Ezekiyele

17 Yehovha a tlhela a vulavula na mina a ku: 2 “N’wana wa munhu, vula ntshayito ni xivuriso mayelana ni yindlu ya Israyele.+ 3 U fanele u ku, ‘Yehovha Hosi Leyi Tlakukeke u ri: “Gama lerikulu+ leri nga ni timpapa letikulu to leha ni tinsiva to tala ta mavalavala, ri te eLebanoni+ ri fika ri tshova xirhabyana emaninginingini ya murhi wa mukedari.+ 4 Ri tshove xirhabyana xa le henhla swinene, ri xi tisa etikweni ra vaxavisi* ri fika ri xi veka emutini wa vaxavisi.+ 5 Endzhaku ka sweswo, ri teka mbewu yin’wana etikweni+ ri yi byala ensin’wini leyo nona. Ri yi byala ku fana ni murhi wa munengenedzi ekusuhi ni mati yo tala. 6 Yi kula yi nava yi va murhi wa madiriva lowukulu+ lowu nga lehangiki, lowu matluka ya wona ma khotsekeleke endzeni, timitsu ta wona ti kula ehansi ka wona. Kutani yi va murhi wa madiriva lowu nga ni marhavi.+

7 “‘“Ku ta gama rin’wana lerikulu,+ leri nga ni timpapa letikulu.+ Kutani murhi lowu wa madiriva wu yisa timitsu ta wona eka rona, ekule ni ntanga lowu a wu byariwe eka wona, wu yise marhavi ya wona eka rona leswaku ri ta wu cheleta.+ 8 A wu byariwe ensin’wini leyinene leyi nga ekusuhi ni mati yo tala, leswaku wu humesa marhavi, wu tswala mihandzu, wu va murhi lowukulu wa madiriva.”’+

9 “Vula u ku, ‘Yehovha Hosi Leyi Tlakukeke u ri: “Xana wu ta kula? Xana munhu un’wana a nge tsuvuli timitsu ta wona,+ a endla mihandzu ya wona yi bola ni matluka ya wona ma vuna?+ Wu ta oma lerova a ku nge laveki munhu wa matimba kumbe vanhu vo tala leswaku va wu tsuvula. 10 Hambileswi wu simuriweke wu tlhela wu byariwa, xana wu ta kula? Xana a wu nge omi hi ku helela loko wu biwa hi moya wa le vuxeni? Wu ta oma entangeni lowu wu byariweke eka wona.”’”

11 Yehovha a tlhela a vulavula na mina a ku: 12 “Ndzi kombela u byela vanhu lava va xandzukaka, u ku, ‘Xana a mi swi tivi leswaku swilo leswi swi vula yini?’ Vula u ku, ‘Maswivo! Hosi ya le Babilona yi te eYerusalema yi fika yi teka hosi ya kona ni tihosana ta kona, yi famba na tona eBabilona.+ 13 Yi tlhela yi teka n’wana* un’wana wa le vuhosini+ yi endla ntwanano na yena, kutani yi n’wi endlisa xihlambanyo.+ Endzhaku ka sweswo, yi teka vavanuna lava rhangelaka etikweni,+ 14 leswaku mfumo wu tsongahatiwa, wu nga ha vi na matimba, leswaku wu ta kota ku ya emahlweni wu va kona loko ntsena wu hlayisa ntwanano wa yona.+ 15 Kambe hosi ya Yuda yi hetelele yi xandzukele+ hosi ya le Babilona yi rhumela vanhu va yona eEgipta, leswaku yi kuma tihanci+ ni masocha yo tala.+ Xana makungu ya yona ma ta tirha? Xana loyi a endlaka swilo leswi a nge xupuriwi? Xana u ta tlula ntwanano a tlhela a pona?’+

16 “‘“Leswi ndzi hanyaka,” ku vula Yehovha Hosi Leyi Tlakukeke, “yi ta fela eBabilona, etikweni leri hosi* leyi yi yi* vekeke ku va hosi yi tshamaka eka rona, leyi yi tluleke xihlambanyo xa yona ni ntwanano wa yona.+ 17 Masocha yo tala ya Faro a ma nge yi pfuni enyimpini,+ loko ku akiwa makhumbi yo pfuna ku hlasela muti leswaku ku ta dlayiwa vanhu vo tala. 18 Yi xi langutele ehansi xihlambanyo kutani yi tlula ntwanano. Hambileswi yi tshembiseke, yi endle swilo leswi hinkwaswo, kutani a yi nge baleki.”’

19 “‘Hikwalaho Yehovha Hosi Leyi Tlakukeke u ri: “Leswi ndzi hanyaka, ndzi ta endla leswaku yi langutana ni vuyelo bya ku xi langutela ehansi xihlambanyo xa mina+ ni bya ku tlula ntwanano wa mina. 20 Ndzi ta yi hoxa hi nete naswona yi ta phasiwa hi nete ya mina yo hlota ha yona.+ Ndzi ta yi yisa eBabilona ndzi fika ndzi yi avanyisa kona hikwalaho ka leswi yi nga tshembekangiki eka mina.+ 21 Masocha ya yona hinkwawo lama balekeke ma ta dlayiwa hi banga, kasi lama poneke ma ta hangalasiwa etindhawini hinkwato.+ Kutani mi ta swi tiva leswaku mina Yehovha, ndzi vulavurile.”’+

22 “‘Yehovha Hosi Leyi Tlakukeke u ri: “Ndzi ta tshova xirhabyana emaninginingini ya murhi lowukulu wa mukedari+ ndzi xi byala, ndzi ta phatlula xirhabyana xo olova+ emarhavini ya wona ya le henhlahenhla, ndzi ta xi byala entshaveni yo leha swinene.+ 23 Ndzi ta xi byala entshaveni leyi tlakukeke ya Israyele; marhavi ya xona ma ta kula, xi ta humesa mihandzu kutani xi va mukedari lowukulu. Swinyenyana swa mixakaxaka swi ta tshama ehansi ka wona ni le ndzhutini wa matluka ya wona. 24 Mirhi hinkwayo ya nhova yi ta swi tiva leswaku mina Yehovha, ndzi tsongahate murhi lowukulu ndzi tlakusa murhi lowutsongo;+ ndzi omise murhi lowu nga ni matluka ya rihlaza, ndzi endla leswaku murhi lowu omeke wu hluka.+ Mina Yehovha, ndzi swi vurile naswona ndzi swi endlile.”’”