Lwakusaanguna kuBakkorinte

7 Lino kandilikusandula mibuzyo njimwakalemba, zilikabotu kuti mwaalumi atagumi mwanakazi,* 2 pesi akaambo kakuvula kwabwaamu,* mwaalumi umwi awumwi abe aamwanakazi wakwe alubo mwanakazi umwi awumwi abe aamulumaakwe. 3 Mulumi ape mwanakazi wakwe nzyayelede kumupa, anguwe mwanakazi achite mbuboobo kumulumaakwe. 4 Mwanakazi takwe manguzu pe aamubili wakwe pesi mulumaakwe nguwe uulaawo. Anguwe mulumi takwe manguzu pe aamubili wakwe pesi mwanakazi wakwe nguwe uulaawo. 5 Mutayimani pe, kunze kwakuti mwazuminana kuchita oobo kwachiindi nchimwasala, kuchitila kuti mube aachiindi chakukomba, mpawo muswaanane lubo kuchitila kuti Saatani atayinkilili kunembo kumusunka akaambo kakukachilwa kulinyona kwanu. 6 Nikuba oobo, ndaamba zintu eezi kandimuzumizya kuti muchite oobo, kutali kuti mulawu biya weelede kutobelezegwa. 7 Pesi ndilombozya kuti kaansinga bantu boonse bali mbuli ndime. Nikuba oobo, umwi awumwi ulaachipo chakwe chizwa kuli Leza, umwi ncheechi, umwi ncheechiya.

8 Lino ndaambila aabo batakwete abatakwetwe, abamukabafu, kuti zilikabotu loko kuti bakkale kabali mbuli ndime. 9 Pesi kuti kabatakonzyi kulinyona, abakwate naakuti abakwatwe, nkaambo zilikabotu kukwata naakuti kukwatwa kwiinda kupya aachiyandisyo chakoonana.

10 Bantu bakwetene ndibapa malayilile aaya aatazwi kulindime, pesi aazwa kuMwaami aakuti: Mwanakazi teelede kusiya mulumaakwe pe. 11 Kuti mwanakazi wasiya mulumaakwe, akkale katakwetwe naakuti abweede kumulumaakwe, amulumi teelede kusiya mwanakazi wakwe pe.

12 Pesi ime kutali Mwaami, bamwi ndibabuzya kuti: Kuti mukwesu kakwete mwanakazi uutasyomi alubo mwanakazi ooyo kazumina kukkalaawe, atamusiyi pe mwanakazi wakwe. 13 Alubo kuti mwanakazi kakwetwe aamulumi uutasyomi pesi mulumaakwe kazumina kukkalaawe, atamusiyi pe mulumaakwe. 14 Nkaambo mulumi uutasyomi ulasalazigwa akaambo kamwanakazi wakwe, anguwe mwanakazi uutasyomi ulasalazigwa akaambo kamulumaakwe uusyoma. Kaansinga teembukubede, nikuli bana banu tabasalali pe, pesi lino balasalala. 15 Pesi kuti ooyo uutasyomi wasala kwiinka,* ayinke, mukwesu naakuti muchizi tasungidwe pe muzyiimo zili boobo, pesi Leza wakamwiita kuluumuno. 16 Numwanakazi, tuzi na kuti ulabona wafutula mulumaako? Anduwe numulumi, tuzi na kuti ulabona wafutula mwanakazi wako?

17 Nikuba oobo, umwi awumwi ayende kweendelana ambaakayitwa aaLeza, mbuli mbaakapegwa chaabilo aJehova.* Nkinkaako, ndipa malayilile aaya kumbungano zyoonse. 18 Kuli muntu wakayitwa kapalwidwe kale na? Akkale kali mbuboobo. Kuli muntu wakayitwa katapalwidwe na? Atapalulwi pe. 19 Kupalulwa taakwe anchikwaamba pe akutapalulwa taakwe anchikwaamba pe, pesi chiyandikana nkubamba milawu yaLeza. 20 Kufumbwa chiimo umwi awumwi nchaakabede naakayitwa, akkale kali mbuboobo. 21 Wakayitwa kuli muzike na? Eezi zitakukataazyi pe, pesi kuti kukonzya kwaangunuka, belesya mweenya ooyo. 22 Nkaambo kufumbwa muntu wakayitwa muMwaami kali muzike, muntu waMwaami wakaangununwa, munzila iikozyenie, kufumbwa muntu wakayitwa kaangunukide, muzike waKkristu. 23 Mwakawulwa aamuulo, amuleke kuba bazike babantu. 24 Bakombima, kufumbwa chiimo umwi awumwi nchaakabede naakayitwa, akkale kali mbuboobo kunembo lyaLeza.

25 Kuli banakalindu* tandikwe malayilile aazwa kuMwaami, pesi ndilaamba maboneno aangu mbukunga ndili muntu wakafwidwa luzyalo aMwaami kuti ndisyomeke. 26 Nkinkaako, ndibonaanga zilikabotu loko kuti muntu akkale kali mbuboobo, akaambo kabuyumu-yumu buliwo lino. 27 Ulaangidwe na kumwanakazi? Leka kuyanda kwaangununwa. Ulaangunukide na kumwanakazi? Leka kuyanduula mwanakazi. 28 Pesi nikuba kuti wakwata, taakwe chibi nchunooli wachita pe. Alubo kuti nakalindu wakwatwa, taakwe chibi nchanooli wachita pe. Nikuba oobo, aabo bachita oobo bazooba aamapenzi mumibili yabo. Pesi ndiyanda kumugwasya.

29 Mukuyungizya bakombima, ndimubuzya kuti, chiindi chasyaala chacheya. Kuzwa lino, aabo bali aabanakazi abachite mbuli kuti tabakwaabo pe, 30 alubo aabo balila abachite mbuli baabo batalili pe, aabo babotelwa abachite mbuli baabo batabotelwi pe, aabo bawula abachite mbuli baabo batakwe nchibalaacho pe, 31 alubo aabo babelesya nyika, abachite mbuli baabo batalikwiibelesya buzwide, nkaambo zintu zilikuchitika munyika eeyi zilikuchincha. 32 Kwaamba choonzyo, ndiyanda kuti mutakataazikani pe. Mwaalumi uutakwete ukataazikana aazintu zyaMwaami kuti abone mbakonzya kubotezya Mwaami. 33 Pesi mwaalumi uukwete ukataazikana aazintu zyanyika kuti abone mbakonzya kubotezya mwanakazi wakwe, 34 alubo ulaanzeene. Mukuyungizya, mwanakazi uutakwetwe kuswaanizya anakalindu, bakataazikana aazintu zyaMwaami, kuchitila kuti basalale kumubili amumizeezo. Pesi mwanakazi uukwetwe ukataazikana aazintu zyanyika, kuchitila kuti abone mbakonzya kubotezya mulumaakwe. 35 Ndilikwaamba makani aaya kuti ndimugwasye, kutali kuti ndimukasye, pesi ndimusungwaazya kuti muchite zintu zyeelede akuti mwiinkilile kunembo kulipeda kuMwaami, kakutakwe chintu chimuchelezya pe.

36 Pesi kuti muntu wabona kuti tachikonzyi pe kukkala katakwete alubo kali wayinda aachiimo chabukubusi, nzezi zyeelede kuchitika: Achite nzyayanda, nga taliikuchita chibi pe. Abakwate. 37 Pesi kufumbwa muntu uukkalinkene mumoyo wakwe alubo uutakwe ndaba pe akukwata, uukonzya kulijata alubo wakasala mumoyo wakwe kukkala katakwete,* ulachita kabotu. 38 Nkinkaako, kufumbwa uukwata* uchita kabotu, pesi ooyo uutakwati ulachita kabotu loko.

39 Mwanakazi ulaangidwe kumulumaakwe, kufumbwa kuti mulumaakwe kachipona. Pesi kuti mulumaakwe woona mulufu, ulakonzya kukwatwa kufumbwa amuntu ngwaayanda, pesi muMwaami kupela. 40 Pesi mumaboneno aangu, ndibonaanga ulabotelwa loko kuti wakkala kali mbuboobo. Alubo ndili aachoonzyo chakuti andime ndili aamuuya waLeza.