Tihosi To Sungula

15 Hi lembe ra vu-18 ra ku fuma ka Hosi Yerobuwamu+ n’wana wa Nebati, Abiyamu a sungula ku fuma eYuda.+ 2 U fume malembe manharhu eYerusalema. Vito ra mana wakwe a ku ri Maka+ ntukulu wa Abixalomu. 3 U ye emahlweni a endla swidyoho hinkwaswo leswi tata wakwe a swi endleke emahlweni ka yena naswona mbilu yakwe a yi nga hetisekanga eka Yehovha Xikwembu xakwe, ku fana ni mbilu ya Davhida kokwa wakwe. 4 Hambiswiritano, hikwalaho ka Davhida,+ Yehovha Xikwembu xakwe u n’wi nyike rivoni eYerusalema+ hi ku nyika n’wana wakwe vuhosi ni ku hlayisa Yerusalema wu tshama wu ri kona. 5 Hikuva Davhida u endle leswinene emahlweni ka Yehovha, a nga hambukanga eka hinkwaswo leswi A n’wi leriseke swona vutomi byakwe hinkwabyo, u hambuke ntsena emhakeni ya Uriya wa Muheti.+ 6 A ku tshama ku ri ni nyimpi exikarhi ka Rehobuwama na Yerobuwamu vutomi bya vona hinkwabyo.+

7 Loko ku ri matimu ya Abiyamu hinkwawo ni hinkwaswo leswi a swi endleke, xana a swi tsariwanga ebukwini ya matimu ya tihosi ta Yuda?+ Nakambe ku ve ni nyimpi exikarhi ka Abiyamu na Yerobuwamu.+ 8 Hiloko Abiyamu a fa kutani a lahliwa ni vakokwa wakwe eMutini wa Davhida; kutani Asa+ n’wana wakwe a va hosi.+

9 Hi lembe ra vu-20 ra ku fuma ka Hosi Yerobuwamu wa le Israyele, Asa a sungula ku fuma eYuda. 10 U fume malembe ya 41 eYerusalema. Vito ra kokwa wakwe wa xisati a ku ri Maka+ ntukulu wa Abixalomu. 11 Asa u endle leswinene emahlweni ka Yehovha,+ ku fana na Davhida kokwa wakwe. 12 U hlongole tinghwavava ta xinuna ta le tempeleni etikweni+ a tlhela a susa swifaniso hinkwaswo swo nyenyetsa* leswi endliweke hi vakokwa wakwe.+ 13 A susa hambi ku ri kokwa wakwe Maka+ eka xikhundlha xa ku va mana wa hosi, hikuva a a endle xifaniso xo nyenyetsa xa mhandzi ya Axera* leswaku ku gandzeriwa xona. Asa u tseme xifaniso xexo xo nyenyetsa+ a xi hisa eNkoveni wa Kedroni.+ 14 Kambe tindhawu leti tlakukeke a ti susiwanga.+ Nilokoswiritano, mbilu ya Asa a yi tinyiketele hi ku helela eka Yehovha vutomi byakwe hinkwabyo. 15 Kutani a nghenisa swilo leswi yena ni tata wakwe va swi nyikeleke endlwini ya Yehovha, silivhere, nsuku ni swibya swo hambanahambana.+

16 A ku tshama ku ri ni nyimpi exikarhi ka Asa na Baxa+ hosi ya Israyele. 17 Hiloko Hosi Baxa wa Israyele a ta ku ta lwa na Yuda, kutani a sungula ku aka muti wa Rhama+ leswaku ku nga vi na munhu loyi a humaka kumbe ku nghena eka Hosi Asa wa Yuda.+ 18 Loko Asa a vona sweswo, a teka silivhere hinkwayo ni nsuku leswi a swi sele endhawini yo hlayisela xuma endlwini ya Yehovha ni le ndlwini ya hosi,* a swi nyika malandza yakwe. Kutani Hosi Asa a va rhuma eka Beni-hadadi n’wana wa Tabrimona, n’wana wa Heziyoni, hosi ya Siriya+ loyi a a tshama eDamaska, a ku: 19 “Mina na wena hi endle ntwanano, tata wa mina ni tata wa wena na vona va endle ntwanano. Ndzi ku rhumela nyiko ya silivhere ni ya nsuku. Tana u ta herisa ntwanano wa wena na Hosi Baxa wa Israyele, leswaku a ta suka eka mina.” 20 Beni-hadadi a yingisa Hosi Asa, a rhuma tindhuna takwe ta nyimpi leswaku ti ya hlasela miti ya Israyele, hiloko ti hlasela muti wa Iyona,+ Dani,+ Avele-bete-maka, Kinereti hinkwaro ku katsa ni tiko hinkwaro ra Neftali. 21 Loko Baxa a twa sweswo, a namba a tshika ku aka muti wa Rhama a ya emahlweni a tshama eTirisa.+ 22 Endzhaku ka sweswo Hosi Asa a vitana tiko hinkwaro ra Yuda, va ya rhwala maribye ni timhandzi eRhama leswi Baxa a a aka ha swona, kutani Hosi Asa a tirhisa swona ku aka muti wa Geba+ le Benjamini ni wa Mizpa.+

23 Loko ku ri matimu hinkwawo ya Asa ni mitirho yakwe ni hinkwaswo leswi a swi endleke ku katsa ni miti leyi a yi akeke, xana a swi tsariwanga ebukwini ya matimu ya tihosi ta Yuda? Kambe loko a dyuhele u khomiwe hi vuvabyi bya milenge.+ 24 Kutani Asa a fa, a lahliwa ni vakokwa wakwe eMutini wa Davhida kokwa wakwe; Yehoxafati+ n’wana wakwe a va hosi.

25 Nadabu+ n’wana wa Yerobuwamu, u ve hosi eIsrayele hi lembe ra vumbirhi ra ku fuma ka Hosi Asa wa Yuda, u fume Israyele malembe mambirhi. 26 A a tshamela ku endla swo biha emahlweni ka Yehovha naswona u fambe endleleni ya tata wakwe+ ni le swidyohweni swakwe leswi a dyohiseke Israyele ha swona.+ 27 Baxa n’wana wa Ahiya wa ndyangu wa Isakara a n’wi bohela xikungu, hiloko Baxa a n’wi dlaya eGibetoni+ lowu a wu ri muti wa Vafilista, hi nkarhi lowu Nadabu ni tiko hinkwaro ra Israyele a va rhendzele Gibetoni. 28 Baxa u n’wi dlaye hi lembe ra vunharhu ra ku fuma ka Hosi Asa wa le Yuda, kutani a sungula ku fuma. 29 Hi ku hatlisa loko a sungula ku fuma, u dlaye ndyangu hinkwawo wa Yerobuwamu. A nga siyanga munhu wa ndyangu wa Yerobuwamu; u va dlaye hinkwavo hi ku landza rito ra Yehovha leri a ri vuleke hi ku tirhisa nandza wakwe Ahiya wa le Xilo.+ 30 Leswi swi vangiwe hikwalaho ka swidyoho leswi Yerobuwamu a swi endleke naswona a dyohiseke Israyele ha swona, ni hikwalaho ka leswi a hlundzukiseke Yehovha Xikwembu xa Israyele swinene. 31 Loko ku ri matimu ya Nadabu hinkwawo ni hinkwaswo leswi a swi endleke, xana a swi tsariwanga ebukwini ya matimu ya tihosi ta Israyele? 32 Asa na Hosi Baxa wa Israyele+ a va tshamela ku lwa.

33 Hi lembe ra vunharhu ra ku fuma ka Hosi Asa wa Yuda, Baxa n’wana wa Ahiya u ve hosi eTirisa ya tiko hinkwaro ra Israyele, u fume malembe ya 24.+ 34 Kambe a a tshamela ku endla swo biha emahlweni ka Yehovha+ naswona u fambe endleleni ya Yerobuwamu ni le swidyohweni swakwe leswi a dyohiseke Israyele ha swona.+