Tihosi Ta Vumbirhi
24 Hi nkarhi wa ku fuma ka Yoyakimi, Hosi Nebukadnetsara+ wa le Babilona u tile ku ta lwa na yena, hiloko Yoyakimi a va nandza wa Nebukadnetsara ku ringana malembe manharhu. Hambiswiritano, u n’wi pfukerile. 2 Hiloko Yehovha a sungula ku rhumela mavuthu ya vaphangi ya Vakalidiya,+ Vasiriya, Vamowabu ni ya Vaamoni leswaku ma lwa na yena. U ye emahlweni a ma rhumela leswaku ma ta hlasela muti wa Yuda ma wu lovisa, hilaha Yehovha a vuleke hakona+ hi ku tirhisa malandza yakwe lama nga vaprofeta. 3 Kunene leswi swi endleke hi ku landza xileriso xa Yehovha mayelana na Yuda, leswaku a wu susa emahlweni ka yena+ hikwalaho ka swidyoho leswi Manase a swi endleke+ 4 ni hikwalaho ka leswi a halateke ngati leyi nga riki na nandzu+ hikuva u tate Yerusalema hi ngati leyi nga riki na nandzu naswona Yehovha a a nga tiyimiselanga ku rivalela.+
5 Loko ku ri matimu ya Yoyakimi hinkwawo, hinkwaswo leswi a swi endleke, xana a swi tsariwanga ebukwini ya matimu ya tihosi ta Yuda?+ 6 Yoyakimi a lahliwa ni vakokwa wakwe;+ kutani Yoyakini n’wana wakwe a va hosi.
7 Hosi ya Egipta a ya ha tlhelanga yi hloma yi huma etikweni ra yona, hikuva hosi ya Babilona a yi teke swilo hinkwaswo swa hosi ya Egipta+ ku sukela eNkoveni wa Egipta+ ku ya fika eNambyeni wa Yufrata.+
8 Yoyakini+ a a ri ni malembe ya 18 loko a va hosi naswona u fume tin’hweti tinharhu eYerusalema.+ Vito ra mana wakwe a ku ri Nehuxita n’wana wa Elinathani wa le Yerusalema. 9 U ye emahlweni a endla swo biha emahlweni ka Yehovha hi ku landza hinkwaswo leswi tata wakwe a swi endleke. 10 Hi nkarhi wolowo, malandza ya Hosi Nebukadnetsara wa Babilona ma ya eYerusalema ma fika ma rhendzela muti.+ 11 Hosi Nebukadnetsara wa Babilona na yena u tile emutini hi nkarhi lowu malandza yakwe a ma wu rhendzerile.
12 Hosi Yoyakini wa Yuda a ya eka hosi ya Babilona+ a ri ni mana wakwe, malandza yakwe, tihosana takwe ni vatirhi vakwe va le hubyeni;+ kutani hosi ya Babilona yi n’wi khoma hi lembe ra vunhungu ra ku fuma ka yona yi n’wi yisa evuhlongeni.+ 13 Kutani yi teka swilo hinkwaswo swa nkoka leswi a swi ri endlwini ya Yehovha ni le ndlwini ya hosi.+ Yi tlhela yi fayetela ni swibya hinkwaswo leswi endliweke hi nsuku leswi Solomoni hosi ya Israyele a a swi endlile etempeleni ya Yehovha.+ Leswi swi endleke hilaha Yehovha a profeteke hakona. 14 Yi teka vanhu hinkwavo va le Yerusalema, tihosana hinkwato,+ tinhenha hinkwato, lava tivaka ntirho wa mavoko ni lava kotaka ku endla swilo hi nsimbhi,+ yi teke vanhu va 10 000 yi va yisa evuhlongeni. A ku siyiwanga munhu handle ka swisiwana swa makumu etikweni.+ 15 Kutani yi teka Yoyakini+ yi n’wi yisa evuhlongeni le Babilona;+ yi tlhela yi teka mana wa hosi, vasati va yona, vatirhi va le hubyeni ni vavanuna lava tivekaka etikweni, yi va yisa evuhlongeni va suka eYerusalema va ya eBabilona. 16 Hosi ya Babilona yi tlhele yi teka tinhenha hinkwato ta 7 000 ni vanhu va 1 000 lava tivaka ntirho wa mavoko ni lava kotaka ku endla swilo hi nsimbhi, hinkwavo ka vona a va ri vavanuna va matimba lava leteleriweke nyimpi, yi va yisa evuhlongeni eBabilona. 17 Hosi ya Babilona yi veke Mataniya makwavo wa tata wa Yoyakini+ ku va hosi ivi yi n’wi cinca vito yi n’wi thya Sedekiyasi.+
18 Sedekiyasi a a ri ni malembe ya 21 loko a va hosi naswona u fume malembe ya 11 eYerusalema. Vito ra mana wakwe a ku ri Hamutala+ n’wana wa Yeremiya wa le Libna. 19 U ye emahlweni a endla swo biha emahlweni ka Yehovha, hi ku landza hinkwaswo leswi Yoyakimi a swi endleke.+ 20 Swilo leswi swi endleke eYerusalema ni le Yuda hikwalaho ka ku hlundzuka ka Yehovha, kukondza a va susa emahlweni ka yena.+ Hiloko Sedekiyasi a xandzukela hosi ya Babilona.+