Tihosi Ta Vumbirhi

7 Kutani Elixa a ku, “Yingisani rito ra Yehovha. Yehovha u ri: ‘Mundzuku hi nkarhi lowu egedeni* ya muti wa Samariya, seya* ya mapa lama silekeke kahle yi ta vitana xiphemu xin’we xa silivhere* naswona tiseya timbirhi ta maxalana ti ta vitana xiphemu xin’we xa silivhere.’”+ 2 Hiloko ndhuna leyi a yi ri xandla xa hosi yi byela nandza wa Xikwembu xa ntiyiso yi ku: “Hambiloko Yehovha o pfula matilo,* xana swilo leswi swi nga endleka?”+ Kutani Elixa a ku: “U ta swi vona loko swi endleka,+ kambe a wu nge swi dyi.”+

3 A ku ri ni vavanuna va mune lava nga ni nhlokonho egedeni ya muti,+ hiloko va vutisana va ku: “Hi tshamele yini laha hi nga ta kala hi fa? 4 Loko hi ku, ‘A hi ngheneni emutini,’ loko ka ha ri ni ndlala emutini,+ hi ta fela kona. Kasi loko hi tshama laha, swo fana hi ta fa. Hikwalaho, a hi yeni enxaxeni wa Vasiriya. Loko vo ka va nga hi dlayi hi ta hanya, kambe loko vo hi dlaya, hi ta fa.” 5 Hiloko va suka nimadyambu va nghena enxaxeni wa Vasiriya. Loko va fika emakumu ka nxaxa wa Vasiriya, a ku nga ri na munhu kwalaho.

6 Hikuva Yehovha a a endle leswaku Vasiriya va twa mpfumawulo wa makalichi ya nyimpi, wa tihanci ni wa masocha yo tala,+ kutani va byelana va ku: “Hosi ya Israyele yi thole tihosi ta Vaheti ni ta le Egipta leswaku ti ta lwa na hina!” 7 Hiloko madyambu wolawo va baleka va siya matende, tihanci, timbhongolo ta vona ni nxaxa va wu siyisa xisweswo, hi ku chava ku dlayiwa.

8 Loko vavanuna lava nga ni nhlokonho va fika emakumu ka nxaxa, va nghena etendeni rin’wana va sungula ku dya ni ku nwa. Va teka silivhere, nsuku ni swiambalo va famba va ya swi fihla. Kutani va tlhela va vuya va nghena eka tende rin’wana va teka swilo va famba va ya swi fihla.

9 Eku heteleleni va byelana va ku: “Leswi hi swi endlaka a swi kahle. Leri i siku ra mahungu lamanene! Loko ho hlwela ri kondza ri xa hi ta xupuriwa. Sweswi a hi fambeni hi ya vika mhaka leyi endlwini ya hosi.” 10 Kutani va famba va fika eka varindzi va gede ya muti va ku: “Hi ye enxaxeni wa Vasiriya, kambe a hi kumanga munhu, a ku nga twakali munhu na wun’we. A ko va ni tihanci ni timbhongolo leti bohiweke ntsena naswona matende ma sale ma ri woxe.” 11 Varindzi va gede va namba va huwelela kutani mhaka leyi yi ya vikiwa endlwini ya hosi.

12 Xikan’wekan’we hosi yi pfuka nivusiku kutani yi byela malandza ya yona yi ku: “Mi nge ndzi mi byela leswi Vasiriya va swi endleke. Va swi tiva leswaku hi khomiwe hi ndlala,+ kutani va hume enxaxeni va ya tumbela enhoveni, va ku, ‘Va ta huma emutini, kutani hi ta va khoma hi nghena emutini.’”+ 13 Kutani un’wana wa malandza ya hosi a ku: “Ndzi kombela u rhuma vanhu va famba hi tihanci ta ntlhanu leti nga sala emutini. Swo fana, va ta hetelela va fane ni ntshungu hinkwawo wa Israyele lowu nga laha mutini. Swo fana, va ta hetelela va fane ni ntshungu hinkwawo wa Israyele lowu loveke. A hi va rhumeni hi vona leswaku ku ta endleka yini.” 14 Hiloko va teka makalichi mambirhi ni tihanci, ivi hosi yi va rhuma enxaxeni wa Vasiriya yi ku: “Fambani mi ya vona leswaku ku endleka yini.” 15 Va landzelela mikondzo ya vona ku ya fika eYordani naswona hinkwako laha a va famba kona a ku ri ni swiambalo ni swingolongondzwana leswi Vasiriya va swi cukumeteke loko va ri karhi va baleka va chuhile. Hiloko varhumiwa va tlhelela eka hosi va ya vika leswi va swi voneke.

16 Kutani vanhu va huma va ya phanga enxaxeni wa Vasiriya, hiloko seya ya mapa lama silekeke kahle yi sungula ku vitana xiphemu xin’we xa silivhere ni tiseya timbirhi ta maxalana ti vitana xiphemu xin’we xa silivhere, hilaha Yehovha a vuleke hakona.+ 17 Hosi a yi veke ndhuna leyi nga xandla xa yona leswaku yi rindza gede, kambe vanhu va yi kandziyela egedeni kukondza yi fa, hilaha nandza wa Xikwembu xa ntiyiso a a byele hosi hakona loko yi te eka yena. 18 Swi endleke hilaha nandza wa Xikwembu xa ntiyiso a byeleke hosi hakona loko a ku: “Mundzuku hi nkarhi lowu, egedeni ya Samariya tiseya timbirhi ta maxalana ti ta vitana xiphemu xin’we xa silivhere ni seya ya mapa lama silekeke kahle yi ta vitana xiphemu xin’we xa silivhere.”+ 19 Kambe ndhuna leyi a yi ri xandla xa hosi a yi byele nandza wa Xikwembu xa ntiyiso yi ku: “Hambiloko Yehovha o pfula matilo* xana nchumu wo tano wu nga endleka?” Emhakeni leyi Elixa u yi hlamule hi ndlela leyi: “U ta swi vona loko swi endleka, kambe a wu nge swi dyi.” 20 Leswi hi swona leswi endlekeke eka yena, hikuva vanhu va n’wi kandziyele kukondza a fa egedeni.