2 Tikronika
13 Elembeni ra vu-18 ra Hosi Yerobuwamu, Abiya a sungula ku fuma Yuda.+ 2 U fume malembe manharhu eYerusalema, vito ra mana wakwe a ku ri Mikaya+ n’wana wa Uriyele wa le Gibiya.+ Ku va ni nyimpi exikarhi ka Abiya na Yerobuwamu.+
3 Kutani Abiya a lwa nyimpi a ri ni vandla ra masocha ya vavanuna va matimba lava va hlawuriweke va 400 000.+ Yerobuwamu yena a lunghekela ku lwa na yena a ri ni vavanuna va vurhena, va matimba,+ lava ringanaka 800 000. 4 Kutani Abiya a suka a yima ehenhla ka Ntshava ya Semarayima, leyi yi nga exifundzheni xa tintshava xa Efrayimi,+ a ku: “Ndzi yingise, Wena Yerobuwamu ni tiko hinkwaro ra Israyele. 5 Xana a hi n’wina mi faneleke mi tiva leswaku Yehovha Xikwembu xa Israyele u veke Davhida+ leswaku a fuma Israyele hilaha ku nga riki na makumu,+ yena ni vana vakwe,+ hi ntwanano wa munyu?+ 6 Kutani Yerobuwamu+ n’wana wa Nebati, nandza+ wa Solomoni n’wana wa Davhida, a suka a yima a xandzukela+ hosi yakwe.+ 7 Vanhu ntsena,+ lava va nga pfuniki nchumu+ va hambeta va hlengeletanela eka yena. Eku heteleleni va vonaka va ri ni matimba ku tlula Rehobuwama n’wana wa Solomoni, kasi Rehobuwama+ a a ri ntsongo naswona a a ri ni rhumbu,+ a nga va tiyelanga.
8 “N’wina mi ehlekete ku hlasela mfumo wa Yehovha lowu nga evokweni ra vana va Davhida,+ kasi mi ntshungu+ lowukulu naswona mi ni marhole ya nsuku ya Yerobuwamu lawa mi endleriweke wona ma va swikwembu.+ 9 Xana a mi va hlongolanga vaprista va Yehovha,+ vana va Aroni ni Valevhi, xana a mi hambeti mi tiendlela vaprista ku fana ni vanhu va matiko?+ Loko ku ri munhu la fikeke a tata voko rakwe hi matimba hi ku tirhisa xinkunzana ni makhuna ya nkombo, u ve muprista wa swilo leswi nga riki swikwembu.+ 10 Loko ku ri hina, Yehovha i Xikwembu xa hina,+ naswona a hi n’wi siyanga; kambe vaprista va tirhela Yehovha, vana va Aroni ni Valevhi na vona va tirha.+ 11 Va endla magandzelo yo hisiwa ma mbulukela eka Yehovha mixo wun’wana ni wun’wana ni madyambu+ man’wana ni man’wana ni murhi wa risuna lowu nun’hwelaka;+ ni swinkwa leswi tlhandlakaneke swi le henhla ka tafula ra nsuku wo tenga,+ naswona ku ni swo tlhoma timboni swa nsuku+ ni timboni ta swona to voninga madyambu man’wana ni man’wana;+ hikuva hi endla ntirho+ wa Yehovha Xikwembu xa hina, kambe n’wina mi n’wi siyile.+ 12 Maswivo, hina hi rhangeriwe hi Xikwembu+ xa ntiyiso xi ri ni vaprista+ va xona ni timhalamhala+ to tivisa mukhosi wa nyimpi ku lwa na n’wina. N’wina vana va Israyele, mi nga tshuki mi lwa na Yehovha Xikwembu xa vatata wa n’wina,+ hikuva a mi nge humeleli.”+
13 Loko ku ri Yerobuwamu, a rhumela vanhu va tumbelela ematlhelo leswaku va ta endzhaku ka vona, kutani va va emahlweni ka Yuda naswona lava va tumbeleleke va ta endzhaku ka vona.+ 14 Loko vanhu va Yuda va hundzuluka, waswivo, a ku ri ni nyimpi emahlweni ni le ndzhaku.+ Va sungula ku huwelela Yehovha,+ vaprista va ri karhi va ti pfumisa ngopfu timhalamhala. 15 Vavanuna va Yuda va ba hungwe ra nyimpi.+ Kuteloko vanhu va Yuda va be hungwe ra nyimpi, hiloko Xikwembu xa ntiyiso xi hlula+ Yerobuwamu ni tiko hinkwaro ra Israyele emahlweni ka Abiya+ na Yuda. 16 Vana va Israyele va baleka emahlweni ka Yuda, kutani Xikwembu xi va nyiketa evokweni ra vona.+ 17 Abiya ni vanhu vakwe va dlaya vanhu vo tala; lava va dlayiweke va Israyele va hambeta va wa, vavanuna lava va hlawuriweke va 500 000. 18 Kutani vana va Israyele va tsongahatiwile hi nkarhi wolowo, kambe vana va Yuda va vonaka va tlakukile hikuva a va titshege+ hi Yehovha Xikwembu xa vatata wa vona. 19 Abiya a hambeta a hlongorisa Yerobuwamu, a n’wi tekela miti, ku nga Bethele+ ni swimitana leswi swi titshegeke ha wona, na Yexana ni swimitana leswi swi titshegeke ha wona, na Efurayini ni swimitana leswi swi titshegeke ha wona.+ 20 Yerobuwamu a nga ha vanga na matimba+ emasikwini ya Abiya; kambe Yehovha u n’wi twise ku vava,+ lerova a fa.
21 Abiya a ya emahlweni a va ni matimba.+ Hi ku famba ka nkarhi a tikumela vasati va 14,+ a va tata wa vana va majaha va 22+ ni va vanhwanyana va 16. 22 Timhaka letin’wana ta Abiya, tindlela takwe ni marito yakwe, swi tsariwile enhlamuselweni ya muprofeta Ido.+