Genesa
49 Endzhaku ka nkarhi Yakobe a vitana vana vakwe a ku: “Hlengeletanani leswaku ndzi ta mi byela leswi nga ta mi humelela exiphen’wini xo hetelela xa masiku. 2 Hlengeletanani mi yingisa, n’wina vana va Yakobe, ina, yingisani Israyele tata+ wa n’wina.
3 “Ruveni, u mativula ya mina,+ u matimba ya mina ni masungulo ya matimba+ ya mina ya ku tswala, ku xiximeka hi xindzhuti ni ku xiximeka hi ntamu. 4 Hi ntshunxeko lowu hundzeletiweke ku fana ni mati, u nga vi la tlakukeke,+ hikuva u tlhandlukele esangwini+ ra tata wa wena. Hi nkarhi wolowo u nyamise xilawu xa mina.+ U tlhandlukele eka xona!
5 “Simiyoni na Levhi i vamakwavo.+ Matlhari ya vona ya ku dlaya i switirho swa madzolonga.+ 6 Wena moya-xiviri wanga, u nga ti entlaweni wa vona lowukulu.+ Wena mintlhaveko yanga, u nga tihlanganisi+ ni nhlengeletano ya vona, hikuva hi ku hlundzuka ka vona va dlaye vanhu,+ naswona hi tihanyi ta vona va tseme misiha ya tinkunzi. 7 A ku rhukaniwe ku hlundzuka+ ka vona hikuva ku ni tihanyi,+ ni vukarhi bya vona hikuva byi va endlisa nsele.+ Ndzi ta va susa eka Yakobe ndzi va hangalasa eIsrayele.+
8 “Loko ku ri wena Yuda,+ vamakwenu va ta ku dzunisa.+ Voko ra wena ri ta va enhan’wini ya valala+ va wena. Vana va tata wa wena va ta tiwisela eka wena.+ 9 Yuda i n’wana wa nghala.+ N’wananga, kunene u ta tlhandluka u suka eka lexi u xi hlaseleke. A pavalala a tiolola ku fana ni nghala, naswona ku fana ni nghala, xana i mani la nga n’wi pfuxaka?+ 10 Nhonga ya vuhosi a yi nge hambukisiwi eka Yuda+ hambi ku ri nhonga ya ndhuna emilengeni yakwe, kukondza ku fika+ Xilo; naswona vanhu va ta yingisa+ yena. 11 U ta tsimba mbhongolo yakwe emurhini wa vhinya ni vana va mbhongolo yakwe ya ntswele emurhini wo hlawuleka wa vhinya, hakunene u ta hlantswa swiambalo swakwe evhinyweni ni tinguvu takwe engatini ya madiriva.+ 12 Mahlo yakwe ma tshwukile hikwalaho ka vhinyo naswona meno yakwe ma basile hikwalaho ka ntswamba.
13 “Zebuloni u ta tshama eribuweni+ ra lwandle, u ta va eribuweni laha swikepe swi yimisiwaka kona hi nsoma;+ tlhelo ra yena ra le kule ri ta va etlhelo ra Sidoni.+
14 “Isakara+ i mbhongolo ya marhambu yo tiyela, leyi etlelaka exikarhi ka minkwama yimbirhi yo hakarha enhlaneni. 15 Yena u ta vona leswaku ndhawu yo wisela eka yona i yinene nileswaku tiko ri sasekile; u ta yisa katla rakwe ehansi leswaku a rhwala mindzhwalo naswona u ta endla ntirho wa vuhlonga wo sindzisiwa.
16 “Dani u ta avanyisa vanhu vakwe a ri un’wana wa tinyimba ta Israyele.+ 17 Dani a a ve nyoka leyi nga etlhelo ka gondzo, nyoka leyi nga ni timhondzo etlhelo ka ndlela, leyi lumaka swirhendze swa hanci kutani mukhandziyi wa yona a wa hi xindzhaku.+ 18 Oho Yehovha,+ hakunene ndzi ta rindzela ku ponisiwa ka wena.
19 “Loko ku ri Gadi, vuthu ra vaphangi ri ta n’wi hlasela hi xitshuketa, kambe yena u ta hlasela va le ndzhaku+ hi xitshuketa.
20 “Xinkwa lexi nga ta huma eka Axere xi ta va lexi noneke,+ u ta humesa switshongo swa hosi.+
21 “Neftali+ i mhunti yo lala. U humesa marito yo xonga.+
22 “Xihluke xa murhi lowu vekaka mihandzu,+ Yosefa i xihluke xa murhi lowu vekaka mihandzu ekusuhi ni nseledyana,+ lowu khandziyisaka marhavi ya wona ehenhla ka rirhangu.+ 23 Kambe vacopi va tshamela ku n’wi karhata ni ku n’wi copa, va tshamela ku n’wi venga.+ 24 Kambe vurha bya yena a byi tshama endhawini+ leyi tshamaka yi ri kona, naswona ntamu wa mavoko yakwe a wu pfumelelana ni swiyimo.+ Emavokweni ya lowa matimba wa Yakobe,+ hi laha murisi a humaka kona, ribye ra Israyele.+ 25 U huma eka Xikwembu xa tata+ wa wena, naswona u ta ku pfuna;+ u ni Lowa Matimba Hinkwawo,+ kutani u ta ku katekisa hi minkateko ya matilo lama nge henhla,+ hi minkateko ya xidziva xa mati lama nga ehansi-hansi,+ hi minkateko ya mavele ni ya mbeleko.+ 26 Entiyisweni mikateko ya tata wa wena yi ta va leyi tlakukeke eka mikateko ya tintshava+ leti tshamaka hi masiku, ni le ka xin’wetsin’wetsi xa xitsunga+ lexi tshamaka hilaha ku nga riki na makumu. Swi ta tshama enhlokweni ya Yosefa ni le thavathaveni ya loyi a hlawuriweke eka vamakwavo.+
27 “Benjamini u ta tshamela ku handzula ku fana ni mhisi.+ Nimixo u ta dya xiharhi lexi khomiweke kutani nimadyambu u ta ava leswi phangiweke.”+
28 Leti hinkwato i tinyimba ta 12 ta Israyele, hi swona leswi tata wa vona a va byeleke swona loko a va katekisa. U katekise un’wana ni un’wana hi ku ya hi nkateko+ wakwe.
29 Endzhaku ka sweswo a va lerisa a ku eka vona: “Ndzi vekiwa eka varikwerhu.+ Ndzi lahleni ni vatata wa mina ebakweni leri nga ensin’wini ya Efroni lowa Muheti,+ 30 ebakweni leri nga ensin’wini ya Makapela, lowu nga emahlweni ka Mamre etikweni ra Kanana, nsimu leyi Abrahama a yi xaveke eka Efroni lowa Muheti leswaku yi va xilahlo.+ 31 Abrahama na Sara nsati+ wakwe va va lahle kwalaho. Isaka na Raveka nsati+ wakwe va va lahle kwalaho, na Leya ndzi n’wi lahle kwalaho. 32 Nsimu leyi xaviweke ni bako leri nga eka yona a swi ri swa vana va Heti.”+
33 Hikwalaho Yakobe a heta ku lerisa vana vakwe. Kutani a veka milenge yakwe esangwini, a timeka, hiloko a vekiwa eka varikwavo.+