2 Johane

1 Eni mwama nyi dandridego,* nyi ngu loveya nyamayi a hathidwego ni ga sanana saye, avo nyi va haladzago khu lisine, na siri eni basi, ganiolu vatshavbo vale va tigo lisine, 2 khu kotani nya lisine li gomogo gwathu, li na simamago ni ethu kala gupindruga. 3 Wuwadi nya wukhongolo ni wuhindzi ni gurula gu tago khiyo ga Nungungulu, Papayi, wu tago gambe khiyo ga Jesu Kristo, Gyanana gya Papayi ni lisine ni lihaladzo si na ba siri ni ethu.

4 Nyi tsakide ngudzu khu guti gu kheni simbe sanana sago si ngu gimbiya lisineni; si ngu landra nayo hi hakhidego khiyo ga Papayi. 5 Olu, nyamayi u hathidwego, nyi ngu lomba gu kheni hi haladzanani khu gyathu. (Nayo wowu nyi gu loveyago khandri wuphya, ganiolu hi nawo gukhugeya gale.) 6 Lihaladzo kheli: Khu gu hi simama gu landrisa milayo yaye. Nayo mu wu pwidego gukhugeya gale khowu: Simamani gu gimbiya lihaladzoni. 7 Nyo gu loveya silo sesi kholu gu na ni vakanganyisi nya vangi va phalalegidego tigoni gwatshavbo, ava va si dzumeyigo gu khavo Jesu Kristo dzude khu nyama. Avo vakanganyisi nigu valala va Kristo.

8 Dzi woneyeni gasi mu si luzi thumo hi wu giridego, wulangani nya isoso, hakhani tshatshazelo nya gu eneye. 9 Oyu a ndragago vbingano nya sihevbudzo sa Kristo, a si simami gwaso, kha tsakedwi khu Nungungulu. Oyu a simamago sihevbuloni sa Kristo a ngu tsakedwa khu Papayi ni Gyanana. 10 Muthu a guta iyo gwanu, ganiolu na si resi sihevbudzo sa Kristo, mu nga mu hakhi dzindrangani gwanu, ne mu nga mu losi, 11 kholu oyu a mu losago a gu hengeya naye mithumoni gwaye nya guvivbe.

12 Nyi na ni silo nya singi nyi vbwetago gu mi embeya, ganiolu kha nyi dzini guya khu gu si lova avba nya lidangaliya. Ganiolu, nya mba hweya nyi na ta mi wuseya; nyi na ta ganeya nanu khovbe ni khovbe, gasi mu tsaka ngudzu.

13 Sanana sa ndriyago, oyu a hathidwego, si ngu gu losedzeya.