Levitikko

16 Jehova wakaambuula aaMozesi kuzwa nibakafwa bana ba-Aroni babili akaambo kakuswena aafwiifwi aJehova. 2 Jehova wakati kuli Mozesi: “Buzya Aroni mukulanaako kuti atanoonjili kufumbwa chiindi mundawu iisalala mukati kakketeni kunembo lyachivunisyo chili aajulu aaBbokesi kuchitila kuti atafwi nkaambo ndizoolibonia aajulu aachivunisyo mujoba.

3 “Nzezi zintu Aroni nzyayelede kuzaazyo nanjila mundawu iisalala: pule wang’ombe uuchili muniini wachipayizyo chachibi amugutu wachipo chitentwa. 4 Weelede kuzwaata chigogo chilamfu chisalala chamulembo mubotu azibbudula* zyamulembo mubotu kuti zivumbe mubili wakwe. Weelede kulyaanga mulembo mubotu muchibuno angwaani yamulembo mubotu kumutwe. Nzigogo zisalala. Weelede kusamba mpawo azizwaate.

5 “Weelede kubweza, kuzwa kumbungano yama-Israyeli tupule twampongo tubili twachipayizyo chachibi amugutu uumwi wachipo chitentwa.

6 “Mpawo Aroni weelede kweeta pule wang’ombe uuchili muniini wachipayizyo chachibi chakwe alubo weelede kumaninsya milandu yakwe ayabamung’anda yakwe.

7 “Mpawo uleeta mpongo zibili azyiimikizye kunembo lyaJehova kumanjililo aatente lyakuswaanganina. 8 Aroni weelede kuuma chisale* aakati kampongo zibili, chimwi chisale chibe chaJehova mpawo chimwi chisale chibe cha-Azazeli.* 9 Aroni uleeta mpongo yasalwa kwiinda mukuuma chisale kuti ibe yaJehova alubo ulayipa kayili chipayizyo chachibi. 10 Pesi mpongo yasalwa kwiinda mukuuma chisale kuti ibe ya-Azazeli, yeelede kweetwa kayili ng’umbulu* yiimikizigwe kunembo lyaJehova kuchitila kuti milandu yabantu ilekelelwe mpawo itandilwe munkanda kuti ibe ya-Azazeli.

11 “Aroni uleeta pule wang’ombe uuchili muniini wachipayizyo chachibi chakwe alubo ulamaninsya milandu yakwe ayabamung’anda yakwe, kuzwa waawo ulajaya pule wang’ombe uuchili muniini wachipayizyo chachibi chakwe.

12 “Weelede kubweza chakubikkila makala chizwide makala aayaka aazwa aachipayililo kunembo lyaJehova atununkilizyo tukuyidwe tukkwana mumaboko aabili alubo weelede kuzyeeta mukati aakketeni. 13 Alubo weelede kubikka tununkilizyo aamakala kunembo lyaJehova mpawo joba lyabusi bwatununkilizyo lilavumba chivunisyo chaBbokesi chili aajulu aabbokesi lyaBukamboni kuchitila kuti atafwi.

14 “Weelede kubweza ganzi lyapule wang’ombe uuchili muniini alisansiile akanwe kakwe kunembo lyachivunisyo kubbazu lyakubuzwezuba alubo weelede kusansiila limwi ganzi akanwe kwaziindi zili musanu azibili kunembo lyachivunisyo.

15 “Mpawo weelede kujaya mpongo yachipayizyo chazibi zyabantu ayete ganzi lyayo mukati kakketeni. Ganzi lyayo alichite mbuli mbaachita ganzi lyapule wang’ombe uuchili muniini, weelede kulisansiila kunembo lyachivunisyo.

16 “Weelede kumaninsya milandu yandawu iisalala akaambo kamichito yama-Israyeli iisofweede alubo akaambo kamilandu yabo azibi zyabo alubo nzizyo nzyayelede kuchita akutente lyakuswaanganina likkede aakati kabaabo bachita michito iisofweede.

17 “Taakwe umwi muntu weelede kuba mutente lyakuswaanganina kuzwa chiindi mupayizi nanjila kuti amaninsye milandu mundawu iisalala kusikila azwe. Ulamaninsya milandu yakwe ayabamung’anda yakwe ayambungano yoonse yama-Israyeli.

18 “Kuzwa waawo, ulazwa aanze aye kuchipayililo kunembo lyaJehova, amaninsye milandu yacho alubo ulabweza limwi ganzi lyapule wang’ombe uuchili muniini alimwi ganzi lyampongo alilambe aameja aachipayililo kumabazu woonse. 19 Alubo ulasansiila limwi ganzi aalinchicho akanwe kakwe kwaziindi zili musanu azibili kuti achisalazye kumichito iisofweede yama-Israyeli.

20 “Naazwa aakumaninsya milandu yandawu iisalala, yatente lyakuswaanganina ayachipayililo, weelede kweeta mpongo ng’umbulu. 21 Aroni weelede kubikka maboko aakwe woonse aabili aamutwe wampongo ng’umbulu mpawo aambe kubisya kwama-Israyeli, milandu yabo azibi zyabo aalinjiyo. Ulazibikka aamutwe wampongo eeyo mpawo ulayitandila munkanda kwiinda mukwiipa muntu uusalidwe* kuchita oobo. 22 Mpongo eeyo ilayinka aamilandu yabo yoonse munkanda mpawo ulayileka kuti yiinke munkanda.

23 “Mpawo Aroni weelede kunjila mutente lyakuswaanganina, agwisye zigogo zyamulembo mubotu nzyaazweete naalikunjila mundawu iisalala, azibikke aansi mumoomo. 24 Weelede kusamba aamaanzi mundawu iisalala, azwaate zigogo zyakwe alubo weelede kuzwa aanze ape chipo chakwe chitentwa achipo chabantu chitentwa alubo weelede kumaninsya milandu yakwe amilandu yabantu. 25 Ulatenta mafuta aachipayizyo chachibi kuti asuke busi aachipayililo.

26 “Muntu uutola mpongo ya-Azazeli munkanda, weelede kuwacha zigogo zyakwe asambe aamaanzi, kuzwa waawo, ulakonzya kunjila mukkeempu.

27 “Pule wang’ombe uuchili muniini wachipayizyo chachibi ampongo yachipayizyo chachibi zili aaganzi lyeetwa mundawu iisalala kuti kumaninsigwe milandu, zilatolwa aanze aakkeempu alubo zikumba zyazyo, nyama yazyo alufusi bwazyo zyeelede kutentwa mumulilo. 28 Muntu wali kuzitenta, weelede kuwacha zigogo zyakwe asambe aamaanzi, kuzwa waawo, ulakonzya kunjila mukkeempu.

29 “Ooyu ulaba mulawu wanu kukabe kutamani: Mubuzuba bwachi 10 mumweezi wamusanu ayibili, mweelede kuusa mumyoyo* yanu alubo taakwe mulimu ngumweelede kubeleka pe, kazitakwe ndaba kuti muntu wakazyalilwa munyika eeyo na, naakuti mweenzu uukkede aakati kanu. 30 Mubuzuba oobo, milandu yanu izoomaninsigwa kuchitila kuti mwaambwe kuti mulasalala. Muzoosalala kuzwa kuzibi zyanu zyoonse kunembo lyaJehova. 31 Ndisabata lyakupumuna kwanu alubo mweelede kuusa mumyoyo yanu. Ooyu mulawu unooliwo kukabe kutamani.

32 “Mupayizi wakananikwa akubikkwa kuti abeleke kali mupayizi aandawu yawisi, weelede kumaninsya milandu alubo weelede kuzwaata zigogo zyamulembo mubotu, nkukwaamba zigogo zisalala. 33 Weelede kumaninsya milandu yandawu iisalala, yatente lyakuswaanganina ayachipayililo alubo weelede kumaninsya milandu yamupayizi ayambungano yabantu boonse. 34 Ooyu ulaba mulawu wanu kukabe kutamani kuti milandu yama-Israyeli imaninsigwe akaambo kazibi zyabo zyoonse kuchitwa kamwi amunyaka.”

Nkinkaako, wakachita kweendelana aJehova mbaakalayilila Mozesi.