Bikpela Hevi Bai Painim Lain Bilong Sakim Tok

Jisas i gat bikpela rispek long Jon Bilong Baptais, tasol planti man i gat wanem tingting long Jon? Jisas i tok: “Lain pipol bilong dispela taim . . . i olsem ol pikinini i sindaun long ol ples maket na singaut long ol poroman bilong ol olsem: ‘Mipela i winim flut long yupela, tasol yupela i no danis. Mipela i krai sori, tasol yupela i no paitim bros bilong yupela bilong kamapim bel sori.’”—Matyu 11:16, 17.

Wanem mining bilong tok bilong Jisas? Em i tok: “Jon i kam na em i no kaikai o dring, tasol ol manmeri i tok, ‘Wanpela spirit nogut i stap long en.’ Pikinini bilong man i kam na em i kaikai na dring, tasol ol man i tok, ‘Lukim! Em man bilong kaikai planti tumas na dring planti wain, em i pren bilong ol takisman na ol sinman.’” (Matyu 11:18, 19) Jon i promis long mekim wok bilong God, olsem na em i no save dring wain, tasol ol man i tok spirit nogut i stap long em. (Namba 6:2, 3; Luk 1:15) Tasol Jisas i stap wankain olsem ol narapela man, em i kaikai na dring inap long mak. Maski i olsem, ol man i sutim tok olsem em i save kaikai na dring planti tumas. I klia tru olsem maski Jon na Jisas i mekim wanem samting, ol man i wok yet long sutim tok long ol.

Jisas i tok ol manmeri bilong dispela taim i olsem ol pikinini long ol ples maket, ol i no laik danis taim ol arapela pikinini i winim flut, na tu, ol i no sori taim ol narapela i krai. “Tasol stretpela pasin man i mekim i kamapim ples klia olsem em i gat savetingting.” (Matyu 11:16, 19) Tru tumas, “stretpela pasin” bilong Jon na Jisas i soim olsem ol tok ol man i sutim long tupela i giaman.

Bihain long Jisas i kamapim klia pasin bikhet bilong ol manmeri, em i krosim ol lain bilong ol taun we em i bin mekim planti mirakel, olsem Korasin, Betsaida, na Kaperneam. Jisas i tok sapos em i bin mekim ol dispela mirakel long ol taun bilong Fonisia olsem taun Tair na Saidon, ol manmeri bilong ol dispela taun inap tanim bel. Na tu, em i krosim ol manmeri bilong Kaperneam, em ples em i bin stap long en inap sampela haptaim. Maski em i stap long dispela ples, planti man i no bilip. Olsem na Jisas i tok long dispela taun olsem: “Long De Bilong Kot, strafe i painim Sodom bai i no bikpela olsem strafe i painim yu.”—Matyu 11:24.

Jisas i mekim dispela tok pinis na em i litimapim nem bilong Papa bilong em, long wanem, Em i save haitim ol gutpela tok i tru long “ol man i gat savetingting na ol klevaman,” tasol Em i kamapim ol dispela gutpela tok long ol man i gat pasin daun olsem bilong ol liklik pikinini. (Matyu 11:25) Jisas i mekim gutpela singaut long ol kain man olsem: “Yupela ol man i save hatwok nating na karim ol bikpela hevi, yupela kam long mi na bai mi givim nupela strong long yupela. Karim hap plang bilong mi na kisim skul long mi, long wanem, mi man bilong pasin isi na pasin daun, na yupela bai kisim nupela strong. Hap plang bilong mi i gutpela na samting mi askim yupela long karim i no hevi.”—Matyu 11:28-30.

Olsem wanem Jisas i givim nupela strong long ol man? Ol hetman bilong lotu i kolim ol pasin ol man i mas bihainim long lotu na dispela i putim bikpela hevi long ol, olsem ol i kolim planti liklik samting man i mas mekim bilong bihainim lo bilong Sabat. Tasol Jisas i givim nupela strong long ol taim em i skulim ol long tok i tru bilong God, na ol i stap fri long ol pasin bilong lotu em ol hetman i kamapim. Na tu, Jisas i mekim ol tok bilong givim bel isi long ol man i karim hevi long wok bos bilong ol gavman politik, na long ol man husat i bel hevi long sin bilong ol. Yes, Jisas i helpim ol long luksave long olsem wanem God bai lusim sin bilong ol na ol i ken i stap wanbel wantaim God.

Hap plang bilong Jisas i gutpela, olsem na ol man i bihainim em na karim dispela hap plang, ol i ken dediket long God na mekim wok bilong Papa long heven, em Man bilong sori na marimari. Taim yumi mekim olsem, ol lo bilong God i no givim hevi long yumi.—1 Jon 5:3.