Ezekiyele

6 Yehovha a tlhela a vulavula na mina a ku: 2 “N’wana wa munhu, languta etintshaveni ta Israyele u profeta mayelana na tona. 3 U fanele u ku, ‘N’wina tintshava ta Israyele, twanani leswi Yehovha Hosi Leyi Tlakukeke a swi vulaka: Yehovha Hosi Leyi Tlakukeke u byela tintshava, swintshabyana, swinambyana ni minkova a ku: “Maswivo! Ndzi ta lwa na n’wina hi banga naswona ndzi ta lovisa tindhawu ta n’wina leti tlakukeke. 4 Tialtari ta n’wina ti ta fayeteriwa, swilo swa n’wina swo tlhandleka murhi wa risuna swi ta tshoviwa+ naswona vanhu va n’wina lava dlayiweke ndzi ta va lahlela emahlweni ka swikwembu swa n’wina leswi nyenyetsaka.*+ 5 Ndzi ta cukumeta mitsumbu ya Vaisrayele emahlweni ka swikwembu swa vona leswi nyenyetsaka naswona ndzi ta hangalasa marhambu ya n’wina ematlhelo hinkwawo ya tialtari ta n’wina.+ 6 Miti yi ta lovisiwa+ ni tindhawu leti tlakukeke ti ta hirimuxiwa ti sala ti ri marhumbi etindhawini hinkwato leti mi tshamaka eka tona.+ Tialtari ti ta hirimuxiwa ti hlanhleleriwa, swikwembu swa n’wina leswi nyenyetsaka swi ta herisiwa, swilo swa n’wina swo tlhandleka murhi wa risuna swi ta wiseteriwa ni swilo leswi mi swi endleke swi ta herisiwa. 7 Van’wana va ta dlayiwa exikarhi ka n’wina,+ kutani mi ta swi tiva leswaku hi mina Yehovha.+

8 “‘“Kambe ndzi ta siya van’wana va n’wina va hanya, hikuva van’wana va n’wina va ta pona ku dlayiwa hi banga exikarhi ka matiko, loko mi hangalaseriwa ematikweni man’wana.+ 9 Lava poneke va ta ndzi tsundzuka va ri ematikweni lawa va yisiweke evuhlongeni eka wona.+ Va ta swi xiya leswaku a ndzi twe ku vava swinene hikwalaho ka leswi va nga tshembekangiki* eka mina+ ni hileswi matihlo ya vona ma naveleke swikwembu swa vona leswi nyenyetsaka.+ Va ta khomiwa hi tingana va tlhela va nyenya swilo hinkwaswo swo homboloka ni leswi nyenyetsaka leswi va swi endleke.+ 10 Va ta swi tiva leswaku hi mina Yehovha ni leswaku a ndzi tiyisile loko ndzi vula leswaku ndzi ta va tisela khombo leri.”’+

11 “Yehovha Hosi Leyi Tlakukeke u ri: ‘Phokotela mavoko u gima ehansi hi nenge u rila hikwalaho ka swilo hinkwaswo swo biha ni leswi nyenyetsaka leswi endliweke hi Vaisrayele, hikuva va ta dlayiwa hi banga, hi ndlala ni hi ntungu.+ 12 Loyi a nga ta va a ri ekule u ta dlayiwa hi ntungu, loyi a nga ta va a ri ekusuhi u ta dlayiwa hi banga, kasi loyi a nga ta pona swilo leswi u ta dlayiwa hi ndlala; ndzi ta humesela vukarhi bya mina hinkwabyo ehenhla ka vona.+ 13 U ta swi tiva leswaku hi mina Yehovha,+ loko vanhu lava dlayiweke va vona va cukumetiwe exikarhi ka swikwembu swa vona leswi nyenyetsaka, ekusuhi ni tialtari ta vona,+ eswintshabyanini hinkwaswo leswi tlakukeke, ehenhla ka tintshava hinkwato, ehansi ka murhi wun’wana ni wun’wana lowukulu ni le hansi ka marhavi ya mirhi leyikulu laha va endleke magandzelo yo nun’hwela kona leswaku va tsakisa swikwembu swa vona hinkwaswo leswi nyenyetsaka.+ 14 Ndzi ta tlakusa voko ra mina ndzi va xupula kutani ndzi endla tiko ra vona ri va rhumbi naswona tindhawu ta vona hinkwato leti va tshamaka eka tona ti ta va rhumbi leri tlulaka mananga lama nga ekusuhi ni le Dibla. Va ta swi tiva leswaku hi mina Yehovha.’”