Bilip Bilong Kirap Bek i Gat Strong
“Mi lusim pinis olgeta arapela samting, . . . Mi laik save tru long Krais. Krais i bin kirap bek long matmat.”—FILIPAI 3:8-10.
1, 2. (a) Long planti yia i go pinis, wanpela pris i stori olsem wanem long ol man i dai pinis bai kirap bek? (b) Ol man bai kirap bek olsem wanem?
LONG yia 1892 samting, wanpela nius i stori long narapela kain tok em wanpela pris long Bruklin, Nu Yok, Amerika, em i bin mekim. Em i tok, taim ol man i dai pinis ol i kirap bek, God bai bungim gen na strongim gen [laip bilong] olgeta bun na mit bilong bodi bilong man, maski em i bagarap long paia o long ka samting, o wanpela animal i kaikai o em i tanim i kamap graun. Dispela pris i tok, long wanpela de i gat 24 aua long en ol han, lek, pinga, bun, rop, na skin bilong planti bilion manmeri bai pulap long win. Ol dispela hap bilong bodi bilong ol man bai wok long painim ol narapela hap bilong wan wan bodi. Bihain ol tewel bai lusim heven na bikpaia na go insait long ol dispela bodi i bin kirap bek.
2 Taim ol man i dai pinis ol i kirap bek, yumi no inap ting ol atom bilong skin bilong ol bilong bipo bai bung gen, nogat; na tu, ol man i no gat tewel. (Saveman 9:5, 10; Esekiel 18:4) Jehova, em God bilong kirapim bek ol man i dai pinis, em i no gat wok long bungim ol atom samting bilong olpela bodi bilong man. Em inap wokim nupela bodi bilong ol man i kirap bek. Jehova i bin givim strong long Pikinini bilong em, Jisas Krais, long kirapim bek ol man i dai pinis, na ol inap i stap oltaim oltaim. (Jon 5:26) Olsem na Jisas i tok: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip yet.” (Jon 11:25, 26) Em i wanpela gutpela tok promis tru! Em i strongim yumi long sanap strong na karim ol hevi, na redi long i dai tu, olsem wanpela Witnes Bilong Jehova i stap gut long em.
3. Bilong wanem Pol i mas mekim sampela tok bilong helpim bilip bilong kirap bek?
3 Dispela bilip olsem ol man i dai pinis bai kirap bek em i pait wantaim bilip olsem ol man i gat wanpela tewel i no save dai—dispela tingting i bilong wanpela saveman bilong ol Grik, em Pleto. Olsem na taim aposel Pol i autim tok long ol bikman bilong Grik long Areopagus long Atens, na em i toktok long God i bin kirapim bek Jisas, wanem samting i kamap? Baibel i tok: “Ol i harim dispela tok bilong man i kirap bek long matmat, na sampela i tok bilas long Pol.” (Aposel 17:29-34) Planti ol i bin lukim Jisas Krais bihain long taim em i kirap bek na ol i stap yet long dispela taim, na maski ol narapela i tok bilas long ol, ol i tokaut olsem Jisas i bin kirap bek long matmat. Tasol ol tisa giaman i bung wantaim kongrigesen long Korin, ol i tok Jisas i no bin kirap bek. Olsem na long 1 Korin sapta 15, Pol i mekim strongpela tok bilong helpim dispela bilip Kristen. Taim yumi skelim gut ol tok bilong Pol, dispela bai kamapim long ples klia olsem ol man i dai pinis bai kirap bek tru, na dispela bilip bilong yumi i gat strong.
Samting i Kamapim Klia Olsem Jisas i Bin Kirap Bek
4. Pol i stori long husat i bin lukim Jisas bihain long em i kirap bek?
4 Tingim pasin bilong Pol long kirapim tok bilong em. (1 Korin 15:1-11, NW ) Ol Korin i mas holimpas gutnius olsem God bai kisim bek ol man, nogut ol i kamap olsem ol bilipman i no gat as bilong bilip bilong ol. Krais i dai bilong tekewe sin bilong yumi, na ol i planim em, na em i kirap bek. Taim Jisas i kirap bek pinis, em i kamap long Pita na “bihain gen long ol 12-pela aposel.” (Jon 20:19-23) Inap 500 manmeri i lukim em taim em i tok: “Yupela i mas i go mekim olgeta lain manmeri i kamap disaipel.” (Matyu 28:19, 20) Jems na olgeta gutpela aposel i lukim em. (Aposel 1:6-11) Klostu long Damaskus Jisas i kamap long Sol “olsem long wanpela nupela pikinini mama i karim hariap tumas na i no taim yet bilong karim”—i olsem God i bin kirapim Sol pinis olsem wanpela spirit. (Aposel 9:1-9) Ol Korin i kamap bilipman, long wanem, Pol i bin autim tok long ol, na ol i bilip long gutnius.
5. Olsem wanem Pol i skelim tok bilong kirap bek olsem yumi lukim long 1 Korin 15:12-19?
5 Tingim pasin bilong Pol long kamapim tok bilong kirap bek. (1 Korin 15:12-19) Ol man i bin lukim Krais taim em i kirap bek pinis na ol i tokaut long dispela samting, orait olsem wanem na sampela ol inap tok ol man i dai pinis ol i no inap kirap bek? Sapos Jisas i no bin kirap bek, orait tok yumi autim na bilip bilong yumi i samting nating, na taim yumi tok God i bin kirapim bek Krais, yumi man bilong giaman na tok bilong yumi i daunim God. Sapos ol man i dai pinis ol i no ken kirap bek, ‘yumi stap yet long sin bilong yumi,’ na ol man i bihainim Krais na ol i dai, ol i lus pinis. Na tu, “sapos yumi wetim ol samting yumi bai kisim long laip bilong dispela graun tasol, orait tru tumas yumi tarangu lain stret.”
6. (a) Pol i tok wanem bilong strongim tok olsem Jisas i bin kirap bek? (b) Laspela “birua” em i wanem samting? Olsem wanem em bai pinis?
6 Pol i strongim tok olsem Jisas i bin kirap bek. (1 Korin 15:20-28) Krais i bin “kirap paslain” long ol man i dai pinis, olsem na bihain ol narapela man tu bai kirap bek. Pasin bikhet bilong wanpela man, Adam, i kamapim indai, na long rot bilong wanpela man, Jisas, ol man i dai pinis ol bai kirap bek. Lain bilong em ol i bilong kirap bek taim em i kam i stap. Krais bai “pinisim olgeta gavman na olgeta strongpela spirit na olgeta samting i gat strong” na i birua long wok bos bilong God, na Krais bai mekim wok King i go inap long taim Jehova i daunim olgeta birua bilong em. Laspela “birua”—em indai yumi kisim long Adam—bai pinis long rot bilong ofa bilong Jisas. Krais bai givim Kingdom i go bek long God na Papa bilong em, na em bai putim em yet “aninit long God, orait God bai i stap het tru bilong olgeta samting.”
Baptais Bilong Kamap Man i Dai Pinis
7. Husat “i kisim baptais bilong kamap man i dai pinis”? Dispela i makim wanem samting?
7 Ol man i sakim tok bilong kirap bek, Pol i askim ol olsem: “Long wanem as na sampela man i kisim baptais bilong kamap man i dai pinis?” (1 Korin 15:29, NW ) Pol i no tok olsem ol man i stap laip ol i mas kisim baptais bilong helpim ol man i dai pinis, nogat; ol disaipel bilong Jisas ol yet i mas kisim save, na bilip, na kisim baptais. (Matyu 28:19, 20; Aposel 2:41) Ol Kristen God i bin makim ol i “kisim baptais bilong kamap man i dai pinis” taim ol i bihainim rot i bringim ol i go long indai na kirap bek. Dispela kain baptais i kirap taim spirit bilong God i makim ol na dispela i kirapim tingting long bel bilong ol olsem ol i bilong kisim laip long heven, na dispela baptais i pinis taim ol i kirap bek long matmat na kisim laip long heven olsem spirit na ol i no inap i dai.—Rom 6:3-5; 8:16, 17; 1 Korin 6:14.
8. Ol Kristen inap bilip tru long wanem samting, maski Satan na lain bilong em ol i kilim ol i dai?
8 Olsem tok bilong Pol i kamapim, kirap bek i mekim na ol Kristen inap sanap strong taim ol bikpela hevi na indai i laik painim ol long taim bilong autim tok bilong Kingdom. (1 Korin 15:30, 31) Ol i save olsem Jehova inap kirapim ol bek sapos em i larim Satan na lain bilong em i kilim ol i dai. God tasol inap pinisim tru laip bilong ol long Gehena, em dispela ples i makim olsem man i lus olgeta.—Luk 12:5.
Yumi Mas Was i Stap
9. Sapos yumi laik bai bilip bilong kirap bek i strongim yumi, yumi mas abrusim wanem samting?
9 Bilip bilong kirap bek i bin strongim Pol. Taim em i stap long Efesus, ating ol birua bilong em ol i bin tromoi em i go long stediam long pait wantaim ol wel animal. (1 Korin 15:32) Sapos dispela samting i bin kamap, God i helpim em long abrusim bagarap, olsem em i bin helpim Daniel long abrusim bagarap long hul bilong ol laion. (Daniel 6:16-22; Hibru 11:32, 33) Pol i bilip olsem ol man i dai pinis bai kirap bek, olsem na em i no gat wankain tingting olsem bilong ol Juda long taim bilong Aisaia em ol i bin lusim lotu i tru. Ol i bin tok: “Kam, yumi kaikai na dring, long wanem, tumora bai yumi dai.” (Aisaia 22:13) Sapos yumi laik bai dispela bilip bilong kirap bek i strongim yumi olsem em i bin strongim Pol, yumi no ken bung wantaim ol man i gat dispela kain tingting nogut. Pol i tok: “Yupela i no ken larim ol arapela man i giamanim yupela. Yupela i save long dispela tok, ‘Sapos yumi poroman wantaim ol man nogut, bai ol i bagarapim gutpela pasin bilong yumi.’ ” (1 Korin 15:33) Na dispela tok i stret long planti samting long i stap bilong yumi.
10. Bilip bilong yumi long kirap bek i ken stap strong long bel bilong yumi olsem wanem?
10 Pol i tokim ol man i no bilip tumas long kirap bek, olsem: “Yupela i mas lusim longlong pasin na tingting stret. Yupela i no ken mekim sin moa. Yupela harim. Sampela bilong yupela ol i no save yet long God. Mi mekim dispela tok bai yupela i ken sem long pasin bilong yupela.” (1 Korin 15:34) Long dispela “taim bilong las de,” yumi mas bihainim stretpela save bilong God na Krais. (Daniel 12:4; Jon 17:3) Dispela bai helpim yumi long wok yet long bilip olsem ol man i dai pinis bai kirap bek.
Kirap Bek Long Wanem Kain Bodi?
11. Pol i mekim wanem tok piksa long kirap bek bilong ol Kristen God i bin makim long spirit holi?
11 Orait nau Pol i skelim sampela askim. (1 Korin 15:35-41) Ating wanpela man i laik daunim bilip long kirap bek na em bai askim olsem: “Ol man i dai pinis, bai ol i kirap bek olsem wanem? Bai ol i gat wanem kain bodi taim ol i kirap bek?” Olsem Pol i kamapim, pikinini bilong kaikai ol i planim long graun i mas senis pastaim, i olsem em i dai, bambai em i ken kru. Olsem tasol ol man em God i bin makim long spirit holi, ol i mas i dai. Kru i save kamap long pikinini bilong kaikai olsem wanpela nupela bodi, na olsem tasol taim ol Kristen God i bin makim ol i kirap bek, bodi bilong ol i narapela kain long bodi bilong ol man bilong graun. Ol i gat wankain tingting na pasin samting olsem bilong taim ol i no dai yet, tasol ol i kirap bek olsem nupela man i gat bodi spirit em inap i stap long heven. Na ol man i kirap bek long graun, ol bai kisim bodi bilong graun.
12. Wanem insait bilong dispela tok ‘bodi bilong heven’ na ‘bodi bilong graun’?
12 Olsem Pol i tok, skin bilong man i narapela kain long skin bilong ol animal. Na skin bilong ol animal tu i narapela narapela kain. (Stat 1:20-25) Ol ‘bodi bilong heven’ bilong ol spirit i gutpela tru na i narapela kain long ol ‘bodi bilong graun.’ Ol gutpela bilas bilong san, na mun, na ol sta tu i narapela narapela kain. Tasol bodi bilong ol Kristen God i bin makim i nambawan tru.
13. Olsem 1 Korin 15:42-44 i kamapim, ol i planim wanem samting na wanem samting i kirap bek?
13 Taim Pol i stori pinis long ol dispela samting i narapela narapela kain, em i tok moa: “Pasin bilong man i dai pinis na i kirap bek, em i olsem tasol.” (1 Korin 15:42-44) Em i tok : “Bodi yumi planim, em i save bagarap. Bodi i kirap bek, em i no inap bagarap.” Long dispela ves ating Pol i tok long lain Kristen olgeta, em God i bin makim ol. Bodi yumi planim taim em i dai em i save bagarap, tasol bodi i kirap bek i no gat sin na i no inap bagarap. Maski ol man bilong graun i ting ol i samting nogut, ol i kirap bek na kisim laip long heven na stap wantaim Krais long bikpela lait. (Aposel 5:41; Kolosi 3:4) Taim man bilong dispela lain i dai ol i planim “bodi bilong graun,” na taim em i kirap bek em i kisim “bodi bilong heven.” Em nau, ol Kristen God i makim long spirit holi ol inap kirap bek na kisim bodi bilong heven, olsem na yumi ken save tru olsem ol narapela manmeri i dai pinis ol inap kirap bek na kisim laip long graun.
14. Olsem wanem Pol i soim olsem Krais i narapela kain long Adam?
14 Nau Pol i skelim Krais wantaim Adam. (1 Korin 15:45-49) Namba wan man, Adam, em i “kamap wanpela man i gat laip.” (Stat 2:7) “Narapela Adam i kamap bihain tru”—Jisas—“em i bin kamap spirit bilong givim laip long man.” Em i givim laip bilong em yet olsem ofa bilong baim bek ol man, na pastaim dispela ofa i bilong helpim lain em God i bin makim ol long spirit holi. (Mak 10:45) Taim ol i stap long graun ol i olsem “man bilong graun,” tasol taim ol i kirap bek ol i kamap wankain olsem Adam i kamap bihain tru. Tasol ofa bilong Jisas bai helpim olgeta lain manmeri i bihainim tok, ol lain i kirap bek long graun tu.—1 Jon 2:1, 2.
15. Bilong wanem ol Kristen God i bin makim ol i no kirap bek wantaim skin bilong graun? Olsem wanem ol i kirap bek taim Jisas i kam i stap pinis?
15 Taim ol Kristen God i bin makim ol i dai, ol i no kisim bodi bilong graun taim ol i kirap bek. (1 Korin 15:50-53) Bodi bilong graun i save bagarap, em i no inap kisim laip i gutpela olgeta long Kingdom bilong heven. Sampela Kristen God i bin makim, ol i no ken slip long matmat taim ol i dai. Taim Jisas i kam i stap pinis, ol i stap gut long God i go inap long taim ol i pinisim wok bilong ol long graun; orait “wantu tasol” bai ol i “senis na i kamap narakain.” Ol bai kirap bek wantu tasol olsem spirit na stap long bikpela lait, na ol i kisim laip i no inap bagarap. Dispela lain i kamap olsem “meri” bilong Krais long heven, ol inap olsem 144,000.—KTH 14:1; 19:7-9; 21:9; 1 Tesalonaika 4:15-17.
Winim Pait na Pinisim Indai!
16. Olsem Pol na ol profet bilong bipo i tok, wanem samting bai painim indai yumi bin kisim long sinman Adam?
16 Pol i tok God bai pinisim tru indai. (1 Korin 15:54-57) Ol bodi bilong graun i save dai na bagarap, taim ol i senis na kisim laip i no inap bagarap, em nau, dispela tok bai kamap tru: “God i winim pait na em i pinisim dai tru.” “Dai, we stap strong bilong yu long daunim ol man? Dai, we stap spia bilong yu bilong bagarapim ol man?” (Aisaia 25:8; Hosea 13:14) Sin i save kamapim indai, na sin i kisim strong long Lo, em dispela Lo i makim ol man i mekim sin ol i mas i dai. Tasol ofa na kirap bek bilong Jisas i mekim na indai yumi kisim long Adam bai i no gat strong moa.—Rom 5:12; 6:23.
17. Olsem wanem ol tok i stap long 1 Korin 15:58 i stret long nau?
17 Pol i tok: “Olsem na, ol brata tru bilong mi, yupela i mas i stap strong, na i no ken surik liklik. Yupela i save olsem, hatwok yupela i save mekim long Bikpela, em bai i no inap lus nating. Olsem na oltaim yupela i mas wok strong long mekim wok bilong Bikpela.” (1 Korin 15:58) Ol dispela tok i stret long lain remnan em God i bin makim na long “ol arapela sipsip” bilong Jisas, maski ol i dai long dispela taim bilong las de. (Jon 10:16) Hatwok ol i mekim long autim tok bilong Kingdom bai i no lus nating, long wanem, ol bai kirap bek. Yumi ol wokman bilong Jehova, yumi mas wok strong yet long mekim wok bilong Bikpela na wet long dispela taim bai yumi ken amamas na singaut olsem: “Dai, we stap strong bilong yu long daunim ol man?”
Ol Man i Dai Pinis Ol Bai Kirap Bek!
18. Bilip bilong Pol long kirap bek i strong o olsem wanem?
18 Tok bilong Pol long 1 Korin sapta 15 i kamapim klia olsem bilip bilong kirap bek i gat strong long i stap bilong em. Em i bilip tru olsem Jisas i bin kirap bek long matmat na ol narapela manmeri tu bai lusim matmat. Olsem wanem? Yu gat kain strongpela bilip olsem? Pol i ting ol gutpela samting bilong dispela graun “ol i olsem pipia nating,” na em i “lusim pinis olgeta arapela samting” bambai em i ken ‘save tru long Krais na long strong [bilong kirap bek] bilong em.’ Dispela aposel i redi long i dai olsem Krais i bin mekim, na em i wet long em bai kirap bek long “namba wan taim ol manmeri i kirap bek long matmat.” Lain 144,000 bilong Jisas em God i bin makim, ol i bilong kirap bek “long dispela namba wan taim.” Tru, ol i kirap bek na kisim laip olsem spirit long heven, tasol “ol arapela manmeri i dai pinis” ol bai kirap bek na kisim laip long graun.—Filipai 3:8-11; KTH 7:4; 20:5, 6.
19, 20. (a) Husat ol man em stori bilong ol i stap long Baibel na ol bai kirap bek long graun? (b) Yu wet long husat bai kirap bek long matmat?
19 Ol Kristen God i bin makim long spirit holi na ol i bin stap gut long em i go inap long ol i dai, ol i kirap bek pinis. (Rom 8:18; 1 Tesalonaika 4:15-18; KTH 2:10) Ol manmeri i abrusim taim bilong “bikpela hevi tru” ol bai lukim ol man i dai pinis ol i kirap bek long graun, taim “solwara i larim olgeta man i dai pinis na i stap long en, ol i go. Na Dai wantaim Ples bilong ol man i dai pinis, tupela tu i larim olgeta man i dai pinis na i stap long han bilong tupela, ol i go.” (KTH 7:9, 13, 14, NW; 20:13) Wanpela bilong ol man bai kirap bek em Jop, em 7-pela pikinini man na 3-pela pikinini meri bilong em ol i bin lus. Tingim bikpela amamas bilong em taim ol i kirap bek—na ol dispela pikinini tu bai amamas tru long ol i gat 7-pela brata na 3-pela naispela susa moa!—Jop 1:1, 2, 18, 19; 42:12-15.
20 Em i wanpela gutpela samting tru taim Abraham na Sara, Aisak na Rebeka, na planti manmeri moa na “olgeta profet” bai kisim laip na kirap bek long graun! (Luk 13:28) Wanpela bilong ol dispela profet em Daniel, em God i bin tok promis long em bai kirap bek taim gavman bilong Mesaia i bosim graun. Daniel i slip long matmat inap 2,500 yia, tasol klostu nau em bai kirap bek na mekim “ol samting God i bin makim” em long mekim olsem wanpela bilong ol lain bai kisim namba bilong “bosim ol manmeri long olgeta hap bilong graun.” (Daniel 12:13; Song 45:16) Bai yu amamas tru long sekanim ol bilipman bilong bipo i kirap bek, na tu, bai yu amamas long lukim papa, mama, pikinini man, pikinini meri, na ol narapela bilong famili bilong yu, em birua bilong yumi, indai, i bin kisim ol!
21. Bilong wanem yumi mas mekim gutpela pasin long ol narapela long nau?
21 Sampela pren na famili bilong yumi ol i bin mekim wok bilong God inap planti yia na ol i lapun nau. Bikpela krismas bilong ol inap mekim na ol i hatwok long karim ol hevi bilong i stap bilong ol. Em i gutpela pasin tru sapos yumi mekim ol samting yumi inap mekim bilong helpim ol long nau! Sapos yumi mekim olsem, bai yumi no bel hevi na ting yumi no bin mekim wok bilong yumi long helpim ol sapos ol i dai. (Saveman 9:11; 12:1-7; 1 Timoti 5:3, 8) Yumi ken bilip tru olsem Jehova i no ken lusim tingting long ol gutpela samting yumi mekim bilong helpim ol narapela, maski ol i yangpela o lapun o ol i gat narapela narapela kain sindaun. Pol i tok: “Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.”—Galesia 6:10; Hibru 6:10.
22. Taim yumi no lukim yet ol man i dai pinis ol i kirap bek, yumi mas strong long mekim wanem?
22 Jehova em i “as bilong olgeta pasin marimari na pasin sori. Em i God bilong mekim isi bel bilong olgeta man i gat hevi.” (2 Korin 1:3, 4) Tok bilong Em i mekim gut bel bilong yumi, na i helpim yumi long mekim gut bel bilong ol narapela man taim yumi helpim ol long bilip long kirap bek, em dispela bilip i gat bikpela strong bilong en. Taim yumi no lukim yet ol man i dai pinis ol i kisim laip na kirap bek long graun, yumi mas bihainim pasin bilong Pol, em i bin bilip olsem ol man i dai pinis bai kirap bek. Na yumi mas strong tru long bihainim pasin bilong Jisas, em i bin bilip olsem God i gat strong long kirapim em bek long matmat, na dispela bilip bilong em i no lus nating. Klostu nau ol manmeri i slip long matmat ol bai harim nek bilong Krais na ol bai lusim matmat. Dispela i ken mekim gut bel bilong yumi. Tasol bikpela samting moa, yumi mas tok tenkyu long Jehova, em i bin wokim rot bilong winim pait na pinisim indai long rot bilong Bikpela bilong yumi, em Jisas Krais!
Wanem Bekim Bilong Yu?
• Pol i stori long husat i bin lukim Jisas bihain long em i bin kirap bek?
• Laspela “birua” em i wanem samting? Em bai pinis olsem wanem?
• Taim ol Kristen God i bin makim long spirit holi ol i dai, wanem samting ol i planim na wanem samting i kirap bek?
• Husat ol man em stori bilong ol i stap long Baibel na yu laik bungim ol taim ol i kirap bek na kisim laip long graun?
[Piksa long pes 16]
Aposel Pol i mekim strongpela tok bilong helpim bilip bilong kirap bek
[Ol Piksa long pes 20]
Bikpela amamas bai kamap taim Jop, na famili bilong em, na planti narapela man moa i kirap bek!