Tihosi To Sungula

6 Hi lembe ra vu-480, endzhaku ka loko Vaisrayele va hume etikweni ra Egipta,+ hi lembe ra vumune endzhaku ka loko Solomoni a ve hosi ya Israyele, hi n’hweti ya Zivhi,*+ (ku nga n’hweti ya vumbirhi), a sungula ku aka yindlu ya Yehovha.*+ 2 Yindlu leyi Hosi Solomoni a yi akeleke Yehovha a yi lehe kwalomu ka 27 wa timitara,* yi anama 8,9 wa timitara ivi yi tlakuka 13,4 wa timitara.+ 3 Rikupakupa*+ leri nga emahlweni ka tempele a ri lehe 8,9 wa timitara, ri ringana ni ku anama ka tempele. A ri hume hi 4,5 wa timitara emahlweni ka tempele.

4 U yi endlele mafasitere yo lala.+ 5 A tlhela a aka khumbi ri rhendzela tempele* ni Kamara Ro Kwetsima Ngopfu,+ naswona u ake ni makamara lawa a ma rhendzela tempele.+ 6 Xithezi xa le hansi xa makamara ya le tlhelo a xi aname kwalomu ka timitara timbirhi, xa le xikarhi xi anama kwalomu ka timitara tinharhu, kasi xa vunharhu a xi aname kwalomu ka timitara tinharhu, a endla swo tshega matlhelo hinkwawo ya khumbi leswaku swi tshega timhandzi, ti nga tlhomiwi ekhumbini ra tempele.+

7 Tempele yi akiwe hi maribye lama nga ta ma lunghisiwile,+ lerova a ku nga twali tihamula kumbe swihloka kumbe switirhisiwa swin’wana swa nsimbhi loko yi ri karhi yi akiwa. 8 Nyangwa ya xithezi xa le hansi a yi ri etlhelweni ra le dzongeni* ra tempele,+ a ku ri ni switepisi leswi a swi ya eka xithezi xa le xikarhi ni xa vunharhu. 9 A ya emahlweni a aka tempele a yi heta,+ a yi fulela hi timhandzi ni mapulanga ya mukedari.+ 10 A aka makamara ma rhendzela tempele,+ kamara ha rin’we a ri tlakuke kwalomu ka timitara timbirhi, naswona a ma hlanganisiwe ni tempele hi timhandzi ta mikedari.

11 Hi nkarhi wolowo, rito ra Yehovha ri fika eka Solomoni, ri ku: 12 “Mayelana ni tempele leyi u nga le ku yi akeni, loko wo yingisa milawu ya mina ni swiboho swa mina, ni loko wo hlayisa swileriso swa mina hinkwaswo,+ ndzi ta ku endlela leswi ndzi swi tshembiseke Davhida tata wa wena,+ 13 naswona ndzi ta va exikarhi ka Vaisrayele,+ a ndzi nge va tshiki vanhu va mina, ku nga Israyele.”+

14 Solomoni a ya emahlweni a aka tempele leswaku a yi heta. 15 U ake makhumbi ya le ndzeni ya tempele hi mapulanga ya mukedari. A pfala makhumbi ya le ndzeni hi mapulanga ku suka ehansi ku ya fika elwangwini, kasi ehansi a andlala mapulanga ya yunipa.+ 16 A tlhela a pima ndhawu leyi endlaka kwalomu ka timitara ta kaye hi le makumu ka khumbi ra tempele, a endla kamara hi mapulanga ya mukedari, ku suka ehansi ku ya fika elwangwini, kutani yi va Kamara Ro Kwetsima Ngopfu.+ 17 Tempele,*+ ku nga xiyenge lexi nga emahlweni, a yi ri kwalomu ka 18 wa timitara. 18 Emapulangeni ya mukedari lama nga endzeni ka tempele a ku kovotliwe swifaniso swa marhanga+ ni swa swiluva.+ Hinkwaswo a swi endliwe hi mukedari; maribye a ma nga vonaki.

19 Nakambe a lulamisa Kamara Ro Kwetsima Ngopfu+ endzeni ka tempele, leswaku a ta veka areka ya ntwanano wa Yehovha.+ 20 Kamara Ro Kwetsima Ngopfu a ri lehe kwalomu ka timitara ta kaye, ri anama kwalomu ka timitara ta kaye, ri tlhela ri tlakuka kwalomu ka timitara ta kaye;+ a ri nameka nsuku wo tenga; altari+ yona a yi nameka mapulanga ya mikedari. 21 Endzeni ka tempele Solomoni a nameka nsuku wo tenga,+ a tlhela a veka tinketana ta nsuku emahlweni ka Kamara Ro Kwetsima Ngopfu+ leri a ri namekiwe nsuku. 22 U nameke tempele hinkwayo hi nsuku kukondza tempele hinkwayo yi hetiwa; a tlhela a nameka altari+ leyi nga ekusuhi ni Kamara Ro Kwetsima Ngopfu hi nsuku.

23 EKamareni Ro Kwetsima Ngopfu a endla makerubu+ mambirhi hi ntsandza wa muphayini, ha rin’we a ri tlakuke kwalomu ka ntlhanu wa timitara.+ 24 Ripapa ha rin’we ra kerubu a ri lehe kwalomu ka timitara timbirhi. Ku suka emakumu ka ripapa lerin’wana ku ya emakumu ka lerin’wana a ku ri kwalomu ka ntlhanu wa timitara. 25 Kerubu ra vumbirhi na rona a ri lehe kwalomu ka ntlhanu wa timitara. Makerubu lamambirhi a ma fana naswona a ma ringana. 26 Kerubu lerin’wana a ri lehe kwalomu ka ntlhanu wa timitara, kerubu lerin’wana na rona a ri ri tano. 27 Hiloko a veka makerubu+ eKamareni Ro Kwetsima Ngopfu. Timpapa ta makerubu a ti pfulekile, ripapa ra kerubu rin’we a ri khumba ekhumbini ra tlhelo lerin’wana, ripapa ra kerubu lerin’wana na rona a ri khumba ekhumbini ra tlhelo lerin’wana. Kasi timpapa letin’wana a ti khumbana. 28 Kutani a nameka makerubu hi nsuku.

29 U kovotle swifaniso swa makerubu,+ swa mirhi ya mincindzu+ ni swa swiluva,+ emakhumbini hinkwawo ya Kamara Ro Kwetsima Ngopfu ni ya Kamara Ro Kwetsima. 30 A nameka nsuku ehansi eKamareni Ro Kwetsima Ngopfu ni le Kamareni Ro Kwetsima. 31 Enyangweni ya Kamara Ro Kwetsima Ngopfu u endle mavanti hi ntsandza wa muphayini, tiphuphu ematlhelo ni tifureme ta mavanti ku nga xiphemu xa vuntlhanu.* 32 Mavanti wolawo mambirhi a ma endliwe hi ntsandza wa muphayini, eka wona u kovotle swifaniso swa makerubu ni swifaniso swa mirhi ya micindzu ni swiluva, a nameka nsuku eka wona a tlhela a nameka ni makerubu ni swifaniso swa murhi wa ncindzu. 33 Eka xiphemu xa vumune* enyangweni ya tempele,* u endle tifureme hi ntsandza wa muphayini hi ndlela leyi fanaka ni letin’wana. 34 U tlhele a endla mavanti mambirhi hi ntsandza wa yunipa. Rivanti ha rin’we a ri kota ku pfulekela endzeni ni le handle.+ 35 Emavantini u kovotle swifaniso swa makerubu ni swifaniso swa mirhi ya micindzu ni swiluva, a swi nameka nsuku.

36 A aka xivava*+ lexi nga ekusuhi ni tempele hi khumbi* ra tilayini tinharhu ta maribye lama tsemiweke kahle ni timhandzi ta mikedari.+

37 Masungulo ya tempele ya Yehovha ma vekiwe hi n’hweti ya Zivhi* hi lembe ra vumune;+ 38 kutani hi lembe ra vu-11, hi n’hweti ya Bulu* (ku nga n’hweti ya vunhungu), tempele yi hetiwile hi ku landza pulani ya yona.+ U hete malembe ya nkombo a ri karhi a yi aka.