Vaavanyisi
12 Hiloko vavanuna va Efrayimi va hlengeletana va pelela eSafoni,* kutani va ku eka Yefta: “Hikwalaho ka yini u nga hi vitananga loko u ya lwa ni Vaamoni?+ Hi ta ku hisela endlwini ya wena.” 2 Kambe Yefta a ku eka vona: “Mina ni vanhu va mina hi lwe swinene ni Vaamoni. Ndzi mi vitanile leswaku mi ta ndzi pfuna, kambe a mi tanga. 3 Loko ndzi vona leswaku a mi nge ndzi pfuni, ndzi veke vutomi bya mina ekhombyeni ndzi ya lwa ni Vaamoni,+ hiloko Yehovha a va nyiketa eka mina. Kutani hikwalaho ka yini namuntlha mi ta ku ta lwa na mina?”
4 Hiloko Yefta a hlengeleta vavanuna hinkwavo va Giliyadi,+ va ya lwa ni vavanuna va nyimba ya Efrayimi; vavanuna va Giliyadi va hlula vavanuna va nyimba ya Efrayimi, lava nga te: “Hambileswi n’wina vanhu va le Giliyadi, mi tshamaka etindhawini ta Efrayimi na Manase, mi ntlawa lowu balekeke eka nyimba ya Efrayimi.” 5 Vavanuna va Giliyadi va teka tindhawu leti ku tsemakanyiwaka eka tona eYordani+ kutani va veka vavanuna kwalaho ku sivela vavanuna va nyimba ya Efrayimi leswaku va nga baleki. Loko wanuna wa nyimba ya Efrayimi a kombela ku tsemakanya a baleka, vavanuna va le Giliyadi a va n’wi vutisa va ku, “Xana u wa nyimba ya Efrayimi?” Loko a ku, “E-e,” 6 a va ku eka yena, “Hi kombela u ku Xiboleti.” Kambe yena a a ta ku, “Siboleti,” tanihi leswi a a nga swi koti ku ri vula kahle rito leri. Kutani a va n’wi khoma va n’wi dlayela eYordani. Ku dlayiwe vanhu va 42 000 va nyimba ya Efrayimi hi nkarhi wolowo.
7 Yefta wa Mugiliyadi u avanyise Vaisrayele malembe ya tsevu, endzhaku ka sweswo a fa kutani a lahliwa emutini wakwe eGiliyadi.
8 Endzhaku kakwe Ibizani loyi a a huma eBetlehema a sungula ku avanyisa Vaisrayele.+ 9 A a ri ni vana va majaha va 30 ni va vanhwanyana va 30. A pfumelela vana vakwe va vanhwanyana leswaku va tekiwa hi vavanuna lava nga riki va rixaka rakwe, naswona a tekela vana vakwe va majaha vavasati va 30. U avanyise Vaisrayele malembe ya nkombo. 10 Hiloko Ibizani a fa, a lahliwa eBetlehema.
11 Endzhaku ka yena, Elone wa le Zebuloni a sungula ku avanyisa Vaisrayele; u avanyise Vaisrayele malembe ya khume. 12 Hiloko Elone wa le Zebuloni a fa, a lahliwa eAyaloni etikweni ra Zebuloni.
13 Endzhaku ka yena, Abidoni n’wana wa Hilele wa Mupiratoni a sungula ku avanyisa Vaisrayele. 14 A a ri ni vana va majaha va 40 ni vatukulu va majaha va 30, lava a va famba hi timbhongolo ta 70. U avanyise Vaisrayele malembe ya nhungu. 15 Hiloko Abidoni n’wana wa Hilele wa Mupiratoni a fa, a lahliwa ePiratoni etikweni ra Efrayimi entshaveni ya Vaamaleke.+