1 Samuele

17 Mpoonya ba Filisiti+ bakabunganya impi zyabasikalumamba* babo kunkondo. Bakabungana ku Soko,+ uuli mucisi ca Juda, alimwi bakayaka nkambi akati ka Soko a Azeka,+ ku Efesi-damimu.+ 2 Saulo abaalumi bana Israyeli bakabungana antoomwe akuyaka nkambi mu Kkuti* lya Ela,+ alimwi bakalibambila kulwana ba Filisiti. 3 Ba Filisiti bakali aacilundu kulubazu lumwi, abalo bana Israyeli bakali aacilundu kulubazu lumbi, eelyo akati kabo kwakali kkuti.

4 Mpoonya kunkambi yaba Filisiti kwakazwa mwiiminizi wabasikalumamba uusyomwa; izina lyakwe wakali Goliati,+ waku Gati,+ alimwi wakali kulampa tukokola tuli cisambomwe ajanza livwungulwidwe.* 5 Wakasamide cimpoompo camukuba kumutwe acibaki cankondo icakajisi tubulo tuyalene mbuli makwa aanswi. Lubulo lwamukuba lwacibaki cankondo eeco lwakali kulema+ masyekeli aali 5,000.* 6 Wakasamide zyakukwabilila miindi zyamukuba alimwi kusyule lyakwe wakaligwabikide muumba.+ 7 Mukwikko wasumo lyakwe wakali mbuli cisamu casikuluka,+ eelyo mutwe wasumo lyakwe wakali kulema masyekeli aali 600 ;* alimwi sikumunyamwida ntobo wakali kweendela kumbele lyakwe. 8 Mpoonya wakaima akutalika koompolola kuli basikalumamba bana Israyeli+ akubaambila kuti: “Ino nkaambo nzi ncomwaboolela akulibambila kulwana nkondo? Mebo ndili mu Filisiti, pele sena nywebo tamuli babelesi ba Saulo? Amusale mwaalumi kuti aboole okuno tulwane. 9 Ikuti naa ulakonzya kundilwana akundijaya, nkokuti tulaba babelesi banu. Pele ikuti naa ndimuzunde akumujaya, mulaba babelesi besu alimwi munootubelekela.” 10 Mpoonya mu Filisiti ooyo wakazumanana kwaamba kuti: “Sunu ndilabasampaula* basikalumamba bana Israyeli.+ Amundipe mwaalumi kuti tulwane!”

11 Eelyo Saulo abana Israyeli boonse nobakaamvwa majwi aamu Filisiti ooyu, lyakabaleka alimwi bakayoowa kapati.

12 Lino Davida wakali mwana wa Jese, imuna Efrata+ uuzwa ku Betelehemu+ mu Juda. Jese+ wakajisi bana basankwa bali lusele,+ alimwi mumazuba aa Saulo mwaalumi ooyu wakalicembeede kale. 13 Bana ba Jese basankwa bapati botatwe bakalimutobelede Saulo kunkondo.+ Mazina aabo ngaaya: Mutaanzi wakali Eliabu,+ wabili wakali Abinadabu,+ eelyo watatu wakali Sama.+ 14 Davida ngowakali musyoonto kuli boonse,+ eelyo aaba bapati botatwe bakatobela Saulo.

15 Davida wakali kuunka kuli Saulo akupiluka kuŋanda kutegwa akeembele mbelele+ zyabausyi ku Betelehemu. 16 Lino mu Filisiti ooyo wakali kufwuma kuboola lyoonse kakucili kooko alimwi akumangolezya akwiima abusena bwakwe mazuba aali 40.

17 Kumane Jese wakaambila mwanaakwe Davida kuti: “Kobweza efa* yamaila aaya aayokedwe azinkwa eezyi zili kkumi uzitole cakufwambaana kubanabokwanu kunkambi. 18 Azinkuli zyamabisi* eezyi zili kkumi uzitole kuli silutwe wacuulu cabasikalumamba; alimwi weelede kubona mbobapona banabokwanu akundiletela mulumbe kuzwa kulimbabo.” 19 Aciindi eeco bakali a Saulo abaalumi bambi boonse bana Israyeli mu Kkuti* lya Ela+ kabalwana ba Filisiti.+

20 Aboobo Davida wakafwuma kakucili kooko akusiya mbelele mumaanza aamweembezi; eelyo wakabweza zintu akuunka mbubonya mbobakamulailila bausyi, ba Jese. Naakasika munkambi, wakajana mpi yabasikalumamba noyuunka kunkondo kaiyaaboongolola loongololo lwankondo. 21 Eelyo bana Israyeli aba Filisiti bakatalika kulibambila kulwana nkondo. 22 Mpoonya aawo Davida wakasiya zintu zyakwe kumulindizi wazintu akuzuzila kooko kwakali nkondo. Naakasika ooko wakabaanzya banabokwabo.+

23 Naakacili kwaambaula ambabo, kwakaboola mwiiminizi wabasikalumamba uusyomwa uutegwa Goliati+ imu Filisiti waku Gati. Wakazwa akati kabasikalumamba ba Filisiti, alimwi wakaamba majwi ngoonya ngaakali kwaamba lyoonse,+ eelyo Davida wakamvwa. 24 Lino baalumi boonse bana Israyeli nobakamubona mwaalumi ooyu bakatija akaambo kakuyoowa.+ 25 Kumane baalumi bana Israyeli bakati: “Sena mwamubona mwaalumi ooyu uuboola? Uboolela kusampaula* Israyeli.+ Lino kufwumbwa mwaalumi uutiimujaye, mwami uyoomupa lubono lunji kapati akumupa mwanaakwe musimbi,+ alimwi uyakwaangulula ŋanda yabausyi kukupa mitelo amilimo iimbi mu Israyeli.”

26 Mpoonya Davida wakatalika kubuzya baalumi ibakaimvwi afwaafwi anguwe kuti: “Ino ncinzi ncayoocitilwa muntu uutiijaye mu Filisiti uulya akugwisya masampu kubana Israyeli? Nkaambo ino nguni mu Filisiti ooyu uutapalwidwe uusampaula* basikalumamba ba Leza muumi?”+ 27 Eelyo bantu bakamwaambila mbubonya mbobakamwaambilide kale kuti: “Oobu aboobu mbwayoocitilwa muntu uutiimujaye.” 28 Lino Eliabu+ mwanookwabo mupati naakamumvwa kabandika abaalumi aabo, wakamukalalila kapati Davida akwaamba kuti: “Ino ncinzi ncooboolela okuno? Alimwi nguni ngoosiila mbelele eziya zisyoonto munkanda?+ Ndilizyi kabotu-kabotu kulisumpula kwako amakanze mabi aali mumoyo wako; nkaambo waboolela buyo kweebelela nkondo.” 29 Aboobo Davida wakati: “Ino ncinzi ncindacita? Mebo ndali kubuzya buyo.” 30 Aboobo wakacenguluka akuunka kuluumbi akwaamba majwi ngoonya,+ eelyo bantu bakamuvwiila mbubonya mbuli musyule.+

31 Majwi ngaakaamba Davida akamvwigwa, eelyo bakamwaambila Saulo majwi aaya. Mpoonya wakatuma sikumwiita. 32 Eelyo Davida wakati kuli Saulo: “Kutabi muntu uuli woonse uulenguka moyo* akaambo kanguwe. Mebo ndemubelesi wako ndilaunka ndimulwane mu Filisiti+ ooyu.” 33 Pele Saulo wakati kuli Davida: “Tokonzyi kuunka kuyoolwana mu Filisiti ooyu nkaambo yebo ucili mwana,+ alimwi walo wali sikalumamba* kuzwa kubwana bwakwe.” 34 Mpoonya Davida wakaambila Saulo kuti: “Mebo ndemubelesi wako ndili mweembezi wabutanga bwabataata. Lino buzuba bumwi kwakaboola syuumbwa+ alimwi acibbeya, mpoonya acimwi cakabweza mbelele kuzwa mubutanga. 35 Ndakacitobela akucuuma, eelyo ndakavwuna mbelele kumulomo waco. Nicakandibukila ndakacijata munsingo,* mpoonya ndakacuuma akucijaya. 36 Mubelesi wako wakazijaya zyoonse zyobilo, syuumbwa acibbeya, awalo mu Filisiti ooyu uutapalwidwe ulaba mbuli cimwi canzizyo, nkaambo wasampaula* basikalumamba ba Leza muumi.”+ 37 Mpoonya Davida wakayungizya kuti: “Jehova, iwakandivwuna kumala aasyuumbwa aacibbeya ngonguwe uutiindivwune kujanza lyamu Filisiti ooyu.”+ Eelyo Saulo wakati kuli Davida: “Mbubo koya, Jehova abe anduwe.”

38 Lino Saulo wakasamika Davida zisani zyakwe. Wakamusamika cimpoompo camukuba kumutwe, amane wakamusamika acibaki cankondo. 39 Mpoonya Davida wakasekka panga lyakwe atala aazisani zyakwe akusola kuti aunke pele wakakakilwa, nkaambo tanaakazizibide pe. Kumane Davida wakaambila Saulo kuti: “Tandikonzyi kuunka azisani eezyi nkaambo tandizizibide pe.” Aboobo Davida wakazisamununa. 40 Mpoonya wakabweza nkoli mujanza lyakwe akusala mabwe aabulungene osanwe mukalonga akwaabikka mukabbeeke kakwe kabweembezi mwaakali kunyamwida zintu, eelyo mujanza lyakwe wakajisi nkwisyo.+ Kumane wakatalika kuyaabuswena kumu Filisiti.

41 Mu Filisiti ooyo wakali kuyaabuswena afwaafwi a Davida, eelyo sikumunyamwida ntobo wakali kumbele lyakwe. 42 Lino mu Filisiti naakalanga akubona Davida, wakamusampaula akumunyansya nkaambo wakacili buyo mulombe mubotu weebeka.+ 43 Aboobo mu Filisiti wakati kuli Davida: “Sena ndili mubwa+ noboola kulindime amisako?” Kumane mu Filisiti wakasinganya Davida muzina lyabaleza bakwe. 44 Mu Filisiti ooyu wakaambila Davida kuti: “Boola buyo kulindime, alimwi mubili wako ndilaupa bayuni bauluka mujulu abanyama bamusyokwe.”

45 Aboobo Davida wakaingula mu Filisiti kuti: “Yebo waboola kulindime apanga, sumo amuumba,+ pele mebo ndiboola kulinduwe muzina lya Jehova wamakamu,+ Leza wabasikalumamba bana Israyeli, ooyo ngoosampaula.*+ 46 Sunu Jehova ulakwaaba mumaanza aangu,+ eelyo ndilakujaya akukosola mutwe wako; alimwi sunu mitunta yabasikalumamba ba Filisiti ndilayaaba kubayuni bauluka mujulu abanyama bamunyika; eelyo bantu bamunyika yoonse bayoozyiba kuti bana Israyeli balijisi Leza mwini-mwini.+ 47 Alimwi boonse babungene aano* balazyiba kuti Jehova tavwuni apanga naa asumo pe,+ nkaambo nkondo njiya Jehova,+ alimwi ulamwaaba nywebo nyoonse mumaanza eesu.”+

48 Lino mu Filisiti wakaboola akuswena afwaafwi a Davida, pele awalo Davida wakazuza cakufwambaana kuyooswaangana amu Filisiti. 49 Davida wakanjila mukabbeeke kakwe akubweza bbwe akulibikka munkwisyo akulifwusa. Wakamuuma mu Filisiti ooyo ankumo alimwi bbwe eelyo lyakabbila munkumo yakwe, kumane wakawa ansi cakuvwuntama.+ 50 Aboobo Davida wakamuzunda mu Filisiti kwiinda mukubelesya nkwisyo abbwe; wakamuuma bbwe mu Filisiti akumujaya nokuba kuti Davida tanaakajisi panga mujanza lyakwe.+ 51 Davida wakazuza akuyakwiima afwaafwi anguwe. Kumane wakabweza panga lyamu Filisiti+ ooyo akulisomona mucikanda calyo akuba masimpe kuti wafwa ncobeni kwiinda mukukosola mutwe wakwe andilyo. Lino ba Filisiti nobakabona kuti singuzu wabo wafwa, bakatija.+

52 Aboobo baalumi bana Israyeli abana Juda bakoongolola akutalika kutandaanya ba Filisiti kusikila kukkuti+ akumilyango ya Ekroni,+ alimwi ba Filisiti ibakajaigwa bakalaalabene munzila yoonse kuzwa ku Saaraimu+ mane kusikila ku Gati aku Ekroni. 53 Bana Israyeli nobakapiluka kukutandaanya ba Filisiti, bakasaala nkambi zyabo.

54 Mpoonya Davida wakabweza mutwe wamu Filisiti akuuleta ku Jerusalemu, pele zilwanyo zyamu Filisiti wakazibikka mutente lyakwe.+

55 Lino aciindi Saulo naakabona Davida kaunka kuyooswaangana amu Filisiti, wakabuzya Abineri,+ silutwe wampi yabasikalumamba kuti: “Abineri, ino mulombe ooyu mwanaani?”+ Abineri wakaingula kuti: “Mbubonya mboli muumi,* Omwami, tandizyi pe!” 56 Mwami wakati: “Kobuzya-buzya naa mwanaani mulombe ooyu.” 57 Aboobo Davida mbwaakapilukila buyo kuzwa kukujaya mu Filisiti, Abineri wakamubweza akumutola kuli Saulo kajisi amutwe wamu Filisiti+ mujanza lyakwe. 58 Lino Saulo wakati kulinguwe: “Yebo mulombe, ino uli mwanaani?” Mpoonya Davida wakati: “Ndili mwana wamubelesi wako Jese+ muna Betelehemu.”+