Vakorinto Wo Sungula

14 Yanani emahlweni mi kombisa rirhandzu kambe mi tikarhatela ku kuma tinyiko ta moya, ngopfungopfu leswaku mi ta profeta.+ 2 Hikuva loyi a vulavulaka hi tindzimi a nga vulavuli ni vanhu kambe u vulavula ni Xikwembu, hikuva a ku na loyi a yingiselaka+ kambe u vulavula swihundla swo kwetsima+ hi moya. 3 Hambiswiritano, loyi a profetaka wa aka ni ku khutaza ni ku chavelela vanhu hi leswi a swi vulaka. 4 Loyi a vulavulaka hi tindzimi wa tiaka kambe loyi a profetaka u aka vandlha. 5 Kutani ndzi tsakela leswaku hinkwenu ka n’wina mi vulavula hi tindzimi+ kambe ndzi tsakela ngopfu leswaku mi profeta.+ Kahlekahle loyi a profetaka u nkulu eka loyi a vulavulaka hi tindzimi, handle ka loko a hundzuluxela, leswaku vandlha ri ta akeka. 6 Kambe hi nkarhi lowu vamakwerhu, loko ndzo fika ndzi vulavula na n’wina hi tindzimi, xana leswi swi ta mi pfuna hi yini, handle ka loko ndzi vulavula na n’wina hi marito lama humaka eka Xikwembu+ hi vutivi+ kumbe hi vuprofeta kumbe hi dyondzo?

7 Swi tano ni hi swilo leswi nga hanyiki leswi humesaka mpfumawulo, hambi i xitiringo kumbe i haripa. Loko swi nga humesi mimpfumawulo yo hambana, xana hi ta swi tivisa ku yini leswaku lexi chayiwaka i xitiringo kumbe i haripa? 8 Hikuva loko mhalamhala yi humesa mpfumawulo lowu nga tivekiki, i mani loyi a nga ta lunghekela nyimpi? 9 Hilaha ku fanaka, handle ka loko n’wina mi vulavula swilo leswi twisisiwaka hi ku olova, xana munhu u ta swi tivisa ku yini leswi vuriwaka? Entiyisweni leswi mi swi vulaka swi ta va swi famba ni moya. 10 Ku nga ha va ku ri ni tindzimi to tala leti vulavuriwaka laha misaveni, kambe a ri kona ririmi leri nga riki na nhlamuselo. 11 Hikuva loko ndzi nga swi twisisi leswi vuriwaka hi un’wana, ndzi ta va ndzi fana ni munhu wamatiko eka yena naswona loyi a vulavulaka na mina u ta va munhu wamatiko eka mina. 12 Kutani na n’wina, leswi mi ti navelaka swinene tinyiko ta moya, ti laveni hi xitalo leswaku mi aka vandlha.+

13 Hikwalaho, loyi a vulavulaka hi tindzimi a a khongele leswaku a tiva ku hundzuluxela.+ 14 Hikuva loko ndzi khongela hi tindzimi, i nyiko ya mina ya moya leyi khongelaka kambe mianakanyo ya mina a yi twisisi nchumu. 15 Kutani ku fanele ku endliwa yini? Ndzi ta khongela hi nyiko ya moya, kambe ndzi ta khongela ni hi mianakanyo ya mina. Ndzi ta yimbelela ndzi dzunisa hi nyiko ya moya, kambe ndzi ta tlhela ndzi yimbelela ndzi dzunisa hi mianakanyo ya mina. 16 Loko swi nga ri tano, loko u dzunisa hi nyiko ya moya, xana munhu loyi a nga tiviki nchumu loyi a nga exikarhi ka n’wina u ta vurisa ku yini a ku “Amen” eka xikhongelo xa wena xo khensa, tanihi leswi a nga swi tiviki leswi u swi vulaka? 17 I ntiyiso, u khongela eka Xikwembu hi ndlela leyinene kambe munhu loyi un’wana a nga akeki. 18 Ndzi khensa Xikwembu leswi ndzi vulavulaka tindzimi to tala ku tlula hinkwenu ka n’wina. 19 Nilokoswiritano, evandlheni swi nga antswa ndzi vulavula marito ya ntlhanu lama nga ta twisisiwa leswaku ndzi dyondzisa van’wana, ku ri ni ku vulavula marito ya 10 000 hi tindzimi.+

20 Vamakwerhu, mi nga fani ni vana eka ndlela leyi mi twisisaka ha yona+ kambe mi fana ni vana eka leswo biha;+ naswona vanani lava kuleke hi ku helela eku twisiseni ka n’wina.+ 21 ENawini ku tsariwe leswi: “‘Ndzi ta vulavula ni vanhu lava hi tindzimi ni hi marito ya vanhu vamatiko, kambe ni le nkarhini wolowo va ta ala ku ndzi yingisa,’ ku vula Yehovha.”*+ 22 Hikwalaho tindzimi a hi xikombiso xa vapfumeri kambe i xa lava nga riki vapfumeri,+ kasi ku profeta a hi ka lava nga riki vapfumeri kambe i ka vapfumeri. 23 Kutani loko vandlha hinkwaro ri hlengeletana ndhawu yin’we ivi ri vulavula hi tindzimi, kutani ku nghena vanhu lava nga tiviki nchumu kumbe lava nga riki vapfumeri, xana a va nge vuli leswaku ma penga? 24 Kambe loko hinkwenu mi profeta, kutani ku nghena munhu loyi a nga riki mupfumeri kumbe munhu loyi a nga tiviki nchumu, hinkwavo va ta n’wi tshinya naswona va ta n’wi kambela hi vukheta. 25 Kutani swihundla swa mbilu yakwe swi ta vonaka, lerova u ta nkhinsama xikandza xakwe xi languta ehansi kutani a gandzela Xikwembu a ku: “Hakunene Xikwembu xi na n’wina.”+

26 Kutani ku fanele ku endliwa yini vamakwerhu? Loko mi hlengeletana, un’wana u yimbelela tipisalema, un’wana wa dyondzisa, un’wana u vulavula marito lama humaka eka Xikwembu, un’wana u vulavula ririmi rin’wana naswona un’wana wa hundzuluxela.+ Swilo hinkwaswo a swi endleriwe ku aka van’wana. 27 Kutani loko ku ri ni lava vulavulaka tindzimi, va nga tluli vambirhi kumbe vanharhu naswona a va siyerisane, kutani un’wana u fanele a hundzuluxela.+ 28 Kambe loko ku nga ri na muhundzuluxeri, va fanele va miyela evandlheni, va vulavula ni Xikwembu embilwini ya vona. 29 A ku vulavule vaprofeta vambirhi kumbe vanharhu+ naswona lavan’wana a va twisise nhlamuselo ya kona. 30 Kambe loko un’wana a amukela marito lama humaka eka Xikwembu loko a ha tshame kwalaho, loyi a nga le ku vulavuleni a a miyele. 31 Hikuva hinkwenu mi nga profeta hi ku siyerisana leswaku hinkwavo va dyondza naswona hinkwavo va khutaziwa.+ 32 Naswona tinyiko ta moya ta vaprofeta ti fanele ti lawuriwa hi vaprofeta. 33 Hikuva Xikwembu a hi Xikwembu xa mpfilumpfilu, kambe i xa ku rhula.+

Hilaha swi nga hakona emavandlheni hinkwawo ya vakwetsimi, 34 vavasati a va miyele emavandlheni, hikuva a swi pfumeleriwi leswaku va vulavula.+ Ku ri na sweswo, a va titsongahate,+ hilaha ni Nawu wu vulaka hakona. 35 Loko va lava ku dyondza swo karhi, a va vutise vanuna va vona ekaya, hikuva swi khomisa tingana loko wansati a vulavula evandlheni.

36 Xana rito ra Xikwembu a ri huma eka n’wina kumbe ri nyikiwe n’wina ntsena?

37 Loko munhu a ehleketa leswaku i muprofeta kumbe u ni nyiko ya moya, u fanele a pfumela leswaku swilo leswi ndzi mi tsalelaka swona i nawu wa Hosi. 38 Kambe loko munhu a nga ri na mhaka na swona, Hosi a yi nge vi na mhaka na yena.* 39 Vamakwerhu, yanani emahlweni mi tikarhatela ku profeta,+ kambe mi nga aleli vanhu ku vulavula hi tindzimi.+ 40 Kambe swilo hinkwaswo a swi endliwe hi ndlela leyinene ni hi ku hleleka.+