Husat Inap Tekewe Yumi Long Sori Bilong God?
“Yumi save laikim ol arapela, long wanem, God i bin laikim yumi pastaim.”—1 JON 4:19.
1, 2. (a) Bilong wanem em i bikpela samting long yumi mas save narapela i laikim yumi tru? (b) Em i bikpela samting moa long husat i mas laikim yumi tru?
OLSEM WANEM? Em i bikpela samting long yu long save olsem narapela i laikim yu tru? Kirap long taim ol man i pikinini yet i go inap long ol i bikpela pinis, ol i stap gutpela taim narapela i laikim ol tru. Ating yu bin lukim wanpela mama i holim bebi bilong em long gutpela pasin sori. Maski wanem samting i kamap, bebi i lukluk long pes bilong mama i smail long em, na bebi i stap bel isi long han bilong mama i laikim em tumas. O ating yu tingim taim yu yangpela yet na ol hevi bilong ol yangpela i painim yu. (1 Tesalonaika 2:7) Ating sampela taim yu no save yu laikim wanem samting o yu pilim olsem wanem, tasol em i bikpela samting long save olsem papa na mama i laikim yu tru! Taim yu save olsem yu inap kamapim olgeta kain hevi na askim bilong yu long ol, dispela i bin helpim yu tru, a? Em nau, long laip olgeta bilong yumi em i wanpela bikpela samting long yumi save olsem narapela i laikim yumi tru. Dispela i mekim na yumi no ting yumi samting nating tasol.
2 Pasin bilong papamama long laikim tru pikinini bilong ol long olgeta taim, dispela i mekim na pikinini bai kamap gut na kisim gutpela na stretpela tingting. Tasol taim yumi save olsem Papa bilong yumi long heven, Jehova, em i laikim yumi tru, dispela em i bikpela samting moa bilong helpim yumi long stap gut long ol samting bilong spirit na ol samting yumi pilim long bel. Sampela man em ol i save ritim dispela nius, ating papamama bilong ol i no bin laikim tru ol. Sapos dispela samting i bin painim yu, yu no ken bel hevi. Maski papamama i no bin mekim gutpela pasin sori long yu, God i mekim olsem.
3. Olsem wanem Jehova i helpim lain bilong em long save olsem em i laikim ol tru?
3 Long rot bilong profet Aisaia, Jehova i tok olsem wanpela mama inap “lusim tingting” long bebi bilong em, tasol Jehova i no inap lusim tingting long lain bilong em. (Aisaia 49:15) Devit tu i tok: “Maski papa na mama i givim baksait long mi, Bikpela bai i lukautim mi.” (Song 27:10) Dispela i strongim tru bel bilong yumi, a? Maski sindaun bilong yu i wanem kain, sapos yu dediket pinis long God Jehova, orait oltaim yu mas tingim olsem pasin bilong em long laikim yu tru i winim tru pasin bilong wanpela man long laikim yu!
Stap Insait Long Pasin Sori Bilong God
4. Olsem wanem ol Kristen long taim bilong ol aposel i save olsem God i laikim ol tru?
4 Wanem namba wan taim yu bin kisim save long pasin sori bilong Jehova? Ating samting i bin kamap long yu i wankain olsem i bin kamap long ol Kristen long taim bilong ol aposel. Namba 5 sapta bilong pas Pol i raitim long ol Rom, i stori gut long olsem wanem ol sinman i bin stap longwe long God ol i kisim save long pasin sori bilong Jehova. Ves 5 i tok: “God i givim pinis Holi Spirit long yumi, na pasin bilong God bilong laikim tru ol man, em Holi Spirit i bin kapsaitim long bel bilong yumi.” Long ves 8 Pol i tok moa: “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.”
5. Wanem samting i bin helpim yu long pilim tru bikpela pasin sori bilong God?
5 Na olsem tasol, taim yu harim tok i tru bilong Baibel na yu kirap bilip long en, spirit holi bilong Jehova i kirap stiaim bel bilong yu. Long dispela rot yu kirap pilim tru bikpela samting Jehova i bin mekim taim em i salim Pikinini bilong em bilong i dai na helpim yu. Olsem na Jehova i helpim yu long save em i laikim tru ol manmeri. Maski mama i karim yu olsem wanpela sinman i stap longwe long Jehova, em i stretim rot bilong ol man i ken kamap stretpela man na kisim laip oltaim. Taim yu kisim save long dispela samting, ating yu pilim tru long bel, a? Ating bel bilong yu i kirap tru long laikim tumas Jehova.—Rom 5:10.
6. Bilong wanem sampela taim yumi inap pilim olsem yumi stap longwe liklik long Jehova?
6 Taim pasin sori bilong Papa bilong yu long heven i pulim yu i kam long em na yu stretim sindaun bilong yu bambai em i ken orait long en, orait yu dediketim laip bilong yu long God. Nau yu stap wanbel wantaim em. Tasol olsem wanem? Sampela taim yu pilim olsem yu stap longwe liklik long Jehova? Dispela inap painim yumi olgeta. Tasol oltaim yu mas tingim olsem God i no save senisim pasin bilong em. Pasin sori bilong em i stap oltaim olsem san i save stap, em oltaim san i save hatim graun na salim lait i kam. (Malakai 3:6; Jems 1:17) Tasol pasin bilong yumi inap senis, maski em i bilong sotpela taim tasol. Taim graun bilong yumi i tanim tanim na raunim san, wanpela hap bilong graun i stap long tudak. Na olsem tasol, sapos yumi givim baksait long God, maski yumi mekim olsem liklik tasol, yumi inap pilim olsem yumi stap longwe long em na yumi no pas gut wantaim em. Yumi inap mekim wanem bilong stretim dispela samting?
7. Olsem wanem pasin bilong skelim yumi yet inap helpim yumi long stap insait long sori bilong God?
7 Sapos yumi pilim olsem yumi no stap insait tru long sori bilong God, yumi mas askim yumi yet olsem: ‘Mi save pilim tru pasin sori bilong God? Isi isi mi wok long i go longwe long God bilong pasin sori, na sampela pasin bilong mi i soim olsem bilip bilong mi i no strong moa? Mi save tingting long ol samting “bilong olpela bel,” na mi no tingim tumas ol “pasin bilong Holi Spirit”?’ (Rom 8:5-8; Hibru 3:12) Sapos nau yumi stap longwe long Jehova, yumi inap stretim dispela samting na pas gut gen wantaim em. Jems i tokim yumi: “Yupela i mas i go klostu tru long God, na em bai i kam klostu tru long yupela.” (Jems 4:8) Bihainim dispela tok bilong Jut: “Oltaim yupela i mas larim bilip bilong yupela i strongim bel bilong yupela, em dispela gutpela bilip God yet i bin givim long yupela. Na oltaim yupela i mas prea long strong bilong Holi Spirit. God i save laikim yupela tru, na yupela i mas i stap klostu long em na larim em i laikim yupela oltaim.”—Jut 20, 21.
God Bai Laikim Yumi, Maski Sindaun Bilong Yumi i Senis
8. Wanem ol senis inap kamap wantu tasol long sindaun bilong yumi?
8 Ol samting bilong dispela graun inap senisim i stap bilong yumi. King Solomon i tok, “taim nogut i save painim yumi olgeta.” (Saveman 9:11) Wantu tasol sindaun bilong yumi inap senis olgeta. Wanpela de skin bilong yumi i stap strong, na long de bihain bikpela sik i kisim yumi. O i luk olsem yumi inap holim wok mani bilong yumi inap sampela yia samting, tasol long de bihain yumi no gat moa wok mani. Wantu tasol wanpela yumi laikim em tru em inap i dai. Ol Kristen i sindaun long wanpela kantri i gat bel isi long en, na wantu tasol ol man i kirap birua tru long ol. Ating ol i sutim tok giaman long yumi, na long dispela as yumi karim sampela hevi. Em nau, ol senis inap painim sindaun bilong yumi.—Jems 4:13-15.
9. Bilong wanem i gutpela yumi skelim sampela ves bilong Rom sapta 8?
9 Taim sampela samting i kamap na i mekim yumi bel hevi, yumi inap pilim olsem yumi stap wanpis na yumi ting olsem God i no save laikim yumi moa. Dispela samting inap painim yumi olgeta, olsem na i gutpela yumi skelim gut ol tok i mekim gut bel bilong man, em aposel Pol i raitim long Rom sapta 8. Ol dispela tok i bilong ol Kristen em God i bin makim long spirit holi. Tasol ol i stret tu long ol arapela sipsip em God i kolim ol olsem stretpela man na pren bilong em, olsem em i bin kolim Abraham paslain long taim bilong ol Kristen.—Rom 4:20-22; Jems 2:21-23.
10, 11. (a) Sampela taim ol birua i save sutim wanem ol tok long lain bilong God? (b) Bilong wanem kain tok giaman olsem i no bikpela samting tumas long ol Kristen?
10 Ritim Rom 8:31-34. Pol i tok: “Sapos God i helpim yumi, orait husat bai i birua long yumi?” Tru, Satan na ol man nogut bilong dispela graun bilong em ol i birua long yumi. Ol birua inap sutim ol tok giaman long yumi, na ol inap mekim olsem long kot tu. Ol i sutim tok long sampela papamama Kristen na tok ol i no laikim pikinini bilong ol yet, long wanem, ol i no larim ol dokta i mekim ol samting i brukim lo bilong God, o ol i no larim pikinini i insait long sampela amamas em lotu haiden i as bilong en. (Aposel 15:28, 29; 2 Korin 6:14-16) Ol i sutim tok giaman long sampela Kristen na tok ol i bikhet long gavman, long wanem, ol i no kilim i dai ol man long taim bilong pait o insait long wok politik. (Jon 17:16) Sampela birua i bin kamapim ol tok giaman long TV na ol nius samting na tok olsem ol Witnes Bilong Jehova i wanpela liklik lain lotu nogut em inap bagarapim ol man.
11 Tasol yu no ken lusim tingting olsem, long taim bilong ol aposel ol man i bin tok: “Long olgeta ples, ol manmeri i save mekim tok nogut long dispela nupela lain i bin kamap namel long yumi Juda.” (Aposel 28:22) Tasol ol tok giaman ol man i sutim long ol Kristen i no bikpela samting tumas, a? Ol trupela Kristen i bilip long ofa bilong Krais, na long dispela as God i kolim ol stretpela manmeri. I no gat as na Jehova bai lusim pasin bilong laikim ol man i lotu long em taim em i givim pinis nambawan gutpela presen long ol—em gutpela Pikinini bilong em. (1 Jon 4:10) Krais i kirap bek long matmat na em i stap long han sut bilong God, na em i wok long mekim ol samting bilong helpim ol Kristen. Olsem na husat inap tok olsem ol tok Krais i mekim bilong sambai long lain bilong em i no tru, o tok olsem God i no laikim tru ol man i stap gut long em? I no gat wanpela man inap mekim olsem!—Aisaia 50:8, 9; Hibru 4:15, 16.
12, 13. (a) Wanem ol samting i no inap tekewe yumi long sori bilong God? (b) Satan i laik kamapim wanem samting taim em i givim ol hevi long yumi? (c) Bilong wanem ol Kristen inap winim tru Satan?
12 Ritim Rom 8:35-37. Sapos yumi yet i wok long stap insait long sori bilong God, yu ting i gat wanpela man o wanpela samting inap tekewe yumi long sori bilong Jehova na Pikinini bilong em, Krais Jisas? Satan inap mekim wok long lain bilong em long graun bilong givim planti hevi long ol Kristen. Insait long wan handet yia i go pinis, ol man i bin birua tru long planti brata na sista Kristen bilong yumi long planti kantri. Long sampela hap long nau, ol brata bilong yumi i gat hevi bilong mani. Sampela ol i hangre o ol i sot long ol klos. Satan i laik kamapim wanem samting taim em i givim ol dispela hevi long ol? Wanpela samting em i laik kamapim i olsem: Em i laik daunim pasin bilong lotu tru long Jehova. Satan i laik bai yumi ting God i no laikim yumi moa. Tasol olsem wanem? Dispela em i tru?
13 Pol i kolim tok bilong Song 44:22, na olsem em i bin mekim, yumi tu i save stadi long Tok Bilong God. Yumi save olsem nem bilong God i mekim na ol dispela samting nogut i painim yumi ol “sipsip” bilong em. I gat wok bilong mekim nem bilong God i stap holi na kamapim olsem i stret em i stap Nambawan Bos. Ol dispela bikpela tok i mekim na God i larim ol traim i painim yumi—i no olsem em i no laikim yumi moa. Nogat. Maski wanem bikpela hevi i painim yumi, pasin bilong God long laikim tru lain bilong em—na yumi olgeta wan wan—i no senis. Maski sampela hevi i daunim yumi, bai yumi win sapos yumi stap gut long God. Yumi save God i laikim yumi tru, na dispela i save strongim na helpim yumi.
14. Bilong wanem Pol i bilip tru olsem God i laikim tru ol Kristen, maski ol bikpela hevi i painim ol?
14 Ritim Rom 8:38, 39. Wanem samting i helpim Pol long bilip tru olsem i no gat wanpela samting inap tekewe ol Kristen long sori bilong God? Ating ol samting i bin painim Pol taim em i autim tok i strongim em long bilip olsem ol hevi i no inap senisim pasin bilong God long laikim yumi tru. (2 Korin 11:23-27; Filipai 4:13) Na tu, Pol i save long ol samting Jehova bai mekim bilong kamapim laik bilong em bilong i stap oltaim, na pasin em i bin mekim long lain bilong Em long bipo. Yu ting indai inap daunim pasin bilong God long laikim tru ol man i bin stap gut long wok bilong em? Nogat tru! God i tingim ol man i bin stap gut long em, na bihain em bai kirapim ol bek long matmat.—Luk 20:37, 38; 1 Korin 15:22-26.
15, 16. Kolim ol samting i no inap mekim na God bai lusim pasin bilong laikim tru ol gutpela wokboi bilong em.
15 Maski wanem bikpela hevi inap painim yumi long nau—olsem wanpela bagarap i daunim strong bilong skin bilong yumi, o yumi kisim sik bilong i dai, o bikpela hevi bilong mani—i no gat wanpela samting inap pinisim pasin bilong God long laikim tru lain bilong em. Ol strongpela ensel, olsem wanpela ensel i bikhet na i kamap Satan, i no inap mekim na Jehova i no laikim moa ol gutpela wokman bilong em. (Jop 2:3) Ol gavman inap tambuim wok bilong lain bilong God, kalabusim ol, mekim nogut long ol, na tok ol i no laik bai ol Witnes i stap. (1 Korin 4:13) Pasin bilong ol gavman long nolaik tru long yumi inap stiaim ol man long birua long yumi, tasol dispela i no inap mekim na King bilong heven na graun bai lusim yumi, nogat.
16 Yumi ol Kristen, olsem na i no gat as na yumi mas pret long ol samting Pol i kolim olsem ol “samting nau i stap,” olsem ol hevi na ol samting i save kamap long dispela graun, o ol “samting bai i kamap bihain.” Olgeta dispela samting i no inap pinisim pasin bilong God long laikim tru lain bilong em. Maski ol gavman samting na ol spirit nogut i pait long yumi, pasin bilong God long laikim tru yumi i strongim yumi. Olsem Pol i tok, ol “samting bilong antap o samting bilong daunbilo” i no inap pasim God long laikim yumi. Em nau, maski i gat ol samting i laik daunim yumi o bosim strong yumi, tasol ol i no inap tekewe yumi long sori bilong God, na tu, i no gat wanpela man o spirit inap pasim God long pas gut wantaim ol wokman i stap gut long em. Pasin bilong God long laikim yumi tru i no inap pinis, em bai stap oltaim.—1 Korin 13:8.
Amamas Oltaim Long Pasin Sori Bilong God
17. (a) Bilong wanem pasin bilong God long laikim yumi i “nambawan tru,” winim laip? (b) Olsem wanem yumi ken soim olsem yumi tingim tru pasin sori bilong God?
17 Pasin sori bilong God i bikpela samting long yu o nogat? Yu gat wankain tingting olsem bilong Devit? Em i tok: “Laip bilong dispela graun i gutpela, tasol marimari bilong yu i nambawan tru. . . . Bai mi tenkyu long yu na litimapim nem bilong yu inap mi dai. Bai mi litimapim han bilong mi na prea long yu.” (Song 63:3, 4) Tru tumas, yu ting ol samting dispela graun inap givim long yumi i winim pasin bilong God long laikim yumi na stap olsem gutpela pren bilong yumi? Olsem: Yu ting gutpela wok mani i winim pasin bilong stap bel isi na amamas em yumi save kisim taim yumi pas gut wantaim God? (Luk 12:15) Ol traim i bin painim sampela Kristen na ol i mas wokim tingting na skelim ol samting ol bai mekim, olsem ol bai lusim Jehova o ol bai stap gut long em na ol i mas i dai. Dispela samting i bin painim planti Witnes Bilong Jehova long kalabus nogut bilong ol Natsi long taim bilong Namba Tu Pait. Klostu olgeta brata Kristen bilong yumi ol i stap gut long God, na ol i redi long i dai tu sapos ol i mas mekim olsem bilong stap gut long God. Ol man i stap insait long sori bilong God ol i ken bilip tru olsem bihain ol bai kisim laip oltaim, em samting ol man bilong dispela graun i no inap givim long yumi. (Mak 8:34-36) Tasol i no laip oltaim tasol bai yumi kisim.
18. Bilong wanem yumi gat bikpela laik tru long kisim laip oltaim?
18 Tru, yumi no inap i stap oltaim sapos Jehova i no stap bilong helpim yumi, tasol sapos Man bilong wokim yumi i no stap, bai yumi les tru long i stap oltaim. I stap bilong yumi bai i no gat as bilong en. Jehova i bin givim gutpela wok long lain bilong em bilong mekim long dispela taim bilong las de. Olsem na yumi ken bilip tru olsem taim Jehova, em Bikpela Man bilong kamapim tru ol samting em i laik mekim, i givim laip oltaim long yumi, bai yumi gat planti gutpela samting bilong mekim na kisim save long en. (Saveman 3:11) Maski yumi bai kisim save long kain kain samting insait long planti tausen yia, bai yumi no inap save olgeta long “ol gutpela pasin bilong God na tingting na save bilong en.”—Rom 11:33.
Papa i Laikim Yu Tru
19. Jisas Krais i givim wanem tok long ol disaipel bilong strongim ol taim em i laik lusim ol?
19 Long Nisan 14, 33 C.E., em laspela taim Jisas i bung wantaim ol 11-pela gutpela aposel, na Jisas i tokim ol long planti samting bilong strongim ol long karim ol hevi i laik painim ol. Ol i bin stap gut long Jisas taim ol hevi i bin painim em, na ol i bin pilim olsem Jisas i laikim ol tru. (Luk 22:28, 30; Jon 1:16; 13:1) Orait nau Jisas i tokim ol: ‘Papa yet i laikim yupela.’ (Jon 16:27) Ating ol dispela tok i bin helpim ol disaipel long save olsem Papa bilong ol long heven i laikim ol tru!
20. Yu tingting strong long mekim wanem samting? Yu inap bilip tru long wanem samting?
20 Planti man i stap laip nau ol i bin stap gut long wok bilong Jehova inap planti yia pinis. Taim pinis bilong pasin nogut bilong dispela graun i no kamap yet, planti traim moa bai painim yumi. Tasol yu no ken larim ol traim na hevi i mekim na yu kisim tupela tingting, olsem God i laikim yu o nogat. Mipela i laik strongim tru dispela tok: Jehova i save laikim yu tru. (Jems 5:11) Olsem na yumi olgeta wan wan i mas wok yet long i stap gut long God na bihainim ol tok bilong em. (Jon 15:8-10) Long olgeta taim rot i op yumi mas litimapim nem bilong em. Yumi mas strongim tingting bilong yumi long wok yet long i go klostu long Jehova long rot bilong beten na stadi long Tok bilong em. Maski wanem samting bai painim yumi long tumora, sapos yumi wok strong long mekim ol samting Jehova i orait long en, bai yumi stap bel isi na save tru olsem em i laikim yumi tru.—2 Pita 3:14.
Bai Yu Bekim Olsem Wanem?
• Husat i mas laikim yumi bambai yumi ken stap gut long ol samting bilong spirit na ol samting yumi pilim long bel?
• Wanem ol samting i no inap mekim na Jehova bai lusim pasin bilong laikim tru ol wokboi bilong em?
• Sapos Jehova i laikim tru yumi, olsem wanem dispela i “nambawan tru,” winim laip?
[Ol Piksa long pes 13]
Sapos yumi pilim olsem God i no laikim yumi moa, yumi ken stretim dispela samting
[Piksa long pes 15]
Pol i save long as na ol man i birua long em