1 Tihosi
21 Endzhaku ka swilo leswi, a ku ri ni nsimu ya vhinya leyi a yi ri ya Naboti lowa le Yizriyele, leyi a yi ri eYizriyele+ etlhelo ka xigodlo xa Akabu hosi ya Samariya. 2 Hiloko Akabu a vulavula na Naboti, a ku: “Ndzi nyike+ nsimu ya wena ya vhinya,+ leswaku yi va ntanga+ wa mina wa matsavu,+ hikuva yi le kusuhi ni yindlu ya mina; mina ndzi ku nyika nsimu ya vhinya yo antswa ku yi tlula. Kumbe, loko swi ri swinene ematihlweni ya wena,+ ndzi ta ku nyika mali yi va nxavo wa yona.” 3 Kambe Naboti a ku eka Akabu: “A hi swinene+ eka mina, hi ku ya hi langutelo+ ra Yehovha leswaku ndzi ku nyika ndzhaka ya vatatana.”+ 4 Hiloko Akabu a fika endlwini yakwe a hlundzukile naswona a ri ni gome hikwalaho ka rito leri Naboti lowa le Yizriyele a n’wi byeleke rona, loko a ku: “A ndzi nge ku nyiki ndzhaka ya vatatana.” Kutani a etlela esangwini rakwe xikandza xakwe xi langute ehansi,+ a nga xi dyanga xinkwa.
5 Eku heteleleni Yezabele+ nsati wakwe a fika eka yena, a ku eka yena: “Ha yini moya wa wena wu hlunamile+ naswona u nga xi dyi xinkwa?” 6 Hiloko a vulavula na yena, a ku: “Hikuva ndzi vulavule na Naboti lowa le Yizriyele ndzi ku eka yena, ‘Ndzi nyike nsimu ya wena ya vhinya hi mali. Kumbe loko u swi tsakela, ndzi ku nyika nsimu yin’wana ya vhinya ematshan’weni ya yona.’ Kambe a ku, ‘A ndzi nge ku nyiki nsimu yanga ya vhinya.’”+ 7 Kutani nsati wakwe Yezabele a ku eka yena: “Xana hi wena sweswi la nga hosi ya Israyele?+ Suka u yima u dya xinkwa naswona mbilu ya wena a yi tsake. Mina ndzi ta ku nyika nsimu ya vhinya ya Naboti lowa le Yizriyele.”+ 8 Hiloko a tsala mapapila+ hi vito ra Akabu naswona a ma lema hi mfungho wakwe,+ a rhumela mapapila eka vakulukumba+ ni vanhu va xiyimo xa le henhla lava a va ri emutini wakwe, lava a va tshama na Naboti. 9 Kambe a a tsarile emapapileni, a ku:+ “Tivisani leswaku ku ni ku titsona swakudya, mi tshamisa Naboti emahlweni ka vanhu. 10 Endlani leswaku vavanuna vambirhi,+ vanhu lava nga pfuniki nchumu,+ va tshama emahlweni na yena, a va nyikele vumbhoni lebyi kanetanaka na yena,+ va ku, ‘Wena u rhukane Xikwembu ni hosi!’+ Kutani mi n’wi humesela ehandle mi n’wi khandla hi maribye a fa.”+
11 Hiloko vavanuna va muti wa rikwavo, vakulukumba ni vanhu va xiyimo xa le henhla lava a va tshama emutini wa rikwavo, va endla hilaha Yezabele a va rhumeke hakona, hilaha a ku tsariwe hakona emapapileni lawa a va rhumeleke wona.+ 12 Va huwelela ku titsona swakudya+ naswona va tshamisa Naboti emahlweni ka vanhu. 13 Vavanuna vambirhi, vanhu lava nga pfuniki nchumu va fika va tshama ehansi emahlweni ka yena; kutani vavanuna lava nga pfuniki nchumu va sungula ku nyikela vumbhoni lebyi kanetanaka na yena, ku nga Naboti, emahlweni ka vanhu, va ku: “Naboti u rhukane Xikwembu ni hosi!”+ Endzhaku ka sweswo va n’wi humesela ehandle emakumu ka muti, va n’wi khandla hi maribye a fa.+ 14 Hiloko va rhumela rito eka Yezabele, va ku: “Naboti u khandliwe hi maribye a fa.”+
15 Hi ku hatlisa loko Yezabele a twa leswaku Naboti u khandliwe hi maribye, a fa, xikan’we-kan’we Yezabele a byela Akabu a ku: “Suka u yima u teka nsimu ya vhinya ya Naboti lowa le Yizriyele,+ leyi a aleke ku ku nyika yona hi mali; hikuva Naboti a nga ha hanyi, kambe u file.” 16 Kuteloko Akabu a twa leswaku Naboti u file, xikan’we-kan’we Akabu a suka a yima a rhelela ensin’wini ya vhinya ya Naboti lowa le Yizriyele leswaku a yi teka.+
17 Kutani rito+ ra Yehovha ri fika eka Eliya+ lowa le Tixibe, ri ku: 18 “Suka u yima, u rhelela u ya hlangana na Akabu hosi ya Israyele, loyi a nga eSamariya.+ U le nsin’wini ya vhinya ya Naboti, laha a nga rhelela a ya kona ku ya yi teka. 19 U fanele u vulavula na yena, u ku, ‘Yehovha u te: “Xana u dlayile+ u tlhela u teka?”’+ U fanele u vulavula na yena u ku, ‘Yehovha u te: “Laha+ timbyana ti nantsweleke ngati ya Naboti kona, timbyana ti ta nantswela ngati ya wena, ina, ya wena.”’”+
20 Akabu a ku eka Eliya: “Xana u ndzi kumile, Wena nala wanga?”+ yena a ku: “Ndzi ku kumile. ‘Hikwalaho ka leswi u tixaviseke leswaku u endla swo biha ematihlweni ya Yehovha,+ 21 waswivo, ndzi tisa khombo ehenhla ka wena;+ kunene ndzi ta ku herisa hi ku helela,+ ndzi dlaya eka Akabu un’wana ni un’wana la humeselaka mati ekhumbini,+ ni la nga sirhelelekangiki ni la nga pfuniki nchumu eIsrayele. 22 Kunene ndzi ta endla yindlu ya wena yi fana ni yindlu ya Yerobuwamu+ n’wana wa Nebati, ni ku fana ni yindlu ya Baxa+ n’wana wa Ahiya, hikwalaho ka xikhunguvanyiso lexi u xi endleke kutani u dyohisa Israyele ha xona.’+ 23 Nakambe, malunghana na Yezabele, Yehovha u vurile, a ku, ‘Timbyana ti ta dya Yezabele exiphen’wini xa tiko xa Yizriyele.+ 24 Un’wana ni un’wana wa Akabu loyi a felaka emutini, timbyana ti ta n’wi dya; kutani un’wana ni un’wana loyi a felaka enhoveni, tinyenyana ta matilo ti ta n’wi dya.+ 25 A nga kona ni un’we la nga tshama a fana na Akabu,+ la nga tixavisa leswaku a endla swo biha ematihlweni ya Yehovha, loyi a nga hlohloteriwa+ hi Yezabele+ nsati wakwe. 26 U hambete a endla hi ndlela leyi nyenyetsaka ngopfu hi ku landzela swifaniso swa hava leswi hombolokeke,+ hilaha Vaamori hinkwavo va endleke hakona, lava Yehovha a va hlongoleke emahlweni ka vana va Israyele.’”+
27 Hi ku hatlisa loko Akabu a twa marito lawa, a handzula tinguvu takwe hi le xikarhi, a kapeka nguvu yakwe yo khwaxa ehenhla ka nyama yakwe; a hambeta a titsona swakudya naswona a tshama a etlele engubyeni yo khwaxa,+ a famba hi mbilu leyi tshovekeke.+ 28 Rito ra Yehovha ri fika eka Eliya lowa le Tixibe, ri ku: 29 “Xana u yi vonile ndlela leyi Akabu a titsongahateke ha yona eka mina?+ Hikwalaho ka leswi a titsongahateke eka mina, a ndzi nge ri tisi khombo emasikwini yakwe.+ Ndzi ta tisa khombo ehenhla ka yindlu yakwe emasikwini ya n’wana wakwe.”+