Ol Skul Yumi Kisim Long “Dispela Disaipel Em Jisas i Laikim Tumas”

 1. Yu pilim olsem wanem long pasin laikim bilong God?

APOSEL Jon i tok, “God em i pasin laikim.” (1 Jon 4:8) Dispela tok i kirapim yumi long tingim wanpela bikpela tok i tru: God em i As bilong laip na em i As bilong pasin laikim tu. Jehova i laikim yumi! Pasin laikim bilong em i mekim yumi pilim seif, amamas, na pilim olsem yumi stap gut.

 2. (a) Olsem Matyu 22:37-40 i kamapim, wanem dispela tupela bikpela lo? (b) Wai na yumi inap pilim hatwok long bihainim namba 2 lo?

² Olgeta Kristen i mas soim pasin laikim. Dispela em i wanpela lo. (Ritim Matyu 22:37-40.) Taim yumi save gut long Jehova, bai yumi pilim olsem em i isi long bihainim dispela namba 1 lo. Yumi mekim olsem bikos Jehova em i gutpela olgeta na em i save tingim tru yumi na mekim gut long yumi. Tasol ating yumi inap pilim hatwok long bihainim namba 2 lo. Wai? Bikos ol bratasista bilong yumi em ol lain yumi save stap wantaim ol long olgeta taim na ol i no gutpela olgeta. Sampela taim ol inap mekim ol tok o pasin we yumi pilim olsem ol i no tingim yumi o ol i no laikim yumi. Jehova i save olsem yumi inap bungim dispela hevi, so em i kirapim sampela man bilong raitim Baibel long raitim ol tok long as na yumi mas soim pasin laikim long narapela narapela na hau yumi ken mekim olsem. Wanpela bilong ol dispela man em Jon.—1 Jon 3:11, 12.

 3. Jon i tok wanem long pasin laikim?

³ Long ol tok Jon i raitim, em i kamapim klia olsem ol Kristen i mas soim pasin laikim. Long buk em Jon i raitim we i stori long laip bilong Jisas, em i yusim dispela tok “laikim” planti taim moa long 3-pela narapela man em ol i bin raitim Ol Gutnius. Jon i bin gat 100 krismas taim em i raitim Buk Jon na 3-pela narapela pas bilong em. Ol dispela tok em God i kirapim em long raitim i kamapim klia olsem pasin laikim i mas stiaim olgeta samting wanpela Kristen i mekim. (1 Jon 4:10, 11) Tasol sampela haptaim i lus na Jon i kisim skul long dispela samting.

 4. Yu ting Jon i soim pasin laikim long ol narapela long olgeta taim?

⁴ Taim Jon i yangpela man, em i no soim pasin laikim long olgeta taim. Olsem, wanpela taim Jisas wantaim ol disaipel bilong em i go olsem long Samaria bilong i go long Jerusalem. Sampela manmeri long wanpela liklik taun bilong ol Samaria i no laik mekim gut long ol. Jon i mekim wanem? Em i tok long askim God long salim paia i kam daun long heven na pinisim olgeta man long dispela taun! (Luk 9:52-56) Long narapela taim, Jon i no soim pasin laikim long ol narapela aposel. I luk olsem Jon na brata bilong em Jems i tokim mama bilong ol long askim Jisas long givim ol wok i gat namba long Kingdom bilong em. Taim ol narapela aposel i painimaut long samting Jems na Jon i mekim, ol i belhat nogut tru! (Mat. 20:20, 21, 24) Maski Jon i mekim ol dispela popaia, Jisas i laikim em yet.—Jon 21:7.

 5. Yumi bai stori long wanem samting long dispela atikol?

⁵ Long dispela atikol, yumi bai stori long eksampel bilong Jon na sampela tok em i raitim we i stori long pasin laikim. Taim yumi mekim olsem, yumi bai kisim skul long hau yumi ken soim pasin laikim long ol bratasista bilong yumi. Na tu, yumi bai kisim skul long wanpela bikpela samting em het bilong famili i mas mekim bilong soim olsem em i laikim famili bilong em.

 6. Olsem wanem Jehova i kamapim klia olsem em i laikim yumi?

⁶ Planti taim yumi tingim pasin laikim olsem pasin bilong mekim ol gutpela tok long ol narapela. Tasol pasin laikim tru tru i kamap ples klia long ol pasin yumi mekim. (Skelim Jems 2:17, 26.) Olsem, Jehova i laikim yumi. (1 Jon 4:19) Na em i kamapim klia pasin laikim bilong em long rot bilong ol gutpela tok i stap long Baibel. (Sng. 25:10; Rom 8:38, 39) Tasol yumi bilip tru olsem God i laikim yumi bikos long ol pasin em i mekim na i no long toktok bilong em tasol. Jon i tok: “Pasin laikim bilong God i kamap ples klia long yumi olsem: God i salim Pikinini bilong em, em pikinini tru bilong em, i kam long dispela graun bai yumi inap kisim laip long rot bilong em.” (1 Jon 4:9) Jehova i larim Pikinini em i laikim tumas i karim pen na hevi na dai bilong helpim yumi. (Jon 3:16) So yumi ken bilip tru olsem Jehova i laikim yumi.

 7. Jisas i mekim wanem bilong soim olsem em i laikim yumi?

⁷ Jisas i tokim ol disaipel bilong em olsem em i laikim ol. (Jon 13:1; 15:15) Em i soim olsem em i laikim tru ol na em i laikim yumi tu long rot bilong ol tok na pasin em i mekim. Jisas i tok: “Sapos man i lusim laip bilong em bilong helpim ol pren bilong em, dispela pasin laikim i bikpela moa winim ol arapela pasin laikim.” (Jon 15:13) Taim yumi tingim samting Jehova na Jisas i mekim bilong helpim yumi, dispela i mas kirapim yumi long mekim wanem?

 8. Tok bilong 1 Jon 3:18 i kirapim yumi long mekim wanem?

⁸ Yumi soim olsem yumi laikim Jehova na Jisas taim yumi bihainim ol tok bilong ol. (Jon 14:15; 1 Jon 5:3) Na Jisas i tokim yumi olsem yumi mas laikim narapela narapela. (Jon 13:34, 35) Yumi mas tokim ol bratasista bilong yumi olsem yumi laikim ol, na moa yet yumi mas soim olsem yumi laikim ol long ol pasin yumi mekim. (Ritim 1 Jon 3:18.) Yumi ken mekim wanem ol samting bilong soim olsem yumi laikim ol?

 9. Pasin laikim i kirapim Jon long mekim wanem?

⁹ Jon inap stap bek wantaim papa bilong em na kisim mani long wok bisnis bilong ol long kisim pis. Tasol em i no mekim olsem, em i yusim laip bilong em long helpim ol narapela long kisim save long Jehova na Jisas. Dispela disisen Jon i mekim em i no isi. Ol man i bin mekim nogut long em na long laspela haptaim bilong laip bilong em taim em i lapun tru, ol i bin kalabusim em. (Apo. 3:1; 4:1-3; 5:18; Rev. 1:9) Ol i kalabusim Jon bikos em i autim tok long Jisas, maski em i stap long kalabus em i soim olsem em i tingim ol narapela. Olsem, taim Jon i stap kalabus long ailan Patmos, em i kisim visen i kam long God na em i raitim ol dispela tok na salim i go long ol kongrigesen so ol i ken save long “ol samting i no longtaim bai kamap.” (Rev. 1:1) Na bihain taim Jon i lusim kalabus long Patmos, ating em i raitim Buk Jon we i stori long laip na wok autim tok bilong Jisas. Na tu, em i raitim 3-pela pas bilong strongim na helpim ol bratasista bilong em. Olsem wanem yu ken bihainim pasin bilong Jon long daunim laik bilong em yet?

10. Yu ken mekim wanem bilong soim olsem yu laikim ol narapela?

¹⁰ Yu ken soim olsem yu laikim ol narapela long rot bilong ol disisen yu mekim long laip bilong yu. Ol samting long graun bilong Satan bai kirapim yu long yusim taim na strong bilong yu long inapim laik bilong yu yet, na wok strong long kisim mani o kisim biknem. Maski i olsem, ol Kristen long olgeta hap bilong graun i redi long daunim laik bilong ol na lusim bikpela taim long autim gutnius na helpim planti manmeri long i go klostu long Jehova. Sampela i mekim wok fultaim long autim tok na skulim ol man.

11. Olsem wanem planti gutpela pablisa i soim olsem ol i laikim Jehova na ol bratasista?

¹¹ Planti Kristen i mas wok mani fultaim so ol i ken sapotim ol yet na famili bilong ol. Maski i olsem, ol dispela gutpela pablisa i save sapotim oganaisesen bilong God long kain kain rot. Olsem, sampela i helpim wok bilong disasta rilif, ol narapela i helpim wok bilong ol konstraksen projek, na olgeta i ken givim donesen bilong sapotim wok i kamap long olgeta hap bilong graun. Ol i mekim ol dispela samting bikos ol i laikim God na ol narapela. Long olgeta wan wan wik, yumi soim olsem yumi laikim ol bratasista bilong yumi taim yumi go long ol miting na insait long bekim tok. Maski yumi pilim taiet, yumi save go long ol dispela miting. Maski yumi gat pasin bilong sem, yumi save bekim tok long ol miting. Na maski yumi olgeta i gat ol hevi bilong yumi yet, yumi save strongim ol narapela paslain na bihain long ol miting. (Hib. 10:24, 25) Yumi amamas tru long ol wok ol bratasista bilong yumi i mekim!

12. Wanem narapela rot Jon i soim olsem em i laikim ol bratasista bilong em?

¹² Jon i soim olsem em i laikim ol bratasista bilong em taim em i tok amamas long ol, na tu, taim em i givim ol tok bilong stretim ol. Olsem, long ol pas Jon i raitim, em i tok amamas long ol bratasista long ol gutpela wok ol i mekim, na tu, em i givim ol strongpela tok long ol i no ken mekim sin. (1 Jon 1:8–2:1, 13, 14) Olsem tasol, yumi mas tok amamas long ol bratasista bilong yumi long ol gutpela wok ol i mekim. Tasol sapos wanpela i wok long mekim pasin i no stret, yumi ken soim em olsem yumi laikim em long rot bilong givim ol tok bilong stretim em. Yumi mas strongim bel taim yumi givim tok bilong stretim wanpela pren bikos Baibel i tok ol pren tru i save sapim o stretim narapela narapela.—Prov. 27:17.

13. Yumi no ken mekim wanem?

¹³ Sampela taim, yumi soim olsem yumi laikim ol bratasista bilong yumi long ol samting yumi no mekim. Olsem, yumi no bel hevi hariap long ol tok ol i mekim. Tingim samting i kamap long laspela haptaim bilong Jisas long stap long graun. Em i tokim ol disaipel bilong em olsem bilong kisim laip ol i mas kaikai bodi bilong em na dringim blut bilong em. (Jon 6:53-57) Dispela tok i mekim ol i kirap nogut na planti disaipel bilong em i lusim em—tasol ol gutpela pren bilong em ol i no lusim em, na Jon tu. Ol i stap gut long em. Ol i no kliagut long tok Jisas i mekim, na ating ol tu i kirap nogut long dispela tok. Tasol ol i no ting olsem tok bilong em i no stret na ol i bel hevi long dispela, nogat. Ol i trastim em bikos ol i save olsem em i autim tok i tru. (Jon 6:60, 66-69) Em i bikpela samting long yumi no ken bel hevi hariap long tok ol pren bilong yumi i mekim! Yumi laik givim taim long ol long kamapim klia tok bilong ol.—Prov. 18:13; Ekl. 7:9.

14. Wai na yumi no ken kisim pasin bilong heitim narapela?

¹⁴ Jon i kirapim yumi tu long yumi no ken heitim ol bratasista bilong yumi. Sapos yumi no bihainim dispela tok, yumi opim rot long Satan inap stiaim tingting bilong yumi. (1 Jon 2:11; 3:15) Dispela samting i bin kamap long sampela Kristen long taim bilong ol aposel. Satan i wok strong tru long mekim ol manmeri bilong God i heitim narapela narapela na em i laik pinisim pasin wanbel namel long ol. Long taim Jon i raitim ol pas bilong em, ol man em ol i bihainim wankain pasin olsem Satan ol i stap insait long kongrigesen. Olsem, Diotrefes i kamapim pasin bilong brukim lain insait long wanpela kongrigesen. (3 Jon 9, 10) Em i no rispektim ol elda em gavening bodi i salim i kam. Taim ol brata long kongrigesen i laik mekim gut long ol narapela em Diotrefes i no laikim ol, Diotrefes i laik rausim ol dispela brata long kongrigesen. Em i mekim pasin antap! Long nau tu, Satan i laik tru long mekim ol manmeri bilong God i heitim narapela narapela na em i laik pinisim pasin wanbel namel long ol. Yumi no ken tru larim pasin bilong heitim narapela i pinisim pasin wanbel namel long yumi.

15. Ol het bilong famili i mas tingim wanem samting?

¹⁵ Wanpela bikpela samting em het bilong famili i mas mekim bilong soim olsem em i laikim famili bilong em, em long givim ol samting bilong skin em famili i nidim. (1 Tim. 5:8) Tasol em i mas tingim olsem, ol samting bilong skin i no inap helpim famili bilong em long sait bilong bilip. (Mat. 5:3) Jisas i stap gutpela eksampel long ol het bilong famili. Olsem Gutnius Bilong Jon i kamapim, taim Jisas i stap long diwai pos, em i tingim yet famili bilong em. Jon i sanap wantaim mama bilong Jisas, em Maria, long hap we Jisas i hangamap long en. Maski Jisas i karim bikpela pen, em i stretim rot long Jon i ken lukautim Maria. (Jon 19:26, 27) Jisas i gat ol bratasista em ol inap lukautim Maria long ol samting bilong skin, tasol i luk olsem i no gat wanpela bilong ol i kamap disaipel bilong Jisas yet long dispela taim. So Jisas i laik bai i gat wanpela i lukautim Maria long ol samting bilong skin, na tu, long ol samting bilong bilip.

16. Jon i mekim wanem ol bikpela wok?

¹⁶ Jon i mekim planti bikpela wok. Em i wanpela aposel, olsem na em i go pas long mekim wok autim tok. Na tu, ating em i marit, so em i mas lukautim famili bilong em long ol samting bilong skin na ol samting bilong bilip. (1 Kor. 9:5) Ol het bilong famili long nau inap kisim wanem skul long em?

17. Wai na em i bikpela samting long het bilong famili i mas lukautim famili bilong em long ol samting bilong bilip?

¹⁷ Wanpela brata husat i stap olsem het bilong famili em i gat planti bikpela wok bilong mekim. Olsem, em i mas givim bel long mekim gut wok mani bilong em so pasin bilong em inap givim biknem long Jehova. (Efe. 6:5, 6; Tai. 2:9, 10) Na ating em i gat wok long mekim insait long kongrigesen, olsem mekim wok sepeding na go pas long mekim wok autim tok. Long wankain taim, em i bikpela samting long oltaim em i mas stadi long Baibel wantaim meri na ol pikinini bilong em. Ol bai amamas long hatwok bilong em long helpim ol long stap gut long samting bilong skin, bel na tingting, na long sait bilong bilip.—Efe. 5:28, 29; 6:4.

18. Jon i bilip tru long wanem samting?

¹⁸ Jon i stap laip inap planti yia na em i gat planti ekspiriens. Tasol em i bungim tu kain kain hevi we inap mekim na em i kamap slek long bilip. Maski i olsem, oltaim em i wok strong long bihainim ol lo bilong Jisas, wanpela lo em olsem em i mas laikim ol bratasista bilong em. Olsem na Jon i bilip tru olsem Jehova na Jisas i laikim em na em i save olsem ol bai givim em strong long winim olgeta kain traim i painim em. (Jon 14:15-17; 15:10; 1 Jon 4:16) Satan na ol samting long graun bilong em i no pasim Jon long laikim ol bratasista bilong em na soim dispela pasin laikim long rot bilong ol tok na ol pasin bilong em.

19. Tok bilong 1 Jon 4:7 i kirapim yumi long mekim wanem, na bilong wanem?

¹⁹ Olsem Jon, yumi stap long graun em Satan i bosim, na pasin bilong heitim narapela i pulap tru long graun. (1 Jon 3:1, 10) Satan i laik bai yumi no ken laikim ol bratasista bilong yumi, tasol dispela samting i no inap kamap sapos yumi no larim em i mekim olsem. Yumi mas tingting strong long laikim ol bratasista bilong yumi, na kamapim dispela pasin long tok yumi mekim, na soim dispela pasin laikim long pasin bilong yumi. Long dispela rot yumi bai amamas long stap insait long famili bilong Jehova, na yumi bai stap amamas tru.—Ritim 1 Jon 4:7.