Lemeka Mabambe AaLeza Aalukwatano

1, 2. Malayilile aali muli BaHebrayo 13:4, atusungwaazya kuchitaanzi?

KULAKUBOTEZYA na kulemeka Jehova? Nisimpe kulakubotezya! Nisimpe kuti Jehova uleelela kuti umulemeke alubo uyookulemeka kuti wachita oobo. (1 Sam. 2:30; Tus. 3:9; Ciy. 4:11) Alubo uyanda kuti tulemeke bantu, muchikozyano, bantu bali mubweendelezi. (Rom. 12:10; 13:7) Pesi kuli lumwi lubazu ndweelede kutondeezya kulemeka. Mulukwatano.

² Mwaapostolo Pawulu wakalemba kuti: “Kukwatana kabakulemeka boonse, abulo bwakukwatanina kabusalala.” (Heb. 13:4) Pawulu taakali kunoonezegwa kwaamba makani aali atala alukwatano luzutu. Pesi wakali kubuzya maKristu kuti balemeke lukwatano akuti balubone kaluyandikana. Mbulubona na lukwatano alubo ulubona mbuuli chintu chiyandikana na, kapati kuti kukwete naakuti kukwetwe?

 3. Ngaali malayilile aayandikana Jesu ngaakaamba atala alukwatano? (Langa chifanikisyo chili kumatalikilo aachiiyo.)

³ Kuti kulemeka mabambe aalukwatano, utobelezya chikozyano chili kabotu. Jesu wakali kululemeka lukwatano. BaFarisi nibakabuzya Jesu atala akulekana, wakababuzya makani Leza ngakaambide aali atala alukwatano lwakusaanguna naakati: “Nkaambo kaako mwaalumi uleelede kusia wisi abanyina, akukakatila kumukaakwe, elyo abo bobile baba mubili omwe.” Alubo Jesu wakayungizya kuti: ‘Aabo mbaakaswaanizya Leza, kutabi muntu uubaanzaanya.’​—Bala Marko 10:2-12; Matl. 2:24.

 4. Ngaali mabambe Jehova ngaakabikka atala alukwatano?

⁴ Jesu wakazumina kuti lukwatano lwakatalisigwa aaLeza alubo wakatondeezya kuti talweelede kumana pe. Leza taakabuzya Adamu aEva kuti bazoolekane. Lukwatano lwakatalisigwa mumuunda waEdeni lwakali kuswaanizya mwaalumi uumwi amukayintu uumwi, kuchitila kuti aabo “bobile,” bakkale kabali aamwi kukabe kutamani.

 5. Lufu luluchincha biyeni lukwatano?

⁵ Tulizi kuti kubisya kwaAdamu, kwakachincha zintu zyiingi. Chimwi chakachitika ndufu, lukonzya kupa kuti zintu zichinche mulukwatano. Tulakonzya kuzibona eezi mumajwi mwaapostolo Pawulu ngaakalemba naakali kupandulula kuti maKristu tabachili aansi aMulawu waMusa pe. Wakatondeezya kuti lufu lumwaya lukwatano akuti muntu wafwidwa angwakwetenaawe, ulakonzya kukwata naakuti kukwatwa lubo.​—Rom. 7:1-3.

 6. Mulawu waMusa utondeezya biyeni maboneno aaLeza atala alukwatano?

⁶ Mulawu waMusa Leza ngwaakapede chisi chamaIsrayeli, wakali aamalayilile aali atala alukwatano. Wakali kuzumizya kwaalika alubo chiyanza eechi chakali kuchitwa nikuba Leza katanabapa Mulawu ooyu maIsrayeli. Nikuba boobo, kwaalika kwakali amalayilile aakwabilila mwanakazi abana kuti batajatwi chalunya. Muchikozyano, muIsrayeli wakali kukwata muzike mpawo mukuya kwachiindi, wazookwata umwi mwanakazi, wakeelede kusanina mwanakazi wakusaanguna, kumuyandwiida zyakuzwaata akumupa ziyandikana mumakani akoonana. Leza wakali kuyanda kuti mwaalumi akwabilile mukayintu wakwe akumuyandwiida ziyandikana. (Kul. 21:9, 10) Nikuba kuti tatuchili aansi aMulawu waMusa pesi utugwasya kubona maboneno aaJehova atala alukwatano. Kuziba makani aaya takukusungwaazyi kuti ulemeke lukwatano na?

7, 8. (a) Kweendelana amajwi aali muli Deuteronomo 24:1, Mulawu wakali kutyeni atala akulekana? (b) Jehova ukubona biyeni kulekana?

⁷ Mulawu wakali kutyeni atala akulekana? Nikuba kuti Leza wakabikkide malayilile aasumpukide mulukwatano pesi wakali kuzumizya kuti bantu balekane. (Bala Deuteronomo 24:1.) Mwaalumi muIsrayeli wakali kukonzya kuleka mukayintu wakwe kuti “wajana cintu cuusya insoni mulinguwe.” Mulawu teewakali kwaamba pe kuti chintu “cuusya insoni” chakali kuswaanizyaanzi. Kweelede kuti chintu chakali kupa kuti achite oobo, chakali chintu chifwisya bweeme naakuti chipati, kutali kantu katakwe ambukabede. (Dt. 23:14) Zilawusisya kuti baJuda biingi muchiindi chaJesu, bakali kuleka bakayintu babo ‘akaambo kamakani oonse.’ (Mt. 19:3) Tatuyandi naacheya kuba amaboneno aali boobo.

⁸ Musinsimi Malakki wakaamba maboneno aaLeza atala akulekana. Kuchiindi eecho, baalumi biingi teebakali kusyomeka pe ‘kubakayintu babo bakubulombe,’ amwi akaambo kakuti bakali kuyanda kukwata basimbi bakali kukomba baleza bakubeja. Malakki wakalemba mbakubona Leza kulekana naakati: “Kulekana ndikusulide.” (Malk. 2:14-16) Makani aaya aleendelana amaboneno aaLeza atala alukwatano aakumatalikilo aakuti ‘mwaalumi uyookakatila mwanakazi wakwe, babe nyama yomwe.’ (Matl. 2:24) Jesu wakasumpula maboneno aaWisi aali atala alukwatano naakati: “Abo mbaakakakatizya Leza muntu atabapambukanyi.”​—Mt. 19:6.

 9. Majwi aaJesu aali muli Marko 10:11, 12 aambaanzi?

⁹ Bamwi balakonzya kubuzya kuti, ‘Kuli kaambo na kazumizya kuti muKristu alekane angwakwetenaawe akukwata naakuti kukwatwa lubo?’ Jesu wakaamba maboneno aakwe atala akulekana naakati: ‘Muntu umwi awumwi uuleka mukakwe akukwata uumbi, wamuchitila bumambi, alakwe mwanakazi uuzwa kumulumaakwe akukwatwa uumbi, wachita bumambi.’ (Mk. 10:11, 12; Lk. 16:18) Zili aantanganana kuti Jesu wakali kululemeka lukwatano alubo wakali kuyanda kuti bamwi bachite oobo. Mwaalumi wakali kuleka mukayintu wakwe (naakuti mukayintu wakali kuchija) mulumaakwe akukwata naakuti kukwatwa uumbi, wakali kuchita bumambi. Makani aaya ngachoonzyo nkaambo kulekana takwaambi kuti lukwatano lwamana. Mumeso aaLeza, bantu aaba babili ngabachili “nyama yomwe.” Kuyungizya waawo, Jesu wakati mwaalumi wakali kuleka mukayintu wakwe uusyomeka, wakali kukonzya kumupa kuti achite bumambi. Munzilaanzi? Muchiindi chaJesu, mukayintu wakali walekwa, wakali kulangilila kuzookwatwa lubo kuti akonzye kujana ziyandikana. Mukayintu wakali kukwatwa kachibili, wakali kuchita bumambi.

10. Nkaakali kaambo kazumizya muKristu kuti alekane angwakwetenaawe akukwata naakuti kukwatwa lubo?

¹⁰ Jesu wakaamba kaambo kazumizya kuti bantu bali mulukwatano balekane naakati: “Ndimwaambila kuti kufwumbwa uuleka mukaintu wakwe ikutali akaambo kabwaamu, [MuchiGrikki, por·neiʹa], akukwata umbi, wacita bumambe.” (Mt. 19:9, NW) MuNkambawuko Yakuchilundu, wakaambide kaambo kakozyenie aakaka. (Mt. 5:31, 32) Muziindi eezi zibili, Jesu wakaamba makani aali atala ‘abwaamu.’ Bbala eeli liswaanizya michito iisiyene-siyene yakutalilemeka amuntu ngutakwetenaawe iiswaanizya, bumambi, kuwuula, koonana amuntu ngutakwetenaawe, koonana amuntu ngukozyenie zizo akoonana amunyama. Muchikozyano, kuti mwaalumi uukwete wachita bwaamu, mukayintu wakwe uyoolisalila kuti uyanda kuti balekane na, naakuti batalekani. Kuti wasala kuti balekane, mumeso aaLeza ngatabachikwetene pe.

11. Nkamboonzi muKristu nakonzya kusala kutalekana na ngwakwetenaawe nikuba Magwalo kaazumizya kuti achite oobo?

¹¹ Jesu taakaamba kuti, kuti umwi mulukwatano wachita bwaamu, (por·neiʹa) zyaamba kuti beelede kulekana. Muchikozyano, mukayintu ulakonzya kusala kutalekana amulumaakwe nikuba kuti mulumaakwe wachita bwaamu. Kulakonzeka kuti uchimuyanda, ulilibambilide kumulekelela alubo kayanda kuti lukwatano lwabo lusime. Kuti wasala kuti balekane akuti atakwatwi lubo, simpe ndyakuti uyooswaana buyumu-yumu. Muchikozyano, unoozijana kuli zintu ziyandikana mubuumi anzyayanda mumakani aakoonana? Takalendelelwi na? Kulekana kuyoopa kuti bana bamvwe biyeni? Kuyoopa kuti kumuyumine na kuyiisya bana kuti bakkale kabali mukasimpe? (1 Kor. 7:14) Nisimpe kuti wachitilwa bwaamu kuti wasala kuti balekane, uyooswaana buyumu-yumu.

12, 13. (a) Niinzi chakachitika mulukwatano lwaHosiya? (b) Nkamboonzi Hosiya naakamweeta lubo Gomeri alubo lukwatano lwabo lutuyiisyaanzi mazubaano?

¹² Zyakachitikila musinsimi Hosiya zituyiisya zyiingi atala ambalubona lukwatano Leza. Leza wakabuzya Hosiya kuti akwate mukayintu (Gomeri) wakali kuyooba “mwanakazi muvuule akulijanina bana babuvuule.” Gomeri ‘wakazyalila Hosiya mwana mulombe.’ (Hos. 1:2, 3) Mukuya kwachiindi, Gomeri wakazooba abana, musimbi amulombe, amwi wakabajana akaambo kakuchita bwaamu. Nikuba kuti Gomeri wakali kuchita bwaamu kwaziindi zyiingi pesi Hosiya taakamuleka pe. Kumamanino Gomeri wakachija Hosiya mpawo wakazooba muzike. Nikuba boobo, Hosiya wakamweeta lubo. (Hos. 3:1, 2) Jehova wakali kubelesya Hosiya kutondeezya mbaakabalekelela kwaziindi zyiingi maIsrayeli akaambo kakuchita bwaamu mubukombi. Makani aaya atuyiisyaanzi?

¹³ Kuti umwi mulukwatano wachita bwaamu, muKristu wachitilwa bwaamu weelede kusala nzyayoochita. Jesu wakati wachitilwa bwaamu, ulakonzya kusala kulekana amweenzinyina wakatasyomeka mpawo ulakonzya kukwata naakuti kukwatwa lubo. Kulubazu lumwi, wachitilwa bwaamu ulakonzya kusala kulekelela mweenzinyina. Kuti wachita oobo, tanooli wabisya pe. Hosiya wakamweeta lubo Gomeri. Gomeri naakabweeda kuli Hosiya, taakeelede koona aabamwi baalumi pe. Alubo, Hosiya wakakkala kwachiindi ‘katawoni’ aGomeri. (Hos. 3:3, NW, makani aamunsi.) Mukuya kwachiindi, Hosiya wakazootalika lubo koona amukayintu wakwe, zitondeezya mbaakalibambilide Leza kutambula maIsrayeli akuzumanana kuba abweenzinyina buli kabotu ambabo. (Hos. 1:11; 3:3-5) Makani aaya abeleka biyeni mulukwatano mazubaano? Kuti ooyo wachitilwa bwaamu mulukwatano wasala kuti batalekani, kuzumina kuti baswaanane lubo mumakani aakoonana kutondeezya kuti wamulekelela. (1 Kor. 7:3, 5) Kuchita oobo, kutondeezya kuti takuchikwe kaambo kapa kuti balekane. Mpawo, bakwetene beelede kubeleka changuzu kuti lukwatano balubone mbuuli Leza mbalubona.

14. Kweendelana amalayilile aali muli 1 BaKorinto 7:10, 11, niinzi chikonzya kuchitika mulukwatano?

¹⁴ MaKristu boonse beelede kubelekela kuti babe amaboneno aali mbuuli aJehova aJesu atala alukwatano. Nikuba boobo, bamwi kulabakachila kuchita oobo nkaambo tuli bantu bali achibi. (Rom. 7: 18-23) Makani aaya taayelede kutugambya pe nkaambo nikuba bamwi maKristu bamumwaanda wamunyaka wakusaanguna bakali kuswaana buyumu-yumu mulukwatano. Pawulu wakalemba kuti “mwanakazi teelede kulekana amulumaakwe” pesi chimwi chiindi, eezi zyakali kuchitika.​—Bala 1 BaKorinto 7:10, 11.

15, 16. (a) Ngaali makanze ngibeelede kubaawo bali mulukwatano nikuba kabali mubuyumu-yumu alubo nkamboonzi? (b) Makani aaya abeleka biyeni kumuntu uukwetene aamuntu uutakombi?

¹⁵ Pawulu taakazyaamba pe zintu zipa kuti bantu baanzaane. Penzi teelyakali akuti mwaalumi wachita bumambi. Kaansinga mbukubede, nikuli mukayintu wakali akaambo kapa kuti akwatwe lubo. Pawulu wakalemba kuti mukayintu waanzaana amulumaakwe, weelede ‘kukkala katakwetwe naakuti weelede kubweedelena amulumaakwe.’ Nkinkaako, bantu aaba ngabachilaamwi mumeso aaLeza. Pawulu wakaamba kuti bakwetene beelede kubweedelana kuti kaambo kaliikweeta buyumu-yumu mulukwatano kakatali kakuchita bwaamu. Kabali babili, beelede kuyanduula malayilile aamuBbayibbele kubaalu bambungano. Baalu bayoobapa malayilile aamuBbayibbele kutali kuyanduula wakabisya.

¹⁶ Kulakonzya kuba buyumu-yumu kuti uukomba mulukwatano kali nguwe luzutu uuyanda kutobela zyeelelo zyaLeza pesi kakwetene aamuntu uutakombi. Beelede kwaanzaana na kuti kwaba buyumu-yumu? Mbuuli mbutwayiya, Magwalo alazumizya kuti bakwetene balekane kuti umwi wachita bwaamu pesi taatondeezyi twaambo tukonzya kupa kuti bantu baanzaane. Pawulu wakalemba kuti: ‘Kuti kakuli umwi mwanakazi uujisi mulumaakwe uutali muzumini, lino moyo wakwe wanooyanda kukala kulinguwe atamuleki.’ (1 Kor. 7:12, 13) Malayilile aaya alabeleka nikuba mazubaano.

17, 18. Nkamboonzi bamwi maKristu nibasala kukkala mulukwatano nikuba kabali muyumu-yumu?

¹⁷ Nisimpe kuti chimwi chiindi mulumaakwe “uutali muzumini,” kulakonzeka kuti ‘tayandi pe kukkala anguwe.’ Muchikozyano, amwi umuumisya loko mukayintu wakwe, zyakuti ulakonzya kulemana naakuti kufwa. Kulakonzeka kuti tayandi kusanina mpuli naakuti umuchitila zintu zipa kuti atasimi mubukombi. Muzyiimo zili boobo, bamwi maKristu bakabona kuti kwaanzaana kulakonzya kugwasya nikuba kuti ngubakwetenaawe wakombelezya biyeni, nkaambo unooli watondeezya kuti ‘tayandi pe kukkala anguwe.’ Pesi bamwi maKristu bali muzyiimo zili boobo, bakasala kuti bataanzaani, balisimye akuti babelekele kuti lukwatano lwabo lubotezye. Nkamboonzi nibakasala kuchita oobo?

¹⁸ Nikuba kuti bantu aaba banooli baanzaana pesi bachikwetene. Kuti kabatachikkali aamwi, boonse banooswaana buyumu-yumu mbutwayiya. Mwaapostolo Pawulu waamba kamwi kaambo kapa kuti bakkale aamwi. Wakalemba kuti: “Mulumi uutali muzumini ulasalazigwa kumukaakwe, alakwe mukazi uutali muzumini ulasalazigwa kumulumaakwe. Kwatakuli boobo bana banu nibatasalali, anukuti lino balasalala.” (1 Kor. 7:14) MaKristu biingi basyomeka bakasala kukkalaamwi angubakwetenaawe nikuba lukwatano lwabo nilwakali mubuyumu-yumu. Bakabotelwa kuti kuchita oobo kwakabagwasya kuti muntu ngubakwetenaawe abe Kamboni waJehova.​—Bala 1 BaKorinto 7:16; 1 Pet. 3:1, 2.

19. Nkamboonzi mumbungano zyachiKristu nikuli mpuli zyiingi zizwidilila?

¹⁹ Jesu wakaamba makani aali atala akulekana alubo mwaapostolo Pawulu wakazulwidwa aamuuya kulemba makani aali atala akwaanzaana. Boonse bakali kuyanda kuti bakombi baLeza balemeke lukwatano. Munyika yoonse mazubaano, mumbungano zyachiKristu muli mpuli zilikuzwidilila mulukwatano. Ulakonzya kujana bakwetene biingi babotelwa mumbungano mubede. Mumbungano eezi, kuli bakwesu basyomeka bayanda bakayintu alubo kuli bakayintu balemeka balumi babo, maKristu aaba boonse batondeezya kuti balalulemeka lukwatano. Tulabotelwa kuti mamiliyoni aabantu aaba baliikupona kweendelana amajwi aaLeza aakuti: “Mbuboobo mwaalumi mbweelede kusia wisi abanyina kuti akakatile kumukaakwe, nkabela aba bobile babe nyama yomwe.”​—Ef. 5:31, 33.