Yu Laik Kisim Sampela Save Moa Long Baibel?
Bilong Wanem i Gutpela Long Ritim Baibel?
I NO gat narapela buk i olsem Baibel—em i kamapim ol tok bilong God long skulim yumi. (1 Tesalonaika 2:13) Sapos yu bihainim ol tok bilong Baibel, dispela bai helpim yu tru. Bai yu laikim moa yet God na go klostu long em, em dispela Man bilong givim “olgeta gutpela samting yumi save kisim na olgeta presen i gutpela tru.” (Jems 1:17) Yu bai kisim save long pasin bilong prea long em. Long taim bilong hevi, yu inap kisim helpim i kam long God. Sapos yu stretim wokabaut bilong yu na bai i stret wantaim ol lo bilong Baibel, God bai givim laip oltaim long yu.—Rom 6:23.
Baibel i gat ol tok i tru i givim save long man. Ol man i kisim save long Baibel ol i no kalabus moa long ol tingting kranki i save stiaim wokabaut bilong planti milion manmeri. Olsem: Taim yumi save long samting tru i kamap bihain long yumi i dai, yumi no kalabus moa long pret olsem daiman bai bagarapim yumi o ol wanblut na wantok i dai pinis ol i pilim pen i stap, nogat. (Jop 14:10) Tok bilong Baibel olsem man i dai pinis bai kirap bek, dispela i save mekim gut bel bilong man em sampela long famili i dai. (Jon 11:25) Sapos yumi save long wok bilong ol ensel nogut, dispela bai helpim yumi long save olsem wanem posin na wok bilong glasman inap nogutim yumi na bilong wanem i gat planti hevi long graun.
Ol tok bilong stiaim tingting i stap long Baibel i soim olsem wanem yumi ken wokabaut long rot i helpim skin bilong yumi. Olsem: Pasin bilong mekim ol samting inap long skel, dispela bai helpim man. (1 Timoti 3:2) Pasin bilong “rausim olgeta pasin doti bilong bodi na bilong spirit,” bai helpim yumi long abrusim ol samting em inap bagarapim helt bilong yumi. (2 Korin 7:1) Wok bilong bihainim ol tok bilong God i stap long Baibel i helpim marit long stap amamas na i mekim man i pilim gutpela long i stap bilong em.—1 Korin 6:18.
Sapos yu bihainim Tok Bilong God, amamas bilong yu bai i bikpela moa. Save i stap long Baibel i helpim yumi long stap isi na wetim gutpela samting i kamap. Em i helpim yumi long kisim ol gutpela pasin olsem pasin bilong isi long narapela, laikim tru ol narapela, amamas, bel isi, helpim ol man, na bilip. (Galesia 5:22, 23; Efesus 4:24, 32) Ol dispela pasin bai helpim yumi long kamap gutpela man o meri marit, o gutpela papa o mama, o gutpela pikinini.
Olsem wanem? Sampela taim yu bin tingting long ol samting i laik kamap bihain? Ol tok profet bilong Baibel i makim olsem yumi stap long bikpela taim tru. Ol dispela tok profet i stori long ol samting i wok long kamap long nau, na tu, ol i soim olsem i no longtaim na God bai mekim dispela graun i kamap wanpela gutpela ples paradais.—KTH 21:3, 4.
Helpim Bilong Save Long Baibel
Ating yu bin traim ritim Baibel, tasol yu pilim olsem i hatwok long save gut long ol tok bilong en. Ating yu no save wanem hap long Baibel yu inap painim bekim bilong ol askim bilong yu. Sapos olsem, i no yu tasol i gat dispela hevi. Yumi olgeta mas i gat helpim bilong save gut long Tok Bilong God. Ol Witnes Bilong Jehova, long 235 kantri, ol i save skulim planti milion man long ol tok bilong Baibel. Dispela skul i fri, na ol bai amamas long helpim yu tu.
I gutpela sapos yu stadi long ol as tok bilong Baibel pastaim, na bihain wok long kisim ol bikpela save. (Hibru 6:1) Wok bilong stadi bai inapim yu long kisim ol “strongpela kaikai”—em ol strongpela tok i tru. (Hibru 5:14) Baibel i stap olsem as bilong ol dispela tok. Ol buk na nius bilong Baibel olsem liklik buk God i Laik Yumi Mas Mekim Wanem?, bai helpim yu long save gut long ol tok bilong Baibel long kain kain samting.
Yu Orait Long Lusim Hap Taim Long Olgeta Wik Bilong Kisim Save Long Baibel?
Ol i ken stretim rot bilong stadi wantaim yu long Baibel long taim na ples i stret long yu. Planti i save stadi long haus bilong ol yet. Sampela i yusim telefon na mekim stadi. Dispela stadi program i no olsem wanpela klas i gat planti pipel long en, nogat; em stadi bilong yu yet. Maski yu bin kisim bikpela skul o yu no skul, stadi bai stret long mak bilong yu. I no gat ol tes, na ol i no ken semim yu. Yu bai kisim bekim long ol askim bilong yu long Baibel, na yu bai kisim save long rot bilong i go klostu long God.
Bai yu no gat wok long baim ol long mekim Baibel stadi. (Matyu 10:8) Em i fri. Ol i amamas long stadi wantaim man i gat laik tru long kisim sampela save moa long Tok Bilong God, maski em i bilong wanem lotu o em i no gat lotu.
Husat inap insait long dispela toktok bilong Baibel? Famili olgeta bilong yu. Sampela pren husat yu laik singautim, ol tu i ken insait long en. O sapos yu laik, ol i ken mekim dispela stadi long yu wanpela tasol.
Planti i save makim wanpela aua long olgeta wik bilong stadi long Baibel. Sapos yu inap tromoi bikpela hap taim moa long mekim o yu hatwok long lusim wanpela aua olgeta, no ken wari, ol Witnes bai amamas long bihainim hap taim i gutpela long yu.
Kam Kisim Save
Mipela laik kirapim yu long toksave long ol Witnes Bilong Jehova. Wanpela rot bilong mekim olsem em yu ken salim pas long wanpela atres daunbilo. Ol bai stretim rot na bai wanpela i ken mekim Baibel stadi i no gat pe wantaim yu.
□ Salim liklik buk God i Laik Yumi Mas Mekim Wanem? long mi. Makim tok ples.
□ Plis stretim rot na bai wanpela i ken mekim Baibel stadi wantaim mi i no gat pe.
Ol tok bilong Baibel long dispela nius mipela i kisim long Buk Baibel em Baibel Sosaiti bilong Papua Niugini i wokim.