Olsem Wanem? Ol Man Inap Pinisim Pasin Bilong i Stap Rabis?
PLANTI milion manmeri i no bin pilim hevi bilong i stap rabis. Ol i no bin hangre o kol na skin i guria taim ol i slip. Tasol planti bilong ol i save sori long ol lain i stap rabis na ol i save mekim bikpela wok bilong helpim ol.
Tasol long ol hap we i gat pait insait long kantri yet, na ol bikpela tait wara, na bikpela san na no gat ren, na ol narapela hevi, ol manmeri i stap rabis yet. Ol dispela samting i save givim bikpela hevi long ol man long Afrika i save wok gaden. Sampela i mas lusim ples bilong ol na go sindaun long ol biktaun o go stap long narapela kantri olsem refiuji. Na sampela i save lusim ples kanaka na go sindaun long ol biktaun, long wanem, ol i ting dispela bai helpim i stap bilong ol.
Tasol taim ol taun i gat planti man tumas, pasin bilong i stap rabis i save kamap. I no gat hap graun bilong planim kaikai. I hatwok long painim wok mani. Ol dispela samting i save mekim na planti man i kamap raskol. Ol man long taun i save singaut long narapela i mas helpim ol, tasol ol gavman i no inap pinisim hevi bilong i stap rabis. Nius The Independent bilong London i stori long wanpela ripot em Yunaitet Nesen i bin kamapim long Novemba 2003, olsem: “Namba bilong ol man i stap hangre long olgeta hap bilong graun i wok long i go bikpela. . . . Long nau i gat 842 milion manmeri i sot long kaikai, na dispela lain tu i wok long i go bikpela—long olgeta wan wan yia inap olsem 5 milion manmeri moa i stap hangre.”
Sampela taim, brens ofis bilong ol Witnes Bilong Jehova long Saut Afrika i save kisim pas long ol man i stap rabis. Wanpela man long Bloemfontein i raitim pas na i tok: “Mi no gat wok mani na mi save stil taim rot i op. Sapos mi no stil, mipela i save hangre inap sampela de—na kol nogut tru. Tru tru i no gat wok mani i stap. Planti manmeri i save raun long rot bilong painim wok mani na kaikai. Mi save long sampela em ol i wok long painim kaikai insait long ol dram pipia. Sampela i kilim i dai ol yet. Planti manmeri olsem mi yet i save bel hevi na pilim olsem i no gat rot. I luk olsem i no gat wanpela gutpela samting bilong wetim i kamap bihain. Olsem wanem? Dispela God i bin wokim yumi bilong yumi mas kaikai na pasim klos, em i no luksave long dispela samting?”
I gat ol gutpela bekim bilong ol askim bilong dispela man. Ol dispela bekim i stap long Tok Bilong God, em Baibel, olsem stori i kamap bihain long dispela bai kamapim klia.