Tihosi Ta Vumbirhi
21 Manase+ a a ri ni malembe ya 12 loko a va hosi, u fume malembe ya 55 eYerusalema.+ Vito ra mana wakwe a ku ri Hefesiba. 2 U dyohele Yehovha, a tekelela mikhuva leyi nyenyetsaka ya matiko+ lawa Yehovha a ma hlongoleke emahlweni ka Vaisrayele.+ 3 U pfuxe tindhawu leti tlakukeke leti tata wakwe Hezekiya a a ti herisile,+ a endlela Bali tialtari, a tlhela a endla ni mhandzi ya Axera*+ hilaha Akabu hosi ya Israyele a endleke hakona.+ A tlhela a khinsamela vuthu hinkwaro ra le tilweni a ri tirhela.+ 4 U tlhele a aka tialtari endlwini ya Yehovha,+ laha Yehovha a vuleke a ku: “Ndzi ta veka vito ra mina eYerusalema.”+ 5 A akela vuthu hinkwaro ra le tilweni+ tialtari eswivaveni* swimbirhi swa yindlu ya Yehovha.+ 6 U tlhele a hisa n’wana wakwe hi ndzilo a endla magandzelo hi yena; a endla masalamusi, a hlahluva+ ni ku tlhela a veka vangoma ni vavhumbhi.+ U endle swilo swo biha swinene emahlweni ka Yehovha lerova a n’wi hlundzukisa.
7 U veke xifaniso lexi vatliweke xa mhandzi ya Axera*+ lexi a xi endleke endlwini leyi Yehovha a byeleke Davhida na Solomoni n’wana wakwe a ku: “Endlwini leyi ni le Yerusalema, leyi ndzi yi hlawuleke eka tinyimba hinkwato ta Israyele, ndzi ta veka vito ra mina hilaha ku nga heriki.+ 8 A ndzi nge he tlheli ndzi endla leswaku Vaisrayele va tsendzeleka va ya ekule ni tiko leri ndzi ri nyikeke vakokwa wa vona,+ ntsena loko vo endla hinkwaswo leswi ndzi va leriseke swona,+ va yingisa Nawu hinkwawo lowu Muxe nandza wa mina a va byeleke leswaku va hanya ha wona.” 9 Kambe a va yingisanga naswona Manase u ye emahlweni a va hambukisa lerova va endla swo biha swinene ku tlula matiko lawa Yehovha a ma loviseke emahlweni ka Vaisrayele.+
10 Yehovha a ya emahlweni a vulavula hi ku tirhisa malandza yakwe ku nga vaprofeta+ a ku: 11 “Manase hosi ya Yuda u endle swilo leswi hinkwaswo leswi nyenyetsaka; u dyohe ku tlula Vaamori+ hinkwavo lava hanyeke a nga si va kona,+ u dyohise Vayuda hi swifaniso swakwe leswi nyenyetsaka.* 12 Hikwalaho Yehovha Xikwembu xa Israyele u ri: ‘Ndzi ta tisa khombo eYerusalema+ ni le Yuda, leri loko munhu a ri twa a nga ta tsemeka nhlana.*+ 13 Ndzi ta pima Yerusalema hi ntambhu yo pima+ hilaha ndzi pimeke Samariya+ hakona ni ku tirhisa nsimbhi yo pima levhele* leyi tirhisiweke endyangwini wa Akabu,+ naswona ndzi ta sula Yerusalema wu basa ku fana ni loko munhu a sula xibya a tlhela a xi khubumeta.+ 14 Ndzi ta fularhela lava nga ta sala eka ndzhaka ya mina+ naswona ndzi ta endla leswaku va hluriwa hi valala va vona, va ta phangiwa ni ku khomiwa hi valala va vona hinkwavo,+ 15 hikwalaho ka leswi va ndzi dyoheleke va tlhela va ndzi hlundzukisa ku sukela siku leri vakokwa wa vona va humeke ha rona eEgipta, ku ta fikela namuntlha.’”+
16 Manase u tlhele a halata ngati yo tala ngopfu leyi nga riki na nandzu eYerusalema hinkwayo,+ ku engetela eka swidyoho leswi a dyohiseke Vayuda ha swona hi ku endlela Yehovha swo biha. 17 Loko ku ri matimu ya Manase hinkwawo ni hinkwaswo leswi a swi endleke ni swidyoho swakwe leswi a swi endleke, xana a swi tsariwanga ebukwini ya matimu ya tihosi ta Yuda? 18 Hiloko Manase a fa a lahliwa ni vakokwa wakwe entangeni wa yindlu yakwe, entangeni wa Uza;+ kutani Amoni n’wana wakwe a va hosi.
19 Amoni+ a a ri ni malembe ya 22 loko a va hosi, u fume malembe mambirhi eYerusalema.+ Vito ra mana wakwe a ku ri Maxulemete n’wana wa Harusi wa le Yotiba. 20 A nga tshikanga ku endla swo biha emahlweni ka Yehovha, hilaha Manase tata wakwe a endleke hakona.+ 21 U ye emahlweni a dyoha hilaha tata wakwe a dyoheke hakona naswona u ye emahlweni a tirhela ni ku khinsamela swifaniso leswi nyenyetsaka leswi tata wakwe a swi tirheleke.+ 22 U tshike Yehovha Xikwembu xa vakokwa wakwe, a nga hanyanga hi milawu ya Yehovha.+ 23 Eku heteleleni malandza ya Amoni ma n’wi bohela xikungu kutani ma n’wi dlaya endlwini yakwe. 24 Kambe vanhu va tiko va dlaya hinkwavo lava dlayeke Hosi Amoni kutani va veka Yosiya n’wana wakwe leswaku a va hosi.+ 25 Loko ku ri matimu ya Amoni hinkwawo, leswi a swi endleke, xana a swi tsariwanga ebukwini ya matimu ya tihosi ta Yuda? 26 Hiloko va n’wi lahla esirheni rakwe leri nga entangeni wa Uza+ kutani Yosiya+ n’wana wakwe a va hosi.