Bwatatu, March 27
Amusaangune kuyandaula Bwami. —Mt. 6:33.
Basikwiiya bakausa kapati ciindi naakafwa Jesu. Basikwiiya aaba tiibakasweekelwa buyo mulongwe wabo, pele alimwi bakalimvwa kubula bulangizi. (Lk. 24:17-21) Nokuba boobo, ciindi Jesu naakalibonya kulimbabo, wakasoleka kubagwasya kuti babone mbwaakabuzuzikizya businsimi bwamu Bbaibbele. Kunze lyaboobo, wakabapa amulimo uuyandika kapati. (Lk. 24:26, 27, 45-48) Kuzikusika ciindi naakali kuunka kujulu, basikwiiya tiibakacili kuuside pe, pele bakalikkomene kapati. Akaambo kakuzyiba kuti Simalelaabo wakali muumi alimwi wakalilibambilide kubagwasya kuzuzikizya mulimo wabo mupya, cakabapa kukkomana kapati. Aboobo, eeci cakabapa kuzumanana kumutembaula Jehova. (Lk. 24:52, 53; Mil. 5:42) Kutegwa tubaiye basikwiiya ba Jesu tuyandika kubikka zintu zya Bwami mubusena bwakusaanguna mubuumi bwesu. Nokuba kuti tuyandika kuliyumya kutegwa tuzumanane kumubelekela Jehova, usyomezya kuti uyootulongezya kapati ikuti twacita oobo.—Tus. 10:22. w23.01 30-31 ¶15-16
Kubala Bbaibbele kwa Ciibalusyo: (Zyakacitika masyikati: Nisani 16) Marko 16:2-8
Bwane, March 28
Uyoojokela kubulongo.—Matl. 3:19.
Masimpe kuti swebo tatuyandi kucita mbobakacita ba Adamu a Eva. Kutegwa tutaciti oobo, tweelede kuzumanana kwiiya kujatikizya Jehova, kulumba bube bwakwe, akusolekesya kumvwisya mbwayeeya. Kuti twacita oobo, luyando lwesu kuli Jehova luyooyuma. Amuyeeye kujatikizya Abrahamu. Wakali kumuyanda ncobeni Jehova. Nociba ciindi nocakali kumukatazya kumvwisya Jehova mbwayeeya, Abrahamu taakamuzangila pe. Muciindi caboobo, wakasolekesya kumuzyiba kabotu Jehova. Mucikozyanyo, ciindi naakazyiba kuti Jehova ukanza kunyonyoona munzi wa Sodoma a Gomora, Abrahamu kumatalikilo wakalibilika kuti ambweni “Mubetesi wanyika yoonse” inga wanyonyoona muntu uululeme antoomwe amuntu mubi. Abrahamu wakabona kuti Jehova takonzyi kucita oobo, aboobo wakamubuzya mibuzyo iili mbwiibede. Cakukkazika moyo, Jehova wakamwiingula. Kumamanino, Abrahamu wakazyiba kuti Jehova ulalingula moyo wamuntu uuli woonse alimwi akuti takonzyi kusubula muntu mululami antoomwe amubi.—Matl. 18:20-32. w22.08 28 ¶9-10
Bwasanu, March 29
Muntu uusyomeka ulasisa makani aamaseseke.—Tus. 11:13.
Mu 455 B.C.E., Mweendelezi Nehemiya naakamana kuyakulula bwaanda bwa Jerusalemu, wakayandaula baalumi basyomeka ibakali kuyakuulanganya kabotu munzi. Akati kabaalumi mbaakasala Nehemiya, Hananiya silutwe wa Ngazi wakasalwa. Bbaibbele lipandulula Hananiya kuti “wakali mwaalumi uusyomeka kapati alimwi uuyoowa Leza mwini-mwini kwiinda bamwi banji.” (Neh. 7:2) Kuyoowa Jehova alimwi akutayanda kumupa kuusa, nkokwakali kupa Hananiya kuubeleka cabunkutwe mulimo uuli woonse ngwaakali kupegwa. Bube oobu andiswe bulakonzya kutugwasya kuzumanana kusyomeka mumulimo wa Leza. Amubone cikozyanyo camulongwe wamwaapostolo Paulo iwakali kusyomeka Tukiko. Paulo wakali kusyoma Tukiko, walo ngwaakaamba kuti “mubelesi uusyomeka.” (Ef. 6:21, 22) Paulo wakali kumusyoma, kutali buyo akaambo kakutola magwalo kubakwesu ku Efeso aku Kolose, pele alimwi akuyoobaumbulizya. Tukiko utuyeezya baalumi basyomeka, ibalanganya zintu zyakumuuya mazuba aano.—Kol. 4:7-9. w22.09 9-10 ¶5-6