No Gat Wanpela Samting i Winim Tok i Tru
Em Stori Bilong G. N. Van Der Bijl
Long Jun 1941, ol i putim mi long han bilong wanpela lain polis bilong Hitler ol i kolim Gestapo, na ol i kisim mi i go long banis kalabus bilong Saksenhausen, klostu long Belin, long Jemani. Mi stap olsem kalabusman namba 38190, na mi stap long dispela ples i go inap long taim bilong dispela mats bilong i dai em i bin kamap long Epril 1945. Tasol mi no ken stori hariap long ol samting i bin kamap long dispela taim—pastaim mi mas stori long olsem wanem mi bin kamap wanpela kalabusman.
MAMA i bin karim mi long Rotadam, long hap bilong Netelan, long yia 1914, bihain liklik long taim Namba Wan Pait i bin kamap. Papa i bin wok long ol tren, na liklik haus bilong mipela i sanap klostu long rot bilong tren. Klostu long taim pait i pinis long 1918, mi bin lukim planti tren i spit i go, ating i gat ol soldia long en i bin kisim hap bagarap long pait na tren i karim ol i go bek long ples.
Taim mi gat 12-pela krismas, mi lusim skul na bai mi ken kisim wanpela wok mani. Etpela yia bihain mi kisim wok olsem boskru long wanpela sip i gat ol pasindia long en, na inap 4-pela yia mi raun long sip i go i kam namel long Netelan na Amerika.
Taim sip bilong mipela i sua long pasis bilong Nu Yok long 1939, i olsem narapela pait i laik kamap. Olsem na taim wanpela man i kam antap long sip bilong mipela na em i laik givim buk Government long mi i stori long wanpela stretpela gavman bai kamap, mi amamas long kisim dispela buk. Orait taim mi go bek long Rotadam, mi kirap painim wok long dispela hap, long wanem, i olsem bagarap inap painim mi long wok bilong raun long sip. Long Septemba 1, Jemani i go pait long Polan, na nau ol kantri i go insait long Namba Tu Pait.
Mi Lainim Tok i Tru Bilong Baibel
Long wanpela Sande long moningtaim long Mas 1940, mi go lukim brata bilong mi i marit pinis, na long dispela taim wanpela Witnes Bilong Jehova i paitim dua. Mi tokim em mi kisim pinis buk Government, na mi askim em long heven na husat ol lain i save go long dispela ples. Em i bekim klia tru dispela askim bilong mi na mi pilim olsem tok bilong em i stret, olsem na mi tok long bel bilong mi, ‘Dispela em tok i tru.’ Mi givim atres bilong mi long em na mi tokim em long kam lukim mi long haus bilong mi.
Taim dispela Witnes i kam 3-pela taim tasol na mipela i toktok wantaim long ol bikpela tok bilong Baibel, nau mi kirap i go wantaim em long autim tok long haus bilong ol man. Taim mipela i kamap long hap bilong autim tok, em i soim mi long ples bilong kirap mekim dispela wok, na nau mi wanpela mi mas autim tok long ol dispela haus. Long dispela taim bipo planti nupela man i bin mekim olsem long taim ol i kirap nupela long autim tok. Dispela Witnes i tokim mi, taim mi laik givim buk samting long man bilong haus, long olgeta taim mi mas sanap insait long wanpela hap bilong haus samting na bai ol man i stap long rot ol i no inap lukim mi. Long dispela taim bilong pait mipela i mas was gut.
Orait 3-pela wik bihain, long Me 10, 1940, ami bilong Jemani i kam pait long Netelan, na long Me 29, namba wan ofisa bilong gavman Natsi, em Seyss-Inquart, i tokaut olsem ol i tambuim pinis oganaisesen bilong ol Witnes Bilong Jehova. Mipela i bung long ol liklik grup tasol, na mipela i was gut na i no tokaut long ples mipela i bung long en. Ol wasman bilong raun i save kam lukim mipela, na dispela i strongim tru mipela.
Mi man bilong smok, na taim mi laik givim wanpela smok long Witnes i stadi wantaim mi, mi kisim save olsem em i no save smok. Mi tokim em: “Mi no inap tru long lusim smok!” Tasol bihain liklik mi wokabaut long rot na mi tingting, ‘Sapos mi laik kamap wanpela Witnes, orait mi laik i stap Witnes tru tru.’ Olsem na mi no smok moa.
Mi Givim Bel Long Tok i Tru
Long Jun 1940, olsem 3-pela mun bihain long taim mi bin bungim dispela Witnes long haus bilong brata bilong mi, mi kisim baptais bilong makim olsem mi dediket pinis long Jehova. Sampela mun bihain, long Oktoba 1940, mi go insait long wok bilong autim tok long olgeta de, olsem painia. Long dispela taim ol i givim wanpela samting long mi ol i kolim kolsiot bilong ol painia. I gat planti poket long en bilong pulimapim ol buk na buklet, na mipela inap putim bikpela saket antap long en.
Taim ol ami bilong Jemani i kisim Netelan, ol i wok long painim ol Witnes Bilong Jehova na holim ol. Long wanpela moningtaim long Februeri 1941, mi raun autim tok wantaim sampela Witnes moa. Ol i autim tok long ol haus i stap long wanpela hapsait bilong rot, na mi wok long narapela hapsait na bai mi ken bungim ol. Tasol mi no bungim ol. Olsem na bihain mi go lukluk bambai mi ken save wanem samting i pasim ol. Mi bungim wanpela man na em i askim mi, “Yu tu yu gat sampela liklik buk?”
Mi tok, “Mi gat.” Em nau, em i holim mi na kisim mi i go long polis-tesin. Mi stap long rum gat klostu 4-pela wik. Planti ofisa i mekim pasin pren long mi. Taim ol i no putim yet wanpela man long han bilong ol Gestapo, em inap raitim nem bilong em long wanpela pepa i tok em bai lusim wok bilong tilim ol buk samting bilong Baibel, na nau em inap lusim kalabus. Taim ol i askim mi long raitim nem bilong mi long dispela pepa, mi tokim ol, “Maski yu laik givim wanpela o tupela milion gulden [olsem bikpela mani tru] long mi, mi no ken raitim nem bilong mi long dispela pepa.”
Mi stap liklik na bihain ol i putim mi long han bilong ol Gestapo. Bihain ol i salim mi i go long banis kalabus bilong Saksenhausen, long Jemani.
I Stap Bilong Mi Long Saksenhausen
Taim mi kamap long Saksenhausen long Jun 1941, i gat olsem 150 Witnes ol i stap pinis long dispela ples, na klostu olgeta ol i bilong Jemani. Ol i kisim mipela ol nupela kalabus i go long wanpela hap bilong banis kalabus ol i bin banisim na mipela i no inap bung wantaim ol narapela kalabus. Long dispela hap ol brata Kristen i lukautim mipela na ol i toksave long mipela long ol samting bai painim mipela. Wanpela wik bihain i gat sampela Witnes moa bilong Netelan ol i kamap. Pastaim mipela i mas sanap wantaim long wanpela hap long ai bilong ol haus kalabus, kirap long 7 klok long moningtaim i go inap 6 klok long apinun. Sampela taim ol kalabusman i mas mekim olsem long olgeta de i go inap wanpela wik samting.
Ol i mekim nogut long ol brata, tasol ol brata i save ol i mas mekim yet ol samting bilong kisim ol kaikai bilong spirit. Long olgeta de ol i makim wanpela brata bilong lukim wanpela ves bilong Baibel na redim sampela tok i stori long dispela ves. Orait bihain, long ples ol kalabus i mas bung long en ausait, ol wan wan Witnes bai go sanap klostu long em na harim ol tok em i bin redim. Long kain kain rot ol brata inap salim hait sampela nius samting bilong Baibel i kam insait long banis kalabus, na long olgeta Sande mipela i bung na stadi wantaim long ol dispela nius samting bilong Baibel.
I gat wanpela buk (Children) ol i bin kamapim long kibung i kamap long Sen Lui long Yunaitet Stets long 1941, na long pasin hait ol brata i salim i kam insait long Saksenhausen. Mipela ting, nogut ol i painim dispela buk na bagarapim, olsem na mipela kamautim ol lip bilong en na givim ol hap hap bilong buk long ol brata, na taim ol i kaunim dispela hap, ol i givim long narapela brata na em i kaunim.
Bihain liklik, ol bos bilong banis kalabus i kisim save pinis olsem mipela i save mekim ol miting. Olsem na ol i brukim ol Witnes na putim ol long narapela narapela hap bilong ples kalabus. Em nau, mipela i gat gutpela rot tru bilong autim tok long ol narapela kalabus, olsem na planti man bilong Polan, Yukren, na sampela hap moa ol i kisim tok i tru.
Ol Natsi i no haitim ol samting ol i laik mekim long ol Bibelforscher, em ol i kolim ol Witnes Bilong Jehova olsem—ol Natsi i laik kirapim ol long lusim Jehova o kilim ol i dai. Olsem na ol i wok long subim mipela strong tumas. Ol i tokim mipela olsem sapos mipela i raitim nem bilong mipela long wanpela pepa i tokaut olsem mipela bai lusim bilip bilong mipela, bai mipela inap lusim kalabus. Orait nau sampela brata i tingting, “Sapos mi lusim kalabus, bai mi inap mekim bikpela wok moa bilong Jehova.” Wan wan ol i raitim nem bilong ol long pepa, tasol klostu olgeta brata i stap gut long Jehova, maski ol i no givim kaikai samting long mipela, na ol i daunim mipela na mekim nogut long mipela. Sampela brata em ol i bin raitim nem bilong ol long pepa, mipela i no harim sampela stori moa bilong ol. Tasol gutpela tru, bihain sampela i kam bek na long nau ol i mekim yet wok olsem Witnes.
Long olgeta taim ol i subim mipela long lukluk i stap taim ol i mekim nogut tru long sampela kalabus, olsem ol i paitim ol 25 taim long stik. Wanpela taim mipela i mas lukluk i stap taim ol i hangamapim 4-pela man. Taim man i mas lukim ol kain samting olsem, dispela i save mekim sampela samting long em. Wanpela brata, em longpela man i gat gutpela skin na em i save sindaun long haus lain bilong mi, em i tokim mi: “Taim mi no kam yet long dispela ples, sapos mi lukim blut, wantu bai ai bilong mi i raun na mi pundaun. Tasol nau mi lain pinis long dispela samting.” Tru, mipela i lain pinis, tasol i no olsem bel bilong mipela i strong pinis na i no inap sori moa long man, nogat. Mi ken tok tru olsem, mi no bin bel nogut long ol dispela lain i mekim nogut long mipela.
Mi wok wantaim wanpela kommando (olsem lain wokman), na bihain sik bilong skin hat i kisim mi na ol i putim mi long haus sik. Wanpela dokta bilong Nowe na wanpela nes bilong Sekoslovakia ol i helpim mi, na ating gutpela pasin bilong ol i mekim na mi no dai.
Mats Bilong i Dai
Long Epril 1945, samting i kamap ples klia olsem, Jemani bai lus long dispela pait. Ol ami bilong hap bilong wes ol i wok long kam klostu, na ol ami bilong Rasia long hap bilong is, ol tu i wok long kam klostu. Olsem na insait long sampela de tasol ol Natsi i no inap kilim i dai ol planti handet tausen man i stap long ol banis kalabus na rausim skin bilong ol na bai ol dispela lain ami i no inap save long en. Olsem na ol i pasim tok long kilim i dai ol kalabus i gat sik na kisim ol narapela kalabus i go long ol pasis i stap klostu liklik, em ol sip i save sua long en, na ol bai putim ol dispela kalabus long sampela sip na taim ol sip i go ausait long solwara, ol bai bagarapim ol dispela sip na ol bai go daun insait long solwara.
Orait long Epril 20 long nait, inap olsem 26,000 kalabus bilong Saksenhausen i kirap mats i go. Tasol paslain long dispela, mipela i kisim ol brata i gat sik, em ol i stap long haus sik. Mipela i kisim wanpela wilka bilong putim ol long en na subim i go. Mipela olgeta brata, mipela inap olsem 230, na mipela i bilong 6-pela kantri. Wanpela brata i gat sik, em Brata Arthur Winkler, em i bin helpim tru wok bilong autim tok long Netelan na dispela wok i go bikpela. Mipela ol Witnes i wokabaut long baksait tru bilong dispela lain i mats i go, na oltaim mipela i wok long strongim bel bilong ol brata long wokabaut i go yet.
Pastaim mipela i wokabaut i go inap 36 aua na mipela i no malolo liklik. Taim mi wokabaut, sampela taim ai bilong mi i slip olgeta, long wanem, mipela i stap nogut tru na skin i no gat strong moa. Tasol mipela i no inap wokabaut isi o malolo, nogut ol was bilong ol kalabus i sutim mipela long gan. Long nait mipela i slip ausait long graun o insait long bus. No gat kaikai. Taim pen bilong hangre i kamap strong tru long bel bilong mi, mi rapim tang bilong mi long marasin bilong klinim tit, em lain Retkros bilong Swiden i bin givim long mipela.
Wanpela taim, ol was bilong ol kalabus ol i no save ol ami bilong Rasia na Amerika i stap we, olsem na mipela i kem insait long bus inap 4-pela de. Mipela ting Jehova i stiaim dispela samting i kamap, long wanem, mipela i kamap long Pasis Lubek bihaintaim tumas, na mipela i no inap kalap long ol dispela sip em mipela i bilong kisim bagarap long en long solwara. Orait mipela i wokabaut i go inap 12-pela de olgeta, inap olsem 200 kilomita, na nau mipela i kamap long Krivits Wut. Dispela ples i no longwe tumas long Swerin, em wanpela taun i stap longwe long Lubek inap 50 kilomita samting.
Ol Rasia i stap long hap bilong han sut, na ol Amerika i stap long hap bilong han kais. Mipela inap harim pairap bilong ol bikpela gan na pairap bilong ol raifol, na mipela save mipela i stap klostu long hap ol i mekim pait. Sampela was Jeman bilong ol kalabus, ol i longlong nabaut; sampela i ranawe, na sampela i lusim ol klos bilong ami na ol i putim klos bilong ol kalabus em ol i bin rausim long skin bilong ol kalabus i dai pinis—ol i mekim bambai ol birua i no inap luksave long ol. Taim ol i longlong nabaut olsem, mipela ol Witnes i bung na beten askim Jehova long stiaim mipela.
Ol brata i lukautim mipela ol i tok mipela i mas lusim dispela ples tumora long bikmoning yet na wokabaut i go long hap ol soldia Amerika i stap long en long han kais. Inap olsem 12,000 kalabus i bin dai long rot o ol was bilong ol i kilim ol i dai, tasol olgeta Witnes i abrusim bagarap na ol i stap laip.
Sampela soldia bilong Kanada i bringim mi i go long taun Nimwegen, bipo wanpela susa bilong mi i bin sindaun long dispela ples. Tasol taim mi kamap pinis, mi kisim save olsem em i lusim pinis. Olsem na mi kirap wokabaut long lek i go long Rotadam. Gutpela tru, taim mi wokabaut long rot, wanpela man i kisim mi long ka bilong em na bringim mi i go stret long Rotadam.
Tok i Tru i Bosim i Stap Bilong Mi
Taim mi kamap long Rotadam, long dispela de stret mi wokim pepa gen bilong mekim wok painia. Tripela wik bihain, mi stap pinis long Sutfen, na mi wok painia long dispela hap inap wanpela yia hap. Insait long dispela taim skin bilong mi i wok long kamap strong gen. Orait nau ol i makim mi long kamap wanpela wasman sekit, em nem bilong ol wasman i save raun na lukim ol kongrigesen. Sampela mun bihain, ol i singautim mi i go long Wastaua Baibel Skul Bilong Gileat long Saut Lansing, Nu Yok. Taim mi winim pinis namba 12 klas bilong dispela skul long Februeri 1949, ol i salim mi i go mekim wok misineri long Beljam.
Long Beljam mi mekim ol kain kain wok—mi wok olsem 8-pela yia long brens-ofis na planti yia long wok bilong raun, olsem wasman sekit na wasman distrik. Long 1958 mi maritim Justine, na em i kamap poroman bilong mi long wok bilong raun. Nau mi lapun pinis, tasol mi amamas olsem mi inap mekim yet hap wok olsem helpim bilong wasman bilong raun.
Taim mi tingim wok bilong autim tok mi bin mekim insait long ol dispela yia i go pinis, mi inap tok tru olsem: “I no gat wanpela samting i winim tok i tru.” Tru, sampela taim mi gat hatwok. Mi bin kisim save olsem, taim mi mekim sampela popaia o pasin kranki, mi mas larim dispela samting i skulim mi. Olsem na taim mi toktok wantaim ol yangpela, planti taim mi save tokim ol: “Yu tu bai yu mekim sampela popaia, na yu inap mekim sampela bikpela rong, tasol yu no ken giaman na tok yu no bin mekim. Toktok wantaim papamama o wanpela elda long dispela samting, na bihain yu mas mekim ol samting bilong stretim pasin bilong yu.”
Inap olsem 50 yia pinis mi mekim wok bilong God long olgeta de long Beljam, na mi kisim amamas long lukim sampela brata bipo mi bin save long ol taim ol i pikinini yet, na nau ol i mekim wok olsem elda na wasman sekit. Na bipo i gat olsem 1,700 manmeri i autim tok bilong Kingdom long Beljam, tasol mi lukim dispela lain i go bikpela tru, winim 27,000.
Mi askim olsem: “I gat wanpela rot yumi inap bihainim na i winim rot bilong mekim wok bilong Jehova?” Bipo i no gat, na nau i no gat, na bihain tu bai i no gat. Mi beten askim Jehova long em inap wok yet long stiaim na mekim gut long mi wantaim meri bilong mi bambai mitupela inap mekim yet wok bilong em i go inap oltaim oltaim.
[Piksa long pes 26]
Mi wantaim meri bilong mi bihain liklik long taim mitupela i marit long 1958