Yu Save Inapim Olgeta Wok God i Laik Bai Yu Mekim?
“God bai i kotim yumi long olgeta pasin yumi bin mekim, em ol gutpela pasin na ol pasin nogut na ol pasin hait.”—SAVEMAN 12:14.
1. Jehova i bin mekim wanem bilong helpim lain bilong em?
JEHOVA i save helpim ol man i wok long tingim em olsem Bikpela Man bilong wokim ol. Baibel i helpim ol long kisim save ol i mas kisim bambai God i ken laikim olgeta pasin bilong ol. Spirit holi bilong God i save stiaim ol long mekim laik bilong God na long “mekim planti gutpela wok.” (Kolosi 1:9, 10) Na tu, long rot bilong “wokboi i gat gutpela tingting,” Jehova i save givim kaikai bilong spirit long ol na em i save stiaim ol long ol samting bilong spirit. (Matyu 24:45-47) Olsem na long planti rot, God i givim blesing long lain bilong em taim ol i mekim wok bilong em na mekim bikpela wok bilong tokaut long gutnius bilong Kingdom.—Mak 13:10.
2. Wanem ol askim inap kamap long wok bilong Jehova yumi save mekim?
2 Ol Kristen tru i amamas long mekim wok holi bilong Jehova. Tasol sampela inap bel hevi na ting wok bilong ol i samting nating. Olsem: Sampela taim, ol Kristen i dediket pinis ol inap ting olsem hatwok bilong ol i lus nating. Taim papa bilong famili i tingim famili-stadi na ol narapela wok, sampela askim inap kamap long tingting bilong em, olsem: ‘Jehova i save amamas tru long ol samting mipela i mekim? Mipela i save inapim olgeta wok God i laik bai mipela i mekim?’ Gutpela tok bilong saveman Solomon bai bekim ol dispela kain askim.
Olgeta Samting i No Gat As Bilong En?
3. Olsem Saveman 12:8 i tok, wanem samting i no gat as tru bilong en?
3 Sampela inap ting tok bilong dispela saveman i no save strongim bel bilong ol man—maski ol i yangpela o lapun. Saveman i tok: “Olgeta samting i olsem samting nating tasol na i no gat as tru bilong en.” (Saveman 12:8) I stap bilong yumi i no gat as tru bilong en sapos long taim yumi yangpela yet yumi givim baksait long Bikpela Man bilong wokim yumi, na yumi no mekim wok bilong em taim yumi wok long i go lapun, na wanpela samting tasol yumi inap hambak long en, em yumi bin winim planti krismas na yumi go lapun. Long kain man olsem i no gat as bilong i stap bilong em, maski long taim em i dai em i gat bikpela mani na nem long dispela graun i stap aninit long strong bilong Satan.—1 Jon 5:19.
4. Bilong wanem yumi ken tok, i no olsem i stap bilong olgeta man i no gat as bilong en?
4 Tasol ol wokboi bilong Jehova i stap gut long em na ol i save bungim ol gutpela samting bilong ol long heven, i no olsem i stap bilong ol i no gat as bilong en, nogat. (Matyu 6:19, 20) Ol i gat planti wok bilong mekim long wok bilong Bikpela i gat gutpela pe tru bilong en, na ol dispela kain wok bilong ol i no lus nating. (1 Korin 15:58) Tasol olsem wanem? Sapos yumi Kristen i dediket pinis, yumi save wok strong long mekim wok bilong God em i givim long yumi long dispela taim bilong las de? (2 Timoti 3:1) O sindaun bilong yumi i wankain olsem sindaun bilong ol man i stap klostu long yumi? Ating ol dispela man i insait long ol narapela narapela lotu, na ol i givim bel long God, na ol i save go oltaim long haus lotu bilong ol, na ol i wok long bihainim ol samting lotu bilong ol i laik bai ol i mekim. Tasol ol i no save autim tok bilong Kingdom. Ol i no gat stretpela save olsem nau yumi stap long “taim bilong las de,” na ol i no pilim tru olsem taim i sot pinis.—Daniel 12:4.
5. Sapos yumi tingting tasol long mani kago na ol amamas samting, orait yumi mas mekim wanem?
5 Krais Jisas i stori long dispela taim bilong planti hevi olsem: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap. Taim bikpela tait i no kamap yet, ol i wok long kaikai na dring, na ol man i maritim ol meri, i go inap long taim Noa i go insait long sip. Ol i no save long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri. Orait wankain pasin tasol bai i kamap long taim Pikinini Bilong Man i kamap.” (Matyu 24:37-39) I no gat rong long kaikai na dring sapos yumi kisim long skel tasol, na marit em wanpela samting God yet i bin kamapim. (Stat 2:20-24) Tasol sapos yumi luksave olsem yumi tingting tasol long mani kago na ol amamas samting, orait i gutpela yumi beten long dispela samting, a? Jehova i ken helpim yumi long tingim ol wok bilong Kingdom i namba wan samting, na long mekim pasin i stret, na long inapim wok em i laik bai yumi mekim.—Matyu 6:33; Rom 12:12; 2 Korin 13:7.
Dediket na Wok Bilong God Yumi Mas Mekim
6. Wanem bikpela samting i makim olsem sampela man i baptais pinis ol i no mekim wok bilong God em i laik bai ol i mekim?
6 Sampela Kristen i baptais pinis ol i mas beten strong, long wanem, ol i no save mekim ol wok Kristen ol i kisim taim ol i dediket long God. Inap sampela yia nau, winim 300,000 nupela man i kisim baptais long olgeta wan wan yia, tasol namba bilong ol Witnes Bilong Jehova i save autim tok i no go bikpela olsem. Sampela em ol i bin kamap pablisa bilong Kingdom long bipo ol i no autim tok moa. Tasol ol man i mas insait tru long wok autim tok taim ol i no kisim baptais yet. Olsem na ol i save long wok Jisas i givim long ol disaipel bilong em, olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Ol Witnes Bilong Jehova i baptais pinis na ol i no gat bikpela sik o narapela bikpela samting i pasim ol, tasol ol i no mekim wok autim tok olsem Witnes bilong Jehova na Krais, ol i no stap gut long olgeta wok Bikpela Man bilong wokim yumi em i laik bai ol i mekim.—Aisaia 43:10-12.
7 Lain Israel bilong bipo em i wanpela lain i dediket long God, na aninit long kontrak bilong Lo, ol Israel i mas tingim wok bilong Jehova ol i mas mekim. Olsem: Olgeta man bilong lain Israel, ol i mas bung 3-pela taim long olgeta yia long ol bikpela de bilong lotu, na sapos wanpela man long laik bilong em yet em i no mekim Pasova, em i mas ‘raus long lain Israel,’ olsem em i mas dai. (Namba 9:13; Wok Pris 23:1-43; Lo 16:16) Bilong inapim wok God i laik bai ol i mekim olsem lain bilong em i dediket pinis, ol Israel i mas bung bilong mekim lotu. (Lo 31:10-13) I no gat wanpela tok long Lo i tok olsem: ‘Mekim dispela sapos yu inap painim taim bilong mekim.’ Long ol lain bilong nau i dediket long Jehova, dispela lo long bung bilong mekim lotu i strongim tok bilong Pol olsem: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi . . . no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” (Hibru 10:24, 25) Tru tumas, pasin bilong bung oltaim wantaim ol wanbilip em i wanpela wok God i laik bai yumi ol Kristen i mekim.
Skelim Gut Ol Samting Pastaim!
8. Bilong wanem wanpela yangpela i dediket pinis em i mas beten na tingim gut wok holi bilong God?
8 Ating yu wanpela yangpela i dediket pinis long Jehova. Yu bai kisim ol gutpela blesing sapos yu putim wok bilong Kingdom i go pas long ol narapela samting long i stap bilong yu. (Sindaun 10:22) Sapos yu beten na stretim gut ol samting, ating bai yu inap mekim wok painia o kain wok olsem taim yu yangpela yet—em gutpela rot bilong tingim Bikpela Man i bin wokim yu. Sapos nogat, ating wok bilong painim mani kago bai pulim bikpela hap taim bilong yu. Olsem planti manmeri i save mekim, ating bai yu marit taim yu yangpela liklik na kisim dinau bambai yu ken kisim ol samting bilong skin. Gutpela wok mani inap pulim bikpela hap taim na strong bilong yu. Sapos yu gat pikinini, inap planti yia bai yu gat bikpela wok long lukautim famili. (1 Timoti 5:8) Ating yu no bin lusim tingting long Bikpela Man bilong wokim yu, tasol yu bihainim gutpela tingting sapos yu save olsem ol samting yu skelim pastaim, o yu no skelim, dispela inap makim rot bai yu bihainim taim yu bikpela pinis. Taim yu winim pinis bikpela krismas, ating yu bai tingting bek na ting i gutpela sapos long taim yu yangpela yet yu bin mekim bikpela wok moa long wok holi bilong God. Orait i gutpela sapos nau yu skelim i stap bilong yu na beten bambai yu ken painim amamas long wok holi bilong Jehova taim yu yangpela yet.
9. Wanpela man i gat bikpela krismas moa long nau, na bipo em i bin mekim bikpela wok insait long kongrigesen, ating em i ken mekim wanem?
9 Tingim i stap bilong wanpela man bipo em i bin wok olsem wasman long lain “sipsip” bilong God. (1 Pita 5:2, 3) Yumi no save long as, tasol long laik bilong em yet em i lusim dispela wok bilong em. Tru, em i gat bikpela krismas moa long nau, na ating em i hatwok moa long mekim wok bilong God. Tasol olsem wanem? I gutpela em i wok gen long holim sampela wok insait long kongrigesen? Kain man olsem bai kamap olsem gutpela blesing long ol narapela sapos em inap kisim sampela wok moa insait long kongrigesen! Na yumi no stap bilong tingim yumi yet tasol, nogat. Olsem na ol pren na famili bai amamas sapos wanpela brata inap mekim bikpela wok moa bilong litimapim nem bilong God. (Rom 14:7, 8) Na bikpela samting moa, Jehova i no ken lusim tingting long ol samting yumi mekim long wok bilong em. (Hibru 6:10-12) Olsem na wanem samting i ken helpim yumi long tingim Bikpela Man bilong wokim yumi?
Ol Samting Bilong Helpim Yumi Long Tingim God
10 Saveman Solomon inap givim gutpela tingting long yumi bilong helpim yumi long tingim Bikpela Man bilong wokim yumi. Solomon i beten strong na Jehova i harim beten bilong em na givim gutpela tingting na save long em i narapela kain. (1 King 3:6-12) Solomon i skelim gut olgeta samting ol man i save mekim. Na tu, spirit bilong God i stiaim em long raitim ol samting em i kisim save long en bambai dispela save i ken helpim ol narapela. Em i tok: “Dispela saveman i gat gutpela tingting tru, olsem na em i wok long skulim ol manmeri. Em i skelim gut olkain gutpela tok na tok piksa, na sapos em i ting ol dispela tok i tru, orait em i raitim long buk. Em i hatwok long painim tok i swit long yau bilong ol man, na em i raitim gut ol dispela trupela tok.”—Saveman 12:9, 10.
11. Bilong wanem yumi mas bilip long gutpela tok bilong Solomon?
11 Baibel Grik Septuagint i tanim dispela tok olsem: “Na tu, man bilong autim tok em i gat save, na em i skulim ol man long gutpela tingting na save; bilong yau i ken painim ol tok i swit long ol tok piksa, man bilong autim tok i skelim gut olkain tok bilong painim ol gutpela tok na long raitim gut ol tok i tru.” (The Septuagint Bible, em Charles Thomson i bin tanim tok bilong en.) Solomon i bin wok strong long putim ol tok i go daun long bel bilong ol man na bai ol i pilim tru tok bilong em. Na em i bin mekim olsem long ol gutpela tok, na ol tok bilong kirapim tru tingting bilong ol man na helpim ol. Ol tok bilong em long Baibel, em spirit holi i bin helpim em long raitim, olsem na yumi no ken holim tupela tingting—yumi ken bilip long ol samting em i bin kisim save long en na long ol gutpela tok em i bin raitim.—2 Timoti 3:16, 17.
12. Long tok bilong yu yet, bai yu stori olsem wanem long tok bilong Solomon long Saveman 12:11, 12?
12 Long taim bilong Solomon ol i no gat rot long prinim ol buk olsem nau ol i save mekim, tasol planti buk i stap. Ol man i mas ting olsem wanem long ol dispela kain buk? Solomon i tok: “Tok bilong ol saveman i olsem ol stik i gat sap, em ol wasman i holim bilong stiaim ol [“bulmakau,” NW ]. Na sapos saveman i bungim ol gutpela tok long wanpela buk, bai dispela tok i stap longtaim, olsem ol nil i pas strong long plang. God, wasman bilong yumi olgeta, i bin givim ol dispela tok long yumi. Pikinini bilong mi, mi laik tokim yu long wanpela samting moa. Ol man i save raitim planti buk, na dispela kain wok i no gat pinis bilong en. Na sapos yu wok oltaim long stadi, bai skin bilong yu i les olgeta. Olsem na yu mas lukaut long dispela pasin.”—Saveman 12:11, 12.
13 Tok bilong ol man i gat gutpela tingting na save bilong God i olsem dispela kain stik i gat sap bilong stiaim o kirapim ol bulmakau. Olsem wanem tok bilong ol dispela man i kain olsem stik i gat sap? Ol i kirapim ol man i kaunim o harim tok bilong Baibel long wokabaut i go na bihainim stret ol dispela gutpela tok ol i bin kaunim o harim. Na tu, ol man i save “bungim ol gutpela tok,” em ol savetok bilong helpim tru ol man, ol dispela man i kain olsem “nil i pas strong long plang.” Ating dispela i stret, long wanem, ol gutpela tok bilong ol kain man olsem i makim olsem ol i bihainim tingting bilong Jehova na em inap strongim na helpim ol man i kaunim o harim tok bilong God. Sapos yu wanpela papa o mama i stap aninit long God, yu mas wok strong long skulim pikinini bilong yu long dispela kain save, na wok long putim long tingting na bel bilong em.—Lo 6:4-9.
14 Tasol taim Solomon i stori long ol buk, bilong wanem em i tok olsem? Taim yumi skelim tok bilong Jehova long Baibel, dispela i winim ol planti planti buk bilong dispela graun i kamapim tingting bilong ol man tasol. Planti tingting olsem em tingting bilong Satan. (2 Korin 4:4) Olsem na pasin bilong “wok oltaim long stadi” long ol buk bilong dispela graun i no inap helpim gut ol man inap long olgeta taim bihain. Na planti bilong ol dispela kain buk inap bagarapim yumi long ol samting bilong spirit. Olsem Solomon, yumi mas tingim gut long bel ol tok bilong Baibel i tok long i stap bilong yumi. Dispela bai strongim bilip bilong yumi na yumi bai go klostu moa long Jehova. Sapos yumi lusim bikpela hap taim tumas long kaunim ol narapela buk o lusim taim long ol narapela rot bilong kisim save, dispela inap mekim na skin bilong yumi i les olgeta. Na sapos ol dispela kain buk i save kamapim tingting bilong ol man bilong dispela graun na i pait wantaim gutpela tingting na save bilong God, ol dispela buk inap bagarapim bilip bilong yumi long God na ol laik bilong em. Olsem na yumi no ken lusim tingting olsem ol gutpela tok bilong helpim ol man long taim bilong Solomon na long taim bilong yumi, em ol tok i save kamapim gutpela tingting na save bilong dispela wanpela “wasman,” em God Jehova. Em i bin kamapim ol 66 liklik buk bilong Baibel, na ol dispela buk i mas stap olsem nambawan bikpela samting yumi laik kaunim. Baibel na ol gutpela buk samting bilong ‘gutpela wokboi,’ ol i helpim yumi long “save gut long God.”—Sindaun 2:1-6.
Olgeta Wok God i Laik Bai Yumi Mekim
15. (a) Bai yu stori olsem wanem long tok bilong Solomon long “namba wan samting long laip bilong yumi man”? (b) Yumi mas mekim wanem sapos yumi laik inapim wok God i laik bai yumi mekim?
15 Dispela saveman Solomon em i tingting gut long ol wok samting em i bin skelim, na nau em i tok: “Bilong pinisim olgeta toktok, mi laik tok olsem, namba wan samting long laip bilong yumi man i olsem. Yumi mas aninit [olsem pret] long God tasol na bihainim ol lo bilong em. God bai i kotim yumi long olgeta pasin yumi bin mekim, em ol gutpela pasin na ol pasin nogut na ol pasin hait.” (Saveman 12:13, 14) Sapos yumi pret long Bikpela Man bilong wokim yumi na daun long em, dispela bai lukautim yumi, na ating famili bilong yumi tu, na bai yumi no ken mekim pasin longlong em yumi yet na famili bilong yumi inap kisim planti pen na hevi long en. Sapos yumi laik kisim gutpela tingting na save, orait pastaim yumi mas aninit long Jehova olsem pret long em—dispela i gutpela pasin. (Song 19:9; Sindaun 1:7) Sapos yumi gat gutpela save na tingting em Baibel i as bilong en na yumi bihainim tok bilong en long olgeta samting, orait wok bilong God bai stap olsem “namba wan samting long laip bilong yumi.” I no olsem yumi ken raitim wanpela lista long olgeta wok yumi mas mekim, nogat. Samting yumi mas mekim i olsem: Taim yumi mas stretim ol hevi i save kamap, yumi mas wok long painim ol tok bilong Baibel bilong soim rot long yumi, na long olgeta taim yumi mas mekim ol samting long pasin God i laikim.
16 Yumi mas save olsem Jehova i save lukim olgeta samting. (Sindaun 15:3) Em “bai kotim yumi long olgeta pasin yumi bin mekim.” Tru tumas, God Antap Tru bai skelim olgeta samting, ol samting i stap hait long ai bilong man tu. Taim yumi save long ol dispela samting, dispela inap kirapim yumi long wok strong long bihainim ol lo bilong God. Tasol bikpela samting i mas kirapim yumi long mekim olsem, em pasin bilong laikim tru Papa bilong yumi long heven, long wanem, aposel Jon i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jon 5:3) Na ol lo bilong God i bilong helpim yumi na bai yumi ken kisim laip oltaim, olsem na i stret yumi bihainim ol dispela lo, na sapos yumi mekim olsem yumi bihainim gutpela tingting tu. Dispela i no givim hevi long ol man i save laikim tru Bikpela Man bilong wokim olgeta samting. Ol i laik inapim wok God i laik bai ol i mekim.
Inapim Olgeta Wok Yu Mas Mekim
17. Yumi bai mekim wanem sapos yumi gat bikpela laik long inapim olgeta wok God i laik bai yumi mekim?
17 Sapos yumi gat gutpela tingting na yumi gat bikpela laik long inapim olgeta wok God i laik bai yumi mekim, yumi bai bihainim ol lo bilong em, na yumi bai pret long mekim ol samting em i no laikim. Tru tumas, “sapos man i laik kamap saveman em i mas pret long Bikpela,” na ol man i bihainim ol lo bilong em ol i gat “gutpela tingting.” (Song 111:10; Sindaun 1:7) Olsem na yumi mas bihainim gutpela tingting na bihainim tok bilong Jehova long olgeta samting. Dispela em i bikpela samting long nau, long wanem, King Krais Jisas i stap, na de bilong em long mekim kot long ol man olsem Jas God i bin makim, em i klostu.—Matyu 24:3; 25:31, 32.
18. Yumi bai kisim wanem samting sapos yumi inapim olgeta wok God Jehova i laik bai yumi mekim?
18 Long nau, God i wok long skelim pasin bilong yumi olgeta wan wan. Olsem wanem? Yumi save tingim ol samting bilong spirit, o yumi bin larim ol pasin bilong dispela graun i mekim na yumi no pas gut moa wantaim God? (1 Korin 2:10-16; 1 Jon 2:15-17) Maski yumi yangpela o lapun, yumi mas mekim olgeta samting yumi inap mekim bilong amamasim Bikpela Man bilong wokim yumi. Sapos yumi bihainim tok bilong Jehova na bihainim ol lo bilong em, yumi bai sakim ol samting bilong dispela graun i laik pinis, em ol samting i no gat as bilong en. Na yumi ken tingting long kisim laip oltaim oltaim long nupela taim God i tok promis long kamapim. (2 Pita 3:13) Em ol gutpela samting tru bai painim olgeta man i save inapim olgeta wok God i laik bai ol i mekim!
Bai Yu Bekim Olsem Wanem?
◻ I gat wanem as na yu bai tok, olgeta samting i no olsem samting nating?
◻ Bilong wanem wanpela yangpela Kristen i mas beten na tingim gut wok holi bilong God?
◻ I no gutpela sapos yumi “wok oltaim long stadi” long wanem ol kain buk?
◻ “Namba wan samting long laip bilong yumi man” em wanem samting?
7. Bilong wanem yumi mas bung oltaim bilong mekim lotu?
10. Bilong wanem saveman Solomon inap givim gutpela tingting long yumi bilong helpim yumi long tingim Bikpela Man bilong wokim yumi?
13. Olsem wanem tok bilong ol man i gat gutpela tingting na save bilong God i olsem stik i gat sap bilong kirapim ol bulmakau? Husat i olsem “nil i pas strong long plang”?
14. (a) I no gutpela sapos yumi “wok oltaim long stadi” long wanem ol kain buk? (b) Wanem buk i mas stap olsem nambawan bikpela samting yumi laik kaunim? Bilong wanem?
16. Jehova bai mekim wanem taim em i skelim ol man long kot?
[Piksa long pes 20]
Long ol man i save mekim wok bilong Jehova, i no olsem olgeta samting i no gat as bilong en
[Piksa long pes 23]
Baibel i no olsem planti buk bilong dispela graun —Baibel i save givim nupela strong long yumi na i helpim yumi