Eksoda
15 Hi nkarhi wolowo Muxe ni Vaisrayele va yimbelelele Yehovha risimu leri:+
“Ndzi yimbelelela Yehovha, hikuva u hlule hi ndlela yo hlamarisa.+
U hoxe hanci ni mugadi wa yona elwandle.+
2 Yehovha* i ntamu wa mina ni matimba ya mina, hikuva u ve muponisi wa mina.+
Lexi i Xikwembu xanga, ndzi ta xi dzunisa;+ i Xikwembu xa tatana,+ ndzi ta xi vangamisa.+
3 Yehovha i nhenha ya matimba.+ Yehovha i vito rakwe.+
4 Makalichi ya Faro ni vuthu rakwe ra nyimpi U swi hoxe elwandle,+
Tinhenha takwe ta xiyimo xa le henhla ti mbombomele eLwandle ro Tshwuka.+
5 Magandlati ma va funengetile; va mbombomele ku fana ni ribye ematini lama enteke.+
6 Yehovha Xikwembu xanga, voko ra wena ra xinene ri ni matimba lamakulu;+
Yehovha, voko ra wena ra xinene ri nga faya nala.
7 Hi matimba ya wena lamakulu u nga wisa lava ku pfukelaka;+
Vukarhi bya wena bya pfurha, byi va hisa ku fana ni mahlanga.
8 Hi ku hefemula loku humaka etinhompfini ta wena, mati ma hlengeletiwile;
Mati ma yimile ma fana ni khumbi;
Magandlati ma yime ma tiya exikarhi ka lwandle.
9 Nala u te: ‘Ndzi ta va hlongorisa! Ndzi ta va kuma!
Ndzi ta ava leswi phangiweke ku fikela loko ndzi eneriseka!
Ndzi ta hlomula banga ra mina! Voko ra mina ri ta va lovisa!’+
10 U huhutele moya wa wena, lwandle ri va funengeta;+
Va mbombomele ku fana ni ntsopfu ematini yo tala.
11 Yehovha Xikwembu xanga, i mani loyi a fanaka na wena exikarhi ka swikwembu?+
I mani loyi a fanaka na wena, loyi a kombisaka ku kwetsima lokukulu?+
Loyi a faneleke a chaviwa hi tinsimu ta ku dzunisa, Loyi a endlaka swihlamariso.+
12 U tlakuse voko ra wena ra xinene naswona misava yi va mitile.+
13 Hi rirhandzu ra wena u rhangele vanhu lava u va kutsuleke;+
Hi matimba ya wena u ta va kongomisa endhawini ya wena yo kwetsima, leyi u tshamaka eka yona.
15 Hi nkarhi wolowo tindhuna ta le Edomu ti ta khomiwa hi ku chava,
Vafumi lava nga ni matimba va le Mowabu va ta rhurhumela.+
Ni vaaki hinkwavo va le Kanana va ta tshoveka timbilu.+
16 Va ta chava, va karhateka.+
Hikwalaho ka matimba lamakulu ya voko ra wena va ta yima va nga tsekatseki ku fana ni ribye,
Kukondza vanhu va wena va hundza hi le mahlweni ka vona, Yehovha Xikwembu xanga,
Kukondza vanhu lava u va kumeke+ va hundza hi le mahlweni ka vona.+
17 U ta va tisa u va byala entshaveni ya ndzhaka ya wena,+
Ndhawu leyi u tiendleleke yona leswaku u tshama eka yona, Yehovha Xikwembu xanga,
Ndhawu yo kwetsima leyi mavoko ya wena ma yi endleke, Wena Yehovha.
18 Yehovha u ta va hosi hilaha ku nga heriki.+
19 Loko tihanci ta Faro, makalichi yakwe ya nyimpi ni vagadi vakwe va tihanci swi nghene elwandle,+
Kutani Yehovha u tlherisele mati ya lwandle ehenhla ka vona,+
Kambe Vaisrayele va fambe emisaveni leyi omeke exikarhi ka lwandle.”+
20 Kutani Meriyamu muprofeta wa xisati, makwavo wa Aroni, a khoma xingomana, vavasati hinkwavo va n’wi landzela va khome swingomana va ri karhi va cina. 21 Meriyamu a hlamula vavanuna hi risimu a ku:
“Yimbelelelani Yehovha, hikuva u vangamisiwile swinene.+
Hanci ni mugadi wa yona u swi hoxe elwandle.”+
22 Endzhakunyana Muxe a rhangela Vaisrayele va suka eLwandle ro Tshwuka va ya emananga ya Xure, va fambe masiku manharhu emananga, kambe a va kumanga mati. 23 Va fike eMara*+ kambe a va swi kotanga ku nwa mati ya le Mara hikuva a ma dzunga. Hi yona mhaka leyi yi thyiweke vito ra Mara. 24 Kutani vanhu va sungula ku gungulela Muxe,+ va ku: “Hi ta nwa yini?” 25 A huwelela eka Yehovha,+ kutani Yehovha a n’wi komba murhi. Loko a wu lahlela ematini, mati ma tsokombela.
Kwalaho A va nyika nawu ni xivangelo xa vuavanyisi. A tlhela A va ringa kwalaho.+ 26 A ku: “Loko mo yingisa Yehovha Xikwembu xa n’wina, mi endla leswi lulameke emahlweni ka yena naswona mi yingisa milawu ni swileriso swakwe hinkwaswo,+ vuvabyi lebyi ndzi nga byi tisela Vaegipta a ndzi nge byi tisi eka n’wina,+ hikuva mina Yehovha ndza mi horisa.”+
27 Endzhaku ka sweswo va fika eElimi, laha a ku ri ni swihlovo swa mati swa 12 ni mirhi ya micindzu ya 70. Kutani va dzima matende ya vona kwalaho ekusuhi ni mati.