Kulonga

26 “Weelede kupanga tente lyakukombela kubelesya milembo yatente iili kkumi iipangidwe aabusumyo bubotu boosedwe, busumyo bwabbuluu, wulu yapepulu abusumyo busalala. Alubo weelede kusuminina zifanikisyo zyamakkerubbi aalinjiyo. 2 Mulembo watente umwi awumwi weelede kulampa makkiyubbiti aali 28* alubo busasa bwawo bube makkiyubbiti aali 4. Milembo yoonse yatente yeelede kweelana. 3 Milembo iili musanu yeelede kuswaanizigwa kuti ipange mulembo uumwi alubo imwi iili musanu anjiyo yeelede kuswaanizigwa kuti ipange mulembo uumwi. 4 Weelede kupanga tukole abusumyo bwabbuluu kumupeto wamulembo watente uuli kumamanino aamilembo iiswaanizidwe. Weelede kuchita zikozyenie akumupeto wamilembo iiswaanizidwe, aawo mpiitazooswaanizigwe. 5 Weelede kupanga tukole tuli 50 aamulembo watente wakusaanguna atumwi tuli 50 aamulembo uumbi watente, tukole ooto tweelede kulangana aawo mpiitazooswaanizigwe. 6 Weelede kupanga tupini twangolida tuli 50 uswaanizye milembo eeyo kubelesya tupini ooto. Mpawo tente lyakukombela lilaba chintu chimwi.

7 “Weelede kupanga milembo yakuvumbya tente lyakukombela kubelesya boya bwampongo. Milembo eeyo yeelede kuba 11. 8 Mulembo watente umwi awumwi weelede kulampa makkiyubbiti aali 30 alubo busasa bwawo bube makkiyubbiti aali 4. Milembo yoonse yatente kayili 11 yeelede kweelana. 9 Weelede kuswaanizya milembo iili musanu alubo uchite zikozyenie akuli imwi iili musanu awumwi, mpawo mulembo wamusanu awumwi uuvunge kunembo lyatente. 10 Weelede kupanga tukole tuli 50 kumupeto wamulembo uuli kumamanino aamilembo iiswaanizidwe atumwi tuli 50 kumupeto wawumwi mulembo watente aawo mpiitazooswaanizigwe. 11 Weelede kupanga tupini tuli 50 twakkopa mpawo utunjizye mutukole ooto, kuchitila kuti mulembo ooyu ube chintu chimwi chijisini. 12 Zipanzi zyamulembo zitayindilile mweelede kuzisiya kuti zilengelele. Hafu yamulembo uutayindilile mweelede kuusiya kuti ulengelele kusule aatente lyakukombela. 13 Milembo iitanoolengelede yeelede kwiindilila aakkiyubbiti iimwi kubbazu limwi alimwi, kuchitila kuti ivumbe tente lyakukombela.

14 “Weelede kupanga chakuvumbya tente kubelesya zikumba zyamugutu zinikidwe mumusila uusalala mpawo aajulu lyacho ubikke chakuvumbya chazikumba ziteteete.*

15 “Weelede kupanga mafulemu aatente lyakukombela aamukoka aatazooyimikizigwe. 16 Fulemu limwi alimwi lyeelede kulampa makkiyubbiti aali kkumi alubo busasa bwalyo bube kkiyubbiti iimwi ahafu. 17 Fulemu limwi alimwi lyeelede kuba aatuulu tubili, kamwi kakali kumbali aakamwi. Oobu mbweelede kwaapanga mafulemu woonse aatente lyakukombela. 18 Weelede kupanga mafulemu aali 20 aatapange bbazu lyakumusanza lyatente lyakukombela.

19 “Weelede kupanga zikkazikizyo zyansiliva zili 40 nzweelede kubikka aansi aamafulemu aali 20. Tuulu tubili twafulemu limwi tweelede kunjila muzikkazikizyo zibili, nkukwaamba kuti tuulu tubili twafulemu limwi alimwi tweelede kunjila muzikkazikizyo zibili. 20 Limwi bbazu lyatente lyakukombela, nkukwaamba bbazu lyakunyika, ulipangile mafulemu aali 20 21 azikkazikizyo zyawo zyansiliva zili 40, zikkazikizyo zibili zibe aansi aafulemu limwi, nkukwaamba kuti zikkazikizyo zibili zibe aansi aafulemu limwi alimwi. 22 Bbazu lyakusule lyatente lyakukombela, lili kububbila, ulipangile mafulemu aali musanu alimwi. 23 Upange mafulemu aabili atabeleke mbuli mapila mumakkona aabili aakusule lyatente lyakukombela. 24 Ayelede kubikkwa kaali aabili kuzwa aansi kusika kujulu, kuring’i yakusaanguna. Eezi nzizyo nzweelede kuchita kuli ngawo kaali aabili alubo alapanga mapila aabili aamumakkona. 25 Mafulemu aaya ayelede kuba musanu aatatu azikkazikizyo zyawo zyansiliva zili 16. Fulemu limwi alimwi lyeelede kukkala aazikkazikizyo zibili, nkukwaamba kuti fulemu limwi alimwi linookkede aazikkazikizyo zibili.

26 “Weelede kupanga mbalo zyamukoka, zili musanu zyeelede kujata mafulemu aali kubbazu limwi lyatente lyakukombela, 27 zimwi zili musanu zilajata mafulemu aali kuli limwi bbazu lyatente lyakukombela, mpawo zimwi zili musanu zilajata mafulemu aali kububbila kwatente lyakukombela, nkukwaamba kusule kwalyo. 28 Mbalo yiinda aakati kamafulemu, yeelede kuzwa kukkona limwi kusika kukkona limbi.

29 “Weelede kuzilulula mafulemu aayo angolida alubo waapangile turing’i twangolida muzitanjile mbalo. Mbalo eezyo weelede kuzizilulula aangolida. 30 Weelede kwiimikizya tente lyakukombela kweendelana apulani njwaakatondeezegwa kuchilundu.

31 “Weelede kupanga kketeni kubelesya busumyo bwabbuluu, wulu yapepulu, busumyo busalala abusumyo bubotu boosedwe, usuminine zifanikisyo zyamakkerubbi aalindilyo. 32 Weelede kulengelezya kketeni aamapila aane aamukoka aakazilululwa aangolida. Ngobyo zyawo zyeelede kuba zyangolida. Mapila ayelede kwiimikila aazikkazikizyo zine zyansiliva. 33 Weelede kulengelezya kketeni aatupini mpawo unjizye bbokesi lyaBukamboni kusule aakketeni. Kketeni lilagaanuna Ndawu Iisalala aNdawu Iisalalisya. 34 Weelede kubikka chivunisyo aabbokesi lyaBukamboni lili muNdawu Iisalalisya.

35 “Weelede kubikka tebbulu kunembo lyakketeni mpawo lilangane aachibikkilo chamalambe chitanooli kumusanza kwatente lyakukombela alubo tebbulu lyeelede kuba kubbazu lyakunyika. 36 Upange mulembo wakumanjililo* aatente kubelesya busumyo bwabbuluu, wulu yapepulu, busumyo busalala abusumyo bubotu boosedwe. 37 Mulembo ooyo uupangile mapila aamukoka aali musanu aazilulwidwe aangolida. Ngobyo zyawo zyeelede kuba zyangolida alubo weelede kwaapangila zikkazikizyo zyakkopa zili musanu.