Daniyele

8 Hi lembe ra vunharhu ra ku fuma ka hosi Belxatsara,+ ku humelele xivono eka mina, mina Daniyele, endzhaku ka lexi xi humeleleke eka mina eku sunguleni.+ 2 Kutani ndzi sungula ku vona exivonweni; loko ndzi ri karhi ndzi langutile, a ndzi ri eXuxani,+ ekhokholweni leri nga aElami+ muganga lowu nga ehansi ka vulawuri bya hosi; ndzi ya emahlweni ndzi vona exivonweni, a ndzi ri ekusuhi ni ndlela ya mati ya Ulayi.+ 3 Kuteloko ndzi tlakusa mahlo, waswivo, ndzi vone khuna+ ri yime emahlweni ka ndlela ya mati, a ri ri ni timhondzo timbirhi. Timhondzo leti timbirhi a ti lehile, kambe rin’we a ri lehe ku tlula lerin’wana, lero leha ngopfu ri hume endzhaku.+ 4 Ndzi vone khuna leri ri mpfhumpfha ri ya evupela-dyambu ni le n’walungwini ni le dzongeni, naswona ku hava swivandzana swa nhova leswi a swi yima emahlweni ka rona, a ku nga ri na munhu loyi a a kota ku kutsula evokweni ra rona.+ Kutani ri endla hi ku ya hi ku rhandza ka rona, ri tikukumuxa.

5 Loko ku ri mina, ndzi ya emahlweni ndzi xiyisisa, kutani waswivo, a ku ri ni xiphongo+ lexi humaka evupela-dyambu ehenhla ka vuandlalo bya misava hinkwayo, a xi nga yi khumbi misava. Loko ku ri xiphongo lexi, exikarhi ka mahlo ya xona a ku ri ni rimhondzo leri xiyekaka.+ 6 Kutani xi ta xi kongome khuna leri ri nga ni timhondzo timbirhi, leri ndzi ri voneke ri yime emahlweni ka ndlela ya mati; xi tsutsumela eka rona hi vukarhi lebyikulu.

7 Ndzi xi vone xi ri tshinelela swinene khuna leri, xi sungula ku ri karihela ngopfu, kutani xi hlasela khuna, xi tshova timhondzo ta rona timbirhi, khuna a ri nga ri na wona matimba yo yima emahlweni ka xona. Hiloko xi ri lahlela emisaveni, xi ri kandziyela, khuna a ri nga ri na mukutsuri evokweni ra xona.+

8 Loko ku ri xiphongo, xi tikukumuxe+ ngopfu; kuteloko xi va ni matimba, rimhondzo lerikulu ri tshoveka, kutani ematshan’weni ya rona ku humelela ta mune leti xiyekaka, etlhelo ra timheho ta mune ta matilo.+

9 Kutani eka rin’wana ra tona ku huma rimhondzo rin’wana, leritsongo,+ ri hambeta ri kula ngopfu swinene etlhelo ra le dzongeni ni le tlhelo ra le vuhuma-dyambu ni le tlhelo ro Khavisiwa.+ 10 Kutani ri hambeta ri kula ku ya fika eka vuthu ra le matilweni,+ lerova ri endla leswaku van’wana va vuthu ni tinyeleti+ tin’wana swi wela emisaveni, hiloko ri swi kandziyela.+ 11 A ri tikukumuxa ku ya fika ni le ka Hosana+ ya vuthu, naswona eka yona ku susiwe xitlhavelo xa nkarhi hinkwawo,+ ndhawu ya vukwetsimelo bya yona yi hirimuxiwa.+ 12 Hakatsongo-tsongo vuthu ri nyiketiwa,+ swin’we ni xitlhavelo xa nkarhi hinkwawo,+ hikwalaho ka ku tlula nawu;+ ri hambeta ri lahlela ntiyiso+ emisaveni,+ ri teka goza naswona ri humelela.+

13 Kutani ndzi twa mukwetsimi+ un’wana a vulavula, ni mukwetsimi un’wana a byela loyi a a vulavula a ku: “Xi ta teka nkarhi wo fikela kwihi xivono xa xitlhavelo xa nkarhi hinkwawo+ ni xa ku tluriwa ka nawu loku onhetelaka,+ ku endla leswaku ndhawu yo kwetsima ni vuthu swi va swilo swo kandziyeriwa?”+ 14 Hiloko a ku eka mina: “Kukondza ku va madyambu ni mixo ya 2 300; kutani ndhawu yo kwetsima kunene yi ta va exiyin’weni xa yona lexi lulameke.”+

15 Kuteloko mina Daniyele, ndzi vona xivono ni ku lava ku twisisa,+ waswivo, phela emahlweni ka mina a ku yime loyi a langutekaka ku fana ni munhu la tiyeke emirini.+ 16 Kutani ndzi twa rito ra munhu wa la misaveni exikarhi ka Ulayi,+ a huwelela a ku: “Gabriyele,+ endla munhu yoloye a twisisa nchumu lowu a wu voneke.”+ 17 Hiloko a ta etlhelo ka laha a ndzi yime kona, loko a fika, ndzi chava kutani ndzi wela ehansi hi xikandza. A ya emahlweni a ku eka mina: “Twisisa,+ Wena n’wana wa munhu,+ leswaku xivono lexi i xa nkarhi wa makumu.”+ 18 Loko a ri karhi a vulavula na mina, a ndzi etlele vurhongo, xikandza xa mina xi ri emisaveni.+ Hiloko a ndzi khumba, a ndzi yimisa laha a ndzi yime kona.+ 19 A ya emahlweni a ku: “Waswivo, ndzi ku tivisa leswi swi nga ta endleka exiphen’wini xo hetelela xa xigwevo, hikuva i xa nkarhi lowu vekiweke wa makumu.+

20 “Khuna leri u ri voneke ri ri ni timhondzo timbirhi ri yimela tihosi ta Meda na Peresiya.+ 21 Xiphongo lexi nga ni voya xi yimela hosi ya Grikiya;+ loko ku ri rimhondzo lerikulu leri a ri ri exikarhi ka mahlo ya xona, ri yimela hosi yo sungula.+ 22 Kutani leri ri tshovekeke, ivi ku huma ta mune ematshan’weni ya rona,+ ku ni mimfumo ya mune etikweni ra yona leyi yi nga ta humelela, kambe ku nga ri hi matimba ya yona.

23 “Exiphen’wini xo hetelela xa mfumo wa tona, hilaha lava va tlulaka nawu va endlaka hakona hi ku helela, ku ta va ni hosi leyi nga ni nghohe ya tihanyi, leyi twisisaka marito lama nga twisisekiki.+ 24 Matimba ya yona ma fanele ma kula, ku nga ri hi matimba ya yona.+ Kutani yi ta vanga ku onhaka hi ndlela yo hlamarisa,+ kunene yi ta humelela, yi endla hilaha ku humelelaka. Entiyisweni yi ta lovisa lava va nga ni matimba, ni vanhu lava katsaka vakwetsimi.+ 25 Hi ku landza ku twisisa ka yona, kunene yi ta endla leswaku vuxisi byi humelela evokweni ra yona.+ Yi ta tikukumuxa+ embilwini ya yona, enkarhini wo pfumala ku karhatiwa+ yi ta lovisa vo tala. Yi suka yi yima leswaku yi lwa ni Hosana ya tihosana,+ kambe yi ta tshoviwa handle ko tirhisa voko.+

26 “Kutani nchumu lowu wu voniweke malunghana ni madyambu, ni mixo, lowu wu vuriweke, i ntiyiso.+ Loko ku ri wena, hlayisa xivono xi ri xihundla, hikuva xa ha ta teka masiku yo tala.”+

27 Loko ku ri mina Daniyele, ndzi hele matimba, ndzi vabyile masiku yo karhi.+ Kutani ndzi suka ndzi yima, ndzi endla ntirho wa hosi;+ ndzi tshamela ku chava hikwalaho ka nchumu lowu ndzi wu voneke, a ku nga ri na munhu loyi a wu twisisaka.+