Litimapim Nem Bilong Jehova ‘Namel Long Ol Man i Bung Bilong Lotu’
OL MITING Kristen i gutpela samting tru Jehova i givim bilong helpim lain bilong em long i stap strong long ol samting bilong spirit. Taim yumi go long olgeta miting, yumi kamapim klia olsem yumi amamas long dispela gutpela samting Jehova i givim yumi. Na tu, taim yumi go long ol miting yumi inap long “kirapim [ol brata] long laikim ol arapela na mekim ol gutpela pasin long ol,” dispela em i wanpela bikpela rot bilong soim olsem yumi laikim ol brata bilong yumi. (Hibru 10:24; Jon 13:35) Tasol olsem wanem yumi inap kirapim ol brata bilong yumi long ol miting?
Tokaut Long Ai Bilong Ol Man
King Devit i tok long em yet olsem: “Bai mi autim tok long ol brata bilong mi long strongpela wok yu bin mekim. Taim ol i bung bilong lotu bai mi go namel long ol na litimapim nem bilong yu. Long bikpela bung bilong lotu bai mi litimapim nem bilong yu.” “Bai mi tenkyu long yu namel long planti lain manmeri i bung wantaim. Tru tumas, bai mi litimapim nem bilong yu namel long bikpela lain manmeri.” “Bikpela, mi bin autim gutnius long taim ol planti lain manmeri bilong yu i kam bung. . . . Mi no ken pasim maus.”—Song 22:22, 25; 35:18; 40:9.
Long taim bilong aposel Pol, taim ol Kristen i bung wantaim bilong lotu, ol tu ol i save mekim ol kain tok olsem bilong Devit bilong soim bilip bilong ol long Jehova na litimapim nem bilong em. Long dispela rot ol i strongim bel bilong narapela, na ol i kirapim ol brata long laikim tru ol narapela na mekim ol gutpela pasin long ol. Nau long taim bilong yumi, planti handet yia bihain long taim bilong Devit na Pol, yumi save “de” bilong Jehova “i kam klostu.” (Hibru 10:24, 25) Dispela graun bilong Satan klostu nau bai kisim bagarap, na ol hevi i wok long i go bikpela tru. Long dispela taim nau, winim olgeta taim bipo, yumi “mas sanap strong.” (Hibru 10:36) Ol brata bilong yumi tasol inap long strongim yumi long stap strong.
Nau, olsem long bipo, i gat rot bilong ol man i bilip i ken tokaut long bilip bilong ol ‘namel long ol lain i bung bilong lotu.’ Wanpela rot olgeta inap mekim olsem, em long rot bilong bekim ol askim ol i givim long ol miting bilong kongrigesen. No ken ting pasin bilong bekim tok i no inap kamapim gutpela samting. Olsem: Ol bekim i kamapim olsem wanem yumi inap karim o abrusim ol hevi, ol dispela kain bekim i save strongim ol brata long tingting strong long bihainim ol stiatok bilong Baibel. Ol bekim i stori long ol Baibel ves em ol paragraf i no kamapim tok bilong en o ol bekim i kamapim ol tok ol brata i bin painim taim ol i mekim stadi bilong ol yet, ol inap kirapim ol narapela long kirap mekim gut stadi bilong ol yet.
Yumi save olsem taim yumi bekim tok dispela bai helpim yumi yet na ol narapela na dispela i mas kirapim yumi olgeta Witnes Bilong Jehova long lusim pasin bilong pret. Em i bikpela samting long ol elda na ol kongrigesen sevent i bekim tok long ol miting, long wanem, ol i mas go pas long insait long miting na go long ol miting. Tasol olsem wanem sapos wanpela i pilim olsem em i hatwok long bekim tok long ol miting?
Ol Samting Yu Ken Mekim Bilong Helpim Yu
Tingim olsem pasin bilong bekim tok em hap bilong lotu bilong yumi long Jehova. Wanpela sista Kristen i sindaun long Jemani em i stori long tingting bilong em long ol tok em i save bekim, na em i tok: “Long rot bilong bekim tok mi soim olsem Satan i no inap pasim mi long tokaut long bilip bilong mi.” Wanpela brata i baptais nau tasol na em i save go long dispela wankain kongrigesen, em i tok: “Bilong bekim tok mi save beten planti taim.”
Redi gut. Sapos yu no redim ol buk bilong stadi pastaim, bai yu hatwok long bekim tok na ol bekim yu kamapim bai i no gutpela tumas. I gat ol tok inap helpim yu long bekim tok long ol miting bilong kongrigesen i stap long buk Skul Tiokratik Bilong Autim Tok, pes 70.a
Putim mak long bekim wanpela tok long ol wan wan miting. Dispela i makim olsem yu mas redim sampela bekim, long wanem, taim yu putim han planti taim brata i lukautim stadi inap makim yu long bekim tok. Yu ken tokim em paslain long miting long wanem paragraf yu laik bekim tok long en. Dispela em i gutpela rot sapos yu kirap nau tasol long bekim tok long ol miting. Ating yu pret liklik long putim han “namel long planti lain manmeri i bung wantaim,” tasol sapos yu makim pinis wanpela paragraf bilong bekim na brata i lukautim dispela hap bilong miting i save long dispela, em bai wet long lukim han bilong yu na dispela bai kirapim yu long bekim tok.
Kirap hariap long bekim tok. Wanpela wok i hatwok long mekim i no inap kamap isi sapos yu wok long surikim i go long narapela taim bilong mekim. Sapos yu kirap hariap long bekim tok long miting, dispela inap helpim yu. Taim yu bekim pinis namba wan taim nau bai i no hatwok moa long yu bekim namba tu o namba tri taim long miting.
Makim wanpela sia i stret. Sampela i pilim olsem taim ol i sindaun long fran em i isi long bekim tok. I no gat planti samting i pulim ai bilong ol na brata i lukautim stadi inap lukim han bilong ol. Sapos yu mekim olsem, orait tingting long bekim tok strong na bai olgeta inap harim, moa yet sapos kongrigesen yu stap long en i no save yusim wokabaut maikrofon.
Putim gut yau. Dispela bai helpim yu na bai yu no kamapim gen wankain bekim olsem bilong narapela. Na tu, bekim bilong ol narapela inap kirapim yu long tingim wanpela skripsa o tok em yu inap skruim long bekim em narapela i kamapim. Sampela taim, yu ken kamapim wanpela sotpela ekspiriens i stret wantaim samting yupela i stori long en. Ol kain bekim olsem i gutpela.
Lain long bekim long toktok bilong yu yet. Taim yu ritim bekim long buk em yupela i stadi long en, dispela i kamapim klia olsem yu painim bekim i stret, na ating em i wanpela gutpela rot long bihainim bilong helpim yu long kirap bekim tok. Tasol taim yu bekim long toktok bilong yu yet, dispela i makim olsem yu klia gut long samting stadi i toktok long en. I no olsem yu mas kolim ol wan wan tok stret i stap long ol buk na nius bilong yumi taim yu bekim tok. Ol Witnes Bilong Jehova i no save kolim nating tasol ol tok i stap long ol buk na nius bilong ol, nogat.
Kamapim ol bekim i stret long stori. No ken kamapim ol bekim em stadi i no toktok long en o ol bekim i no helpim ol bikpela tok bilong stadi. Dispela i makim olsem bekim bilong yu i mas stret long samting em stadi i stori long en. Long dispela rot ol bekim bai helpim ol tok bilong spirit yupela i stadi long en i kamap gutpela.
Tingting long strongim narapela. Bikpela as na yumi mas bekim tok em bilong strongim ol narapela, olsem na yumi no ken mekim ol tok i no strongim ol. Na tu, taim yu bekim tok, no ken karamapim paragraf olgeta na nau i no gat hap tok i stap bilong ol narapela i ken bekim. Ol longpela bekim o bekim i hatwok long kisim i save mekim na bikpela tok bilong paragraf i no kamap klia. Ol sotpela bekim i gutpela, na ol bai kirapim ol nupela man long mekim ol sotpela bekim ol i bin redim.
Wok Bilong Ol Brata i Save Lukautim Ol Miting
Brata i lukautim miting i gat bikpela wok bilong strongim ol narapela long bekim tok. Em i save soim olsem em i tingim tru olgeta bekim ol brata sista i bekim taim em i putim gut yau na lukluk long brata o sista i bekim tok na em i no bisi long mekim narapela samting nabaut. I no gutpela sapos em i no putim gut yau na nau em i kamapim gen wankain tok brata o sista i bekim pinis o kolim wanpela askim narapela i bekim pinis!
Na tu, i no gutpela sapos em i wok long kolim tok i klostu wankain long bekim em wanpela i kamapim pinis na i olsem em i laik tok dispela bekim i no stret tumas. Tasol sapos em i kamapim sampela tok o askim i opim rot long ol brata sista i ken kamapim sampela tok i helpim bikpela tok bilong paragraf, dispela i gutpela. Kain olsem, ‘Olsem wanem yumi ken bihainim dispela pasin long kongrigesen bilong yumi?’ o, ‘Wanem skripsa long paragraf i helpim bekim em brata o sista i kolim pinis?’
I gutpela long em i mekim tok amamas long ol nupela man o ol man bilong sem taim ol i bekim tok long miting. Em i ken mekim olsem long dispela man yet bihain long miting, na long dispela rot man i no ken sem na brata i lukautim stadi i gat rot long kamapim sampela tok bilong helpim em sapos em i ting i stret long mekim olsem.
Long taim ol man i toktok wantaim, sapos wanpela tasol i mekim olgeta toktok na ol narapela nogat, dispela i no kirapim narapela long toktok. Ol man i harim tok bilong em bai pilim olsem i no gat wok long ol i kamapim tingting bilong ol. Na ol bai i no givim bel tumas long harim tok bilong em. Kain samting olsem inap kamap taim brata i lukautim miting em yet i wok long stori stori na karamapim ol tok. Tasol brata i lukautim miting inap kirapim tingting bilong ol brata sista long tingim ol samting em stadi i stori long en long rot bilong kamapim sampela askim moa. Em i ken yusim ol dispela kain askim wan wan taim.
Brata i lukautim miting i no ken makim hariap wanpela i putim han pastaim. Sapos em i makim hariap namba wan man i putim han dispela inap mekim na ol narapela husat i mas tingting gut pastaim bilong bekim tok inap bel hevi. Sapos em i wet liklik, em inap long givim rot long wanpela i no bekim tok yet long bekim. Na tu, em bai bihainim gutpela tingting na i no makim ol liklik pikinini long bekim tok long ol samting em ol i no klia gut long en.
Olsem wanem sapos wanpela i kamapim bekim i no stret? Brata i lukautim miting i no ken mekim dispela brata o sista sem. Maski ol bekim i no stret, ol dispela bekim i gat sampela tok i tru long en. Em i ken kolim gen wanpela hap bilong dispela bekim i stret, o kolim askim gen long narapela rot, o kamapim narapela askim, na long dispela rot em i ken stretim dispela bekim na i no mekim brata o sista i sem.
Bilong kirapim ol brata sista long bekim tok, brata i lukautim miting i no ken kamapim ol kain askim olsem, ‘Sampela narapela i gat bekim moa ol i laik kamapim?’ Dispela askim, ‘Husat i no bekim yet? Dispela em i laspela taim nau yu gat bilong bekim tok!’ Em i gutpela tasol, dispela bai i no inap kirapim wanpela long kamapim bekim bilong em. Ol brata sista i no ken pilim nogut olsem ol i no bin bekim tok long kirap bilong stadi. Brata i lukautim miting i mas kirapim ol brata sista long bekim tok, long wanem, pasin bilong bekim tok i soim pasin bilong laikim narapela. Na tu, taim em i makim pinis wanpela long bekim tok, i gutpela em i no ken tok olsem, “Bihain long dispela brata i bekim tok, bai yumi harim bekim bilong brata . . . , na sista . . . na i go olsem.” Em i mas putim gut yau pastaim long bekim bilong brata o sista na bihain em i ken skelim sapos i mas i gat sampela bekim moa o nogat.
Pasin Bilong Bekim Tok i Gutpela
Pasin bilong go long ol miting em i bikpela samting long ol samting bilong spirit. Pasin bilong bekim tok long ol miting em i gutpela samting. Taim yumi insait long dispela gutpela rot bilong litimapim nem bilong Jehova ‘namel long ol man i bung bilong lotu,’ yumi bihainim pasin bilong Devit na yumi bihainim tok bilong Pol. Taim yumi bekim tok long ol miting dispela i kamapim klia olsem yumi laikim ol brata bilong yumi na yumi insait long bikpela kongrigesen bilong Jehova. De bilong Jehova i kam klostu, olsem na yumi laik i stap long ol miting na i no long ol narapela hap, a?—Hibru 10:25.
[Futnot]
a Ol Witnes Bilong Jehova i wokim.
[Ol Piksa long pes 20]
Pasin bilong putim gut yau na bekim tok long ol miting ol i bikpela hap bilong ol miting Kristen
[Piksa long pes 21]
Brata i lukautim miting i save soim olsem em i tingim tru olgeta bekim