Deteronoma

26 “Kutaku loko eku heteleleni u nghena etikweni leri Yehovha Xikwembu xa wena a ku nyikaka rona leswaku u ri teka, naswona u ri fuwile, u tshama eka rona,+ 2 u fanele u tlhela u teka swirhangana+ swa mihandzu hinkwayo ya misava, leswi u nga ta swi tisa swi huma etikweni ra wena, leri Yehovha Xikwembu xa wena a ku nyikaka rona, u fanele u swi chela exirhundzwini, u ya endhawini leyi Yehovha Xikwembu xa wena a nga yi hlawula leswaku vito rakwe ri tshama kona.+ 3 U fanele u ya eka muprista+ la nga ta va a tirha emasikwini wolawo, u ku eka yena, ‘Ndzi fanele ndzi vika namuntlha eka Yehovha Xikwembu xa wena leswaku ndzi nghene etikweni leri Yehovha a hlambanyeleke vatatana leswaku u ta hi nyika rona.’+

4 “Muprista u fanele a teka xirhundzu evokweni ra wena a xi veka emahlweni ka alitari ya Yehovha Xikwembu xa wena. 5 Kutani u fanele u hlamula, u vula emahlweni ka Yehovha Xikwembu xa wena, u ku, ‘Tatana a a ri Muasiriya+ la lovaka; u rhelele aEgipta+ a ya luvela kona a ri ni vanhu va nga ri vangani;+ kambe kwalaho u ve tiko lerikulu, leri nga ni matimba ni leri nga ni vanhu vo tala.+ 6 Vaegipta va hi khome hi ndlela yo biha, va hi xanisa naswona va hi sindzisa hi vuhlonga lebyikulu.+ 7 Hiloko hi sungula ku huwelela eka Yehovha Xikwembu xa vatatana,+ Yehovha a twa marito+ ya hina naswona a languta ku xaniseka ka hina ni ku karhateka ka hina, ni ku tshikileriwa+ ka hina. 8 Eku heteleleni Yehovha a hi humesa aEgipta hi voko+ ra matimba ni hi voko leri tshambulutiweke+ ni hi ku chavisa lokukulu,+ ni hi swikombiso ni masingita.+ 9 Kutani a hi tisa endhawini leyi, a hi nyika tiko leri, tiko leri khulukaka ntswamba ni vulombe.+ 10 Kutani sweswi, ndzi tise swirhangana swa mihandzu ya misava leyi Yehovha a ndzi nyikeke yona.’+

“U fanele u yi veka emahlweni ka Yehovha Xikwembu xa wena naswona u nkhinsama emahlweni ka Yehovha Xikwembu+ xa wena. 11 U fanele u tsaka+ hikwalaho ka vunene hinkwabyo lebyi Yehovha Xikwembu xa wena a byi nyikeke wena ni vandyangu wa wena, wena ni Mulevhi ni muluveri la nga exikarhi ka n’wina.+

12 “Loko se u hetile ku humesa vukhume+ hinkwabyo bya ntshovelo wa wena hi lembe+ ra vunharhu, ku nga lembe ra vukhume, u fanele u tlhela u byi nyika Mulevhi ni muluveri ni n’wana la nga riki na tatana ni noni, va fanele va byi dyela endzeni ka tinyangwa ta wena va xurha.+ 13 U fanele u vula emahlweni ka Yehovha Xikwembu xa wena u ku, ‘Ndzi suse swo kwetsima endlwini, ndzi swi nyike Mulevhi ni muluveri ni n’wana la nga riki na tatana ni noni,+ hi ku pfumelelana ni swileriso swa wena hinkwaswo leswi u ndzi leriseke swona. A ndzi swi tlulanga swileriso swa wena kumbe ku swi rivala.+ 14 A ndzi swi dyanga hi nkarhi wa ku rila ka mina, kumbe ku susa swin’wana swa swona loko ndzi nga tenganga, kumbe ndzi nyika swin’wana swa swona eka un’wana ni un’wana loyi a feke. Ndzi yingise rito ra Yehovha Xikwembu xa mina. Ndzi endle hi ku pfumelelana ni hinkwaswo leswi u ndzi leriseke swona. 15 Languta ehansi u ri endhawini ya wena yo kwetsima+ leyi u tshamaka eka yona, ku nga matilo, u katekisa vanhu va wena Israyele+ ni misava leyi u hi nyikeke yona, hilaha u va hlambanyeleke hakona vatatana,+ tiko leri khulukaka ntswamba ni vulombe.’+

16 “Esikwini leri, Yehovha Xikwembu xa wena u ku lerisa ku hetisisa swileriso leswi ni swiboho leswi swa vuavanyisi;+ u fanele u swi hlayisa naswona u swi hetisisa hi mbilu+ ya wena hinkwayo ni hi moya-xiviri+ wa wena hinkwawo. 17 Namuntlha u susumete Yehovha a vula leswaku u ta va Xikwembu xa wena loko u famba etindleleni takwe naswona u hlayisa milawu+ yakwe ni swileriso+ swakwe ni swiboho swakwe swa vuavanyisi,+ u yingisa rito+ rakwe. 18 Loko ku ri Yehovha, namuntlha u ku susumetele ku vula leswaku u ta va tiko rakwe, ndzhaka+ yakwe yo hlawuleka, hilaha a ku tshembiseke+ hakona, nileswaku u ta hlayisa swileriswo swakwe hinkwaswo, 19 nileswaku u ta ku tlakusa a ku veka ehenhla ka matiko laman’wana hinkwawo lawa a ma endleke,+ makumu ma va ku dzunisa ni ndhuma ni ku saseka, loko u tikombisa u ri tiko ro kwetsima eka Yehovha Xikwembu xa wena,+ hilaha a tshembiseke hakona.”