ʻOku totonu ke tau vakai ki he talanoa ʻo e Lōmakí ʻi ha ʻuhinga fakaekikite? Ko e talí ko e ʻikai. Ko e hā hono ʻuhingá? Koeʻuhí ʻoku ʻikai ha makatuʻunga Fakatohitapu ke fai pehē. Naʻe fakahoa ʻe Sīsū ʻa e ngaahi ʻaho ʻo Noá ki he taimi ʻo ʻene ʻi hení, ka naʻe ʻikai ke ne fakahuʻunga ko e Lōmakí naʻe ʻi ai hano ʻuhinga fakaekikite, ʻa ia ko e tokotaha taki taha mo e meʻa taki taha naʻe hokó ʻe ʻi ai hono fakahoko lahi ange ʻi he kahaʻú; pea naʻe ʻikai ke ne pehē ko hono tāpuni ʻa e matapā ʻo e ʻaʻaké naʻe ʻi ai hano mahuʻinga fakaekikite. (Māt. 24:​37-39) Naʻe fēfē fakafeangai ʻa Noa ki he pōpoaki fakaefakatokanga ʻa Sihová? Naʻá ne fakamoʻoniʻi naʻá ne maʻu ʻa e tuí ʻaki hono langa ʻa e ʻaʻaké. (Hep. 11:7; 1 Pita 3:20) ʻI he tuʻunga meimei tatau, ko e kakai ʻoku nau fanongo ki he ongoongo lelei fekauʻaki mo e Puleʻanga ʻo e ʻOtuá kuo pau ke nau ngāueʻaki ʻa e meʻa ʻoku nau fanongo ki aí. (Ngā. 3:​17-20) Naʻe ui ʻe Pita ʻa Noa “ko ha tokotaha malangaʻi ʻo e māʻoniʻoní.” ʻI he ʻahó ni, ʻoku tau kau ʻi ha ngāue fakamalanga fakamāmanilahi, pea ʻoku tau feinga mālohi ke kau faivelenga ki ai. Ka neongo pe ko e hā hono lahi ʻetau feingá, heʻikai malava ke tau aʻu mo e ongoongo leleí ki he tokotaha kotoa ʻi he māmaní ki muʻa ke hoko mai ʻa e ngataʻangá. w24.05 9-10 ¶3-5

ʻOku totonu ke tau kumi ki ha ngaahi founga ke fakahāhā ʻa e anga-lelei mo e fakaʻapaʻapa ki he ngaahi kaumeʻa ʻo Sihová. (Loma 12:10) Anga-fēfē? Ko e founga ʻe taha, ʻoku lave ki ai ʻa e Saame 15:​4, ko ha tokotaha fakaafe ʻi he tēniti ʻo Sihová ʻoku “ʻikai te ne fakafoki ʻa ʻene palōmesí, neongo kapau ʻe kovi kiate ia.” Ko hono maumauʻi ʻetau palōmesí ʻe lava ke fakalotomamahi moʻoni ki he niʻihi kehé. (Māt. 5:37) Ko e fakatātaá, ʻoku ʻamanekina ʻe Sihova ʻene kau fakaafé ke nau moʻui ʻo fakatatau ki heʻenau fuakava malí. ʻOkú ne toe leleiʻia ʻi he feinga mālohi ʻa e ngaahi mātuʻá ke fakahoko ʻa e palōmesi ʻoku nau fai ki heʻenau fānaú. Ko ʻetau ʻofa ki he ʻOtuá mo e kaungāʻapí te ne ueʻi kitautolu ke tau fai ki heʻetau leá ʻi he lelei taha ʻetau malavá. Ko ha toe founga ke fakaʻapaʻapaʻi ai ʻa e ngaahi kaumeʻa ʻo e ʻOtuá ko e hoko ʻo anga-talitali kakai mo nima-homo. (Loma 12:13) Ko e taimi ʻatā ʻoku tau fakamoleki mo hotau fanga tokouá mo e fanga tuofāfiné ʻokú ne tokoniʻi kitautolu ke fakaivimālohiʻi ʻa e ngaahi haʻi ʻo e kaumeʻá mo kinautolu pea mo Sihova. ʻIkai ko ia pē, ʻi hono fakahāhā ʻa e anga-talitali kakaí, ʻoku tau faʻifaʻitaki ai kia Sihova. w24.06 12 ¶15-16

ʻOku fakahaaʻi ʻe Sihova ʻa e moʻoní ki he faʻahinga ʻoku anga-fakatōkilaló. (Māt. 11:25) Naʻa tau tali anga-fakatōkilalo ʻa e tokoni ke ako ʻa e moʻoní. (Ngā. 8:​30, 31) Neongo ia, kuo pau ke tau tokanga ke ʻoua te tau hoko ʻo pōlepole. Ko e hoko ʻo pōlepolé ʻe lava ke ne ʻai ke tau fakakaukau ko ʻetau ngaahi fakakaukau fakafoʻituituí ʻoku tonu tatau pē ia mo e ngaahi tefitoʻi moʻoni Fakatohitapú pea mo e ngaahi tataki mei he kautaha ʻa Sihová. Ke tauhi maʻu ʻetau anga-fakatōkilaló, ʻoku fiemaʻu ke tau manatuʻi ʻoku tau valevale fau ʻi hono fakahoa ki he lahi ʻo Sihová. (Saame 8:​3, 4) ʻE lava ke tau toe lotu ke fakatupulekina ha laumālie anga-fakatōkilalo mo akoʻingofua. ʻE tokoniʻi kitautolu ʻe Sihova ke tau ʻai ʻene ngaahi fakakaukaú, ʻa ia ʻokú ne tokonaki mai fakafou ʻi heʻene Folofolá mo ʻene kautahá, ke muʻomuʻa ia ʻi haʻatautolú. ʻI hoʻo lau ʻa e Tohi Tapú, kumi ki ha ngaahi poini fekauʻaki mo e ʻofa ʻa Sihova ʻi he anga-fakatōkilaló pea mo ʻene fehiʻa ʻi he pōlepolé, hīkisiá mo e ʻafungí. Pea mātuʻaki tokanga ke nofoʻaki anga-fakatōkilalo kapau ʻokú ke maʻu ha monū ʻo e ngāué ʻokú ne ʻai koe ke ke makehe. w24.07 10 ¶8-9