Tihosi Ta Vumbirhi

12 Yehowaxi+ u ve hosi hi lembe ra vunkombo ra ku fuma ka Yehu+ naswona u fume eYerusalema malembe ya 40. Vito ra mana wakwe a ku ri Sibiya loyi a a huma eBera-xeba.+ 2 Yehowaxi a ya emahlweni a tirhela Yehovha hi ku tshembeka emasikwini hinkwawo lawa muprista Yoyada a n’wi dyondziseke ha wona. 3 Hambiswiritano, tindhawu leti tlakukeke+ a ti susiwanga naswona vanhu a va ha endla magandzelo va tlhela va endla leswaku nun’hwelo wa magandzelo wolawo wu tlhandluka etindhawini leti tlakukeke.

4 Yehowaxi a byela vaprista a ku: “Tekani mali hinkwayo ya magandzelo yo kwetsima+ leyi tisiwaka endlwini ya Yehovha, mali ya xibalo leyi hakeriwaka,+ mali leyi nyikeriwaka hi lava tshembiseke ku endla tano ni mali hinkwayo leyi vanhu va yi nyikelaka hi ku swi rhandza endlwini ya Yehovha.+ 5 Vaprista va ta yi teka eka lava yi nyikelaka, va yi tirhisela ku lunghisa yindlu, laha yi nga ta kumeka yi onhake kona.”+

6 Hi lembe ra vu-23 ra ku fuma ka Hosi Yehowaxi, vaprista a va nga si yi lunghisa yindlu.+ 7 Hiloko Hosi Yehowaxi a vitana muprista Yoyada+ ni vaprista lavan’wana a ku eka vona: “Hikwalaho ka yini mi nga lunghisi yindlu? Hikwalaho, mi nga ha yi teki mali leyi humaka eka lava nyikelaka handle ka loko mi lava ku yi tirhisela ku lunghisa yindlu.”+ 8 Kutani vaprista va pfumela leswaku a va nge he yi teki mali leyi nyikeriwaka ni leswaku a ku nge he vi vona lava nga ni vutihlamuleri byo lunghisa yindlu.

9 Hiloko muprista Yoyada a teka bokisi+ a ri boxa mbhovo exipfalweni, a ri veka etlhelo ka altari hi le xineneni loko munhu a nghena endlwini ya Yehovha. Vaprista lava a va ri varindzi va tinyangwa a va chela mali hinkwayo leyi a yi nyikeriwa endlwini ya Yehovha kwalaho.+ 10 Loko va vona leswaku bokisi ri tele hi mali, matsalana wa hosi ni muprista lonkulu a va fika va humesa mali leyi nyikeriweke endlwini ya Yehovha va tlhela va yi hlaya.+ 11 Mali leyi a yi hlayiwile a va yi nyika lava a va hlawuriwe ku langutela ntirho endlwini ya Yehovha. Kutani vona va hakela lava tirhaka hi timhandzi ni vaaki lava a va tirha endlwini ya Yehovha+ 12 ni lava a va kota ku aka hi maribye ni vavatli va maribye. A va tlhela va xava timhandzi ni maribye lama vatliweke leswaku va lunghisa yindlu ya Yehovha ni ku tlhela va hakela hinkwaswo leswi a swi laveka leswaku yindlu yi lunghisiwa.

13 Kambe mali leyi a yi nyikeriwa endlwini ya Yehovha a yi tirhiseriwanga ku endla swo hlambela swa silivhere, swo tima timboni, minkambana, timhalamhala,+ kumbe muxaka wun’wana ni wun’wana wa swilo swa nsuku ni swa silivhere leswi a swi ta tirhisiwa endlwini ya Yehovha.+ 14 A va yi nyika lava a va langutela ntirho leswaku va lunghisa yindlu ya Yehovha. 15 A va nga va vutisi nchumu vavanuna lava a va nyikiwa mali yo hakela vatirhi, hikuva a va ri vanhu vo tshembeka.+ 16 Kambe mali ya magandzelo ya nandzu+ ni mali ya magandzelo ya xidyoho, a yi nga tisiwi endlwini ya Yehovha; a yi ri ya vaprista.+

17 A ku ri hi nkarhi wolowo loko Hazayele+ hosi ya Siriya a ya lwa ni muti wa Gati+ a wu teka, endzhaku ka sweswo a kunguhata ku ya hlasela Yerusalema.+ 18 Hiloko Hosi Yehowaxi wa Yuda a teka minyikelo hinkwayo leyi vakokwa wakwe ku nga Yehoxafati, Yehorama na Ahaziya lava a va ri tihosi ta Yuda va yi nyikeleke eka Xikwembu, ku katsa ni leswi yena a swi nyikeleke ni nsuku hinkwawo lowu a wu ri endlwini ya Yehovha ni le ndlwini ya hosi, a swi rhumela eka Hazayele hosi ya Siriya.+ Kutani Hazayele a tshika makungu yakwe yo lava ku lwa na Yerusalema.

19 Loko ku ri matimu ya Yehowaxi hinkwawo, hinkwaswo leswi a swi endleke, xana a swi tsariwanga ebukwini ya matimu ya tihosi ta Yuda? 20 Hambiswiritano, malandza yakwe ma n’wi bohele xikungu+ ma n’wi dlaya endlwini leyi a yi akiwe ehenhla ka Xitsunga*+ endleleni leyi yaka eSila. 21 U dlayiwe hi Yozakara n’wana wa Ximeyata na Yohozabadi n’wana wa Xomeri lava a va ri malandza yakwe.+ Va n’wi lahla ni vakokwa wakwe eMutini wa Davhida, kutani Amaziya n’wana wakwe a va hosi.+