Esaya
52 Pfuka, pfuka, tiambexe ntamu wa wena,+ Wena Siyoni! Ambala tinguvu ta wena to saseka,+ Wena Yerusalema, muti wo kwetsima!+ Hikuva loyi a nga yimbangiki ni loyi a nga basangiki a nge he ngheni eka wena.+ 2 Tidzudze ritshuri,+ pfuka, tshama ehansi, Wena Yerusalema. Tintshunxe switsimbo swa nhamu ya wena, Wena nhwanyana wa Siyoni la nga khumbi.+
3 Hikuva Yehovha u te: “N’wina mi xaviseriwe swa hava,+ naswona a mi nge xaviwi hi mali.”+
4 Hikuva Yehovha, Hosi leyi Lawulaka u te: “Vanhu va mina va rhelele aEgipta eku sunguleni va ya luvela kona;+ kasi loko ku ri Asiriya u va tshikilerile ku nga ri na xivangelo.”
5 “Kutani, xana ndzi vuyeriwa hi yini laha?” ku vula Yehovha. “Hikuva vanhu va mina va tekiwe swa hava.+ Lava va va fumaka va tshamela ku kolola,”+ ku vula Yehovha, “naswona nkarhi hinkwawo, siku hinkwaro, vito ra mina a ri khomiwa hi ndlela leyi nga kombisiki xichavo.+ 6 Hikwalaho ka sweswo vanhu va mina va ta tiva vito ra mina,+ hi xivangelo xexo esikwini rero, hikuva hi mina Loyi a vulavulaka.+ Waswivo! Hi mina.”
7 Milenge+ ya loyi a tisaka mahungu lamanene+ ya languteka hakunene ehenhla ka tintshava, loyi a twarisaka ku rhula,+ loyi a tisaka mahungu lamanene ya leswo antswa,+ loyi a twarisaka ku ponisiwa,+ loyi a byelaka Siyoni a ku: “Xikwembu xa wena i hosi!”+
8 Yingisa! Varindzi+ va wena va ta tlakusa rito ra vona.+ Hi vun’we va hambeta va huwelela hi ku tsaka; hikuva va ta vona hi tihlo+ rin’we loko Yehovha a tlherisela Siyoni.+
9 Khanani, huwelelani hi ku tsaka hi vun’we, n’wina tindhawu leti onhakeke ta Yerusalema,+ hikuva Yehovha u chavelele vanhu vakwe;+ u kutsule Yerusalema.+ 10 Yehovha u pfule voko rakwe ro kwetsima ematihlweni ya matiko hinkwawo;+ makumu hinkwawo ya misava ma fanele ma vona ku ponisiwa loku humaka eka Xikwembu xa hina.+
11 Sukani, sukani, humani kona,+ mi nga khumbi nchumu lexi nga basangiki;+ humani exikarhi ka yena,+ tshamani mi basile, n’wina lava rhwalaka swibya swa Yehovha.+ 12 Hikuva n’wina mi ta huma mi nga chavi nchumu,+ naswona a mi nge fambi hi ku chava. Hikuva Yehovha u ta va a famba emahlweni ka n’wina,+ Xikwembu xa Israyele xi ta mi rindza endzhaku.+
13 Waswivo! Nandza+ wa mina u ta endla hi ku twisisa.+ U ta va exiyin’weni lexi tlakukeke naswona kunene u ta tlakusiwa, a yisiwa ehenhla swinene.+ 14 Hilaha vo tala a va n’wi languta hakona hi ku hlamala+—ku onhaka ka ku languteka+ kakwe ku ve kukulu swinene ku tlula ka munhu wihi ni wihi naswona xivumbeko+ xakwe lexikulu a xi tlula xa vana va vanhu— 15 u ta chavisa matiko yo tala hi ndlela yoleyo.+ Tihosi ti ta pfala milomu emahlweni ka yena,+ hikuva entiyisweni ti ta vona leswi ti nga si tshamaka ti runguleriwa swona, naswona ti ta yisa miehleketo eka leswi ti nga si tshamaka ti swi twa.+