Levitikko

8 Jehova wakayinkilila kunembo kwaambuula aaMozesi kati: 2 “Bweza Aroni abana bakwe mbalaabo, zigogo, mafuta aakunanika, pule wang’ombe wachipayizyo chachibi, bagutu babili abbasikiti lyazinkwa zitakwe bumena 3 alubo ubuzye mbungano yoonse kuti ibunganaamwi kumanjililo aatente lyakuswaanganina.”

4 Mpawo Mozesi wakachita mbuli mbaakalayililwa aaJehova alubo mbungano yakabunganaamwi kumanjililo aatente lyakuswaanganina. 5 Mozesi wakati kumbungano: “Nzezi Jehova nzyaatulayilila kuti tuchite.” 6 Nkinkaako, Mozesi wakeeta Aroni abana bakwe aafwiifwi mpawo wakabasanzya amaanzi. 7 Kuzwa waawo, wakamuzwaatika chigogo chilamfu, wamusunga mulembo muchibuno. Wakamuzwaatika jansi litakwe maboko akabaki kabupayizi mpawo wakamusunga bbanti lyakusunga kabaki kabupayizi, kuti kajate. 8 Alubo wakamuzwaatika kagogo kakukaango akubikka Urimu aTumimu aakagogo kakukaango. 9 Mpawo wakamuzwaatika ngwaani yabupayizi alubo aankumu wakamubikka kazeng’e kangolida kang’ayima, chitondeezyo chisalala chakulipeda,* mbuli Jehova mbaakalayilila Mozesi.

10 Mpawo Mozesi wakabweza mafuta aakunanika, wananika tente lyakukombela azintu zyoonse zyakali mulindilyo mpawo wakazisalazya. 11 Kuzwa waawo, amwi mafuta wakaasansiila aachipayililo kwaziindi zili musanu azibili alubo wakananika chipayililo, zibelesyo zyacho zyoonse, bbavu achikkazikilo chalyo, kuchitila kuti azisalazye. 12 Kumamanino, amwi mafuta wakaatila aamutwe wa-Aroni akumunanika kuchitila kuti amusalazye.

13 Kuzwa waawo, Mozesi wakaswenzya bana ba-Aroni aafwiifwi, wabazwaatika zigogo zilamfu, wabaanga mabbanti aamulembo mpawo wakabazwaatika ngwaani zyabupayizi kweendelana aaJehova mbaakalayilila Mozesi.

14 Mpawo wakeeta pule wang’ombe wachipayizyo chachibi alubo Aroni abana bakwe bakabikka maboko aabo aamutwe wapule wachipayizyo chachibi. 15 Mozesi wakajaya pule ooyo mpawo wakatompa kanwe kakwe muganzi lyakwe, walilamba aameja aachipayililo mumabazu aacho woonse alubo wakasalazya chipayililo kuzwa kuchibi, pesi ganzi lyoonse lyakasyaala wakalitila aansi aachipayililo kuti achisalazye kuchitila kuti akonzye kupa zipayizyo zyakumaninsya milandu aalinchicho. 16 Mpawo wakabweza luvumbula* loonse, amafuta aali aachini ansa zibili amafuta aazyo alubo Mozesi wakazitenta kuti zisuke busi aachipayililo. 17 Mpawo pule woonse, chikumba chakwe, nyama yakwe alufusi wakati zitentelwe aanze aakkeempu, mbuli Jehova mbaakalayilila Mozesi.

18 Kuzwa waawo, wakeeta mugutu wachipo chitentwa aafwiifwi alubo Aroni abana bakwe bakabikka maboko aabo aamutwe wamugutu ooyo. 19 Mozesi wakawujaya, wasansiila ganzi lyamugutu kumabazu woonse aachipayililo. 20 Wakanenga mugutu ooyo muzipanzi zyawo alubo Mozesi wakapa kuti mutwe, zipanzi zyawo amafuta aali aansa zitentwe, zisuke busi. 21 Wakasanzya mala amyeendo alubo Mozesi wakapa kuti mugutu woonse utentwe usuke busi aachipayililo. Chakali chipo chitentwa chili aabweema bununkilila,* chipo chitentwa aamulilo kuli Jehova, mbuli Jehova mbaakalayilila Mozesi.

22 Mpawo wakeeta mugutu wachibili, mugutu wakubikkwa kwabapayizi alubo Aroni abana bakwe bakabikka maboko aabo aamutwe wamugutu ooyo. 23 Mpawo Mozesi wakawujaya alubo wakabweza limwi ganzi lyawo, walilamba aakutwi kwa-Aroni kwachilisyo akuchaala chakuboko kwakwe kwachilisyo, akuchaala chakukuulu kwakwe kwachilisyo. 24 Kuzwa waawo, Mozesi wakeeta bana ba-Aroni kunembo mpawo wakabalamba ganzi kumatwi aabo aakuchilisyo akuzyaala zyabo zyakumaboko aakuchilisyo akuzyaala zyabo zyakumawulu aakuchilisyo. Pesi limwi ganzi lyoonse lyakasyaala, Mozesi wakalisansiila mumabazu woonse aachipayililo.

25 Mpawo wakabweza mafuta, mafuta aakumuchila, luvumbula amafuta aali aachini, ansa zibili amafuta aazyo amweendo wachilisyo. 26 Wakabweza chinkwa chimwi chalawundi chili aampako aakati chitakwe bumena, achinkwa chimwi chalawundi chili aampako aakati chinanikidwe mafuta, achinkwa chimwi chipapalete mubbasikiti lyakali aazinkwa zitakwe bumena, lyakali kunembo lyaJehova. Mpawo wakazibikka aajulu aamafuta amweendo wachilisyo. 27 Wakabikka zipayizyo zyoonse mumaboko aa-Aroni amumaboko aabana bakwe mpawo bakasaanguna kuziyumba ooku akooku, kazili chipo chakuyumba kunembo lyaJehova. 28 Mpawo Mozesi wakazibweza mumaboko aabo akuzitenta kuti zisuke busi aachipayililo aajulu aachipo chitentwa. Zyakali zipayizyo zyakubikkwa kwabapayizi, zili aabweema bununkilila.* Chakali chipo chitentwa aamulilo kuli Jehova.

29 Mpawo Mozesi wakabweza kaango wakayumba ooku akooku kuti chibe chipo chakuyumba kunembo lyaJehova. Kaango aaka kakazwa kuchipayizyo chamugutu chakubikkwa kwabapayizi, kakaba chaabilo chaMozesi, mbuli Jehova mbaakalayilila Mozesi.

30 Alubo Mozesi wakabweza amwi mafuta aakunanika aganzi limwi lyakali aachipayililo mpawo wakalilamba Aroni azigogo zyakwe akulilamba aabana bakwe aazigogo zyabana bakwe bakalaamwi anguwe. Nkinkaako, wakasalazya Aroni azigogo zyakwe abana bakwe azigogo zyabo.

31 Mpawo Mozesi wakati kuli Aroni akubana bakwe: “Amujike nyama kumanjililo aatente lyakuswaanganina alubo mwiilide nkukooko kamuli kwiilisya aachinkwa chili mubbasikiti libelesegwa nikubikkwa bapayizi, mbuli mbundakalayililwa kuti, ‘Aroni abana bakwe bazoochilya.’ 32 Nyama iisyaala achinkwa chisyaala, zyeelede kutentwa mumulilo. 33 Tamweelede kuzwa pe kumanjililo aatente lyakuswaanganina kwamazuba aali musanu aabili, kusikila mazuba aakubikkwa kuti mube bapayizi akkwane, nkaambo kuzootola mazuba aali musanu aabili kuti kubikkwa kwanu kuba bapayizi kumane.* 34 Jehova wakalayilila kuti tuchite zintu nzitwachita sunu, kuchitila kuti milandu yanu imaninsigwe. 35 Mweelede kukkala kumanjililo aatente lyakuswaanganina sikati amansiku kwamazuba aali musanu aabili, muchite zyoonse nzimwalayililwa aaJehova kuti muchite, kuchitila kuti mutafwi, nkaambo mbuboobu mbundakalayililwa.”

36 Mpawo Aroni abana bakwe bakachita zintu zyoonse Jehova nzyaakalayilila kabelesya Mozesi.