Mitirho

16 Kutani a fika eDerbe ni le Listra.+ Waswivo, a ku ri ni mudyondzisiwa un’wana loyi a vitaniwaka Timotiya,+ n’wana wa wansati wa Muyuda la pfumelaka kambe tata wakwe a a ri Mugriki, 2 naswona a ku vulavuriwa kahle ha yena hi vamakwavo va le Listra ni le Ikoniya. 3 Pawulo u phofule ku navela ka leswaku wanuna loyi a famba na yena, hiloko a n’wi teka a n’wi yimbisa+ hikwalaho ka Vayuda lava a va ri etindhawini teto, hikuva hinkwavo a va swi tiva leswaku tata wakwe a a ri Mugriki. 4 Loko va hundza hi le mitini a va nyika lava a va ri eka yona swileriso swa nawu leswaku va swi hlayisa, leswi bohiweke hi vaapostola ni vakulukumba lava a va ri eYerusalema.+ 5 Hikokwalaho, hakunene mavandlha a ma ya ma tiyisiwa eripfumelweni+ ni ku andza hi nhlayo siku rin’wana ni rin’wana.

6 Ku tlula kwalaho, va tsemakanye eFrigiya ni le tikweni ra Galatiya,+ hikuva moya lowo kwetsima wu va arisile ku vula rito emugangeni wa Asiya. 7 Ku tlula kwalaho, loko va fika eMisiya va endle matshalatshala yo ya eBitiniya,+ kambe moya wa Yesu a wu va pfumelelanga. 8 Hiloko va hundza eMisiya kutani va rhelela va ya eTrowasi.+ 9 Nivusiku ku humelele xivono+ eka Pawulo: wanuna un’wana wa Mukedoniya a a yimile a n’wi kombela a ku: “Pelela eMakedoniya u ta hi pfuna.” 10 Endzhakunyana ka loko a vone xivono, hi lave ku ya eMakedoniya,+ hi gimeta hileswaku Xikwembu xi hi vitane leswaku hi vula mahungu lamanene eka vona.

11 Hikokwalaho hi teke riendzo ra xikepe ku suka eTrowasi kutani hi famba hi ndlela yo tsemakanya hi ta fika eSamotraka, kambe hi siku leri landzelaka hi ya eNeyapoli, 12 hi suka kona hi ya eFilipiya,+ ku nga koloni, muti lowukulu wa muganga wa Makedoniya.+ Hi tshame emutini lowu hi heta masikunyana. 13 Kutani hi siku ra savata hi huma hi nyangwa hi ya etlhelo ka nambu, laha a hi ehleketa leswaku ku ni ndhawu ya xikhongelo; hiloko hi tshama ehansi hi vulavula ni vavasati lava a va hlengeletanile. 14 Kutani wansati un’wana la vuriwaka Lidiya, muxavisi wa swilo swa xivunguvungu, wa muti wa Tiyatira+ la nga mugandzeri wa Xikwembu, a a yingisile, hiloko Yehovha a pfula mbilu+ yakwe swinene leswaku yi nyikela nyingiso eka swilo leswi vuriwaka hi Pawulo. 15 Kuteloko yena ni ndyangu wakwe va khuvuriwa,+ a endla xikombelo a ku: “Loko n’wina mi ndzi avanyise leswaku ndzi tshembekile eka Yehovha, nghenani endlwini ya mina mi tshama.”+ Kutani a hi sindzisa ku nghena.+

16 Kuteloko hi ya endhawini ya xikhongelo, nandza un’wana wa xisati loyi a a ri ni moya,+ dimona ra vungoma,+ a hlangana na hina. A a hamba a tisela vini vakwe mpindzulo+ lowukulu hi ku tirhisa vutshila bya ku bvumba. 17 Nandza loyi wa xisati a a tshamela ku landzelela Pawulo swin’we na hina a huwelela+ marito lama nge: “Vavanuna lava i mahlonga ya Xikwembu Lexi nge Henhla-henhla, lava twarisaka eka n’wina ndlela ya ku ponisiwa.” 18 A a tshamela ku endla sweswo masiku yo tala. Eku heteleleni Pawulo a karhala+ hi swona kutani a hundzuluka a byela moya wolowo, a ku: “Ndzi ku lerisa hi vito ra Yesu Kreste leswaku u huma eka yena.”+ Hiloko wu huma hi nkarhi wolowo.+

19 Kutani, loko vini va yena va vona leswaku ntshembo wa vona wo kuma mpindzulo wu sukile,+ va khoma Pawulo na Silasi va va kokela eka vafumi+ endhawini ya ku xavisela, 20 loko va va yisa etindhuneni ta tiko, va ku: “Vanhu lava va pfilunganya+ muti wa hina swinene, kasi i Vayuda, 21 naswona va twarisa mikhuva+ leyi swi nga pfumeleriwiki leswaku hina hi yi amukela kumbe hi hanya ha yona, hikuva hi Varhoma.” 22 Hiloko ntshungu wu va pfukela swin’we; kutani tindhuna ta tiko, endzhaku ko handzulela tinguvu ta vona ta le handle, ti lerisa leswaku va biwa hi tinhonga.+ 23 Endzhaku ka loko va va be ko tala,+ va va hoxa ekhotsweni, va lerisa mulanguteri wa khotso leswaku a va rindza+ swinene. 24 Hikwalaho ka leswi a kumeke xileriso xexo, a va hoxa ekhotsweni+ ra le xikarhi kutani a va manya milenge hi tingole.+

25 Kambe exikarhinyana ka vusiku+ Pawulo na Silasi a va khongela ni ku dzunisa Xikwembu hi risimu;+ ina, vakhotsiwa a va va twa. 26 Hi xitshuketa ku va ni ku tsekatseka lokukulu ka misava, lerova masungulo ya khotso ma ninginisiwa. Ku tlula kwalaho, tinyangwa hinkwato ti pfuleka xikan’we-kan’we, kutani timpecana ta vona hinkwavo ti ntshunxeka.+ 27 Mulanguteri wa khotso, loko a pfuka evurhongweni a vona tinyangwa ta khotso ti pfulekile, a hlomula banga rakwe naswona a a lava ku tidlaya,+ a anakanya leswaku vakhotsiwa va balekile.+ 28 Kambe Pawulo a huwelela hi rito lerikulu, a ku: “U nga tivavisi,+ hikuva hi kona hinkwerhu!” 29 Hiloko a kombela timboni kutani a tlulela endzeni, hi ku khomiwa hi ku rhurhumela, a wela ehansi+ emahlweni ka Pawulo na Silasi. 30 Kutani a va humesela ehandle a ku: “Vakulukumba, xana ndzi fanele ku endla yini+ leswaku ndzi ponisiwa?” 31 Va ku: “Pfumela eka Hosi Yesu kutani u ta ponisiwa,+ wena ni ndyangu+ wa wena.” 32 Kutani va n’wi byela rito ra Yehovha swin’we ni hinkwavo lava nga endlwini yakwe.+ 33 Kavaloko a famba na vona hi nkarhi wolowo wa vusiku kutani a hlantswa mimpfembeti ya vona; naswona, hinkwavo, yena ni lava va nga va yena va khuvuriwa+ handle ka ku hlwela. 34 Kutani a va yisa endlwini yakwe a veka swakudya etafuleni emahlweni ka vona, a tsaka swinene ni ndyangu wakwe hinkwawo leswi a kholweke Xikwembu.

35 Loko ri xa, tindhuna ta tiko+ ti rhuma varindzi leswaku va ku: “Ntshunxani vavanuna volavo.” 36 Kutani mulanguteri wa khotso a vikela Pawulo marito ya vona: “Tindhuna ta tiko ti rhume vanhu leswaku n’wina havambirhi mi ntshunxiwa. Hikokwalaho, humani mi tifambela hi ku rhula.” 37 Kambe Pawulo a ku eka vona: “Va hi be erivaleni hi nga ri na nandzu, hina vavanuna lava nga Varhoma,+ kutani va hi hoxa ekhotsweni; kutani, xana sweswi va hi ntshunxa exihundleni? Swi nga vi tano, hakunene, kambe a va te va ta hi humesa hi voxe.” 38 Kutani varindzi va vika marito lawa eka tindhuna ta tiko. Vona va sungula ku chava loko va twa leswaku vavanuna lava a va ri Varhoma.+ 39 Hikwalaho va ta va va kombela, endzhaku ka ku va humesa, va va kombela leswaku va huma emutini. 40 Kambe va huma ekhotsweni kutani va ya ekaya ra Lidiya, kuteloko va vona vamakwavo, va va khutaza+ kutani va famba.