Zakariya
6 Kutani ndzi tlhela ndzi tlakusa mahlo ndzi languta; waswivo, a ku ri ni makalichi ya mune lama humaka exikarhi ka tintshava timbirhi, tintshava leti a ti ri tintshava ta koporo. 2 Ekalichini yo sungula a ku ri ni tihanci to tshwuka;+ kasi ekalichini ya vumbirhi a ku ri ni tihanci ta ntima.+ 3 Kutani ekalichini ya vunharhu a ku ri ni tihanci to basa;+ kasi ekalichini ya vumune, a ku ri ni tihanci ta mavalavala, ta mikhwalalati.+
4 Ndzi ya emahlweni ndzi angula ntsumi leyi a yi vulavula na mina, ndzi ku: “Xana i yini leswi, hosi yanga?”+
5 Hiloko ntsumi yi ndzi hlamula yi ku: “Leyi i mimoya ya mune+ ya le matilweni leyi yi humaka,+ endzhaku ka loko yi yimile emahlweni ka Hosi+ ya misava hinkwayo.+ 6 Loko ku ri leyi tihanci ta ntima ti nga eka yona, yi ya etikweni ra le n’walungwini;+ loko ku ri leto basa, ti fanele ti ya endzhaku ka lwandle; loko ku ri leti ta mavalavala, ti fanele ti ya etikweni ra le dzongeni.+ 7 Loko ku ri leti ta mikhwalalati,+ ti fanele ti huma kutani ti tshamela ku lava ndhawu yo ya eka yona, leswaku ti famba-famba emisaveni.”+ Kutani a ku: “Fambani, mi rhendzeleka emisaveni.” Kutani ti famba-famba emisaveni.
8 Yi huwelela eka mina, yi vulavula na mina, yi ku: “Waswivo, leti ti yaka etikweni ra le n’walungwini hi tona leti ti endleke leswaku moya+ wa Yehovha wu tshama etikweni ra le n’walungwini.”+
9 Rito ra Yehovha ri hambeta ri fika eka mina, ri ku: 10 “A ku tekiwe swo karhi eka vanhu lava nga evukhumbini,+ eka Helidayi ni le ka Thobiya ni le ka Yedaya; kutani wena u fanele u ta esikwini rero, u fanele u nghena endlwini ya Yosiya n’wana wa Sofaniya+ swin’we ni lava va humaka eBabilona. 11 U fanele u teka silivhere ni nsuku, u endla harhi leyikulu,+ u yi tlhandleka enhlokweni ya Yoxuwa+ n’wana wa Yohozadaki lowa muprista lonkulu. 12 U fanele u n’wi byela u ku,
“‘Yehovha wa mavuthu u te: “Hi loyi munhu loyi+ vito rakwe a nga Hluke.+ U ta hluka endhawini yakwe, kunene u ta aka tempele ya Yehovha.+ 13 Yena u ta aka tempele ya Yehovha, loko ku ri yena, u ta va ni xindzhuti;+ u fanele a tshama ehansi, a fuma a ri exiluvelweni xakwe, u fanele a va muprista a ri exiluvelweni xakwe,+ kutani xitsundzuxo xa ku rhula+ xi ta va exikarhi ka vona havambirhi. 14 Harhi leyikulu yi ta va ya Heleme na Thobiya na Yedaya+ na Heni n’wana wa Sofaniya, yi va xitsundzuxo+ etempeleni ya Yehovha. 15 Kutani lava va nga ekule va ta ta, entiyisweni va ta aka etempeleni ya Yehovha.”+ N’wina mi ta swi tiva leswaku Yehovha wa mavuthu hi yena loyi a ndzi rhumeke eka n’wina.+ Swi fanele swi endleka—loko hakunene mo yingisa rito ra Yehovha Xikwembu xa n’wina.’”+