Mi malanukta ja nantatalik bʼa ayal-e yabʼ ja yuntikile ja bʼa leki soka mi lekuki. Lekni ayaweyi sjobʼjelik jastal it bʼa yajele och rason: «¿Jas yuj ja Biblia wa xyala mi lekuk skʼulajel jastik junuk bʼa lajansok jel xpaywani? ¿Jasa wa xya kʼokxan bʼa tolabida oj yawi alekilal ja jastik kanel kulan bʼa Biblia?» (Is. 48:17, 18). Yajni jun uninal wa skʼana oj yi jaʼ, ja snantati tʼilan oj skoltaye bʼa yajel spensaraʼuk ja cholalik yiʼoj bʼa skʼulajel ja jaw. ¿Jastal wa xyila? ¿Jastik junuk ja slekilali? ¿Jastik junuk ja swokolili? ¿Jas yuj masto ekʼel ja slekilal yuja wokoliki? (Mar. 10:29, 30). Jelni tʼilan ja untiki a-spensaraʼuke ja sjobʼjelik it bʼajtanto oj yiʼe jaʼ. Ta ja nantatalik wa skoltaye ja yuntikile bʼa oj spensaraʼuke ja jastik jaw, bʼobʼta mas oj kʼokxuke bʼa masni lek skʼuʼajel tolabida ja jastik kanel kulan bʼa Biblia. w17.12 21 par. 14, 15

Tuk wane stalnajel ja spamilyaʼe bʼa awelexa, ama ja weʼnlexi cha wanexani yijbʼel. Jujuntik wane skʼuljel luchar bʼa yajelyi ja spamilyaʼe ja jastik mas tʼilan sok mi jaʼuk ja jastik junuk bʼa chaʼan stsʼakol. Sok wa xnaʼatik jitsan mi kechanta wa x-ekʼ sbʼaje june ja bʼa wokolik it, ayni wa x-ekʼ sbʼaje jitsan wokol bʼa junta tyempo. Ta wa xchamskʼujol ja skʼulbʼenik mey sakʼanili, ¡pensaraʼan jastal maʼ wa xyabʼ sbʼaja weʼn! Ja weʼn waxa waʼteltay, pe ja yuja waxa yajtay sok mi skʼuluneja programar bʼa jach oja kʼuluk (Sal. 19:1, 3, 14). Ja jTatik Dyos wa snaʼa abʼaj tsʼikan lek. Ja Jesús yala: «Hasta ja stzotzil ja hua olomexi, cuenta ay» (Mat. 10:30). Sok june ja tsʼijbʼanumik bʼa salmos yala: «Ja Jyoba wa snaʼa ja jas wa x-ekʼ sbʼaj ja maʼ mey smuli» (Sal. 37:18). Bʼa pilan yaljel, wa snaʼa ja prebaʼik wan ekʼelabʼaj sok wa xbʼobʼ yawi awip bʼa oj chʼak kuchukawuj. w18.01 7, 8 par. 1, 4

Ja milagro it sbʼaja sakʼwelal ja Tabita jelni cham yabʼye, ja yuj jel jitsan «ja maʼ scʼuan ja Cajualtiqui». Ja ajkʼach nochumanik bʼobʼni xchole sbʼaja Kajwaltik Jesús sok ja yip yiʼoj ja Jyoba bʼa yajel sakʼwuk ja chamwiniki (Hech. 9:36-42). La cha jtatik tiʼal bʼa pilan sakʼwelal bʼa yilawe tuktukil ixuk winik. Bʼa jun kʼakʼu, ja jekabʼanum Pablo wan yajel ekʼ jun sloʼil bʼa kan man snalan akwal bʼa jun naʼits bʼa Troas, ja bʼa jtyempotik jani noroeste bʼa Turquía. Ja Eutico, jun kerem ti kulan ekʼ bʼa jun bentana bʼa wan smaklajel ja sloʼil ja Pablo, ochkan swayel sok moʼkon man yoxil piso. Ja maʼ bʼajtan kʼot ja bʼa mokʼi bʼobʼta jaʼ waj ja Lucas, ja yeʼn waj jun loktor. Ja yeʼn yala sbʼaja keremi mini kechanuk tupeluk yikʼ, chamtani. Ja Pablo koʼko ja bʼa escalera, stela ja kwerpoʼali sok yala yabʼ spetsanil ja matik teyi ja Eutico sakʼanxa ay. Ja milagro it jelni chamyilawe ja matik teye tiw. Jelni aji kulan skʼujole yuja yilawe jun sakʼwelal (Hech. 20:7-12). w17.12 5 par. 10, 11