Tinhlayo

8 Yehovha a ya emahlweni a vulavula na Muxe a ku: 2 “Byela Aroni u ku eka yena, ‘Nkarhi hinkwawo loko u lumeka timboni, timboni ta nkombo ti fanele ti voninga ndhawu leyi nga emahlweni ka xo tlhoma rivoni.’”+ 3 Kutani Aroni a sungula ku endla tano. A lumeka timboni ta ndhawu leyi nga emahlweni ka xo tlhoma rivoni,+ hilaha Yehovha a leriseke Muxe hakona. 4 Kutani xo tlhoma rivoni a xi endliwe hi ndlela leyi. A xi ri xa nsuku, xi furiwe hi hamula. A xi furiwe+ hi hamula ku ya fika ematlhelo ya xona ni ku ya fika eka swiluva swa xona. Hi ku landza xivono+ lexi Yehovha a xi kombeke Muxe, yena u endle xo tlhoma rivoni hi ndlela yoleyo.

5 Yehovha a ya emahlweni a vulavula na Muxe a ku: 6 “Teka Valevhi exikarhi ka vana va Israyele, u va tengisa.+ 7 Kutani u ta endla leswi, leswaku u va tengisa: Va xuve hi mati ya ku tengisa xidyoho,+ va fanele va hundzisa rikari enyameni+ ya vona hinkwayo ivi va hlantswa tinguvu+ ta vona, va titengisa.+ 8 Kutani va fanele va teka nkunzi+ leyitsongo ni gandzelo ra yona ra mavele+ ra mapa lamanene lama tsakamisiweke hi mafurha, wena u ta teka nkunzi yin’wana leyitsongo yi va ya gandzelo ra xidyoho.+ 9 Kutani u fanele u nyikela Valevhi emahlweni ka ntsonga wa nhlangano, ivi u hlengeleta ntshungu hinkwawo wa vana va Israyele.+ 10 U fanele u nyikela Valevhi emahlweni ka Yehovha, kutani vana va Israyele va fanele va tlhandleka+ mavoko ya vona ehenhla ka Valevhi.+ 11 Aroni u fanele a endla leswaku Valevhi va ya emahlweni ni le ndzhaku emahlweni ka Yehovha, va va gandzelo leri ndziwitiwaka+ ra vana va Israyele, va fanele va yisa ntirho wa Yehovha+ emahlweni.

12 “Kutani Valevhi va ta tlhandleka mavoko ya vona etinhlokweni ta tinkunzi.+ Endzhaku ka sweswo, nyikela leyi yi nga gandzelo ra xidyoho ni leyi yi nga gandzelo ro hisiwa eka Yehovha leswaku ti kombelela Valevhi ku rivaleriwa.+ 13 U fanele u yimisa Valevhi emahlweni ka Aroni ni vana vakwe, naswona u fanele u va endla leswaku va ya emahlweni ni le ndzhaku va va gandzelo leri ndziwitiwaka eka Yehovha. 14 U fanele u hambanisa Valevhi exikarhi ka vana va Israyele, Valevhi va ta va va mina.+ 15 Kutani endzhaku ka sweswo Valevhi va ta ta va ta tirhela entsongeni wa nhlangano.+ Hikwalaho u fanele u va basisa u va endla va ya emahlweni ni le ndzhaku va va gandzelo leri ndziwitiwaka.+ 16 Hikuva hi lava va nyiketiweke, va nyiketiwe eka mina va huma exikarhi ka vana va Israyele.+ Ndzi ta titekela vona ematshan’weni ya lava va pfulaka timbeleko hinkwato, mativula hinkwawo ya vana va Israyele.+ 17 Hikuva mativula hinkwawo ya vana va Israyele i ya mina, ya munhu ni ya xiharhi.+ Ndzi tihlawulekisele+ wona siku ndzi nga ba mativula man’wana ni man’wana etikweni ra Egipta.+ 18 Kutani ndzi ta teka Valevhi va va ematshan’weni ya mativula hinkwawo exikarhi ka vana va Israyele.+ 19 Kutani ndzi ta nyiketa Valevhi va va lava nyiketiweke eka Aroni ni vana vakwe, va huma exikarhi ka vana va Israyele,+ leswaku va hambeta va tirhela vana va Israyele entsongeni wa nhlangano+ ni ku kombelela vana va Israyele ku rivaleriwa, leswaku ku nga tshuki ku va ni khombo leri nga ta humelela vana va Israyele,+ hikwalaho ko va vana va Israyele va tshinele endhawini yo kwetsima.”

20 Kutani Muxe na Aroni ni ntshungu hinkwawo wa vana va Israyele va endla tano eka Valevhi. Vana va Israyele va endle tano eka vona, hi ku pfumelelana ni hinkwaswo leswi Yehovha a swi leriseke hi Muxe malunghana ni Valevhi. 21 Hiloko Valevhi va titengisa+ naswona va hlantswa tinguvu ta vona, endzhaku ka sweswo Aroni a endla leswaku va ya emahlweni ni le ndzhaku va va gandzelo leri ndziwitiwaka emahlweni ka Yehovha.+ Kutani Aroni a va kombelela ku rivaleriwa ku ri ku va tengisa.+ 22 Endzhaku ka sweswo Valevhi va nghena ro sungula leswaku va endla ntirho wa vona entsongeni wa nhlangano emahlweni ka Aroni ni vana+ vakwe. Va endle tano eka vona, hilaha Yehovha a leriseke Muxe hakona malunghana ni Valevhi.

23 Kutani Yehovha a vulavula na Muxe a ku: 24 “Leswi hi leswi swi khumbaka Valevhi: Ku sukela eka loyi a nga ni malembe ya 25 hi vukhale ku ya ehenhla, u ta nghena entlaweni wa vutirheli bya ntsonga wa nhlangano. 25 Kambe endzhaku ka malembe ya 50 hi vukhale u ta tshika ku va entlaweni wa vutirheli, a nga ha tirhi. 26 U fanele a tirhela vamakwavo entsongeni wa nhlangano hi ku khathalela mfanelo yakwe, kambe a nga ha tirhi nchumu. U ta endla tano eka Valevhi hi ku pfumelelana ni leswi, eka timfanelo+ ta vona.”