Wanpela Bikpela Toksave

LONG pinis bilong miting bilong olgeta yia bilong Sosaiti Was Taua bilong Pensilvenia long Oktoba 7, 2000, siaman John E. Barr bilong Gavening Bodi i mekim wanpela bikpela toksave. Dispela toksave i skruim sampela tok moa long ol tok Theodore Jaracz na Daniel Sydlik i bin mekim paslain long dispela.​—⁠Lukim pes 12-16 na 28-31 bilong dispela nius.

Brata Barr i tokaut long wanpela bikpela samting, olsem: “ ‘Wokboi i gat gutpela tingting’ na Gavening Bodi bilong en i bin kisim wok i bikpela samting tru, winim wok ol koporesen gavman i orait long en i bin kisim. Wok bilong olgeta wan wan koporesen olsem i stap long lo pepa bilong ol, tasol ol samting ol inap mekim i gat mak bilong en. Tasol Bikpela bilong yumi, Jisas Krais, em i bin makim lain gutpela wokboi long lukautim olgeta ‘samting bilong em,’ olsem ol samting bilong Kingdom hia long graun.”​—⁠Matyu 24:​45-47.

Brata Barr i stori long Pensilvenia koporesen olsem: “Kirap long taim ol i kamapim dispela koporesen long 1884, Sosaiti Was Taua bilong Pensilvenia i bin mekim bikpela wok insait long lain bilong yumi long nau. Tasol em i wanpela koporesen tasol em gavman i orait long en, em lain ‘wokboi i gat gutpela tingting’ i ken mekim wok long en taim em i mas mekim olsem.”

Long tok bilong ol, Brata Sydlik na Jaracz i kamapim olsem wok bilong lain “wokboi i gat gutpela tingting” long lukautim ol samting bilong Bikpela long graun, i no pasim ol long larim ol man bilong lain “arapela sipsip” long mekim sampela wok bilong lukautim koporesen. (Jon 10:16) Na tu, Baibel i no gat wanpela lo i tok ol i mas kisim ol dairekta bilong ol koporesen ol Witnes Bilong Jehova i save yusim, long lain Kristen God i bin makim long spirit holi, nogat.

Brata Barr i tokim ol brata sista olsem i no longtaim i go pinis na sampela bilong Gavening Bodi Bilong Ol Witnes Bilong Jehova em ol i bin stap olsem ol dairekta na ofisa long ol koporesen gavman i orait long en​—⁠em ol koporesen dispela lain “wokboi i gat gutpela tingting” i save mekim wok long ol long Amerika​—⁠ol i bin lusim ol dispela wok long laik bilong ol yet. Ol i makim ol brata bilong lain arapela sipsip​—⁠em ol inap bilip long ol​—⁠long kisim ples bilong ol.

Dispela em i wanpela gutpela samting tru. Dispela i mekim na Gavening Bodi i ken lusim bikpela hap taim moa long redim kaikai bilong spirit, na long lukautim ol brata long olgeta hap long ol samting bilong spirit.

Long pinis bilong tok, siaman i tokim ol brata sista olsem: “Ol i bin makim ol wasman i gat save long lukautim ol wok bilong ol koporesen, . . . tasol olgeta ol i wok aninit long Gavening Bodi na em i stiaim ol long ol samting bilong spirit. . . . Yumi olgeta i beten askim Jehova long blesim wok bilong yumi long mekim laik bilong em, bilong litimapim gutpela nem bilong em.”