Ezekiyele

36 “Loko ku ri wena n’wana wa munhu, profeta hi tintshava ta Israyele u ku, ‘N’wina tintshava ta Israyele, yingisani rito ra Yehovha. 2 Yehovha Hosi Leyi Tlakukeke u ri: “Nala u vule leswi hi wena, ‘Aha! Hambi ku ri tindhawu leti tlakukeke ta khale ti ve ndzhaka ya hina!’”’+

3 “Hikwalaho profeta u ku, ‘Yehovha Hosi Leyi Tlakukeke u ri: “Leswi va nga ku endla rhumbi ni leswi va ku hlaseleke matlhelo hinkwawo, leswaku u va ndzhaka ya lava saleke exikarhi ka matiko naswona vanhu va tshamela ku vulavula hi wena ni ku ku onha vito,+ 4 hikwalaho n’wina tintshava ta Israyele, yingisani leswi Yehovha Hosi Leyi Tlakukeke a swi vulaka! Yehovha Hosi Leyi Tlakukeke u byela tintshava ni swintshabyana, swinambyana ni minkova, marhumbi+ ni miti leyi tshikiweke leyi phangiweke ni ku hlekuriwa hi lava saleke exikarhi ka matiko lama nga ekusuhi na tona;+ 5 Yehovha Hosi Leyi Tlakukeke u ri: ‘Ndzi ta vulavula ni lava saleke exikarhi ka matiko ni tiko hinkwaro ra Edomu ndzi hlundzukile+ swinene, lava va nga teka tiko ra mina va tsakile va ri karhi va ri hlekula+ va ri endla ndzhaka ya vona, va teka madyelo ya rona va tlhela va phanga swilo swa rona.’”’+

6 “Hikwalaho profeta mayelana ni tiko ra Israyele, u byela tintshava ni swintshabyana, swinambyana ni minkova u ku, ‘Yehovha Hosi Leyi Tlakukeke u ri: “Maswivo! Matiko ma mi khomise tingana, hi yona mhaka ndzi twaka ku vava naswona ndzi ta vula leswi ndzi nga ta swi endla eka wona ndzi karihile swinene.”’+

7 “Hikwalaho Yehovha Hosi Leyi Tlakukeke u ri: ‘Ndzi tlakusa voko ra mina ndzi hlambanya leswaku matiko lama nga ekusuhi na n’wina ma ta khomiwa hi tingana.+ 8 Kambe n’wina tintshava ta Israyele, mi ta humesa marhavi ni ku veka mihandzu leyi nga ta dyiwa hi vanhu va mina ku nga Vaisrayele,+ hikuva va ta vuya ku nga ri khale. 9 Ndzi na n’wina, ndzi ta mi komba tintswalo naswona mi ta rimiwa mi byariwa mbewu. 10 Ndzi ta andzisa vanhu va n’wina, tiko hinkwaro ra Israyele, miti yi ta va ni vaaki+ naswona tindhawu leti nga marhumbi ti ta pfuxiwa.+ 11 Ndzi ta andzisa vanhu va n’wina ni swifuwo swa n’wina;+ swi ta tala naswona swi ta tswalana. Ndzi ta endla leswaku mi tlhela mi va ni vaaki ku fana ni le ku sunguleni,+ ndzi ta endla leswaku swilo swi mi fambela kahle ku tlula enkarhini lowu hundzeke;+ mi ta swi tiva leswaku hi mina Yehovha.+ 12 Ndzi ta endla leswaku vanhu va mina ku nga Vaisrayele va tshama eka n’wina, va ta mi teka mi va ndzhaka ya vona.+ Mi ta va ndzhaka ya vona naswona a mi nge he pfuki mi endle leswaku va nga vi na vana.’”+

13 “Yehovha Hosi Leyi Tlakukeke u ri: ‘Leswi va nge eka n’wina, “Wena u tiko leri lovisaka vanhu naswona u endla leswaku matiko ya wena ma nga vi na vana,”’ 14 ‘hikwalaho a wu nge he va lovisi vanhu kumbe ku endla leswaku matiko ya wena ma nga ha vi na vana,’ ku vula Yehovha Hosi Leyi Tlakukeke. 15 ‘A ndzi nge he ma pfumeleli matiko leswaku ma endla xihlekiso hi wena kumbe ndzi endla leswaku vanhu va ku sandza+ naswona a wu nge he endli leswaku matiko ya wena ma dyoha,’ ku vula Yehovha Hosi Leyi Tlakukeke.”

16 Yehovha a tlhela a vulavula na mina a ku: 17 “N’wana wa munhu loko vanhu va yindlu ya Israyele va ha tshama etikweni ra vona, va ri thyakisile hi swilo leswi a va swi endla.+ Swilo leswi a va swi endla swi endle leswaku va va lava thyakeke ematihlweni ya mina ku fana ni wansati loyi a nga le nkarhini.*+ 18 Ndzi chululele vukarhi bya mina eka vona hikwalaho ka ngati leyi va yi halateke etikweni,+ ni hikwalaho ka leswi va thyakiseke tiko hi swikwembu swa vona leswi nyenyetsaka.*+ 19 Ndzi va hangalase exikarhi ka matiko, ndzi va yisa ematikweni man’wana.+ Ndzi va avanyise hi ku ya hi leswi va swi endleke. 20 Kambe loko va fika ematikweni wolawo, vanhu va thyakise vito ra mina ro kwetsima+ hi ku vula leswi ha vona, ‘Lava i vanhu va Yehovha kambe va boheke ku suka etikweni ra yena.’ 21 Ndzi ta teka goza hikwalaho ka vito ra mina ro kwetsima, leri vanhu va Israyele va ri thyakiseke ematikweni lawa va nga ya eka wona.”+

22 “Hikwalaho byela yindlu ya Israyele u ku, ‘Yehovha Hosi Leyi Tlakukeke u ri: “A ndzi swi endleli n’wina yindlu ya Israyele kambe ndzi swi endlela vito ra mina ro kwetsima, leri mi ri thyakiseke exikarhi ka matiko lawa mi yeke eka wona.”’+ 23 ‘Ndzi ta kwetsimisa vito ra mina lerikulu,+ leri thyakisiweke exikarhi ka matiko, leri mi ri thyakiseke exikarhi ka wona; kutani matiko ma ta swi tiva leswaku hi mina Yehovha,’+ ku vula Yehovha Hosi Leyi Tlakukeke, ‘loko ndzi kwetsimisiwa exikarhi ka n’wina ematihlweni ya wona. 24 Ndzi ta mi humesa ematikweni, ndzi mi hlengeleta ku suka ematikweni hinkwawo, ndzi mi tlherisela etikweni ra n’wina.+ 25 Ndzi ta mi n’wan’wasela hi mati yo basa kutani mi ta va lava baseke;+ ndzi ta mi basisa ethyakeni ra n’wina hinkwaro+ ni le ka swikwembu hinkwaswo swa n’wina leswi nyenyetsaka.+ 26 Ndzi ta mi nyika mbilu leyintshwa+ naswona ndzi ta chela moya lowuntshwa endzeni ka n’wina.+ Ndzi ta susa mbilu ya ribye+ emimirini ya n’wina kutani ndzi mi nyika mbilu ya nyama.* 27 Ndzi ta chela moya wa mina endzeni ka n’wina, ndzi ta endla leswaku mi yingisa milawu ya mina,+ mi ta hlayisa swiboho swa mina swa vuavanyisi, mi swi endla. 28 Mi ta tshama etikweni leri ndzi ri nyikeke vakokwa wa n’wina, mi ta va vanhu va mina kutani mina ndzi ta va Xikwembu xa n’wina.’+

29 “‘Ndzi ta mi ponisa eka thyaka ra n’wina hinkwaro, ndzi vitana mavele ndzi ma andzisa, a ndzi nge mi tiseli ndlala.+ 30 Ndzi ta endla leswaku mihandzu ya mirhi ni ntshovelo wa le masin’wini swi tala, leswaku mi nga ha tlheli mi hlaseriwa hi ndlala exikarhi ka matiko.+ 31 Kutani mi ta tsundzuka tindlela ta n’wina to biha ni swiendlo swa n’wina leswi a swi nga ri swinene, mi ta tinyenya hikwalaho ka xidyoho xa n’wina ni hikwalaho ka mikhuva ya n’wina leyi nyenyetsaka.+ 32 Kambe tivani leswi: A ndzi swi endli hikwalaho ka n’wina,’+ ku vula Yehovha Hosi Leyi Tlakukeke. ‘Ematshan’weni ya sweswo, khomani hi tingana hikwalaho ka tindlela ta n’wina, n’wina Vaisrayele.’

33 “Yehovha Hosi Leyi Tlakukeke u ri: ‘Siku leri ndzi nga ta mi basisa ha rona eswidyohweni swa n’wina hinkwaswo, ndzi ta endla leswaku miti yi va ni vaaki+ ni tindhawu leti nga marhumbi ti pfuxiwa.+ 34 Tiko leri nga rhumbi leri a ri voniwa hi munhu un’wana ni un’wana loyi a hundzaka hi ndlela ri ta rimiwa. 35 Kutani vanhu va ta ku: “Tiko leri a ri ri rhumbi se ri fana ni ntanga wa Edeni,+ miti leyi a yi ri marhumbi yi tlhela yi hirimuxiwa yi biyeleriwile naswona yi ni vaaki.”+ 36 Matiko lama saleke lama nga ekusuhi na n’wina ma ta swi tiva leswaku mina Yehovha, ndzi ake swilo leswi hirimuxiweke naswona ndzi simeke tindhawu leti siyiweke ti ri marhumbi. Mina Yehovha ndzi swi vurile naswona ndzi swi endlile.’+

37 “Yehovha Hosi Leyi Tlakukeke u ri: ‘Ndzi ta tlhela ndzi pfumelela yindlu ya Israyele ku ndzi kombela ku yi endlela leswi: Ndzi ta endla leswaku vanhu va yona va tala ku fana ni ntlhambi. 38 Ku fana ni ntlhambi wa vanhu vo kwetsima, ku fana ni ntlhambi wa Yerusalema* hi nkarhi wa mikhuvo yakwe,+ miti leyi a yi ri marhumbi yi ta tala hi mitshungu ya vanhu;+ va ta swi tiva leswaku hi mina Yehovha.’”