Zakariya

14 “Waswivo! Ku ni siku ra Yehovha+ leri ri taka, kunene leswi phangiweke swa wena swi ta aviwa exikarhi ka wena. 2 Kunene ndzi ta hlengeleta matiko hinkwawo ku lwa na Yerusalema;+ entiyisweni muti wu ta tekiwa, tindlu ti phangiwa,+ vavasati va ta pfinyiwa.+ Xiphemu xa muti xi fanele xi ya evukhumbini;+ kambe vanhu lava va seleke,+ a va nge herisiwi emutini.+

3 “Kunene Yehovha u ta famba a ya lwa ni matiko+ wolawo ku fana ni le sikwini ra ku lwa ka yena, esikwini ra nyimpi.+ 4 Esikwini rero milenge ya yena yi ta yima ehenhla ka ntshava ya mitlhwari, leyi yi nga emahlweni ka Yerusalema, evuxeni;+ kutani ntshava ya mitlhwari+ yi fanele yi avanyisiwa hi le xikarhi,+ ku suka evuhuma-dyambu ku ya evupela-dyambu. Ku ta va ni nkova lowukulu ngopfu; kutani hafu ya ntshava leyi yi ta yisiwa en’walungwini, hafu yin’wana ya yona yi ta ya edzongeni. 5 Kunene n’wina mi ta balekela enkoveni wa tintshava ta mina;+ hikuva nkova wa tintshava wu ta fika eAzele. Kutani mi ta boheka ku baleka, hilaha mi balekeke hakona loko ku tsekatseka misava emasikwini ya Uzhiya hosi ya Yuda.+ Kunene Yehovha Xikwembu xa mina u ta ta,+ vakwetsimi hinkwavo va ri na yena.+

6 “Esikwini rero, ku vonakala ka risima a ku nge vi kona+—swilo swi ta tiya.+ 7 Kutani ri ta va siku rin’we leri ri tiviwaka ri ri ra Yehovha.+ Nhlikanhi a wu nge vi kona, nivusiku a byi nge vi kona;+ kutani nimadyambu ku ta va ni ku vonakala.+ 8 Esikwini rero mati lama hanyaka+ ma ta huma eYerusalema,+ xiphemu xa wona xi ya evuxeni bya lwandle,+ xiphemu xin’wana xa wona xi ya evupela-dyambu bya lwandle.+ Swi ta endleka hi ximumu ni hi vuxika.+ 9 Yehovha u fanele a va hosi ehenhla ka misava hinkwayo.+ Esikwini rero Yehovha u ta va un’we,+ ni vito rakwe ri va rin’we.+

10 “Tiko hinkwaro ri ta hundzuriwa ri fana na Arabha,+ ku suka eGeba+ ku ya eRimoni+ ku ya edzongeni wa Yerusalema; wu fanele wu tlakuka kutani wu va ni vaaki endhawini ya wona,+ ku suka eNyangweni ya Benjamini+ ku ya fika endhawini ya Nyangwa yo Sungula, ku ya fika eNyangweni ya le Yinhleni, ni ku suka eXihondzweni xa Hananele+ ku ya fika emakhuwaneni ya le swikamelweni swa hosi. 11 Kunene vanhu va ta aka eka wona; naswona ku vekeriwa ndzoviso a ku nge he vi kona,+ Yerusalema wu fanele wu akiwa hi nsirhelelo.+

12 “Lowu wu ta va ntungu lowu Yehovha a nga ta va xupula ha wona vanhu hinkwavo lava va nga ta endla ntirho wa nyimpi ku lwa na Yerusalema:+ Nyama ya munhu yi ta bola, munhu a yime hi milenge;+ mahlo ya munhu ma ta bola emakheleni ya wona, ni ririmi ra munhu ri ta bola enon’wini wakwe.

13 “Kutani esikwini rero ku pfilunganyeka loku ku humaka eka Yehovha ku ta tala exikarhi ka vona;+ entiyisweni un’wana ni un’wana u ta khoma voko ra nakulobye, voko ra yena ri ta lwa ni voko ra nakulobye. 14 Yuda na yena u ta lwa eYerusalema; kunene rifuwo ra matiko hinkwawo lama rhendzeleke ri ta hlengeletiwa, nsuku ni silivhere ni tinguvu hi vunyingi bya swona.+

15 “Wu ta va tano ntungu wa hanci, meyila, kamela ni mbhongolo ya xinuna, ni xifuwo xa muxaka wun’wana ni wun’wana lexi xi kumekaka eminxaxeni yoleyo, wu ta fana ni ntungu lowu.

16 “Kutani, malunghana ni un’wana ni un’wana loyi a siyiweke eka matiko hinkwawo lawa ma taka ku ta lwa na Yerusalema,+ va fanele va tlhandluka lembe ni lembe+ va ya nkhinsamela Hosi,+ Yehovha wa mavuthu,+ ni ku tlangela nkhuvo wa mintsonga.+ 17 Kutani, mani na mani loyi a nga humiki+ eka mindyangu+ ya misava a ta eYerusalema a ta nkhinsamela Hosi, Yehovha wa mavuthu, mpfula a yi nge ni ehenhla ka vona.+ 18 Loko ndyangu wa Egipta wu nga tlhandluki, wu nghena, na vona a va nge neriwi hi nchumu. Ku ta va ni ntungu lowu Yehovha a xupulaka ha wona matiko lawa ma nga tlhandlukiki ma ta tlangela nkhuvo wa mintsonga. 19 Lowu wu ta va nxupulo wa xidyoho xa Egipta ni xidyoho xa matiko hinkwawo lawa ma nga tlhandlukiki ma ta tlangela nkhuvo wa mintsonga.+

20 “Esikwini rero ku ta tsariwa+ eka swingelengele swa tihanci va ku, ‘Vukwetsimi i bya Yehovha!’+ Timbita letikulu+ leti ti nga endlwini ya Yehovha ti fanele ti fana ni minkambana+ emahlweni ka alitari.+ 21 Kutani mbita yin’wana ni yin’wana leyikulu eYerusalema ni le Yuda yi fanele yi va nchumu wo kwetsima eka Yehovha wa mavuthu, hinkwavo lava va endlaka xitlhavelo va fanele va nghena, va pambula eka tona, va sweka ha tona.+ A ku nge he vi na Mukanana+ endlwini ya Yehovha wa mavuthu esikwini rero.”+