Askim

Matyu i stori long Josep. Em i stori long tingting Josep i gat taim Maria i gat bel, driman em i kisim we ensel i toktok long em, na olsem wanem Josep i wanbel long olgeta dispela tok. (Mat. 1:19-25) Na tu, Matyu i stori long ensel i tokim Josep long kisim famili na ranawe i go long Isip, olsem wanem ol i go kamap long Isip, hau ol i go bek long Israel, taim ol i go kamap, na disisen em i mekim long famili i mas stap long Nasaret. (Mat. 2:13, 14, 19-23) Long sapta 1 na sapta 2 bilong gutnius Matyu i raitim, em i kolim nem bilong Josep inap 12-pela taim, na nem bilong Maria em i kolim 9-pela taim.

Luk i stori long Maria. Em i stori long ensel Gebriel i kam lukim Maria, Maria i go visitim wanblut bilong em Elisabet, na ol tok Maria i mekim bilong litimapim nem bilong Jehova. (Luk 1:26-56) Na tu, Luk i stori long ol tok Simeon i tokim Maria long en long ol pen na hevi bai painim Jisas long bihain. Luk i stori long samting i kamap taim famili bilong Jisas i go long tempel taim em i gat 12 krismas. Na tu, em i stori olsem Maria i bel hevi tru long ol samting i bin kamap. Luk i kolim tasol ol tok bilong Maria, na em i no kolim ol tok Josep i bin mekim. (Luk 2:19, 34, 35, 48, 51) Long sapta 1 na sapta 2, Gutnius Bilong Luk i kolim nem bilong Maria inap 17 taim, na em i kolim nem bilong Josep inap 5-pela taim tasol. Yumi inap luksave olsem Matyu i stori long ol samting Josep i tingting planti long en na ol wok em i mekim, na Luk i stori gut long ol samting i painim Maria.

Josep na Maria i kamap long lain tumbuna bilong King Devit, tasol stori Matyu na Luk i raitim long lain tumbuna bilong ol i no wankain. Matyu i stori gut long lain tumbuna bilong Josep. Olsem, Josep i kamap long lain tumbuna bilong Solomon, em pikinini bilong King Devit. Ol tumbuna bilong Solomon i gat rait long mekim wok king. Olsem na i stret long Jisas i kisim ples bilong King Devit bikos Josep em i waspapa bilong Jisas. (Mat. 1:6, 16) Luk i stori olsem Maria i kamap long lain tumbuna bilong Natan, em narapela pikinini bilong King Devit. (Luk 3:31) Taim Maria i karim Jisas, em i “kamap man bilong graun na em i bilong lain bilong Devit.” Olsem na i stret em i mekim wok king. (Rom 1:3) Tasol bilong wanem Luk i no tokaut olsem Maria em i pikinini meri bilong Heli? Long bipo, ol i save kolim tasol nem bilong ol pikinini man. Olsem na taim Luk i tok Josep em i pikinini bilong Heli, dispela i makim olsem Josep em i tambu pikinini bilong Heli.—Luk 3:23.

Lain tumbuna bilong Jisas em Matyu na Luk i stori long en i kamapim klia olsem Jisas em dispela Mesaia. Planti man i save long lain tumbuna bilong Jisas. Ol Farisi na Sadyusi i save tu long dispela. Long nau, ol tok Matyu na Luk i raitim i stiaim bilip bilong yumi, na dispela i soim klia olsem yumi inap bilip tru long ol tok promis bilong God.