Yohane

19 Hiloko Pilato a teka Yesu a n’wi ba.+ 2 Kutani masocha ma luka harhi ya mitwa ma yi tlhandleka enhlokweni yakwe ma tlhela ma n’wi ambexa nguvu ya phephulu,*+ 3 a ma tshamela ku ya eka yena ma ku: “Xewani, wena Hosi ya Vayuda!” Nakambe a ma tshamela ku n’wi makala hi timpama.+ 4 Pilato a tlhela a humela ehandle a ku: “Ndzi n’wi tisa eka n’wina leswaku mi ta swi vona leswaku a ndzi n’wi voni nandzu.”+ 5 Hiloko Yesu a huma, a tlhandlekiwe harhi ya mitwa a ambale ni nguvu ya phephulu.* Kutani Pilato a ku: “Hi loyi munhu wa n’wina!” 6 Hambiswiritano, loko vaprista lavakulu ni tindhuna va n’wi vona, va huwelela va ku: “N’wi belele emhandzini! N’wi belele emhandzini!”+ Pilato a ku: “N’wi tekeni hi n’wexe mi ya n’wi dlaya hikuva mina a ndzi n’wi voni nandzu.”+ 7 Vayuda va n’wi hlamula va ku: “Hi ni nawu naswona hi ku ya hi wona u fanele a fa,+ hikuva u tiendle n’wana wa Xikwembu.”+

8 Loko Pilato a twa leswi a va swi vula, a ya a chava ngopfu, 9 kutani a tlhela a nghena ekaya ka ndhunankulu, ivi a ku eka Yesu: “U huma kwihi?” Kambe Yesu a nga n’wi hlamulanga.+ 10 Hiloko Pilato a ku: “Xana a wu swi lavi ku vulavula na mina? Xana wa swi tiva leswaku ndzi ni matimba ya ku ku tshunxa kumbe ya ku ku dlaya?” 11 Yesu a n’wi hlamula a ku: “Loko Xikwembu a xi nga ku nyikanga wona a wu nga ta va ni matimba eka mina. Hi yona mhaka leyi munhu loyi a ndzi nyiketeke eka wena a nga ni xidyoho lexikulu.”

12 Hikwalaho ka sweswo Pilato a ringeta ku lava tindlela to n’wi tshunxa, kambe Vayuda va huwelela va ku: “Loko u tshunxa munhu loyi, a wu munghana wa Khezari. Loyi a tiendlaka hosi u lwa na Khezari.”+ 13 Endzhaku ka loko Pilato a twe sweswo, a humesela Yesu ehandle hiloko a tshama exiluvelweni xa ku avanyisa endhawini leyi vuriwaka Vuandlalo Bya Maribye, leyi hi Xiheveru yi vuriwaka Gavata. 14 A ku ri siku ro Lulamisela+ Paseka; a ku ri kwalomu ka awara ya vutsevu.* Hiloko a byela Vayuda a ku: “Vonani! Hi leyi hosi ya n’wina!” 15 Kambe va huwelela va ku: “N’wi dlaye! N’wi dlaye! N’wi belele emhandzini!” Pilato a ku: “Xana mi lava ndzi dlaya hosi ya n’wina?” Vaprista lavakulu va ku: “A hi na hosi yin’wana handle ka Khezari.” 16 Hiloko a va nyika yena leswaku a dlayiwa emhandzini.+

Kutani va teka Yesu va famba na yena. 17 Loko a rhwala mhandzi ya nxaniso* a ya laha ku vuriwaka Ndhawu ya Xipalapala,+ leyi hi Xiheveru yi vuriwaka Golgota.+ 18 Va fika va n’wi belela emhandzini+ ni vavanuna van’wana vambirhi, un’wana eka tlhelo lerin’wana kasi un’wana eka lerin’wana, Yesu a ri exikarhi ka vona.+ 19 Pilato a tlhela a tsala marito a ma veka ehenhla ka mhandzi ya nxaniso.* Marito ya kona a ma ku: “Yesu wa le Nazareta Hosi ya Vayuda.”+ 20 Vayuda vo tala a va hlaya marito lawa, hikuva ndhawu leyi Yesu a a beleriwe eka yona a yi ri kusuhi ni muti naswona a ma tsariwe hi Xiheveru, Xilatini ni Xigriki. 21 Hambiswiritano, vaprista lavakulu va Vayuda va byela Pilato va ku: “U nga tsali u ku, ‘Hosi ya Vayuda,’ kambe tsala leswaku u te, ‘Hi mina Hosi ya Vayuda.’” 22 Pilato a ku: “Leswi ndzi swi tsaleke, ndzi swi tsarile.”

23 Loko masocha ma belele Yesu emhandzini, ma teke swiambalo swakwe swa le handle ma swi ava swi va swiphemu swa mune kutani socha ha rin’we ri teka xiphemu xa rona naswona ma tlhele ma teka xiambalo xakwe xa le ndzeni. Kambe xiambalo xa le ndzeni a xi nga rhungiwanga, a xi lukiwe ku suka ehenhla ku ya fika ehansi. 24 Hiloko ma byelana ma ku: “Hi nga xi handzuli, kambe a hi hoxeni vuhlolotwana* hi ta tiva leswaku xi ta va xa mani.”+ Sweswo swi endle leswaku ku hetiseka tsalwa leri nge: “Va avelane swiambalo swa mina naswona va hoxe vuhlolotwana* leswaku va avelana swiambalo swa mina.”+ Masocha ma swi endlile sweswo hakunene.

25 Ekusuhi ni mhandzi ya nxaniso* leyi Yesu a nga beleriwa eka yona, a ku yime mana wakwe+ ni mhanintsongo wakwe; Mariya nsati wa Klopasi na Mariya Magadala.+ 26 Loko Yesu a vona mana wakwe ni mudyondzisiwa loyi a a n’wi rhandza+ va yime kwalaho, a byela mana wakwe a ku: “Hi yoloye n’wana wa wena!” 27 Endzhaku ka sweswo, a byela mudyondzisiwa a ku: “Hi yoloye mana wa wena!” Ku sukela kwalaho, mudyondzisiwa yoloye u teke mana wa Yesu a famba na yena ekaya kakwe.

28 Loko Yesu se a swi tiva leswaku swilo hinkwaswo swi endlekile, leswaku ku hetiseka tsalwa a ku: “Ndzi twa torha.”+ 29 A ku ri ni jomela kwalaho leri a ri ri ni vhinyo yo dzunga. Hiloko va tlhoma rihlanga ra hisopa* exiponcini lexi teleke hi vhinyo kutani va ri yisa enon’wini wakwe.+ 30 Loko Yesu a nantswa vhinyo yoleyo yo dzunga a ku: “Swi hetisekile,”+ kutani a korhamisa nhloko a fa.+

31 Leswi a ku ri siku ro Lulamisela,+ Vayuda va kombele Pilato leswaku ku tshoviwa milenge ya vanhu lava a va ri etimhandzini ni leswaku mitsumbu ya vona yi nga siyiwi etimhandzini ta nxaniso+ hi Savata (hikuva siku rolero ra Savata a ri ri lerikulu).+ 32 Hiloko masocha ma fika ma tshova milenge ya wanuna wo sungula ni ya wanuna lowun’wana loyi a beleriwe etlhelo ka yena. 33 Kambe loko ma fika eka Yesu, a ma yi tshovanga milenge yakwe hikuva ma vone leswaku se a a file. 34 Kambe socha rin’wana ri n’wi tlhava timbambu hi tlhari,+ hiloko ku huma ngati ni mati. 35 Loyi a swi voneke u nyikele vumbhoni lebyi naswona vumbhoni byakwe i ntiyiso, wa swi tiva leswaku leswi a swi vuleke i ntiyiso, leswaku na n’wina mi ta swi tshemba.+ 36 Kahlekahle, swilo leswi swi endleke leswaku ku hetiseka tsalwa leri nge: “A ku na rhambu ni rin’we rakwe leri nga ta tshoviwa.”+ 37 Ku tlhele ku hetiseka tsalwa rin’wana leri nge: “Va ta languta loyi va n’wi tlhaveke.”+

38 Endzhaku ka sweswo, Yosefa wa le Arimatiya, loyi a a ri mudyondzisiwa wa Yesu wa le xihundleni hileswi a a chava Vayuda,+ a ya eka Pilato a ya kombela ntsumbu wa Yesu kutani Pilato a n’wi pfumelela. Hiloko a ya a ya wu teka.+ 39 Nikodema+ loyi a nga ya eka Yesu ro sungula nivusiku na yena u fikile, a tisa mafurha ya mira lama hlanganisiweke ni mhangani, lama tikaka kwalomu ka 30 wa tikhilogiramu.*+ 40 Hiloko va teka ntsumbu wa Yesu va wu tsondzela hi malapi ya ntsembyana lama nga ni mirhi yo nun’hwela,+ hi ku ya hi ndlela leyi Vayuda a va lahla ha yona. 41 Ku kumeke leswaku endhawini leyi a dlayeriweke eka yona a ku ri ni ntanga naswona entangeni lowu a ku ri ni sirha lerintshwa,+ leri a ku nga si tshama ku lahliwa munhu eka rona. 42 Va lahle Yesu kwalaho hikuva sirha leri a ri ri ekusuhi naswona a ku ri siku ra ku Lunghiselela+ nkhuvo wa Vayuda.