Vaavanyisi
3 Lawa i matiko lawa Yehovha a nga ma tshika ma sala leswaku ma ta ringa Vaisrayele lava a va nga si tshama va lwa nyimpi etikweni ra Kanana+ 2 (xikongomelo xa sweswo a ku ri leswaku vatukulu va Vaisrayele lava a va ta landzela, lava a va nga si tshama va lwa nyimpi, va ta tiva nyimpi): 3 tihosi ta ntlhanu ta Vafilista,+ Vakanana hinkwavo, Vasidoni+ ni Vahivhi+ lava a va tshama eNtshaveni ya Lebanoni+ ku sukela eNtshaveni ya Bali-hermoni ku ya fika eLebo-hamati.*+ 4 Matiko lawa a ma ringa Vaisrayele ku vona loko va ta yingisa swileriso leswi Yehovha a swi nyikeke vatata wa vona hi ku tirhisa Muxe.+ 5 Vaisrayele a va tshama exikarhi ka Vakanana,+ Vaheti, Vaamori, Vaperezi, Vahivhi ni Vayebusi. 6 Vaisrayele va teke vana va vanhwanyana va le matikweni lawa va va endla vasati va vona, kasi vana va vona va vanhwanyana va va pfumelele va tekiwa hi majaha ya le matikweni wolawo, kutani va sungula ku tirhela swikwembu swa vona.+
7 Hiloko Vaisrayele va endla swilo swo biha emahlweni ka Yehovha, va rivala Yehovha Xikwembu xa vona, kutani va gandzela swikwembu leswi vuriwaka Bali+ ni timhandzi ta Axera.*+ 8 Hiloko Yehovha a hlundzukela Vaisrayele swinene, kutani a va nyiketa eka Kuxani-rixatayimi hosi ya le Mesopotamiya.* Vaisrayele va tirhele Kuxani-rixatayimi malembe ya nhungu. 9 Loko Vaisrayele va kombela Yehovha leswaku a va pfuna,+ Yehovha u va nyike muponisi, ku nga Otiniyele+ n’wana wa Kenazi, ndzisana ya Kalebe, leswaku a va ponisa.+ 10 Moya wa Yehovha wu va ehenhla ka yena,+ kutani a va muavanyisi wa Vaisrayele. Loko a ya enyimpini, Yehovha u nyikete Kuxani-rixatayimi hosi ya le Mesopotamiya* eka yena kutani a n’wi hlula. 11 Endzhaku ka sweswo ku ve ni ku rhula etikweni ku ringana malembe ya 40. Kutani Otiniyele n’wana wa Kenazi a fa.
12 Vaisrayele va tlhela va endla swilo swo biha emahlweni ka Yehovha.+ Hiloko Yehovha a endla leswaku Egiloni hosi ya Mowabu+ a hlula Vaisrayele, hikuva a va endle swilo swo biha emahlweni ka Yehovha. 13 Ku tlula kwalaho, Egiloni a rhamba Vaamoni+ ni Vaamaleke+ leswaku va n’wi pfuna ku lwa ni Vaisrayele. Va va hlaserile kutani va teka muti lowu nga ni mirhi ya micindzu.+ 14 Vaisrayele va tirhela Egiloni hosi ya Mowabu malembe ya 18.+ 15 Hiloko Vaisrayele va kombela Yehovha leswaku a va pfuna,+ kutani Yehovha a va nyika Ehudi+ n’wana wa Gera, wa rixaka ra Benjamini,+ loyi a a tirhisa voko ra ximatsi,+ leswaku a va ponisa.+ Hi ku famba ka nkarhi Vaisrayele va rhuma Ehudi leswaku a yisa xibalo eka Egiloni hosi ya Mowabu. 16 Ehudi a a tiendlele banga leri tsemaka matlhelo hinkwawo, a ri lehe kwalomu ka 38 wa tisentimitara* naswona a a ri bohelele endzhumbini wa xinene ivi a ri funengeta hi xiambalo xakwe. 17 U fike a nyika Egiloni hosi ya Mowabu xibalo. Egiloni a a nyuhele ngopfu.
18 Loko Ehudi a heta ku humesa xibalo, u fambe ni vanhu lava a va rhwale xibalo. 19 Kambe loko va fika endhawini leyi nga ni swifaniso leswi vatliweke eGiligala,+ u tlhelele eka hosi kutani a fika a ku: “Ndzi ku khomele mhaka ya xihundla, wena hosi.” Hiloko hosi yi ku: “Humani!” Kutani vatirhi va yona hinkwavo va huma. 20 Hiloko Ehudi a ya eka hosi loko ya ha tshame ekamareni ra yona ro titimela leri a ri ri ehenhla ka lwangu. Kutani Ehudi a ku: “Ndzi ku khomele mhaka leyi humaka eka Xikwembu.” Hiloko hosi yi tlakuka exitulwini xa yona. 21 Kutani Ehudi a hlomula banga endzhumbini wakwe wa xinene hi voko rakwe ra ximatsi, a tlhava hosi ekhwirini. 22 Xikhomo xa rona xi nghena kutani mafurha ma funengeta banga hikuva a a nga ri hlomulanga ekhwirini ra hosi, kutani ku huma thyaka. 23 Hiloko Ehudi a huma hi le rikupakupeni,* a pfala tinyangwa ta kamara leri a ri ri ehenhla ka lwangu a tlhela a ti lotlela. 24 Loko a fambile, malandza ya hosi ma tile kutani ma kuma tinyangwa ta kamara ra le ehenhla ka lwangu ti lotleriwile. Hiloko ma ku: “U fanele a ha ri eku tipfuneni.”* 25 Ma rindzile kukondza ma karhala, kambe loko ma vona leswaku hosi ya wona a yi pfuli tinyangwa, ma teke xikhiya ma pfula, hiloko ma kuma hosi ya wona yi wele ehansi yi file!
26 Ehudi u baleke loko ma ha rhendzeleka, kutani a hundza hi le ndhawini leyi nga ni swifaniso leswi vatliweke+ a ya eSeyira. 27 Loko a fika kwalaho, endhawini ya tintshava ya Efrayimi+ a sungula ku ba nanga;+ kutani Vaisrayele va rhelela na yena a va rhangele emahlweni. 28 Hiloko a ku eka vona: “Ndzi landzeleni, hikuva Yehovha u nyikete Vamowabu lava nga valala va n’wina evokweni ra n’wina.” Kutani va n’wi landzela, va teka tindhawu leti ku periwaka eka tona eYordani leswaku va sivela Vamowabu ku tsemakanya, a va pfumelelanga munhu ku tsemakanya. 29 Hi nkarhi wolowo va dlaya vavanuna va Vamowabu va kwalomu ka 10 000+ lava a va ri ni matimba ni xivindzi; a ku balekanga ni un’we wa vona.+ 30 Hiloko Vaisrayele va hlula Vamowabu hi siku rero; kutani ku va ni ku rhula etikweni ku ringana malembe ya 80.+
31 Endzhaku ka Ehudi, Xamugari+ n’wana wa Anati hi yena a poniseke Vaisrayele naswona u dlaye vavanuna va Vafilista va 600,+ hi nhonga yo tontswa+ yo khayima tihomu.