Wanpela Pas i Kam Long Ripablik Dominika
“Mi No Bin Pilim Dispela Kain Pasin Laikim Bipo”
EM NAMBA wan taim Niurka i mekim wanpela tok bilong Baibel long kongrigesen bilong mipela long dispela wik. Em i redim dispela tok long rot bilong raitim ol tok long rait Brel bilong ol aipas, na em i kolim kolim gen ol tok bambai tok i ken i stap long tingting bilong em. Mi sindaun long pletfom wantaim em, mi kamap olsem meri i gat laik long harim tok i tru bilong Baibel. Ol toktok bilong mi i go long maikrofon na i kamap long liklik spika em i putim long yau. Taim mipela i pinis, ol odiens i amamas tru na paitim han bikpela tru na em inap harim ol. Smail bilong em i kamapim klia bikpela amamas bilong em. Mi tu i amamas. Tru tumas, wok misineri i save kamapim gutpela samting tru!
Mi tingim namba wan taim mi bungim Niurka, em tupela yia i go pinis. Mipela i ron 30 minit long wanpela rot i gat das long en na em namba wan taim mi bin lukim Niurka. Em i sindaun long veranda bilong wanpela haus bilong ples—ol i wokim long diwai na brik, na kapa bilong haus em i ros. Yu inap smelim, na tu, harim singaut bilong ol meme, ol rabit, na ol dok. Niurka i daunim het i stap, i luk olsem em i stap wanpis na em bel hevi. Maski em i gat 34 krismas tasol, em i luk olsem meri i gat bikpela krismas tru.
Mi holim sol bilong em isi tasol na em i apim het, tasol em i no lukim mipela, long wanem, em i bin kamap aipas inap 11-pela yia i go pinis. Mi kolim strong nem bilong mi na bilong poroman em mi raun autim tok wantaim. Bihain mipela i kisim save olsem, Niurka gat sik Marfan syndrome—em wanpela sik em i kisim long papa o mama na dispela i givim bikpela pen na hevi long em. Na tu, Niurka i gat sik daiabitis na oltaim ol i mas sekim mak bilong suga long blut bilong em.
Taim mi putim Baibel long han bilong em, em i save em Baibel na em i tok em i bin amamas long ritim Baibel paslain long em i kamap aipas. Tasol olsem wanem mi inap skulim dispela tarangu meri long ol tok bilong Baibel em inap givim nupela strong long em? Em i save pinis long ol leta alfabet, olsem na mi putim long han bilong em ol leta A,B,C, em ol i wokim long plastik. I no longtaim na em save long ol i wanem wanem leta. Bihain em i pilim han bilong mi taim mi mekim sain na em i lain na save long wanem sain i makim wanem leta long tokples sain bilong Amerika. Isi isi em i lainim sampela sain moa. Mi yet i bin kirap nau tasol long lain long dispela tok ples, olsem na mi mas lusim planti aua bilong redim olgeta wan wan stadi. Tasol mitupela Niurka wantaim i gat strongpela laik long lainim tokples sain, olsem na mitupela i lain hariap.
Taim wanpela lain bilong helpim ol man i sot i bin givim long Niurka ol masin bilong harim tok bilong helpim em long harim gut tok, dispela i bin helpim em tru. Maski ol dispela masin i bilong bipo, ol i helpim em gut tru. Winim tenpela yia samting em i bin stap aipas, na yaupas tu, na i olsem em i stap wanpis. Tasol spirit bilong Jehova i bin opim bel na tingting bilong em na em i kisim save, pasin laikim, na em inap wetim gutpela samting i kamap bihain. I no longtaim, Niurka i mekim wok long stik wokabaut na em i kirap raun long ol haus bilong ol neiba bilong em na autim tok bilong Baibel long ol.
Niurka i stadi long Baibel wantaim anti na tupela kasen bilong em. Em i redim gut ol tok na em i putim long tingting ol tok bilong wan wan stadi paslain long em i mekim stadi. Ol sumatin bilong em i save ritim paragraf bilong stadi na Niurka i save kamapim ol askim long rot bilong ritim rait Brel long buk bilong em. Poroman bilong em long autim tok i kamapim ol bekim bilong sumatin long Niurka long rot bilong kolim strong ol tok i go insait long yau bilong em o long rot bilong wokim han na bai Niurka i ken pilim.
Olgeta long kongrigesen i save helpim Niurka na ol i mekim ol tok bilong strongim em. Sampela brata Kristen bilong em i save kisim em i go long ol miting na ol kibung. Ol narapela i save poromanim em long taim bilong autim tok. I no longtaim i go pinis, Niurka i tokim mi: “Mi no bin pilim dispela kain pasin laikim bipo.” Em i tingting long kisim baptais long kibung distrik bai kamap.
Taim mipela i tanim i go insait long rot i go long haus bilong Niurka, mipela i lukim em i sindaun long san long veranda na apim het na i smail i stap. Mi askim em long as na em i smail. Em i tok: “Mi wok long tingting long taim bihain we graun bai kamap wanpela gutpela ples paradais. Na mi wok long piksaim long tingting olsem mi stap pinis long dispela Paradais.”
[Piksa long pes 25]
Niurka wantaim sampela bratasista long kongrigesen bilong mipela long fran bilong Haus Kingdom
[Piksa long pes 25]
Niurka i stori wantaim ol narapela long samting em i kisim save long en