Bikpela Lain Arapela Sipsip i Preisim God na Krais

 1. Wanpela tok i kamap long wanpela kibung long 1935 i mekim wanem long wanpela yangpela man?

WANPELA yangpela man i gat 18 krismas taim em i kisim baptais long yia 1926. Papamama bilong em ol i Sumatin Bilong Baibel, em nem bilong ol Witnes Bilong Jehova long dispela taim. Ol i gat tripela pikinini man na tupela pikinini meri, na ol i skulim olgeta long bihainim pasin bilong Jisas Krais na mekim wok bilong Jehova God. Dispela yangpela man i save kisim bret na wain long Kaikai Bilong Bikpela long olgeta yia wankain olsem ol narapela Sumatin Bilong Baibel long dispela taim i save mekim. Tasol tingting bilong em i senis olgeta long rot bilong wanpela tok, nem bilong en, “Traipela Lain Manmeri.” Brata J. F. Rutherford i mekim dispela tok long wanpela kibung i kamap long Washington D.C., Amerika long 1935. Ol Sumatin Bilong Baibel i kisim wanem save long dispela kibung?

 2. Brata Rutherford i bin kamapim klia wanem nupela save bilong tok i tru long tok bilong em?

² Long tok bilong em, Brata Rutherford i kamapim klia ol manmeri husat bai insait long dispela “traipela lain tru” (King Jems Pisin Baibel) o “bikpela lain manmeri” em Reveselen 7:9 i stori long ol. Paslain long dispela, ol i bilip olsem dispela lain ol i nambatu lain bilong go long heven em ol i no bin stap gut long God. Brata Rutherford i yusim Baibel long stori gut olsem dispela bikpela lain em God i no makim ol na ol i no inap go long heven, nogat, ol i arapela lain sipsipb bilong Krais em ol bai winim “traipela hevi tru” na stap laip oltaim long graun. (Rev. 7:14) Jisas i tok: “Mi gat ol arapela sipsip, na ol i no bilong dispela banis. Mi mas bringim ol tu i kam, na ol bai putim yau long nek bilong mi. Na olgeta bai kamap olsem wanpela lain sipsip i gat wanpela wasman.” (Jon 10:16) Dispela lain manmeri em ol i gat pasin olsem bilong sipsip em ol Witnes Bilong Jehova em ol i stap gut long God na ol i bilip olsem ol bai stap laip oltaim long Paradais long graun. (Mat. 25:31-33, 46) Nau yumi ken skelim hau dispela nupela save bilong tok i tru bilong Baibel i bin senisim laip bilong planti manmeri bilong God na laip bilong dispela yangpela man i gat 18 krismas.—Sng. 97:11; Prov. 4:18.

3-4. Long kibung bilong 1935, planti tausen manmeri i luksave long wanem samting long bilip bilong ol, na bilong wanem?

³ Wanpela taim bilong amamas tru i bin kamap long dispela kibung taim brata bilong mekim tok i tokim odiens olsem: “Yupela ol manmeri husat i bilip long kisim laip oltaim long graun, inap yupela sanap plis?” Wanpela aiwitnes i tok, winim 50 pesen bilong dispela 20,000 manmeri i bung, ol i sanap. Orait Brata Rutherford i tok: “Lukim! Traipela lain tru!” Nau ol i amamas tru na paitim han inap longpela taim. Ol manmeri i sanap, ol i luksave olsem God i no makim ol long kisim laip long heven. Ol i save olsem holi spirit bilong God i no makim ol. Long neks de bilong kibung, inap 840 nupela Witnes i kisim baptais, na planti bilong ol em ol i bilong ol arapela sipsip.

⁴ Bihain long dispela tok, yangpela brata em yumi bin stori pinis long em na planti tausen narapela, ol i stop long kisim bret na wain long Kaikai Bilong Bikpela. Wanpela brata i kamapim tingting em planti i gat, em i tok: “Memorial bilong 1935 em laspela taim mi kisim bret na wain. Mi luksave olsem Jehova i no yusim holi spirit bilong em long makim mi long kisim laip long heven, tasol mi bilip long stap laip oltaim long graun na mekim wok bilong kamapim Paradais long graun.” (Rom 8:16, 17; 2 Kor. 1:21, 22) Kirap long dispela taim na i kam, namba bilong bikpela lain manmeri i go antap tru na ol i amamas long wok wantaim lain remnanc em God i makim.

 5. Jehova i gat wanem tingting long ol bratasista em ol i stop long kisim bret na wain bilong Memorial?

⁵ Jehova i gat wanem tingting long ol bratasista em ol i stop long kisim bret na wain bilong Memorial bihain long 1935? Olsem wanem sapos wanpela baptais Witnes long nau i save kisim bret na wain long Kaikai Bilong Bikpela, tasol bihain em i luksave olsem tru tru God i no bin makim em? (1 Kor. 11:28) Sampela i kisim bret na wain bikos ol i no kliagut long bilip bilong ol. Tasol sapos ol i luksave na ol i tokaut long popaia bilong ol, na ol i stop long kisim bret na wain, na ol i givim bel yet long mekim wok bilong Jehova, Em bai orait long ol olsem ol i bilong lain arapela sipsip. Maski ol i no inap kisim bret na wain, ol i ken kam yet long bung bilong Memorial bikos ol i pilim tru gutpela pasin Jehova na Jisas i mekim long ol.

 6. Jisas i tokim ol ensel long mekim wanem?

⁶ Klostu nau traipela hevi tru bai kamap, olsem na i gutpela yumi skelim gen ol tok em Revelesen sapta 7 i mekim long ol Kristen God i makim na bikpela lain arapela sipsip. Jisas i tokim ol ensel long holim strong yet 4-pela win bilong kamapim bagarap. Ol i no ken lusim ol dispela win bilong bagarapim graun inap long ol i putim pinis mak long poret bilong ol Kristen God i makim—em taim Jehova i tok ol i bin stap gut long Em. (Rev. 7:1-4) Ol brata bilong Krais em God i makim, ol bai mekim wok king na pris wantaim Jisas long heven na dispela i olsem pe bilong pasin bilong ol long stap gut long God. (Rev. 20:6) Olgeta lain i insait long famili bilong God long heven, ol bai amamas tru long lukim lain 144,000 i kisim gutpela pe bilong ol long heven.

 7. (a) Olsem Revelesen 7:9, 10 i kamapim, Jon i lukim husat long visen? (b) Ol i mekim wanem? (Lukim fran pes piksa.)

⁷ Bihain long Jon i stori long 144,000 king na pris, Jon i lukim narapela lain em “bikpela lain manmeri” i abrusim Armagedon. Dispela lain i no wankain long fes lain, ol i planti tru na i no gat man inap kaunim namba bilong ol. (Ritim Revelesen 7:9, 10.) “Ol i werim ol longpela waitpela klos,” na dispela i makim olsem ol i bin “stap longwe olgeta long pasin doti bilong dispela graun” bilong Satan na ol i stap gut long God na Krais. (Jems 1:27) Ol i singaut strong olsem ol i kisim laip bikos long ol samting Jehova na Jisas—Pikinini Sipsip bilong God—i bin mekim. Ol i wok long holim ol lip bilong diwai pam na dispela i soim olsem ol i luksave olsem Jisas em King em Jehova i bin makim.—Skelim Jon 12:12, 13.

 8. Revelesen 7:11, 12 i tok wanem long lain famili bilong Jehova long heven?

⁸ Ritim Revelesen 7:11, 12. Wanem samting i kamap long heven? Jon i lukim lain famili bilong Jehova long heven i amamas tru taim bikpela lain manmeri i kam na preisim God. Lain famili bilong Jehova long heven bai amamas tru long lukim truim bilong dispela visen taim bikpela lain manmeri i winim taim bilong traipela hevi tru.

 9. Olsem Revelesen 7:13-15 i tok, bikpela lain manmeri i mekim wanem wok?

⁹ Ritim Revelesen 7:13-15. Jon i tok bikpela lain manmeri i “wasim longpela klos bilong ol long blut bilong Pikinini Sipsip na klos bilong ol i kamap waitpela.” Dispela i makim olsem ol i gat klinpela maus bilong bel na ol i stap stretpela manmeri long ai bilong Jehova. (Ais. 1:18) Ol i dediket na baptais na ol i gat strongpela bilip long ofa bilong Jisas na ol i pas gut wantaim Jehova. (Jon 3:36; 1 Pita 3:21) Olsem na ol i winim mak bilong sanap long ai bilong sia king bilong God na “long san na long nait ol i mekim wok bilong em” hia long graun. Long nau tu, ol i insait long bikpela wok bilong autim gutnius bilong Kingdom na kamapim ol disaipel—ol i putim wok bilong Kingdom i stap nambawan samting long laik bilong ol yet.—Mat. 6:33; 24:14; 28:19, 20.

10. (a) God i tok em bai mekim wanem long bikpela lain manmeri? (b) Ol bai lukim truim bilong wanem tok promis?

¹⁰ Bikpela lain manmeri i winim taim bilong traipela hevi tru i ken save tru olsem God i tok em bai wok yet long lukautim ol, bikos “Man i sindaun long sia king bai karamapim ol long haus sel bilong em.” Tok promis em lain arapela sipsip i bin wet long lukim truim bilong en, em bai kamap tru: “[God] bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen.”—Rev. 21:3, 4.

11-12. (a) Olsem Revelesen 7:16, 17 i kamapim, bikpela lain manmeri bai kisim wanem ol gutpela blesing? (b) Lain arapela sipsip i mas mekim wanem long Memorial, na bilong wanem?

¹¹ Ritim Revelesen 7:16, 17. Long nau, sampela lain bilong Jehova ol i no gat kaikai na ol i stap hangre bikos long hevi bilong mani o bikos long pait insait long kantri na woa. Ol narapela i stap long kalabus bikos long bilip bilong ol. Tasol bikpela lain manmeri i amamas tru long save olsem taim ol i winim dispela haptaim we God i pinisim pasin nogut bilong nau, oltaim bai ol i gat planti kaikai na planti gutpela tok i kam long Jehova. Taim God i pinisim graun bilong Satan wantaim ol pasin nogut bilong en, bikpela lain manmeri bai abrusim dispela belhat bilong Jehova “i hat nogut tru” we em bai kapsaitim antap long ol man nogut. Taim traipela hevi tru i pinis, Jisas bai bringim ol man bilong kisim laip long graun i go long “wara bilong laip [oltaim].” Tingim: Bikpela lain manmeri i gat wanpela gutpela bilip tru. Long planti bilion manmeri i bin stap laip, dispela lain tasol bai i no inap dai!—Jon 11:26.

¹² Lain arapela sipsip i tenkyu long Jehova na Jisas long gutpela bilip ol i gat! Tru God i no makim ol long kisim laip long heven, tasol dispela i no makim olsem ol i samting nating, nogat, ol i gutpela samting long ai bilong Jehova. Bikpela lain manmeri na liklik lain wantaim i ken preisim God na Krais. Wanpela rot bilong mekim olsem em long go long bung bilong Kaikai Bilong Bikpela.

13-14. Wai na olgeta manmeri i mas bung long Memorial bilong tingim dai bilong Krais?

¹³ Insait long ol yia i go pinis, wanpela man tasol namel long olgeta 1 tausen man i kam bung long Memorial i save kisim bret na wain. Long planti kongrigesen i no gat wanpela i save kisim bret na wain. Planti manmeri i kam bung long Memorial, ol i bilip long kisim laip long graun. Sapos olsem, wai na ol i kam bung long Kaikai Bilong Bikpela? Ol i kam long bung bilong Memorial long wankain risen olsem ol man i save go long weding bilong wanpela pren. Ol i go long weding bikos ol i laik soim olsem ol i laikim na sapotim dispela tupela man na meri i marit. Olsem tasol, lain arapela sipsip i kam long Memorial bikos ol i laikim na sapotim Krais na ol Kristen God i makim. Lain arapela sipsip i go long Memorial bilong soim olsem ol i tingim tru ofa bilong Jisas, em wanpela sakrifais we i opim rot long ol inap kisim laip oltaim long graun.

¹⁴ Narapela bikpela risen na lain arapela sipsip i go long Memorial em long bihainim tok bilong Jisas. Taim Jisas i kirapim dispela bung wantaim ol gutpela aposel bilong em, em i tokim ol: “Yupela i mas mekim olsem yet bilong tingim mi.” (1 Kor. 11:23-26) So ol i wok yet long mekim bung bilong Kaikai Bilong Bikpela taim hap lain bilong ol Kristen God i makim i stap laip yet long graun. Na lain arapela sipsip i save singautim olgeta manmeri long kam bung wantaim ol long Memorial.

15. Yumi inap mekim wanem bilong preisim God na Krais long Memorial?

¹⁵ Long Memorial, yumi ken preisim God na Krais long rot bilong singsing na beten. Tok bai kamap long Memorial long dispela yia em “Pilim Tru Samting God na Krais i Bin Mekim Long Yu!” Em bai helpim yumi long pilim tru gutpela pasin bilong Jehova na Krais. Taim yumi ol lain i bung i holim bret na wain, yumi bai tingim gen samting bret na wain i makim—em bodi na blut bilong Jisas. Yumi bai tingim olsem Jehova i larim Pikinini bilong em i dai bilong helpim yumi na bai yumi inap kisim laip. (Mat. 20:28) Olgeta man husat i laikim Papa bilong yumi long heven na Pikinini bilong em, ol bai kam long Memorial.

16. Wanem samting i mekim na liklik lain na bikpela lain ol i wankain?

¹⁶ Long sampela samting, ol Kristen God i makim na ol arapela sipsip i wankain—Jehova i laikim tupela lain wantaim. Tupela lain wantaim i stap olsem gutpela samting long ai bilong Jehova. Em i givim wankain pe em laip bilong Pikinini bilong em long baim bek liklik lain na bikpela lain wantaim. Samting i no wankain namel long dispela tupela lain em samting ol i bilip na wet long en bai kamap bihain. Tupela lain wantaim i mas stap gut long God na Krais. (Sng. 31:23) Na tingim, holi spirit bilong God i givim wankain strong long yumi olgeta long mekim wok bilong God. Dispela i makim olsem Jehova i save givim holi spirit long yumi olgeta wan wan inap stret long mak yumi nidim, maski yumi bilong liklik lain o bikpela lain.

17. Ol Kristen God i makim i luk fowed long wanem samting?

¹⁷ Ol Kristen God i makim, ol i no bon wantaim dispela bilip bilong go long heven. God i putim dispela tingting long bel bilong ol. Ol i tingim dispela bilip bilong ol, ol i beten long dispela samting, na ol i wetim dispela taim ol bai kisim laip long heven. Ol i no save long wanem kain bodi ol bai i gat long taim ol i go long heven. (Fili. 3:20, 21; 1 Jon 3:2) Maski i olsem, ol i luk fowed olsem ol bai go bungim Jehova, Jisas, ol ensel, na ol narapela Kristen God i bin makim. Ol i wetim dispela taim ol bai kisim ples bilong ol long Kingdom bilong heven.

18. Lain arapela sipsip i luk fowed long wanem samting?

¹⁸ Lain arapela sipsip i laikim dispela bilip ol i gat olsem ol bai kisim laip oltaim long graun—em samting olgeta manmeri i gat laik long en. (Ekl. 3:11) Ol i luk fowed long dispela taim we ol bai helpim wok bilong mekim graun olgeta i kamap wanpela ples paradais. Ol i gat laik tru long dispela taim we ol i ken wokim ol haus, planim ol gaden, na kamapim na mekim bikpela long ol pikinini i gat gutpela helt. (Ais. 65:21-23) Ol i luk fowed long dispela taim we ol bai raun na lukim ol samting long graun—ol maunten, ol bikbus, na solwara—na ol bai kisim save long olgeta samting i gat laip em Jehova i bin wokim. Bikpela samting moa, ol bai amamas tru long save olsem ol bai pas gut moa wantaim Jehova na kamap gutpela pren bilong em.

19. (a) Memorial i opim rot long yumi wan wan inap mekim wanem? (b) Memorial bilong dispela yia bai kamap long wanem taim?

¹⁹ Jehova i helpim olgeta wan wan wokman bilong em husat i dediket long em long wetim gutpela samting bai kamap bihain. (Jer. 29:11) Memorial bilong indai bilong Krais i opim rot long yumi olgeta wan wan long preisim God na Krais long gutpela wok tupela i bin mekim bilong helpim yumi long kisim laip oltaim. Olsem na Memorial em i wanpela bikpela bung bilong olgeta Kristen tru long bung wantaim. Memorial bilong dispela yia bai kamap long apinun bilong Sarere, Mas 27, 2021. Long dispela yia, planti bilong yumi i stap long ol ples we yumi stap fri long mekim dispela bung. Ol narapela bai mekim dispela bung maski i gat pasin birua i stap. Sampela bai feisim hatwok bilong mekim dispela bung long haus kalabus. Jehova, Jisas, na ol Kristen God i makim em ol i kirap bek pinis, ol bai lukluk i stap taim olgeta kongrigesen, ol grup, na olgeta wan wan brata na sista i mekim dispela naispela bung bilong Memorial!