Tinhlayo

35 Yehovha a ya emahlweni a byela Muxe etimbaleni ta le kwandzasini ra Mowabu ekusuhi na Yordani+ eYeriko, a ku: 2 “Lerisa vana va Israyele leswaku va fanele va nyika Valevhi miti+ yo tshama eka yona yi huma endzhakeni ya rifuwo ra vona, va fanele va nyika Valevhi madyelo ya miti hinkwayo leyi yi va rhendzeleke.+ 3 Kutani miti yi ta va ya vona yo tshama eka yona, kasi madyelo ma ta va ya swifuwo swa vona ni ya nhundzu ya vona ni ya swivandzana swa vona hinkwaswo. 4 Madyelo ya miti leyi mi nga ta yi nyika Valevhi ma ta sukela ekhumbini ra muti, ma anama swisungunu swa 1 000 ma rhendzela hinkwako. 5 Mi fanele mi pima swisungunu swa 2 000 ehandle ka muti etlhelo ra le vuxeni, ni swisungunu swa 2 000 etlhelo ra le dzongeni, ni swisungunu swa 2 000 etlhelo ra le vupela-dyambu, ni swisungunu swa 2 000 etlhelo ra le n’walungwini, muti wu va exikarhi. Lawa ku ta va madyelo ya miti.

6 “Miti leyi mi nga ta yi nyika Valevhi hi leyi: miti ya tsevu ya vutumbelo,+ leyi mi nga ta yi nyika loyi a dlayeke munhu leswaku a balekela kona,+ kasi handle ka yona mi ta va nyika miti yin’wana ya 42. 7 Miti hinkwayo leyi mi nga ta yi nyika Valevhi yi ta va yi ri 48, yi hlangane ni madyelo ya yona.+ 8 Miti leyi mi nga ta yi nyika yi ta huma erifuweni ra vana va Israyele.+ Eka lava va nga ni ro tala mi ta teka ro tala, eka lava va nga na leritsongo mi ta teka leritsongo.+ Un’wana ni un’wana hi ku ya hi mpimo wa ndzhaka yakwe leyi a nga ta yi teka yi va rifuwo, miti yakwe yin’wana u ta yi nyika Valevhi.”

9 Yehovha a ya emahlweni a byela Muxe a ku: 10 “Byela vana va Israyele u ku eka vona, ‘Mi pela Yordani mi ya etikweni ra Kanana.+ 11 Mi fanele mi hlawula miti leyi yi mi faneleke. Yi ta va miti ya vutumbelo eka n’wina, kutani loyi a dlayeke munhu, u fanele a balekela kona, loyi a baka moya-xiviri a wu dlaya ku nga ri ha vomu.+ 12 Kutani miti yi ta va vutumbelo eka murihiseri+ wa ngati, leswaku loyi a dlayeke munhu a nga fi kukondza a yima emahlweni ka ntshungu a avanyisiwa.+ 13 Miti leyi mi nga ta yi nyika, miti ya tsevu ya vutumbelo, mi ta yi tirhisa. 14 Mi ta nyiketa miti yinharhu etlhelweni leri ra Yordani,+ naswona mi ta nyiketa miti yinharhu etikweni ra Kanana.+ Yi ta va miti ya vutumbelo. 15 Miti leyi ya tsevu yi ta va vutumbelo eka vana va Israyele ni le ka muluveri+ ni le ka nhlapfa, lava va nga exikarhi ka vona, leswaku un’wana ni un’wana loyi a baka moya-xiviri a wu dlaya ku nga ri ha vomu a balekela kona.+

16 “‘Kutani loko a n’wi be hi xitirho ra nsimbi kutani a fa, i mudlayi la dlayaka hi vomu.+ Hakunene mudlayi la dlaya-​ka hi vomu u ta dlayiwa.+ 17 Loko a n’wi hoxe hi ribye leritsongo, leri nga n’wi dlayaka kutani a fa, i mudlayi la dlayaka hi vomu. Hakunene mudlayi la dlayaka hi vomu u ta dlayiwa. 18 Loko a n’wi be hi xitirho lexitsongo xa ntsandza lexi nga n’wi dlayaka, kutani a fa, i mudlayi la dlayaka hi vomu. Hakunene mudlayi la dlayaka hi vomu u fanele a dlayiwa.

19 “‘Murihiseri+ wa ngati hi yena la nga ta dlaya mudlayi la dlayaka hi vomu. Loko o tshuka a hlangana na yena u ta n’wi dlaya. 20 Loko a n’wi susumete+ hikwalaho ka leswi a a n’wi vengile kumbe a n’wi hoxe hi xilo xo karhi, kasi a a tumbelerile+ kutani a fa, 21 kumbe hikwalaho ka vulala a n’wi be hi voko leswaku a fa, hakunene loyi a n’wi beke u ta dlayiwa. I mudlayi la dlayaka hi vomu. Loko murihiseri wa ngati o tshuka a hlangana ni mudlayi la dlayaka hi vomu u ta n’wi dlaya.+

22 “‘Kambe loko a n’wi susumete kumbe a n’wi hoxetele hi xilo xo karhi a nga n’wi tumbelelanga, ku nga ri ha vomu, ku nga ri hikwalaho ka vulala,+ 23 kumbe ribye rin’wana ni rin’wana leri ri nga n’wi dlayaka a nga n’wi vonanga kumbe a endla leswaku ri wela ehenhla ka yena, kutani a fa, kasi a a nga ri nala wa yena naswona a a nga lavi ku n’wi vavisa, 24 ntshungu wu fanele wu avanyisa exikarhi ka la n’wi beke ni murihiseri wa ngati hi ku landza vuavanyisi lebyi.+ 25 Kutani ntshungu+ wu fanele wu kutsula loyi a dlayeke munhu evokweni ra murihiseri wa ngati, naswona ntshungu wu fanele wu n’wi tlherisela emutini wa ka vona wa vutumbelo lowu a a balekele eka wona, u fanele a tshama eka wona kukondza ku fa muprista lonkulu loyi a totiweke hi mafurha yo kwetsima.+

26 “‘Kambe loko hakunene loyi a dlayeke munhu a huma endzilakaneni wa muti wakwe wa vutumbelo lowu a balekeleke eka wona, 27 ivi murihiseri+ wa ngati a n’wi kuma ehandle ka ndzilakana wa muti wakwe wa vutumbelo, kutani murihiseri wa ngati a dlaya loyi a dlayeke munhu, a nga na nandzu wa ngati. 28 Hikuva u fanele a tshama emutini wakwe wa vutumbelo kukondza ku fa muprista lonkulu,+ kutani endzhaku ka rifu ra muprista lonkulu loyi a dlayeke munhu a nga tlhelela etikweni ra rikwavo. 29 Leswi swi fanele swi va nawu wa vuavanyisi eka n’wina eswitukulwaneni swa n’wina hinkwaswo, etindhawini ta n’wina hinkwato leti mi tshamaka eka tona.

30 “‘Un’wana ni un’wana la baka moya-xiviri a wu dlaya, u fanele a dlayiwa a ri la dlayaka hi vomu+ loko ku ri ni timbhoni,+ naswona mbhoni yin’we a yi nge humesi vumbhoni lebyi kanetaka moya-xiviri leswaku wu fa. 31 Mi nga tshuki mi amukela nkutsulo wa moya-xiviri eka la dlayaka hi vomu loyi a faneriwaka hi ku fa,+ hikuva u fanele a dlayiwa hakunene.+ 32 Mi nga tshuki mi amukela nkutsulo wa la balekeleke emutini wakwe wa vutumbelo a tlhela a ya tshama etikweni muprista lonkulu a nga si fa.

33 “‘Mi nga tshuki mi nyamisa tiko leri mi nga eka rona; hikuva i ngati leyi thyakisaka tiko,+ naswona tiko ri nga tshuki ri kombeleriwa ku rivaleriwa hikwalaho ka ngati leyi halatiweke eka rona, handle ka ngati ya yoloye a yi halataka.+ 34 Mi nga tshuki mi nyamisa tiko leri mi tshamaka eka rona, leri ndzi tshamaka exikarhi ka rona; hikuva mina Yehovha, ndzi tshama exikarhi ka vana va Israyele.’”+