Wanem Pasin i As Bilong Lotu Kristen Tru?
LONG NAU planti manmeri moa i tok ol i bilong lotu Kristen, winim olgeta narapela lotu. Tasol bilip bilong narapela i pait wantaim bilip bilong narapela. Ol i no stap wanbel, na sampela taim ol i kirap na narapela i kilim i dai narapela. Olsem na yumi save, planti ol i no Kristen tru. Jisas i tok, long taim bilong yumi bai planti man i kolim em, “Bikpela, Bikpela”—bai ol i tok ol i Kristen—tasol em bai i tokim ol: “Mi no save liklik long yupela. Yupela ol man bilong mekim pasin nogut, yupela klia long mi.” (Matyu 7:21, 23) Yumi no laik insait long dispela lain, a? Orait, olsem wanem yumi inap save yumi Kristen tru o nogat?
I gat planti samting man i mas mekim na bai em i stap Kristen tru. Kristen tru i mas i gat strongpela bilip. “Man i no bilip long God, em i no inap bihainim laik bilong God.” (Hibru 11:6) Na strongpela bilip bilong em i mas kirapim em long mekim ol stretpela pasin na wok. Disaipel Jems i toksave olsem: “Man i bilip nating na bilip bilong en i no kamapim gutpela pasin tu, orait bilip bilong dispela man i olsem em i dai pinis.” (Jems 2:26) Na Kristen tru i mas tingim bikpela wok o namba em lain ‘gutpela wokboi’ i holim na em i mas daun long dispela. (Matyu 24:45-47) Tasol i gat narapela pasin i olsem as bilong lotu Kristen tru.
Wanem dispela pasin? Aposel Pol i stori long en long namba wan pas em i raitim long ol Korin. Em i tok: “Sapos mi save toktok long ol manmeri long kain kain tok ples bilong man na long tok bilong ol ensel tu, tasol mi no givim bel bilong mi long ol, orait mi olsem belo i mekim planti nois, na mi olsem garamut i pairap nating. Na sapos mi save autim tok profet na mi save pinis long olgeta tingting hait bilong God na mi gat olgeta arapela save tu, na sapos mi gat strongpela bilip tru inap long mekim ol maunten i surik i go long narapela hap, tasol sapos mi no givim bel bilong mi long ol manmeri, orait mi olsem samting nating. Na sapos mi givim olgeta samting bilong mi long ol rabisman, na sapos mi larim ol man i holimpas mi na kukim bodi bilong mi long paia na mi dai pinis, tasol sapos mi no bin givim bel bilong mi long ol, orait dispela olgeta pasin bilong mi bai i no inap helpim mi liklik.”—1 Korin 13:1-3.
Olsem na pasin bilong laikim tru ol narapela em i as bilong lotu Kristen tru. Kristen tru em i mas i gat bilip, na em i mas mekim ol gutpela pasin na gutpela wok, na em i mas bung wantaim ol gutpela poroman. Em bikpela samting tru. Tasol sapos em i no laikim tru ol narapela, olsem givim bel long ol, ol dispela narapela pasin i samting nating. Bilong wanem i olsem?
As bilong dispela em pasin bilong dispela God yumi lotuim. Aposel Jon i stori long pasin bilong God Jehova, em God bilong lotu Kristen tru. Jon i tok: “God yet em i as bilong dispela pasin bilong laikim ol arapela.” (1 Jon 4:8) God i gat planti narapela gutpela pasin—em i gat bikpela strong, na stretpela pasin, na gutpela save na tingting—tasol nambawan pasin tru bilong Jehova em pasin bilong laikim tru ol arapela. Olsem na yu ting em i laik bai ol manmeri i lotuim em ol i mas bihainim wanem kain pasin? Em i laik bai ol i bihainim pasin bilong em na ol i lain long laikim tru ol narapela.—Matyu 5:44, 45; 22:37-39.
Stretpela Laik na Tingting
Tru tumas, pasin bilong laikim tru ol narapela i kirapim ol Kristen long bihainim pasin bilong God bilong ol. Olsem na ol tu i gat ol stretpela laik na tingting, kain olsem God. Orait wanem samting tru i bin kirapim God Jehova long salim Jisas i kam long graun bambai yumi gat rot bilong kisim laip i stap oltaim? Pasin bilong laikim tru ol narapela. “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Orait, wanem samting i mas kirapim yumi long bihainim laik bilong God? Pasin bilong laikim tru ol narapela. “Sapos yumi laikim tru God, orait yumi save bihainim ol lo bilong en.”—1 Jon 5:3.
Tasol olsem wanem? Inap yumi gat tingting kranki na yumi mekim wok bilong God? Tru tumas. Pol i stori long sampela long taim bilong em, em ol i bel nogut long em na ol i laik daunim em, na long dispela as tasol ol i autim tok bilong Krais. (Filipai 1:15-17) Nogut kain laik olsem i kirapim yumi long mekim wok. Ol manmeri bilong dispela graun i laik daunim ol narapela bambai ol yet i ken kisim biknem. Yumi tu inap kisim kain tingting kranki olsem. Nogut yumi hambak na yumi ting yumi inap mekim gutpela pablik-tok, winim ol narapela, o yumi ting yumi winim ol long tilim planti magasin na buk samting. Nogut yumi skelim wok yumi kisim insait long kongrigesen wantaim wok narapela i kisim na yumi hambak, o yumi bel nogut long em. Nogut wanpela elda i strong tumas long holim wok bilong em insait long kongrigesen na dispela i kirapim em long pasim rot bilong yangpela brata long lain na kamap strong. Nogut yumi gat laik long kisim sampela samting bilong helpim yumi yet na dispela i kirapim yumi long pren wantaim ol Kristen i gat planti samting, na yumi givim baksait long ol Kristen i no gat planti samting.
Olkain laik nogut olsem inap kamap long bel bilong yumi, long wanem, yumi sinman. Tasol sapos yumi bihainim pasin bilong Jehova na yumi larim pasin bilong laikim ol narapela i stap olsem as tru bilong ol pasin yumi mekim, orait bai yumi wok strong long daunim ol dispela laik nogut. Sapos yumi tingim yumi yet tasol, o yumi gat laik long kisim biknem, o yumi save hambak—ol dispela kain pasin inap daunim pasin bilong laikim tru ol narapela na “i no inap helpim [yumi] liklik.”—Sindaun 11:2; 1 Korin 13:3.
Bihainim Pasin Sori, Maski Ol Narapela i Tingim Ol Yet Tasol
Jisas i tok, ol disaipel bilong em “ol i no bilong dispela graun.” (Jon 17:14) Tasol yumi ken mekim wanem bambai ol pasin bilong dispela graun i no ken karamapim yumi? Sapos yumi bihainim pasin sori, olsem pasin bilong laikim tru ol narapela, dispela inap helpim yumi. Olsem: Long nau ol man “i laikim tumas ol kain kain pasin bilong amamas bilong dispela graun,” na ol “i no laikim God.” (2 Timoti 3:4) Jon i givim toksave long yumi olsem: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa. Yumi save, olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol.”—1 Jon 2:15, 16.
Tasol yumi save hatwok long givim baksait olgeta long “pasin bilong bel kirap” na pasin bilong “aigris,” long wanem, skin bilong yumi i save laikim. Na long nau i gat kain kain amamas bilong graun na ol man i aigris long planti samting moa, winim tru long taim bilong Jon. Olsem na sapos pasin bilong aigris i bin pulim ol Kristen long taim bilong Jon, yumi ol Kristen bilong nau i mas was gut moa yet long en.
Planti samting ol man bilong nau i laikim, i no gat rong long en. Sapos wanpela man i gat bikpela haus, o gutpela ka, o televisen, o redio-kaset samting, no gat rong long dispela. Na sapos wanpela man i go lip longtaim na em i raun lukim ol narapela ples, em i no brukim wanpela lo bilong Baibel. Tasol sapos i no gat rong long ol dispela samting, orait, i gat wanem as na Jon i givim dispela toksave long yumi? As bilong en i olsem: Nogut ol dispela samting i kamap bikpela samting tumas long yumi, o ol i kirapim yumi long tingim yumi yet tasol, o long laikim tumas mani kago, o long hambak. Na yumi mas wok strong tru bambai yumi inap kisim mani bilong baim ol kain samting olsem, na dispela inap pasim yumi long mekim wok bilong Jehova. Na ol dispela samting i save pulim bikpela hap taim bilong yumi, na yumi ol Kristen i no gat bikpela hap taim bilong ol kain samting olsem, long wanem, yumi mas stadi long Baibel, na go long ol bung bilong lotu wantaim ol narapela Kristen, na autim gutpela tok bilong Kingdom.—Buk Song 1:1-3; Matyu 24:14; 28:19, 20; Hibru 10:24, 25.
Long nau ol man i save tingting tumas long ol samting bilong skin, olsem na yumi mas wok strong bambai yumi inap ‘tingim Kingdom bilong God pastaim,’ na yumi ‘no ken mekim wok long samting bilong graun olsem i bikpela samting long laip bilong yumi.’ (Matyu 6:33; 1 Korin 7:31) Sapos yumi gat strongpela bilip, dispela inap helpim yumi. Na sapos yumi laikim tumas Jehova na ol narapela man, dispela inap helpim yumi moa yet. Dispela pasin inap strongim yumi long sakim ol samting i laik pulim yumi, em ol samting i no gat rong long en, tasol ol inap pasim yumi na bai yumi no “mekim tru” wok bilong God. (2 Timoti 4:5) Sapos yumi no gat dispela pasin bilong laikim tumas God na ol man, bai yumi mekim nating wok bilong God na yumi no givim bel long en.
Laikim Tru Ol Brata Sista
Jisas i makim olsem pasin bilong laikim tru ol narapela i bikpela samting. Em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Ol elda i save lusim bikpela hap taim long helpim ol brata. Yu ting ol bai mekim olsem sapos ol i no laikim tru ol? Ol Kristen i save lusim tingting long ol liklik pasin kranki bilong ol narapela Kristen—na bilong ol elda tu. Yu ting ol bai mekim olsem sapos ol i no laikim tru ol brata? Pasin bilong laikim tru ol arapela i save kirapim ol Kristen long helpim ol brata long ol samting bilong skin taim ol i sot long en. (Aposel 2:44, 45) Taim ol birua i mekim nogut long ol Kristen, ol i save mekim ol samting bilong lukautim ol brata, na ol i redi long i dai tu bilong lukautim ol. Wanem samting i kirapim ol long mekim olsem? Pasin bilong laikim tru ol narapela.
Sampela taim, liklik samting tasol inap kamapim klia tru olsem yumi laikim tru ol brata. Olsem: Sapos wanpela elda i gat planti wok na wanpela brata i gat hevi long wanpela samting na em i kam long elda, na em i laik toktok gen wantaim elda long dispela hevi em tupela i bin toktok long en inap planti taim pinis. Yu ting elda i ken kros? Nogat. Elda i no laik bai dispela samting i mekim na tupela i bruk. Olsem na em i mekim pasin isi na mekim gut long dispela brata bilong em. Tupela i toktok wantaim long dispela hevi, na dispela i helpim tupela long pren gut, winim bilong bipo. (Matyu 5:23, 24; 18:15-17) Olgeta insait long kongrigesen ol i no tingim tumas ol yet na ol samting i stret ol yet i ken mekim; ol i wok long bihainim bikpela pasin sori Jisas i tok long en—ol i redi long lusim rong bilong ol brata bilong ol “inap 70 taims 7-pela taim.” (Matyu 18:21, 22) Olsem na ol Kristen i save wok strong long bihainim pasin bilong laikim tru ol narapela na givim bel long ol, long wanem, dispela pasin i save helpim ol long “wok bung wantaim.”—Kolosi 3:14.
Yumi Mas Strongim Pasin Bilong Yumi Long Laikim Tru Ol Brata
Tru tumas, stretpela tingting i kirapim yumi long mekim wok bilong Jehova em olsem: Yumi save laikim ol narapela. Dispela pasin i strongim yumi long sakim ol pasin bilong graun, na i helpim kongrigesen long i stap Kristen tru. Tru, yumi mas mekim gut ol wok bilong yumi, tasol ol brata i holim wok insait long kongrigesen, nogut ol i strong tumas long mekim gut ol dispela wok na ol i lusim pasin bilong mekim gut long ol brata na isi long ol. Pasin bilong laikim ol narapela i helpim yumi olgeta long “bihainim tok bilong ol [elda] na i stap aninit long ol.”—Hibru 13:17.
Aposel Pita i kirapim yumi long “holim strong pasin bilong laikim tru” ol brata, long wanem dispela pasin “i save karamapim planti sin.” (1 Pita 4:8) Olsem wanem yumi ken mekim olsem? God i wokim man i kamap olsem em yet, olsem na yumi olgeta manmeri i gat strong inap long yumi bihainim pasin bilong laikim ol narapela. Tasol bilong “laikim tru” ol narapela, yumi mas i gat samting moa. Dispela pasin i namba wan pasin em spirit bilong God i kirapim ol man long bihainim. (Galesia 5:22) Olsem na bilong kisim dispela pasin, yumi mas mekim ol samting bambai yumi inap kisim spirit bilong God. Yumi mas mekim wanem? Yumi mas stadi long Baibel, long wanem, spirit bilong God i as bilong olgeta tok bilong Baibel. (2 Timoti 3:16) Na yumi mas beten askim Jehova long givim spirit bilong em long yumi bambai yumi inap holim strong pasin bilong laikim tumas Jehova na ol brata Kristen. Na yumi mas bung wantaim lain bilong Jehova, long wanem, Jehova i save givim spirit bilong em long ol na i no gat samting i pasim rot bilong en.
Na yumi mas skelim pasin na tingting bilong yumi yet, nogut yumi mekim sampela pasin o yumi gat sampela tingting i no kamapim pasin sori. Bel i save kirapim yumi long laikim ol narapela, olsem na yumi mas was gut long ol tingting i stap long bel bilong yumi. Baibel i tok: “Tingting bilong man em i nogut tru.” (Jeremaia 17:9) Jehova i save mekim planti samting bilong helpim yumi long bihainim pasin sori, tasol sampela taim bai yumi mekim sampela pasin i no pasin bilong sori. Ating bai yumi tok kros liklik long wanpela brata, o yumi kros kwik long wanpela tok brata i mekim long yumi. Olsem na yumi mas mekim beten wankain olsem Devit, em i tok: “God, skelim mi gut na bai yu save long olgeta tingting i stap long bel bilong mi. Traim mi, na bai yu save gut long olgeta tingting bilong mi. Skelim mi gut, nogut sampela tok giaman i stap long tingting bilong mi. Na yu mas bringim mi long rot bilong kisim laip bilong i stap gut oltaim oltaim.”—Buk Song 139:23, 24.
Olsem Baibel i tok, “dispela pasin bilong givim bel bilong yumi long ol arapela, em i no inap pinis.” (1 Korin 13:8) Sapos long olgeta taim yumi wok long laikim tru ol brata, orait long taim bilong traim bai yumi no sot long dispela pasin. Long lain bilong God, narapela i save laikim tru narapela, na dispela gutpela pasin i helpim tru paradais bilong spirit i stap long nau. Ol man i laikim tru ol narapela na ol i givim bel tru long ol, ol tasol bai amamas long i stap long nupela taim long bihain. Olsem na yu mas bihainim pasin bilong Jehova na laikim tru ol narapela—dispela bai strongim pasin bilong i stap wanbel. Yu mas wok long kisim pasin bilong laikim tru ol narapela—dispela pasin i as bilong lotu Kristen tru.