1 Bakorinto
6 Umwi akati kanu najisi kaambo kumweenzinyina,+ nkaambo nzi ncaunka kunkuta kubantu bataluleme, muciindi cakuunka kubasalali? 2 Naa sena tamuzyi kuti basalali bayakwiibeteka nyika?+ Lino ikuti naa nywebo muyakwiibeteka nyika, sena tamweeleli kubeteka twaambo tuniini kapati? 3 Sena tamuzyi kuti tuyoobeteka bangelo?+ Aboobo sena tatweeleli kubeteka makani aamubuumi oobu? 4 Aboobo ikuti kamujisi makani aamubuumi oobu aayelede kubetekwa,+ sena mbantu basampaulwa mumbungano mbomubikka kuba babetesi? 5 Ndaamba boobu kutegwa ndimuusye nsoni. Sena masimpe kuti kunyina musongo naba omwe akati kanu uukonzya kubeteka makani akati kababunyina? 6 Muciindi caboobo, mukwesu utola munyina kunkuta, kubantu ibatasyomi!
7 Masimpe, eeci ncomutolana kunkuta caamba kuti mwazundwa kale cakumaninina. Nkaambo nzi ncomutalekeli buyo kuti mubisyilwe ndinywe?+ Nkaambo nzi ncomutalekeli buyo kuti nywebo lwanu muuninwe? 8 Pele muciindi caboobo, mulabisya akuunina, alimwi aabo mbomucitila boobo mbanabokwanu.
9 Sena tamuzyi kuti bantu bataluleme tabakanjili mu* Bwami bwa Leza?+ Mutalyeeni pe.* Basibwaamu,*+ basikukomba mituni,+ basimamambe,+ baalumi boonwa abaaluminyina,+ baalumi boona baaluminyina,+ 10 babbi, basyaacivwulemwangu,+ bakolwi,+ basimatusi alimwi azigwebenga, tabakanjili mu* Bwami bwa Leza.+ 11 Lino oobo mbobakabede bamwi akati kanu. Pele nywebo mwakasanzyigwa;+ mwakasalazyigwa;+ mwakaambwa kuti muli balulami+ muzina lya Mwami wesu Jesu Kristo amumuuya wa Leza wesu.
12 Zintu zyoonse zilizumizyidwe kulindime, pele tazili zintu zyoonse zilaampindu.+ Zintu zyoonse zilizumizyidwe kulindime, pele tandikalekeli cintu cili coonse kundeendelezya. 13 Izyakulya zyakapangilwa da, alyalo da lyakapangilwa zyakulya, pele Leza uyoonyonyoona zyoonse zyobilo ida azyakulya.+ Lino mubili tauli wabwaamu* pe, pele ngwa Mwami,+ alimwi Mwami ngomukamwini mubili. 14 Pele Leza wakamubusya Mwami+ alimwi andiswe uyootubusya kuzwa kulufwu+ kwiinda munguzu zyakwe.+
15 Sena tamuzyi kuti mibili yanu nzizo zya Kristo?+ Aboobo sena ndibweze zizo zya Kristo akuziswaanganya kumuvwuule? Peepe! 16 Sena tamuzyi kuti kufwumbwa ooyo uuliswaanganya kumuvwuule uba mubili omwe anguwe? Nkaambo Leza waamba kuti, “aaba bobilo bayooba mubili omwe.”+ 17 Pele kufwumbwa ooyo uuswaangene a Mwami waba omwe anguwe kumuuya.+ 18 Amubutije bwaamu!* Cibi+ cimbi cili coonse muntu ncanga wacita cili kunze aamubili wakwe, pele kufwumbwa ooyo uucita bwaamu ubisizya mubili wakwe mwini.+ 19 Sena tamuzyi kuti mubili wanu nditempele+ lyamuuya uusalala ngomujisi kuzwa kuli Leza?+ Alimwi buumi mbomujisi tabuli bwanu nobeni pe,+ 20 nkaambo mwakaulwa amuulo waatala.+ Aboobo ziyume zitete,+ amumulemeke Leza mumibili yanu.+